Lamka Public Ground ah ‘3rd World Zomi Convention’ kipan
Lamka, Oct 25: Lamka Public Ground ah tuni zinglam dak 10:00 in ni 3 sung om ding ‘the 3rd World Zomi Convention 2013’ patna ding in honna(inaugural ) program om a, Rev Vanmawia in thumna in hong hi. Huai a Chief Guest ding Oscar Fernades, Union Minister (Road Transport & Highways) himahleh a hawh theihlouh banah Functional President ding Chief Minister leng New Delhi ah a omlai ziakin tel theilou a, Guest of Honour ding Deputy Chief Minister Gaikhangam khuallian a pang in aman ‘3rd World Zomi Convention(3WZC) meisel dekuang hi. Functional President in Md. Nasir, Minister (Agri & Fishery), Guest of Honour in Dr Chaltonlien Amo, Chairman,Hill Areas Committee leh Chief Host in Phungzathang Tonsing, Minister (Health & FW, GAD, CADA) pang hi.
Chief Guest dinga chial a om hileleng tel theilou Union Minister Oscar Fernandes in
Zomi Council Chairman LB Sona kiangah laithon a tel theihlouh ziak theisak a, huai ah Lamka a 3rd World Zomi Convention a Chief Guest hiding a chial pom mahleh state 5 ah tunung sawtlou a Assembly election om dinga puankhiak ahih ziak banah a Ministry ah thukin leh poimawhkin hunkhop om guih ziakin zinkhe theilou hi a theisak kawm in poisakthu thon hi.
Chief Guest in a genna ah ‘Zomi’ kichite Pathian vualzawl namte hi’n gen a, Pathian lau namte leng na hi uh chi’n gen hi. Zomite leitung gam tuamtuam a kithehdelh in sepna tuamtuam nei in khawsa uh a, lemna leh muanna deih nam ahihdan leng gen hi. Aman a genbehna ah Zomi sungah nupi leh papi te'n a tate uh deihthawh leh hawmthawh takin enkai in khanglian sak uh a, tuni a 3-WZC tungtawn in leng Zomi sunga nam tuamtuamte ading kia hilou in Manipur pumpi ah lemna, muanna, kituahna leh khat leh khat kala ki-it tuahna a om deih thu gen a, 3WZC Organising Committee te panpihna din Rs.1 lakh in pia hi.
Chief Host in tuni a hibanga 3rd World Zomi Conference neih a om lunglen huai leh khasiat-huai sakthu gen a, Zomi Convention 3veina Lamka khawpi a neihtheih a om ziakin kipahthu gen hi. Unau pau le haam kitheituah ngen, tawndan kibang ngen ihih ziakun kua mah kikhen thei omlou ihi chi hi. British nuai apan India in zalenna a ngah hun in India leh Burma gamgi in khentuam a, guam leh mualte’n hong hal mahleh kikhenthei kuamah omlou hi’n gen hi. Mynmar a i mi isate’ sepaih vaihawmna nuai ah genthei taka a om ziakun gam tuamtuam ah kithehdalh uh hi’n gen hi. Zomi-te midangte adia ettontak, huat-huailou i hihding uh chi’n gen hi. Lamka kichi Manipur a 2nd town ahih banah CCpur dist leng peaceful district chih hisek a, civil society tuamtuam, security leh kuaman lemna leh muanna hih buailou dingin ngen hi. 3rd World Zomi Convention in Zomite lakah ki-itna, kitanauna, leh kituahna atut deihthu gen hi.
Chairman,HAC in 3WZC ah teltheih kipahthu gen a, 3WZC in Zomite lakkia hilou in nam tuamtuamte lakah kinaihsemna leh ki-itna atut deihthu gen hi.Manipur ah culture deih huaiou tak gun culture, bomb culture tel a, huaite om nawn kei henla, mimal khat le khat ki-itna, kinaihsemna, lemna leh muanna hon tun leh chih deihthu gen in Rs.20,000 in Organizing committee panpihna pia hi.Md Nasir in a genna ah tuni program a teltheih kipahthu gen a, Manipur ah lemna, muanna , ki-it tuahna omnan ding a Zomite’n panla ding in ngen a, 3WZC organising committee te Rs.50000 in panpih hi.
Tuni a 3rd World Zomi Convention zatna ah lapawl tuamtuam tamkhop kigawmte’n ‘Halleluijah Chorus’ sa uh a, khuallian in Souvenir & Journal (Tun Kho Pum Baite, A tullou lungtup) kichi hongkhia hi. Cultural Exchange hunah Naga Cultural Troupe, Meitei Cultural Troupe & Thang-ta dance lahna om a, Cultural Exhibition hunah tribe tuamtuamte’n namlam lahna nei uhi. Zo Artist, Bawngkawn Pastor Bial Zaipawl, ICI Central Choir, EBC Lamka North Divn Choir, Mizo Cardinal Choir leh lapawl tuamtuamte’ ngaihkhiakna leng om hi.
Tuni a program zatna ah Vungzagin Valte, Parliamentary Secy; T.Manga Vaiphei, Chairman, MTDC; Ginsuanhau, MLA (Singngat A/C); Langkhanpau Guite, Chairman ADC/CCpur; DC/CCpur, SP/CCpur, MDC-te, ZRO President Thang Lian Pau Guite, Dist Level Officer leh pawl tuamtuam a makai tamtak in uap uhi. Mipi kikhawm tam mahmah a, vuah zulou leh nisa khauh lawlou ziakin mipi tamtak in program atawp tan in uap uhi.
Special Item ah ZYA Chandel leh ZYA Mynmar te’n namlam lahna nei uhi. Program teng zawh in Rev Dr Sut Khan Thang in thumna in program hun khak(closed) hi.

YPA HQ Hall ah Seminar/Workshop om
Lamka, Oct 25:Tuni sunnung dak 2:30 in Hiangtam Lamka a YPA Gen HQ hall ah ‘Understanding the past and moving forward’ chih thupi nei in Seminar-cum-Workshop om a, Prof C.Thang Za Tuan, Dr David Vumlallian Zou leh Dr Bianca Mang Khan Cing te’n sinsak uh a, Panellist in Dr Tualchin Neihsial, Dr Lam Khan Piang leh Dr Joseph Suantak pang uhi. Huai mun mah ah Oct 26, 2013 zinglam dak 10:00 in om nawn ding a, session 5 in kikhen ding hi. 1st & 2nd session ah ‘Socio-Cultural challenges and opportunities of the Zo People’ chih thupi zangin Prof Edward Rodrigues leh Dr Lam Khan Piang in sinsak ding uh a, Panellist ah Dr Mary Grace, Dimsianmuanching leh Dr H.Kamkhenthang pang ding uhi. 3rd & 4th Session ah ‘Economic and Political challenges and opportunities of the Zo People’ chih thupi pansan in H.Thangzamuan leh Dr H.Kham Khan Suan te’n sinsak ding uh a, Panellist in Dr Kamkhenthang Guite, Rev Dr Gin Khan Khual leh Dr Thathang Vaiphei pang ding uhi. 5th Session ah ‘Indigenous People: Their Rights and Redressal Mechanism’ chih thupi pansan in Ms Joan Carling in sinsak ding a, Panellist in Siamzading Valte pang ding, Cin Sian Thang in Planery speech hun ah thugen ding hi.

Special drive sungin gari 109 mankhia
Lamka, Oct 25: Lamka khawpi ah Oct 22-24, 2013 sung Police, Traffic Police leh VDF te’n mun 4-Lailam Lei (bridge) gei, CCpur College kong, Nehru Marg-Rengkai Road junction leh Transport office kongah special drive nei uhi. Huai ah driving licence leh gari RC book neilou, gari a ‘A/F’kia kigelh, kumchinglou a gari hek, helmet khulou, Diesel Auto Gari-te DTO’ in route permit piak zuilou a tai leh zu kham kawma gari hekte mi 109 mankhia in TR-5 cut in Rs.100 chiat liausak uh a,Rs.10,900 mukhia uhi.

Dengue natna puakzak thei
Lamka, Oct 25: Sept –Oct 2013 sungin Lailam Veng leh Hmuia Veng a damlou khawsik mi 5 te Dengue natna hi a suikhiak hi’n CMO & DFWO/CCpur apan thusuak kingah hi. Dengue natna neite Delhi leh khawpi tuamtuam akipan kideuh in kigen a, Lamka ah leng dengue natna chiklai peuh a puakzak thei hi’n kigen hi. Dengue natna apan kuapeuh pilvang a, inn kim leh kianga tuivung omte khitsiang ding, sintex sung atui omte leh gari tyre sung a tui omte bawkhia a kuapeuh pilvang dingin CMO & DFWO in mipite theisak uhi. Dengue natna pua thoukang (mosquito) te’n tuisiang kia ah tui (egg) tha uh a, nitak hun in mi kei/pet lou in sun khawvak hunlai kia in mi kei/pet uh hi’n kigen hi.

Contours of Kuki Nationalism
Lamka, Oct-25: KUKI KIBOM saina in B Vengnom Community Hall ah Nov 3, 2013 in ‘One Day Interactive Talk/ Discussion on Contours of Kuki Nationalism’ kichi om ding a, Kuki scholar, public leader, journalist, policy maker, church leader, civil societies te tel ding uhi. Huai hunah Imperialism, Colonialism and Political Economy; Political Identity for Political Movement; Viability of Kuki State and Tribal Hill State; Ideology, Nomenclature and Unification leh Methods and Procedures for Mass Movement chihte genkhawm ding uhi. Huai ah KNO, UPF, HPF-M, KSDC te special invitees hiding uhi.

Employment office apan thusuak
Lamka, Oct-25:District Employment Officer/CCpur in sepna zonna dia Employment Exchange a ki-registered-te adia theihtuak thupuan bawl hi. Huai dungzui in post tuamtuam ading sepna awng om hun ah candidate dinga Employment Exchange ki-sponsored sak ut ziaka registration kibawl utte adin tuban hithei nawnlou ding a, huchibang kam awng om apply ma in Employment Exchange ah ki-register masa dingin theisak hi.Huailou in Employment Exchange a ki-registered khinsa renew bawllou te’n leng akin lama renew bawlsak ding in theisak hi.Registration card renew louhte himhim post apply ut hun ah Employment Exchange office in a min uh sponsored nawnlou ding chih ahi hi.

Scholarship form submit ngai
Lamka, Oct 25:Manipur a singtangmi class V passed a,VI zilte leh class VIII passed a class IX zilte adinn ZEO office ah Oct 23, 2013 apan in scholarship form hawmkhiak hi a, class VI simlel mi 353 leh class IX simlel mi 366 akigawm in mi 719 in form la uhi. Scholarship form lateng in Oct 26, 2013 sunnung dak 2:00 tan in ZEO office ah submit ngai a, scholarship examination tawh kisai instruction kimtak ZEO office a kitakkhia leng kuapeuh in ettheih ding hi. Scholarship exam a lawhching class V passed a class VI zilte’n khateng in Rs.300 ngah ding uh a, class VIII passed a class IX zilte’n kha in Rs.500/-ngah ding uhi.

IMPHAL NEWS
NHRC in extra-judicial a kithahna case 6 adin relief Rs. 32 lakh piak din thupia
Imphal, Oct- 25:National Human Rights Commission(NHRC) team in Imphal a Classic Hotel ah ni 3 sitting a neih uh tuni’n zou uh a, state leh central forces-te’n human rights bawhsia a mi a thahna uh case 6 a thuakte panpihna (relief ) Rs. 32 lakh piak ding in recommend uhi. Commission in Protection of Human Rights Act nuai ah Section 18na pansan in Manipur govt ah Show Cause Notice pia uh a,bangziakin misite innkuante kiang ah panpihna(relief) piak hilou ding hiam chi’n theisak uhi.
NHRC teamte’n ni 3 sung Camp sitting a neihna uah case 46 ngaihtuah uh a, full commission in case 4, Divn Bench-II in case 22 ngaihtuah uh a, huai ah Loktak lake leh CCpur District Hospital case leng tel a,huaite Commission in state CID Crime Branch in investigation a bawl dingin recommend uhi.

Lok Sabha Election ah EVM zat hiding- CEO
Imphal, Oct-25: Chief Electoral Officer O. Nabakishore in kum 2014 a Lok Sabha election ah EVM zat hidin tuni in gen hi. Aman hiai thu tuni’n District Administrator/Dist. Election Officer, Police Officer of the District, AEO’s & Election Officers’te adin ni 2 sung Lamphelpat a training hun ah gen hi. Tua tawh kiton in EVM zat dingte District Election Officer-te kiangah piakkhiak vek hi a, amau strong room ah koihvekta uh chi’n leng gen hi. Tuni a programme bel maban a election thoveng taka neihtheih ahihna ding a neih hidan in gen hi.

Dr. Ng. Bijoy in press-te kimuhpih
Imphal, Oct-25 : Manipur govt in State Pollution Control Board (MSPCB) a Chairman ding a Dr. Ng. Bijoy,MLA zan a guan kiton in tuni’n Dr Ng.Bijoy in Shija Hospital a Auditorium-cum-Conference Hall ah Press-te kimuhpih hi. Huai hun ah aman Manipur a damdawi inn, Nursing home, Pathology leh Blood Banks a bio-medical waste-te bangchi paihkhiak ding hiam, chi’n panlak kipan hi’n gen hi. Huai hun ah Shija Hospital Chairman-cum-Managing Director Dr. Kh. Palin in leng uap a, Dr. Ng. Bijoy in bio-medical waste treatment facility kichi Shija Hospital ah hongkhia hi.

Cyclist Bidyalakshmi tuni’n Imphal tungkik

Imphal, Oct-25 : Manipuri cyclist Sougaijam Bidyalakshmi Leima of Lakhipur village in August 21, 2013 a Northeast a state om teng cycle a phaksuak a sawm tawh kiton in Imphal nusia a, state tuamtuam a phak nungin tuni in Imphal tungkik hi. Aman Northeast biala state tuamtuam a phakna ah km. 3975 asau cycle tuang in phasuak hi. Hibang a Sougaijam in Northeast state tenga cycle a a phak suakna ziak bel numeite tunga thangtatna kuapeuh in tawpsan a deih ziak ahi hi.

CPI in candidate din Dr. M. Nara guang
Imphal, Oct-25 : Communist Party of India (CPI) Manipur State Council te’n kum 2014 a 16th Lok Sabha election ding ah Inner Manipur Parliamentary Constituency ahh CPI party adia candidate ding in State Secretary Dr. M. Nara guang uh chihthu om hi. State Secretariat member N. Mangi Singh in tuni’n media-te akimuhpihna ah CPI Manipur te’n Lok Sabha election ah Dr. M. Nara candidate sak ding uh hi’n gen hi. Huai banah CPI te’n Lok Sabha election ah senior leader banah party adia gin-om mahmah koih hi a, tuaziak in Dr. M. Nara kituaktak a guan a om hi’n gen hi. Tua tawh kiton in Oct. 30, 2013 in New Delhi ah Regional Party te’n Lok Sabha election ah pankhawm ding thu genkhawmna ah vatel ding uhi.

Breast Cancer Awarness campaign om

Imphal,Oct-25:Dr Ajit Lukram makaihna Shija Breast and Thyroid Clinics teamte’n zanhal in ‘International breast cancer awareness month’ zatna kawm in Thoubal district a om
Waikhom Mani girl's college ah ‘Awareness campaign on breast cancer’ nei uhi. Huai hun ah Breast cancer tawh kisai in dotna leh dawnna hun leng om a,huai College a teacher leh student-te ahunkhop tel uhi. Huai Awareness program ahihleh NSS Program Officer, Unit – II, Waikhom Mani Girls College leh Shija Hospitals, Langol pangkhawm a asai uh hi a, . huai a tel mi 250te lakah Pink ribbons leh breast cancer awareness booklets hawmkhia uhi.

Zillai/ Imphal Block Conference om ding
Imphal, Oct-25: Zillai/ Imphal Block te’n Oct 26, 2013 zinglam dak 11:00 in Hotel Imphal ah Conference (commemorating 100 years of Vaiphei Literature) zang ding uh a, huai ah T. Manga Vaiphei, MLA & Chairman/MTDC; P. Vaiphei,IAS; S. Minlianthang Vaiphei, IAS; LM Khaute, IPS; KT Vaiphei, IPS leh Genneikhup Vaiphei, EM/ADC te’n Chief Guest, Guests of Honour leh Functional President hihna tawh uap ding uh a, Chief Host in Henzagen Vaiphei, Chairman, Vaiphei Literature Society (VLS) pang ding hi.

IGP 6 in Addl DGP din kaisang
Joint Manipur-Tripura cadre a Manipur part Indian Police Service(IPS) Officer 6 in Inspector General of Police(IGP) akipan Addl DGP payscale Rs. 67,000-79,000 ding in kaisang uhi. IGP akipan Addl DGP a kaisang IPS officer 6te
1.Pramod Asthana,IPS(MT-1986)
2.Anand Prakash,IPS(MT-1986)
3.Sambhu Nath Singh,IPS(MT-1986)
4.Srinivas Prasad,IPS(MT-1987)
5.P. Doungel,IPS(MT-1987)