Tuni’n Valedictory Programme & Joint Fellowship om ding, Ni 2 sung Seminar/Workshop lawhching takin zou uh
Lamka, Oct-26: 3rd World Zomi Convention(3WZC) zatna a programme poimawh mahmah ‘Understanding the past and moving forward’chih thupi nei in zan sunnung dak 2:30 in Hiangtam Lamka a YPA Gen HQ Hall ah Seminar-cum-Workshop om hi.Tuni zinglam dak 10:00 in sutzop nawn hi a, session 5 a kikhen in nitaklam dak 4.30 velin lawhching takin zousiang uhi. 3rd World Zomi Convention zawhna dinga kikhopna(valedictory programme) zingchiang(Oct 27, 2013) sunnung dak 1.00 in kipan ding a,Chief Guesty in Manipur Chief Minister O. Ibbi pang ding a, a tanu in leng hongzui ding chih ahi hi. Zan nitak apan vuahzuk ziakin Lamka Public Ground buannawi lua a, huaiziakin Hiangtam Lamka a YPA Gen HQ Hall leh Lamka Community Hall ah mipi kikhawm ding uhi.

Tuni a Seminar-cum-Workshop a 1s t&2nd session ah ‘Socio-Cultural challenges and opportunities of the Zo People’ chih thupi zangin Prof. Edward Rodrigues leh Dr Lam Khan Piang in sinsak uh a, Panellist ah Dr Mary Grace, Dimsianmuanching leh Dr H.Kamkhenthang pang uhi. 3rd & 4th Session ah ‘Economic and Political challenges and opportunities of the Zo People’ chih thupi pansan in H.Thangzamuan leh Dr H.Kham Khan Suan in sinsak uh a, Panellist in Dr Kamkhenthang Guite, Rev Dr Gin Khan Khual leh Dr Thathang Vaiphei pang uhi. 5th Session ah ‘Indigenous People: Their Rights and Redressal Mechanism’ chih thupi pansan in Ms Joan Carling in sinsak a, Panellist in Siamzading Valte pang a, Cin Sian Thang in Planery speech hun ah thugen hi.

Seminar/Workshop hun ah mi bangzah hiam apan dotna om a, resource person te’n dawnna pezel uh a, mipi paikhawm tam mahmah in Hall sung ah talou uh a, NE TV te’n live telecast in khahkhia uhi. Seminar/Workshop ah Health Minister Phungzathang Tonsing; Parliamentary Secretary Vungzagin Valte; Langkhanpau Guite, Chairman, ADC/CCpur; Thang Lian Pau Guite @ Sia Pau, President ZRO; MDC member-te ban ah mi poimawh tamtak in uap uhi.

Oct 27, 2013 a Valedictory program ah Rev Dr Pum Za Thang Tombing in Valedictory Message gen ding a, selected leader tuamtuam in leng thugen ding uhi. Short message hun ah AMUCO, AITSAD, ATCFM, GZA, HI, MPC, UNC, ZC leh adang te’n thu gen ding uh a, makai masa mualliamsa - Laldenga, Tun Kho Pum Baite, Chengjapau Doungel, T.Gougin leh heutu dang sisate suunna om ding hi. Huaizawh in “Ka gam uh damsak in(Heal our Land)” chih thupi zang in mipi’n in Nam adinga thumkhawmna (mass prayer) nei ding hi. Programeme tawpkuan lam in lasiam leh lapawl(choir) tuamtuamte apan lasak ngaihkhiakna in zui ding hi.

Vaiphei Literature kum 100 chinna zang uh
Imphal, Oct-26: Zillai Imphal Block saina in tuni zinglam dak 11:30 in Hotel Imphal ah Conference tawh kithuah Vaiphei Literature kum 100 chinna hun zatna om a, T. Manga Vaiphei, MLA & Chairman, MTDC in khuallian hihna tawh uap a, S. Minlianthang Vaiphei, IAS, Jt Secy, MOBC & SC; LM Khaute, IPS, ADGP(Law & Order) leh KT Vaiphei, IPS, IGP (Intel) te Guests of Honour in pang uh a, Genneikhup Vaiphei, EM/ADCC leh Henzagen Vaiphei, Chairman, Vaiphei Literature Society te Functional President leh Chief Host in pang uhi.

Huai ah Mizoram apan C. Zorammuana, IPS, DIG leh mi poimawh hunkhop in leng programme uap uhi. Literature kum 100 chinna theihgigena dia Souvenir kibawl Chief Guest in hongkhe kawmin a thugenna ah, pau ichih hihna (identity) ahihziak in khangthak te’n kepbit poimawh chi hi. S. Minlianthang Vaiphei, IAS in nam sunga pawl tuamtuamte nu leh pa te’n hoihtak a etkai leh kithuahpih poimawh a, nam makaite’n nam itna tawh a makaih ding uh ahi chi hi. LM Khaute, IPS in a genna ah pau hausa hihtheihna din pau laklut tam poimawh chi hi. KT Vaiphei, IPS in pau zatdan tuamtuam i neihte akibang a zatvek deihthu gen hi. Genneikhup Vaiphei in literature hoihtak a puahhoih ahih deihthu gen hi.

CM ziakin traffic kiheikual
Lamka, Oct 26: Lamka a ‘3rd World Zomi Convention’ om lel ah Oct 27, 2013 sunnung a hunkhakna kikhop ah Chief Minister khuallian ahih ding ziakin zinglam dak 10:00 apan traffic rule heikoi in om a, huai dungzui in Tedim Rd-IB Rd junction leh Police Station gei a one way traffic khakkol hiding a,Tedim Rd apan IB road zuitoute taisuak thei ding a, IB road apan Mission Rd zuite Mangpu Tonsing’tenna inn geitan taithei lel ding uhi. Tipaimukh Rd apan Lamka Public Ground lam gari taisuk theilou ding hi. Police Station apan Tipaimukh Rd zuite Central road ah taiphei ding uh a, aban taitou theilou ding uhi. Mualveng apan Public Ground lutna lampi 2 te khaktan hiding a, Zenlang Veng apan Public Ground lam manawhte Cemetary brigde tan kia taithei ding uhi.

ICI a KTP Annual Conference om
Lamka, Oct 26: Independent Church of India (ICI) Tuithaphai Presbytery Khristien Thalai Pawl (KTP) te’n zan apan Oct 27, 2013 tan daihding Sielmat a NSSU Hall ah 53rd Annual Conference 2013 nei uh a, zan sun in vaihawmna nei uhi. Huai ah kum 2014 a budget ding in Rs 2,58,000 bibkhiah uh a, Dec 10-15, 2013 sung ICI Rengkai Biakin ah KTP General Conference om dingin thupuk ui. Dec 14, 2013 in ICI Centre Choir Silver Jubilee lopna om ding a, Tuithaphai KTP in 500 voice choir neih ding in leng thupuk uhi.

Tuni zinglam dak 10:00 in biakna program om a, Mizoram apan 3rd World Zomi Convention zang a honghawh Bawngkawn Pastor Bial Zaipawl te'n uap in Pathian phatna lasa uhi. Sunnung dak 1:00 in Tuailaite'n lapawlpi leh solo kidemna nei uhi. Khawmpi sung in Rev HP Runremthang, YYCO & EAL, ICI leh Ms Darthangmawi, WCO, ICI te’n Pathian thu gen uh a, Oct 27, 2013 nitak kikhop tawp in Upa Dr.Lalzakung Tusing, Chairman Tuithaphai Presbytery Standing Committee in khawmpi khak ding hi.

Prayer Convention om ding
Lamka, Oct 26: Rengkai a Mark Buntain Memorial Church, AG Compound ah Nov 1-3, 2013 sung ‘Tawngtaina Inkhawmpui (Prayer Convention) kichi om ding a, huai ah lunglutna nei kuapeuh tel ding in Organising Committee Ms May Rose in chial hi.

Zomi Siamsin Kipawlna member-te vaidawn

Lamka, Oct 26: Bungmual a SSPP complex ah tuni zingsang dak 7:00 in SSPP Gen HQ te’n 3rd World Zomi Convention a hongtel Myanmar a Zomi Siamsin Kipawlna apan member 10 te vaidawnna leh kimeltheih tuahna neihpih uhi. Huai hun ah SSPP Gen HQ leh Zomi Siamsin Kipawlna (Universities-Myanmar) te’n siamsinna lam a masawnna ding leh kitanau zawksemna ding, mi nam ngeina leh tawndan kepbitna ding banah Zogam kepbitna ding leh khantouhna panla khawm dingin thukimna bawl uhi. Joint Declaration ah SSPP Gen HQ President leh Zomi Siamsin Kipawlna a makaite’n suailai uhi.

Interview a telkhaloute chance pia
Lamka, Oct 26: Trade tuamtuam ading PMEGP loan 2013-14 apply-te laka DIC ate adin DC office a BRGF Resource Centre ah interview pailel a, Oct 28, 2013 in zou ding uhi. Interview hun a telkhaloute’ ading in chance piak hi uh a, Oct 29, 2013 zinglam dak 10:00 apan in KVIB leh KVIC adia interview hun a telloute adin interview om ding a, Oct 30, 2013 zinglam dak 10:00 in DIC nuai a interview atelkhalou te’n interview nei ding uh chi’n Addl DC/CCpur in thusuah bawl hi.

Tuni’n Leprosy training om

Lamka, Oct 26: Dist Health Society saina in tuni zinglam dak 10:00 in CMO office campus a Mini Training Hall ah Male Health Supervisor, Male Health Worker leh PHC a Nurse-te’ading in Leprosy tawh kisai training om hi. Huai ah Dr.HL Liensang, CMO/CCpur, Jugeshwore, Non Medical Supervisor/CCpur leh V.Lily, Non Medical Assitance/CCpur te’n sinsak uhi.

TISS MA admission hun behlap
Lamka, Oct-26: Tata Institute of Social Science(TISS) campus tuamtuam ading Admission kihong lel pen zan in ahun bei mahleh Nov 15, 2013 tan behlap in om a, academic session 2014- adingin tule a BA final year zilte’n leng apply thei uhi. TISS national entrance test bel Dec 22, 2013 sunnung dak 2.00-3.40 sung om ding a, SC/ ST/ OBC(NC), PWD leh minority communy-te adi’n form fill-up man omlou ding hi. Online admission bawl nuamte’n http://admissions.tiss.edu/ ah apply thei ding uh a, Mumbai campus, Tuljapur campus, Hyderabad campus, leh Guwahati campus adi’n Tribe Certificate, Income Certificate leh last exam passed document te PDF file in upload ngai hi.

CMO/CCpur in suty lading
Lamka, Oct 26: Dr. HL Liensang, CMO/CCpur in Guwahati ah hihding poimawh a neihziak in ni 3 sung casual leave la a, Nov 1, 2013 in hongtung kiknawn ding hi. Ama omlouh sung in Dr. F. Thienkhogin,District Aids Control Officer in CMO i/c lenkhawm ding hi.

Cleft Lit treatment Camp
Lamka, Oct 26: STC/BSF leh SMILE Train India-te pangkhawm in tunung sawt lou in Lamka ah student mukka (Cleft Lit) Treatment camp sai ding uhi. Huai tawh kisai student mukka (cleft lit) nei te’n Oct 30, 2013 tan in ZEO/CCpur office ah min piaklut theih ding hi. Cleft lit treatment camp ah doctor te’n student pauchiang lou (speech theraphy) operation leng bawl ding uh hi’n kigen hi.

SUUNNA:
Baby Muanliansiam (3) s/o Thangzahau of Khominthang, New Lamka tuni zingsang in awmna in si a, YPA Hanmual, New Lamka ah kivui hi.
L.Chinlam (89) f/o L. Tongkhopau of Beulahlane tuni zingsang baihtakin teknat ziakin si a,tuni in Simveng hanmual ah kivui hi.

IMPHAL NEWS
CM in AIR Golden Jubilee lopna uap
Imphal, Oct-26: Palace Compound a Manipur Film Dev Corpn Auditorium ah tuni’n All India Radio(AIR),Imphal kum 50 chin (Golden Jubilee) lopna om a, huai ah Chief Minister O. Ibobi khuallian a pangin va uap hi. Chief Minister in a thugenna ah govt in power sector ngai poimawh hi a genkawm in AIR,Imphal station in electric power a ngahna Mayang Imphal high power transmitter tungtawn in power kitatsatlou a piak ding panlak hi’n gen hi.
Huailou in govt in phaijang bial ah ni khat in dakkal 20 sung electric meivak piak sawm ahihdan gen a, singtanglam bial ah dakkal 12 sung tan bek piak sawm in govt in panla hi’n gen hi.Tuni a Golden Jubilee zatna ah AIR,Imphal adia panla mi poimawh khenkhat leh phattuamna nei sepna apan retired khenkhat leng pahtakna piak hi uh a, programme zatna ah C. Lalrosanga,ADG (NER),AIR & Doordarshan leng tel hi.

Colour leh model kibang vek in School building bawl hiding
Imphal, Oct-26:Education Minister M. Okendro makaihna in tuni’n Education(S) deptt a official-te meeting uh a, huai ah SSA nuai a school building 698 bawlna nasep kipan ding thukim uh chihthu om hi. Thusuak in a gendan in govt in Upper Primary School 153 leh Primary School 545 kigawm bawlkhiak sawm a, school building construction leh monitoring tawh kisai School Management & Development Committee (SMDC) khut piak hi’n kigen hi.

Education Minister in a gendan in govt in SSA nuaia school building bawlna dingin fund sanction a, state govt in 1st instalment dan in 40% release masa ding hi’n gen hi. Minister in a genzeldan in school building kibawl khedingte model kibang banah a colour leng Manipur pumpi ah kibang vek a bawl hiding chi’n gen hi.

IED bomb puak ah A/R khat liam

Imphal, Oct-26 : North AOC a (PHED te’ Zonal Reservoir campus sungah tuni zingkal dak 7:35 velin meltheihlouh helpawlte kam IED bomb khat puakzak a, huai ah 40-Assam Rifles personnel khat liam hi. Thusuak in a gendan in bomb puahzak hun in 40-Assam Rifles a ‘A’ Company-te tulela Chinga Msthak a omte patrolling a pai laitak uh hi a, huaite laka tel rifleman Bijay Pal (30) liamkha hi’n kigen hi. Amah Leimakhong a military hospital puaktung in om hi. Huai bomb kikamna mun inches 6 vela thuk lei kuakzou hi’n kigen Huai thiltung theih phetin security forces te’n amun kidelh huan in combing operation bawl uh a, ginlelh huai sak ziakin mi 7 pikhia uhi.

Imphal-Jiri total blockade khawlsak
Imphal, Oct-26 :Student pawl tuamtuam 4 kigawm in Jiribam biala school tuamtuam ah teacher leh vanzat kiching koih ding phutna in Imphal-Jiribam kikal (NH-37) ahOct 20, 2013 zankim akipan economic blockade a puan uh Oct 21, 2013 akipan in Total Blockade in khek uh a, Education Minister M. Okendro in zan in student pawl 4 a makaite a office a kimuhpin thil omdan genkhawm uh a, Minister in student-te thilphut tangtun sakna dia panlak a chiam ziakin kihoulem thei uh a, student pawelin leng Total Blockade a puan uh lakhia uhi.

Assam Rifles te’n PREPAK 1 man
Imphal, Oct-26 : 29- Sector Assam Rifles nuaia om 9-Assam Rifles te’n Oct. 24 & 25, 2013 in Moreh town a search operation a bawlna uah PREPAK cadre khat mankhia uh chihthu om hi. Thusuak kizadan in matkhiak a om amin self-styled Private Laishram Nanao Meitei of Moreh Ward No. 9 hi a, PREPAK a dinga mi poimawh mahmah hidan in kigen hi. Assam Rifles te’n amah akipan in Chinese handgrenade khat mukhiak uh a, amah a a taksa tunga muhkhiak thil tawh Imphal West police ah pekhia uh chih thu om hi.

Awareness-cum-sensitization
Imphal, Oct-26 : RIMS a College of Nursing-te saina in tuni in RIMS Auditorium ah ‘one-day Awareness-cum-Sensitization programme’ om a, Prof. N. Damayanti, Adviser College of Nursing in uap hi. Huai hun zatna ah RIMS campus a students 1300 vel omte tel uh a, amaute hostel a om hi uh a, huaiziakin, domestic leh general waste te bangchi koihkhiak ding chih poimawh mahmah hidan in Prof. N. Damayanti in gen hi. RIMS a nullah hoihlouh ziakin vuah a zuk chiangin kim leh kiangah tui om sek a, hiai pen nullah leh sewage system kichiantak omlouh ziak hidan in gen hi. RIMS pen damdawi inn dang tawh kibang nawnlou in niteng in damlou tamtak ki-admit uh a, huaiziakin niin tam nuam mahmah a, huaite bangchih ding chih lungbuaipih hidan in gen hi.

Manipur-mi in Champion hihna la
Imphal, Oct-26 : Nagaland a 3E (Elite Entertainment Enterprises) te saina a Naga Style Wrestling Mania-2 (King of the Ring Series-2013) om ah Manipur mi KS Peter Poumai of Senapati district HQ in Lightweight Category ah champion hihna la hi. Aman final ah Kehousalie Kiekho zou in cash prize Rs. 50,000/- sang hi.

Vok zuakte akipan Police te’n tax la
Imphal, Oct-26 : Manipur a Pig(vok) Suppliers ten tuni in Manipur Press Club ah press-te kimuhpih uh a, huai ah President Khwairakpam Ahanbi in Manipur a Pig Suppliers te kiangah police te’n tax tampi a lak ziakun haksatna lianpi tuak uh hi’n gen hi. Huai tawh kisai tax a piak zawhlouh ziakun police te’n man zel in dakkal tampipi hentang uh a, tua ziakin a vokte un thuaklawh zelin deih bang a zuak theilou uh hidan in gen a, a haksatna uh concerned authority-ten hihvengsak dingin ngen uhi.

Coaching course adin mi 3 kuan
Imphal, Oct-26 : International Rugby Board (IRB) te’n Pune a Bavewadi Stadium ah Nov. 1-7, 2013 sung ‘A’ leh ‘B’ level coaching course om ding a teldin Manipur Rugby Football Union (MRFU) apan Akoijamjeet Singh makaih in mi 3 in Imphal nusia in Pune zuan uhi. Midang 2te bel P. Lokeshwor leh Atom Reagan hi uh a, amau bel IRB headquarters Dublin apan chialna a muh dungzui un huai coaching course a tel dinga kuan hi uhi.