The 3rd World Zomi Convention tuni’n kipan ding
Lamka, Oct-24: Lamka Public Ground ah Oct 25-27, 2013 sung ‘The 3rd World Zomi Convention 2013’om ding a, Oct 25,2013(Sintawpni) zinglam dak 10:00 in Conventon honna(inaurugal) function om ding hi. Huai ah khuallian in Oscar Fernades, Union Minister (Road Transport & Highways) pang ding a, Functional President in O Ibobi, Manipur Chief Minister pang ding chih ahi hi. Guest of Honour in Gaikhangam, Dy CM pang ding a, Chief Host in Health Minister Phungzathang Tonsing pang ding hi. Special Guests in Minister 4 banah Chairman, Hill Areas Committee; MP(Outer Manipur Lok Sabha) leh mi poimawh tuamtuam tel ding uhi.

Huai hunah lapawl tuamtuam kigawmte’n ‘Halleluijah Chorus’ sa ding uh a, Souvenir & Journal honna leng om ding hi. Cultural Exchange hunah Naga Cultural Troupe, Meitei Cultural Troupe & Thang-ta dance om ding a, Cultural Exhibition hunah tribe tuamtuam te’n namlam lahna nei ding uhi. Zo Artist, Zorock, Bawngkawn Pastor Bial Zaipawl, ICI Central Choir, EBC Lamka North Division Choir, Mizo Cardinal Choir leh lapawl tuamtuam te’n leng lasa ding uhi.

3WZC tawh kisai a programme poimawh mahmah Seminar-cum-Workshop leng Oct 25, 2013 sunnung dak 1.00 in YPA HQ Hall, Hiangtam Lamka ah ‘Issues, challenges and opportunities of the Zomis’ chih kipan ding hi.Nitak dak 6.00 akipan in biakinn tuamtuam 10 ah biakna kikhop om ding hi.

Tuni’n ‘68th Anniversary of UN Day-cum-ZoRO Convention om
Moreh, Oct-24: Chandel district sung Myanmar tawh gamgi jul Moreh khua a Galngam Lentol ah tuni’n ‘Salvation for the Zo people’chih thupi a nei in ‘the 68th Anniversary of United Nations Day,2013-cum-Zo Re-unification Organisation(ZoRO) Convention’ om hi. Huai ah Chief Guest in R. Thangmawia, President, ZoRO Gen HQ pang a, aman ZoRO in a kiphuhkhiak nung kum 25 melmu hi’n gen hi. Huai hunsung in ‘UN Working Groups on Indigenous People’ panlakna nuai a session leh meeting tuamtuam ah ZoRO makaite leng tel a, kum 2000 in ‘UNs Working Groups on Indigenous People’in ZoRO theihpihna(recognition) pia hi’n gen hi.

Aman a thugen zelna ah ZoRO in Zomite kigawmkhawmna ding in international ah nasepkhiak tuamtuam leng nei hi’n gen a,Zomi te’n British-te’ policy kikhenzakna nasep paipihlou ding hi’n gen hi.Mizoram a om Zo mipite’n leitung pumpi a om Zo mipite omna ding bawlsawm in panlak hi a, ZoRO in India govt apan huhna tungtawn a thil hithei ahihdan theichian mahmah chi’n leng ZoRO President in gen hi.

ZoRO Northern Zone organised-na a ZoRO Convention ah “Myanmar, India leh Bangladesh a kithehdalh Zo mipite kigawmkhawmna ding in ‘slow and peaceful means’ vanzat a nei a panlak ding” thupukna bawl uh hi’n kigen a, huai hun ah Manipur pawlam a om Mizoram, Assam a Barak phaijang,Tripura, Bangladesh a Chittagong Hill Tracts, Chin state leh Myanmar a Kachin state akipan cultural dance tuamtuam lahna leng om hi.

Hun beisa nektheih leh dawntheih tamtak haltum
Lamka, Oct-24: Supreme Court in ‘Food Safety and standard Act. 2006’ tawh kisai order a suan pansan in Th.Sunilkumar, Food Safety Officer/CCpur; Y.Satyajeet, FSO/Imphal West; Elvison Thouman, FSO/Chandel; L.Johny , FSO/Senapati leh K.Sunita Devi, FSO/Bishnupur te’n tuni’n Imphal apan Lamka hongpha in CMO’s office a Food Safety & Standard Wing staff-te leh Police tawh kithuah in Police Station khang apan Axis Bank gei, New Bazar kikal a dukan tuamtuam ah Food Safety Certificate neiloute ah mihing adia nek taklou lrh dawn taklou banah smokeless tobacco thilte checking bawl uhi.

Tuni’n thil tamtak mukhia uh a, CMO office gari leh Police te’ gari-407 gari in thil matkhiat-te nawnkhia uhi. Tuni a thil tuamtuam kimankhiate Rs 15 lakh val man ding hi’n kigen hi. Feb 2014 tana Food Safety Certificate neilou dukante chiklaipeuh a check theih gige hi’n kigen hi. Manipur a dist tuamtuam ah mihing adia nek taklou leh nekziaka taksa adia hoihlou thil tuamtuam Imphal East, Imphal West leh Chandel Dist ah Food Safety Certificate neilou dukan tuamtuamte apan nektheih leh dawntheih chi tuamtuam luhkhia (raid) uhi.

Thil kimumkhia teng tuni nitaklam dak 4:30 in CMO office campus ah DC/CCpur; CEO/CCpur; CMO/CCpur leh OC/CCpur PS muh in haltum uhi. DC in Imphal leh CCpur Dist a mi bangzahhiam in mihing adia nek taklou thil tuamtuam dukan apan a kaihkhawm uh kipahpihthu gen hi. Dukan neite’n Supreme Court order dungzui a Food Safety and Standards Authority of India thupiak zahtak a, maban ah leng nek taklou leh taksa adia hoihlou thilte zuaklou ding in dukan neitute theisak hi.

3rd World Zomi Convention Live telecast
Lamka, Oct-24: Lamka public ground ah Oct 25-27, 2013 sung ‘The 3rd World Zomi Convention’ om ding a, ni 2 sung NETV in Live Telecast bawl ding hi. Gamdang a omte’n programme kipat hun chiang in http://www.livestream.com/worldzomi ah online tungtawn a Live Streaming enthei ding uhi. NeTV official-te’ tuni nitakin Lamka hongtung uh a, Oct 25 zing dak 10:30 apan 11:00 sung khah ding uh a, Oct 26 nitak dak 6:30 – 7:00 sung non-stop LIVE om ding hi. Oct 27 nitaklam dak 4.30-5:00 sung non-stop LIVE om ding a, NETV a pau tuamtuam zang a kisuahte ah leng news bulletin in kikhah ding hi. Manipuri bulletin in Oct 25-26 sung zinglam dak 11:30 apan 12:00 sung kikhah ding hi.

DC/CCpur in kimahmante hawmkhia
Lamka, Oct-24: RMSA/CCpur saina in zan in Phungkhothang govt H/S ah ‘District Level Competition on Quiz, Debate & Essay writing’ om a, school tamtak apan class IX-XII student-te tel uhi. Tuni in IB Road a Synod Hall ah debate final oral round om a, huai zawh sunnung dak 2:00 in DC in hunkhak kawmin kipahmante hawmkhia hi.

DC in kipahman lak a lungkim mailou in theih ngeilouhte a tamtheipen zilna hun ahihziak in kipahman laloute’n leng maban ah alazou dinga kisa din hasuan hi.

Quiz kidemna ah 1st in Chingbiaklun & Khailemmuan of Rayburn College 2nd in Juliana Kimneilam & Thangboi Haokip of JNV leh 3rd in Rebecca Nianbiakkim & Mathew Thongminlal of Don Bosco Hr. Sec. School pang uh a, kipahman Rs.2000, Rs.1500 leh Rs.1000 piak hi uhi. Debate kidemna ah 1st in L. Lucy Lhinghoihkim Kom of Don Bosco Hr Sec School; 2nd in Lhingkhonei of JNV leh 3rd in Hoihnunnem of Vision Academy te’n la uh a, kipahman Rs. 1500, 1200, Rs.1000 piak hi uhi.

Essay kidemna ah 1st in Lalrohlu of Vision Academy, 2nd in Pauthianmuan Guite of Don Bosco Hr Sec School leh 3rd in Sylvia F. Laldinmawii of Don Bosco Hr Sec School pang uh a, kipahman Rs. 1500, Rs.1200 leh Rs.1000 piak hi uhi.

Dist Level kidemna a 1st & 2nd banah top 10 teng Oct 27-30, 2013 sung Imphal a TG Hr Sec School leh MFDC Imphal ah State Level Competition om hun in CCpur ai-oh in te ding uhi.

MWCA Golden Jubilee lopna om
Lamka, Oct-24: Manipur Women Christian Assn (MWCA) phuhkhiak nung kum 50 chin ‘Golden Jubilee’ tuni zinglam in Zomi Colony a ZPCS Compound ah lopna om hi. Huai ah teltuam mi 50 te’n Jubilee dak khen-ging uh a, Rev.PC Manga, Executive Secy, ZPCS in Jubilee Souvenir hong in Upa Khupsuankham, Secy (Jr), ZPCS in thumna in h lan hi. Huai zawh in Rev.Stephen Chinzathang, Sr. Executive Secy, ZPCS i/c Women Works in Golden Jubilee suang hong a,Upa Lamkhothawng, Secy (Sr), ZPCS in thumna in lan hi. Rev Awnkhankhup, Moderator, ZPCS in Jubilee Message gen a, program zawh in Upa M.Kamzadou, Treasurer, ZPCS in thumna in hunkhak hi.

KSCWF in ‘Accident prone zone’ road sign takkhe ding
Lamka, Oct-24: Kuki Senior Citizens Welfare Forum(KSCWF) pawlin Molnom leh Tollen khua kikal mun tuamtuam 6 ah ‘Accident Prone Zone’ kichi road sign board takkhiak sawm uh a, Molnom khua ah October 29, 2013 ziglam dak 11.00 in honna om masa ding hi.Road sign board hong dingte leh amun ding - Langkhanpau Guite,Chairman,ADC/CCpur in Molnom ah hong ding a,Demmang Haokip,Vice Chairman,ADC/CCpur in Salbung ah hong ding hi.Ms Jacintha Lazarus,DC/CCpur in Koite ah hong ding a,L. Mangkhogin Haokip,SP/Ccpur in Khangjang ah hong ding hi.N. Guite,EE/PWD in Vajing ah hong ding a, Lamkhosiem Khongsai,DTO/CCpur in Tollen ah hong ding hi.

SSC Admit card download theih
Lamka, Oct-24: Combined Higher Secondary Level(10+2) Examination 2013 a tel ding candidate-te’n tuni akipan official website http://www.sscner.org.in/ ah dublicate admit card download thei uhi. Exam bel Nov 10, 2013 in SSC Exam Centre-te lakah Lamka ah leng om ding a, official website tungtawn in Offline leh Online candidate reject louh teng list et-theih ding hi. Huailou in candidate’ laka lungsim lam buaina (Cerebral Palsy) nei te’n a poimawh bang un minute 40 ( @20 minutes per hour) extra time piak hiding uh, chi’n SSC apan thusuakin gen hi.

3-WZC tawh kisai Traffic Rule
Lamka, Oct-24: 3rd World Zomi Convention(3WZC) Organising Committee in Oct 25-27 sunga 3WZC tawh kisai in khawpi sung mun khenkhat ah Traffic rule anuai abang in bikhiah uhi. 1) Tipaimukh Rd-IB Rd junction akipan Police Station a zero point crossing tan block hi’n puang uh a; 2) Tedim Rd leh Tipaimukh Rd tehtuah a IB Rd ah gari lutsuk leh a luttou omlouh ding; 3)IB Rd akipan Mission Rd leh Vengnuam Rd block uh a;4) Tedim Rd-Tipaimukh Rd kikal Central Rd leng khak hi’n puang uhi. 5) Lamka Public Ground tawh kikawm kha lamlian himhim VVIP,VIP leh pass bawl a omte chihlouh gari dang lut phallou uhi 6) 4-wheeler te CCpur Govt College campus a park ding,huai ding in parking coupon bawl uhi. 7) 2-wheeler te CCpur Govt Hr Sec School campus a park ding, huai din parking coupon om hi.Traffic Rule pen Oct 25 & 27, 2013 a zat hiding a, himahleh Oct 26, 2013(Kiginni) in khahkol hiding chihthu om hi.

Dist Level Committee on Central Scheme
Lamka, Oct-24: DC/CCpur makaih in tuni sunnung dak 1:00 in‘Dist Level Committee on Central Scheme for Assistance to Victims of Terrorist and Communal Violence’ meeting om hi. Huai ah SP/CCpur, CMO/CCpur, Dist Social Welfare Officer leh PO/ICDS tel uh a, case 4 genkhawm in maban ah investigation bawldin thupuk uhi.

DHS GB meeting hun bikhiah
Lamka, Oct-24: District Health Society/CCpur district pawlin DC/Chairperson makaihna in Oct 31, 2013 zinglam dak 11.00 in Tuibuong a District Training Hall ah tukum adia General Body meeting masapen nei ding uh a, huai a agenda dingte bel meeting hun ah luikhiak hiding chi’n DFWo/Member-Secretary,DHS/CCpur in thusuah hi.

One Way traffic khakkol zual ding
Lamka, Oct-24: Lamka Public Ground ah Oct 25, 2013 zinglam dak 10:00 apan 3rd World Zomi Convention hun honna ah VIP tamding ziakin Tedim Road a One Way traffic kikoih zingsang dak 5:00 apan VIP-te’ omsung khahkol hiding hi. Tedim Rd-IB Rd junction leh Police Station gei a one way traffic khakkol hiding a, Tedim Rd apan IB road zuitoute taisuak thei ding a, IB road apan Mission Road zuite’n Mangpu Tonsing’ tenna inn geitan taithei lel ding uh a, Tipaimukh Rd apan Lamka Public Ground lam gari taisuk theilou ding hi. Police Station apan Tipaimukh road zuite Central road ah taiphei ding uh a, aban taitou theilou ding uhi. Zenlang Veng apan Public Ground lam manawhte Cemetary brigde tan kia taithei ding uhi.

SUUNNA
Lal Immanuel (38) s/o Pumzapau of Zoar Veng, Bungmual tuni zingsang in toilet ah sisa a muhkhiak hi a, tuni mah in Bungmual YPA hanmual ah kivui hi.
&&&&&&&&&&&&&&&&&&&&&&&&&&&&&&&&&&&&&&&&&&&
IMPHAL NEWS
Chief Minister in Delhi zotpih
Imphal, Oct-24: Manipur Pradesh Congress Committee(MPCC) in kumthak a Lok Sabha election om ding ah Congress ticket deihte’n Oct 21, 2013 tan ngetna piaktheih dia thupuan a bawl dungzui un Outer Manipur Lok Sabha seat asdin mi 8 in application pia uh a,Inner Manipur Lok Sabha seat adingin mi 4 in application pia uhi. MPCC in Chief Minister leh Dy CM in Central leader-te tawh kithuza a ticket piak ding tungtyang hihfel dia mawhpuakna a piak dungzui in Chief Minister O. Ibobi in zan in party ticket ngente’ list tawh New Delhi ah zin a,Central leader-te tawh thil omdan genkhawm ding uh chihthu om hi.

Top official 2 in Yangon pha
Imphal, Oct-24: Look East Policy tungtawn a India leh Myanmar kala sumdawntuahna lam hoihsem a bawl tupna in tuni’n India a tour operators 2 in Myanmar a Yangon khua zuan in zinkhia uhi. Thusuak in a gendan in NS Advertising Agency leh KB Enterprises tuni a zinkhia in Oct. 25 in Yangon tung ding uhi. Tour operator mi 2 te’n Myanmar-Imphal kal a special flight paisak ding thu telin thu poimawh tuamtuam genkhawm ding uhi.
Thudang kizadan in Manipur a Sangai Festival om hun ah Mandalay leh Yangon Chief Minister in hong uap ding uh a, huai hun ah Myanmar-Imphal kala lenna(flight) omsak ding tawh kisai hihfel hidin kigen hi. Huai flight tungtawn in Myanmar mite’n pilgrimage in Budh-Gaya mun nuamtakin phathei ding uh a, tua banah laizilna ding in Manipur hong zang thei ding uh chihthu om hi. Huailou in kisumdawntuahna lam ah van man leng niamzaw deuhta ding chih ahi hi.

Nagaland pha dingin Mary Kom chial

Imphal, Oct-24: Nagaland Chief Minister Neiphiu Rio in Kohima a Niathu Sports Festival om ding uap dingin Olympic bronze medallist leh Padma Bhushan awardee MC Mary Kom in a chial ziakin Mary Kom tuni’n Nagaland khawpi Kohima tung hi. Aman Oct 25, 2013 akipan ni 3 daih ding Niathu Sports Festival ah thugen ding hi’n kigen hi. Aman huai hun a zat zawh nitaklam in Imphal zuan in hongkik ding a,hong kikma deuh in Dimapur a ‘The Maple Tree’ mun pha in student-te tawh hun sawtlou zangkhawm ding uhi.

Meltheihlouhte’ bomb paih puakzak
Imphal,Oct-24: Meltheihlouh kuate hiamin zan nitak dak 9:45 velin Kh.Sanjoy (32) s/o Kh. Ibomcha of Khurai Chingangbam Leikai tenna inn ah bomb a paihkhum uh puakzak a, himahleh asi leh liam omlou chih ahi hi. Hileleng bomb puakin fencing hihse zek a, Leikai mipi te’n bomb paite mawhpaihna in tuni’n Sit-in-protest tu uhi.
Thudang kizadan in tuni zing dak 7:00 velin Yumnam Devand(57) s/o (late) Yumnam Gulamjat of Nongmeibung Chakpam Leirak tenna inn ah bomb khat muhkhiak in om hi. Y. Devand bel Agriculture department a Assistant AO sem hi a, zingkal dak 8 velin Porompat police te’n bomb va lakhia uhi.

Meeting ah Manipur CEO tel ding
Imphal, Oct-24: Chhatisgarh, Madhya Pradesh, Rajasthan, Mizoram leh Delhi ah Nov 11-Dec 4, 2013 sung huam a Assembly election om ding tawh kisai in Oct. 30, 2013 in New Delhi a Nirvachan Sadan ah Election Commission of India in meeting sam a, huai a te ding in O. Nabakishore,IAS, Chief Electoral Officer(CEO) Manipur in Oct. 29, 2013 in Imphal akipan Delhi zuan din zinkhe ding hi.

Mudslide thu study bawl din kuan uh
Imphal, Oct-24: Ukhrul district sung Tusom village a mudslide tawh kisai study bawl dingin Prof. Arun Kumar, Head of Manipur University’s Earth Science department makaih in scientist 4 in tuni in Tusom village zuan uhi. Earthquake specialist Dr. S.Manichandra inleng zui hi. Tuni a zinkhiate’n zanlam zeka Tusom village a mudslide om tawh kisai hoihtak in amun mahah ah va enkhia in study bawl ding uh hi’n kigen hi. Tusom Village bel Imphal akipan km. 120 vela gamla ahi hi.