Singtang mite’n mahni hihna kembit in tawisang un- CM Ibobi
‘The 3rd World Zomi Convention’ tuni’n zawh hita

Lamka, Oct-27: Tuni sunnung dak 1.00 in Hiangtam Lamka a YPA Gen HQ Hall ah ‘The 3rd World Zomi Convention’ hun tawpna Valedictory Programme leh Joint Fellowship kithuah kikhopna om a,Chief Guest in Manipur Chief Minister O Ibobi Singh pang a,aman a tanu tawh uap uhi. Huai hunah Phungzathang Tonsing, Minister(Health & FW, GAD & CADA); Vungzagin Valte, Parliamentary Secy; T. Manga Vaiphei, Chairman, MTDC; LM Khaute, Additional DGP; Ginsuanhau, MLA; K. Shyam, MLA(Langthabal A/C); Langkhanpau Guite, Chairman, ADCC; Jacintha Lazarus, IAS, DC/Ccpur; L. Mangkhogin Haokip, IPS, SP/CCpur; SDO-te, Thanglianpau Guite, President, ZRO; Chin Sian Thang, President ZNC/ZCD;LB Sona, Chairman, ZC banah Zomi sunga makai tuamtuamte, AMUCO, AITSA, GZA, MPC, HPF(M), UNC leh ZC akipan palaite leh mipi tamtak tel uhi. Minister Phungzathang Tonsing in Zomi Language & Literature Society(ZOLLS)te’ Journal masapen hong hi.
Chief Minister in a thugenna hun ah, Zomi te'n scholar leh laisiam tampi nei in, gamsung makai leng hoihtak nei hi’n gen a, Manipur a nam tuamtuam tengkhawmte khualna in state govt. in development scheme tuamtuam semkhia hi’n gen hi. CM in a genzelna ah govt. hoihtakin Manipur ah vaihawm kha a, tuaziakin masawnna leh khantouhna leng muhtheih tamtak om ahi chi hi. Tribal-te custom leh identity kepbit ding govt. in ngai poimawh a, tua kawmin state mipite kingakna, sum-le-pai dinmun leng bawlhoih in om chi hi. Hibang masawnna om mahleh bawlthak ding thil tamtak omlai a, International Trade leh Arts Centre, Culture leh Infrastructure telin Power connectivity-te puahphat hidin gen a, nam tuamtuamte’n huai thilte hamphatpih ding uh chi hi. State govt. in kitanauna hoihtak omtheihna di’n singtang leh phaizang ah khantouhna kibang omsak zel ding chi a, nidang a omsa bangin khat le khat kituahna leh kimuantuahna omsak ding govt thiltup hi a, tuni a convention a mipite kituah bangin kituahna i poimawh uh chi hi.
Centre govt. in Moreh border town pen international trade omna dingin enlah a, huai din nasepna tamzaw zawhsiang hita a, international flight service leng om ding chi hi. Maban sautak kalsuan ding omlai a, himahleh bawlphat ding thil omte pen ei adinga hunlem hi a, masawnna ding lampi kawkmuhtu hi a, international trade, sports, tourism, education, art leh culture kepbit hunta chi hi. Maban ah khawtang chidam saktu hidingin Zomi Conveniton a hong paikhawmte'n kituahna omsak dia panla dingin ngen a, mipite poimawh leh gamsung in a poimawh pen lemna leh muanna hi'n gen hi. CM in Zomi Convention kithuahpihna in Rs. 1 lakh pia a, a tanu Christian sahkhua zui inleng phatna la sa hi.
Thanglianpau Guite @ Sia Pau, President, ZRO in a genna ah Zomite kipumkhatna dinga kuapeuh in panla chiat a, taksa kahiangte leng tua dinga zang di’n ngen hi. Aman a thugenna ah Zosuan unau khat le khat kal kipumkhatna dingin i kampau leh lungsim ngaihtuahna i zangta hiam chi’n dotna bawl a, unau kikhenzakna ding leh kigensiatna ding hilou in Pathian phatna, midangte itna kampau genkhiakna ding a piak hihdan gen hi. Thu hoihlou leh la hoihlou genna ding a neih hilou in, lungtang ngaihtuahnate khempeuh ah Zomite kituahna ding leh khawsuahna ding ngaihtuah hunta chi hi. MLA, elected member-te’ leh muntuam-gamtuam a Zomi omtheih pen Pathian in i nam hong vualzawl ziak hi a, eimah leh i innkuante ading lela i hamphatna i zat leh a neitute’n leng sawt nei tuanlou thei ahihman in i minam adi’n zang chiat ni chi hi.
Rev Dr Pumza Thang Tawmbing, Principal, GETS Bangalore in Zomi-te gamgi’n honkhen kichi zel pen chih hun nawnlou in, i totna leh sikna peuh i gam hi a, tutung in gam tuamtuam a khawsa, Zomi-te’n hiaimun a convention thupitak neithei ahihman in ‘International Zoland’ kipatna hita chi hi. Valedictory Message agenna ah International Boundary in leng Zomite hong subuai zou nawnkei chi hi. Aman agenzelna Zomi-te’n Zoland om ding i tup leh ngim hi a, i dream ahihziakin dream neite kuaman kipahpih pahlou a, himahleh dream pen Pathian tawh pangkhawm lehang Joshua leh Caleb-te’ bang in vualzou leh gumtu haupen isuak ding chi hi.
Cin Sian Thang, President, ZCD(ZNC) Myanmar in Zomi in ka piang a, Zomi in ka si ding chi a, Zomite kitanau semna ding mitkha a mukhol ahihman in kipak mahmah ahihdan gen hi. Hiaitan tuntheihna pen mimal leh nampi hatna ziak hizawlou in Pathian hehpihna ziak hi’n gen a, Zomi min a pang, makai masate hatna ziak hi’n gen hi. Tu in gam 4 ah Zomite minority a om hi’n gen a, huaite lakah Myanmar a politics tawh kisai himhim sai theihlouh tawh kibang in govt. kalhna ahihdan gen a, tua ziakin India a Zomite hampha hi’n gen hi.
Khaizasong Guite @ K Guite, Advisor, ZRO in Valedictory Speech a genna ah, muntuam-gamtuam a Zomi omte adin mahni kivaihawmna leh sovereignty poimawh masa a, Zomi politics saina leh biakna hun a makai leh mipi tamtak paikhawmte ziakin kituahna om in lawhching mahmah chi hi.
President, AMUCO in Zomi-te'n distincitive identity bawlpha a kembit dingin ngen a, Zomite telin Manipur a singtangmite tawh phaizang mite kituahna deih uh ahihdan gen in, maban hoihzawkna dinga kuapeuh tawh pankhawm lunggulh hi’n gen hi.
Rev Dr Gin Khan Khual, Ph.D, Asst Secy, GZA in Global Zomi Alliance nasepdante pulak in, Zomi-te adinga nasem hoihte GZA in kithuahpih in tawsawn a, himahleh na hoih semlou makaite kiangah Bible tawh thuhilh thei dinga saptuam makaite kipawl khawm ahihdan gen hi.MPC akipan thugentu in Convention kizang kipahpih in hoih a sakdan gen a, Zomite lawhching sem dingin deihsakthu gen hi. President,UNC in khawvel paidan kikhek zel bang a ZC panlakna kipahpih a, dominant community te'n ST status a ngetna uh Manipur pen tribal state hihsak sawm ahihdan uh gen a, UNC in Manipur tribal-te adia panlate kipahpih in thuap zel ding chi hi.
Tuni a Zomi Convention huntawpna ah ZYA Cultural Troupe, Bawngkawn Pastor Bial Zaipawl, Aizawl; BYF/EBCC Hiangtam Lamka in Hon Domsang; Joint Choir, Halleluijah Chorus; Zo Artists; PYF/Zomi Presbyterian Church Synod; EFCI Central Choir; BYF Pethuel; MELC Central choir; Mizoram Cardinal Choir leh lapawl tuamtuam om hi.
Rev. Khen P. Tombing, Chief Co-ordinator PCI(R) in Nampi Maicham hunah makai masate suunna hun ah makai a, Rev. Dr. B. Luaichinthang in Mass Prayer makaih in, Zomi makai, elected member-te leh makai tuamtuamte adinga thumsakna leng om a, Rev. Laldonglian, Director of Ministries, EOC in thumna tawh hunkhak hi.

Workshop-cum-Mas Enrolment
Lamka, Oct-27:CCpur Block Congress Committee saina nuai ah Oct 28,2013 zinglam dak 11.00 akipan in YPA Hall, Hebron Veng(New Lamka) ah CCpur Mahila Block Congress Committee a Office Bearer leh Executive Committee lepthakna banah Workshop-cum-Enrolment om ding hi.Huai ah Chief Guest in Phungzathang,Minister(Health & FW) pang ding a,Guests of Honour in Smt RK Ranisana Devi,President, Manipur Mahila Congress Committee leh Kamsuanlun, EM/ADC pang ding uh a,Functional President in T. Chongbiak,President,CCpur Block Congress Committee pang ding hi.

ZYA Myanmar-te leh ZYA HQ makaite tuni’n kithuahkhawm
Lamka, Oct-27: ZYA HQ makai te’n 3rd World Zomi Convention zang a Mynmar apan ZYA member leh makai hong zinte tuni zingsang in Simveng a SYO Hall ah kimeltheih tuahna dinga kithuahkhawm pih in ankuang leng umpih uhi. Huai hun ah ZYA HQ (India) leh ZYA Myanmar te’n President 1 nuai a omkhawm dingin thupukna bawl uh a, tunung a huai pichinsak hiding in kihoulem uhi.

Sangaikot ah KUT lopna om ding
Lamka, Oct-27: Sangaikot Block KUT Committee-te inntekna in Nov 1, 2013 zinglam dak 10.30 akipan in Sangaikot khua ah KUT-2013 lopna programme om ding hi.Huai ah Chief Guest in Tongkai Baite,MDC(21-Sangaikot) pang ding a, Guest of Honour in Lhunpao Mangte,Vice Chairman,SBCA leh Functional President in Zamkholian,Chief of Sangaikot pang ding hi.KUT lopna hun ah KUT Pa in Thangkholet Lhungdim,ex-Chairman,SBCA pang ding hi.Programme zat sungin khualliante apan thugen ngaihkhiakna banah cultural dance,traditional music,solo-duet-trio,choreography leh traditional couple parade om ding hi.

Accident ziakin mi 3 liam
Lamka, Oct-27: Tuni nitaklam dak 3.00 velin Khumujamba ah Bolero in lampi kuakna a pipe gawital kha in asunga tuang Nuamhoih(20) d/o Kaitinlal of Hmuia Veng in gari mailam glass phukek kha in amai liam hi.Huaima sun dak 12.30 velin Pulsar accident ziakin Robert (22) s/o M. Chinzahau of Zomi Colony khua phawklou a, Ninglianhuai (13) d/o Khamkhanlian of Lailam Veng tuni sunnung dak 2.30 velin inntung feet 12 vel ah kia in anuai cement ah alu tatkha a, amaute hospital ah admit hi uhi.

ZYA makaihin social work ding
Lamka, Oct 27: ZYA HQ makaih in Oct 28, 2013 zinglam dak 10:00 apan in Lamka Public Ground ah social work om ding a, ZYA a Central Executive Committee teng ban ah ZYA Lamka block nuaia Unit teng tel ding uhi. Huailou in Lamka Public Ground ah 3rd World Zomi Convention neihna a Bench leh Parachute thawh ZYA nuai a Constituent Unit te’n lakkhiat theih ding a, Constituent Unit-te’ hahpahna ziaka physical arrangement hoihtak om ziak in ZYA HQ in kipahthu gen uhi.

Dist Level Science Exhibition
Lamka, Oct-27: ZEO/CCpur office a Science Unit saina in Oct 29- 31, 2013 sung Thengra Leirak a Gandhi Centenary govt Aided Jr H/S ah ‘Dist Level Science Exhibition for school children’ om ding hi. Huai ah class IX-XII sim student-te telthei ding uh a, Dist Level Science Exhibition a telkhiak a om student-te State Level Exhibition leh Manipur State pawlam a Eastern India Science Seminar ah kuan ding uhi.

DHS GB meeting hun bikhiah
Lamka, Oct-27: District Health Society/CCpur pawlin DC/Chairperson makaihna in Oct 31, 2013 zinglam dak 11.00 in Tuibuong a District Training Hall ah tukum adia General Body meeting masapen nei ding uh a, huai a agenda dingte meeting hun ah luikhiak hiding chi’n DFWO/Member-Secretary, DHS/CCpur in thusuah hi.

State Level ah ching zoulou
Lamka, Oct-27: AMFA saina in tuni’ apan Oct 29, 2013 tan daihding Imphal a Artificial Turf Ground, Khuman Lampak ah A.Bolchand Singh U-14 yrs Inter Dist Football Festival ading State Level Trial-cum-selection kipan a, tuni’n CCpur team te’n play 2 nei uh a, 1st play ah Kakching team tawh goal 1-1 in kidraw uh a, 2nd play ah goal 0-2 in Imphal East teamte zoulou uhi. Huaiziakin A.Bolchand Singh U-14 yrs Inter Dist Football Festival adi’n CCpur teamte tutung in chingzoulou suak uhi.

SUUNNA
H. Ginmang Simte (50) s/o H. Thangkhogin of V. Munhoih, New Lamka damlou in tusun dak 12:30 in si a, Oct 28 in Simveng Hanmual ah kivui ding hi.
Lianlalson (29) s/o (late) T.Pumzalian of Lower Chapellane, Hiangtam Lamka tuni zingsang in Zenhang Lamka ah sisa in kimukhia a,tuni in Lamka hanmual ah kivui hi.
Kapginsuon Tungdim @ Mawia (48) s/o (late) Evan.Jangkhomang of Kamdou Veng zan zingsang dak 4:30 velin sinna in si a, zan mah in Kamdou Veng hanmual ah kivui hi. Kapginsuon bel Pakhel leh Rt. Rev Dr Ginkhanmung Zou, Bishop, MELC tawh unau hi uhi.

IMPHAL NEWS
Police te’n JCB driver thatte mankhe vek
JAC pawlin dakkal 36 sung General strike puang

Imphal, Oct-27:JCB driver Meisanam Devaraj @ Ton(24) of Khurai Sajor Leilak apaisa Oct 14, 2013 in Singjamei a Chanam Pukhri Mapal ah meltheihlouhten a pimang uh zan in Senapati dist sung Seijang village ah sisa in muhkhiak hi a, huai thu zak phet in ‘JAC against kidnapping and killing of JCB driver’ pawl te’n security te’n M. Devaraj Ton hinna humbit zoulou hi a ngawh in tuni’n Khurai Area ah Imphal-Ukhrul lampi khaktan in kiphin uhi. Amau tualthahte matkhiak ahih ma M. Devaraj luang lalou ding uh hi a genkawm in Oct 28, 2013 zingsang dak 5.00 akipan dakkal 36 sung Manipur ah General Strike puang uhi.
Thudang kizadan in Police te’n tualthatna a kigolh mi 5 mankhia uh hi’n gen uhi. SP/Imphal West in tuni’n a office ah press-te kimuhpih a, M. Devaraj pimang nung a thatte matkhiak vek a om hi’n gen hi. Matkhiak a omte Namoijam Gojen (50) s/o (late) N. Chaoba of Ningombam Makha Leikai; a tapa Namoijam Chalamba @ Rakesh (25), Namoijam Jimikanta (24), Namoijam Ongbi Tombi @ Jiteshwori (24) w/o N. Chalamba leh Tongbram Babu @ Shyamchand (27) s/o T. Biren Singh of Thanga Khunjao tulel a Langol Laimanai a om hi un kigen hi. M. Devaraj in hek JCB leng Police in Tupul gamlak ah mukhia uh hidan in kigen hi.

Tuni apan Oct khalawh kihawm ding
Imphal, Oct-27: Manipur a festival minthang Ningol Chakkouba kichi Nov 5, 2013 a om ding ziakin Manipr govt nuaia employee te’n Oct 28, 2013 akipan in Oct 2013 kha lawh advance a lathei ding uh chi’n govt in Order suah a, huai dungzui in paybill bawl fel a Treasury office in a pass te’n Oct 28, 2013 akipan in lawh hawmkhe panta ding uh chihthu om hi.
Nurse nasem hoihte pahtakna peding
Imphal, Oct-27:Japanese Hospital,Manipur a thuneitute’n Staff Nurse a neihte uh laka nasem hoihte pahtakna thil piak ding in puang uh a,December 8, 2013 in Japanese Hospital phuhkhiak nung kum 9 chin lopni in Japanese Hospital a staff nasem hoihte pahtawina in cash award Rs. 20,000 leh certificate piak hiding uh chih thupuan bawl uhi.Thusuak in a gendan in Japanese Hospital a Staff Nurse apaisa kum 2010 akipan tutan JNIMS Hospital ah attach a semte laka tel Staff Nurse 3 huchibang pahtawina leh kipahman thilpiak ngah ding uh hi’n puang uh a, huaite T. Romita Chanu(Eye OT) of Khurai Chingambam Leikai,Tinsid Rd,Imphal East district ; Oinam Shanta Devi(female Surgery) of Sagolband Thingom Leikai,Imphal West district leh Ashem Sunita Devi(ICU) of Lairikyengbam Makha Leikai,Imphal East district hi uhi.

Indigenious Brothers Meet-2013

Imphal, Oct-27 : League of the Fourth World People Kangleipak (LFWPK) te saina in tuni in Manipur Dramatic Union hall ah ‘Two days 11th Indigenous Brothers Meet-2013’ om a, Chief Guest in Social Welfare Minister Ms AK Mirabai pang hi. hi. Huai ah Guests of Hnour in Mangpu Karong Kom, President LFWPK); Vice-President Hungyo Mera Tangkhul; LN Issac Aimol; Mangangcha Keisham Ibomcha leh Th. Thumbu Maram pang uhi.
Chiewf Guest in a thugenna ah community tuamtuam tenkhawmna Manipur kichi Mini-India hi a, huaiziakin kuapeuh in lemna leh muanna omna dinga panla chiat dingin ngen hi. Nam tengin tawndan, pau leh identity kepbit poimawh hi’n leng gen a, huaiziakin hunpaisa a kituahlouhna i neihte mangngilh in maban ah nuamtak a tenkhawm theihna ding a kuapeuh in panla chiat ding in chial hi.

UNLF in amau thilhih hi’n puang uh
Imphal, Oct-27: North AOC a PHED water reservoir kiang ah zan zingsang dak 7.35 velin 40-Assam Rifles ‘A’ company-te patrolling pailai a IED bomb puak ziaka Assam Rifles personnel khat liam tawh kisai tuni’n UNLF pawlin amau thilhih hidan in puang uhi. Amau press tungtawn a a taklatna uah MPA nuai a Urban Welfare group te’ thilhih hi a, mipi vantang aliam khak ding uh lauh ziakin Assam Rifles personnel khat kia liam hizaw in gen uhi. Amau Governor road a bomb a hihpuak utawh kibang geih hi’n leng taklang uh chihthu om hi.

Zu leh drug doudalna tawh kisai
DC makaih in review meeting om
Imphal, Oct-27: DC/Thoubal office a Conference Hall ah zanhal in Nehru Yuva Kendra/ Thoubal panlakna in zu leh drugs doudalna tawh kisai ‘Prevention of Drug abuse & alcoholoism’ kichi Review meeting om hi. Huai ah T. Ranjit Singh,DC/Thoubal makaihna in officer hunkhop tel uh a,DC in NYK/Thoubal-te panlakna tungtawn in Thoubal district ah zu leh damdoi khamtheih akipan kivenna ding leh ahihzongsang addict-te’n leng a topsan theihna ding ua scheme tuamtuam nasepna in masawn mahmah hi a genkawm in NYK/Thoubal-te panlakna kipahpihthu gen hi.