RBI leh SBI top official khenkhat in Lamka hongpha
Lamka, Sept-28: Anand Prakash,Banking Ombudsman,Reserve Bank of India(RBI),Guwahati; GC Sarma, Asst General Manager(AGM) & Nodal Officer,SBI, Local Head Office, Guwahati leh Dy General Manager,RBI, Guwahati banah RBI official 1 leh SBI Local Head Office,Guwahati akipan official khat in tuni in Lamka hongpha uh a, zinglam dak 10.00 velin SBI/CCpur Branch ah Customer Care Programme ah tel uhi. Huai ah retired central official tuamtuam,senior citizens makaite,widows welfare association heutu leh Lamka a mi poimawh hunkhop telin SBI tawh kisai ngaihdan tuamtuam gen uh a, Banking Ombudsman leh Nodal Officer,SBI, Local Head office in akul leh poimawhte dawnna leh hilhchetna pia uhi.

Customer Care Programme hun ah H. Nengsong,IFS(retd) in a genna ah state govt pensioner 700 vel SBI apan pension sum late adin ni 6/7 hun lutsek ahihman in RBI in baihdeuh a lak theihna dinga panla dingin deihthu a gen Banking Ombudsman in a dawnna ah pension sum hawmkhiak tungtang ah Treasury office leh sum pekhia bank kala arrangement in thupia hi’n gen a,SBI/CCpur Branch leng Currency Chest Branch hita ahihman in state govt transaction a pat theih hunhun in SBI in leng zekai hetlou in pension sum hawmkhe thei ding chi’n gen hi.

Thuamson Hangzo,President, Senior Citizens Welfare Assn in senior citizens leh pensioner-te adin counter tuam poimawh ahihdan leh SBI branch khat hon beh poimawh sakthu gen a, S. Kaikhanthang, Chief Manager, SBI/CCpur branch in a dawnna ah SBI/CCpur branch puahthak lellel ahihdan leh counter thak bawlkhit hunhun in senior citizen leh pensioner-te adin counter tuam koih hiding chi’n gen hi.SBI branch hon beh ding tungtang Banking Ombudsman in a genna ah Chief Manager,SBI/CCpur branch in akituahpih forum ah a luikhiak ngai ding chi’n gen a,aman huai ana bawhzui ding hi’n gen hi.

K. Thangkhopau,ex-serviceman(army) in army, defence leh central govt pensioner te’n khateng a tarik 27-30 kikal in pension mu geihgeih uh ahih banah pension loan leng deih hunhun a mu uh ahihdan gen hi. Mrs Ruth Niangpi Singson, President,Widows Welfare Assn in bank-te’ nasepdan taklang in water filter a hawmna uah amau leng deihsakna a tankhak uh kipahthu gen a, ATM dakkal 24 sung zat theih ding a deihthu a gen banah Self-Help Group(SHG) pawlte leng loan piak hileh chih deihthu hen hi. GL Sarma, AGM, Customer Care Cell & Nodal Officer, SBI Local Head Office in dawnna pia in Northeast ah ATM 1,000 om behlap ding ahihdan leh mun khenkhat in security tawh kisai in zan sawtnung in ATM kihong theilou hizaw chi’n gen hi.

N. Lhungdim,IRS(retd) in amah tawh kisai ah bank-te’ nasepdan thupi leh phat-huai sakthu gen a, midangte tungah leng huchi dinga deih ahihdan a gen banah public leh customer-te tawh kizopna leng bawlhoihsem ahih deihthu gen hi. N. Tuankhankhup,IFS(retd) in a pension sum Delhi akipan SBI/CCpur a lak dinga s transfer dek lai in Bank te’n a hihsakpah ziakun kipahthu gen a,token system zat kipat hunlua sakthu leng gen hi. Chief Manager, SBI/CCpur branch in branch puahna nasep(renovation) zawh hunhun in token system leng pat theih hiding in gen hi.Banking Ombudsman in Lamka hong phakna ziak uh taklang kawm in service tawh kisai taksap a om leh ahun taka sukveng pah ahih keileh Guwahati a hong sese lou in leng e-mail tungtawn in thil omdan amah theihsak ahih aleh ana etzuisak pahpah ding ahihdan gen hi.

Chairman,ADC in Shillong phading
Lamka, Sept-28: Siamsinpawlpi Joint HQ Shillong kiphuhkhiat kum 50 chinna Golden Jubilee lopna Oct 2, 2013 zinglam dak 11:00 in Central Library (Usosotham Auditorium) ah om ding hi. Huai ah Chief Guest in Langkhanpau Guite, Chairman ADC/CCpur pang ding a, huai dingin aman Oct 1, 2013 in Shillong zuan in zinkhe ding hi. Chairman ADC/CCpur in Oct 3, 2013 in Meghalaya a Autononous Dist Council member-te kimuhpih ding a, 6th Schedule nuai a ADC-te’ kipuakdan leh function dan genkhawm ding uhi. Chairman ADC/CCpur bel Oct 4, 2013 in Lamka hongtung kiknawn ding in kigen hi.

SBI/CCpur ading sum hongtung
Lamka, Sept-28: Security escort khauhtak venbitna nuai ah tuni’n Imphal apan SBI/CCpur Branch ading sum hongtung a, Sept 2013 khalawh (pay/salary) leh bank apan lak ding neite adin lungmuanhuai mahmah hi’n kigen hi. SBI/CCpur branch leng RBI sik a sum kemthei ding in Currency Chest branch a puan ahih nungin sum hunkhop hongtun 3veina hita hi.

Laibu thak honna om ding
Lamka, Sept-28:Mrs Lalronghak Songate w/o Rev Dr JL Songate of Sielmat in a bawl ‘Damlai Thlipui(Life Storm)’ kichi Hmar paua kigelh laibu thak Sept 29, 2013 nitaklam dak 5.00 in Sielmat a Roberts Jubilee Chapel a biakna kikhopna ah Rev Darsanglien Ruolngul, Moderator,ICI in hong ding hi.

Workshop leh Mass Enrolment
Lamka, Sept-28:Vungzagin Valte, MLA(Thanlon A/C) & Parliamentary Secy tenna inn Dorcas Veng a Niangzen Khualbuk ah Sept.30, 2013 sunnung dak 1:00 in ‘Worshop on Mahila Congress -cum- Mass Enrolment and Re-constitute Office Bearer & Executive Committee Member of Thanlon Assembly Constituency’ om ding hi. Huai hun ah Vungzagin Valte, Parliamentary Secretary; Langkhanpau Guite, Chairman ADC/CCpur; Rani Sana Devi, President, Manipur Pradesh Mahila Congress Committee (MPMCC); Lalhmangpui, MDC/Parbung; M. Ginzapau Guite, MDC/Ngazam leh H. Jamkhanpau, MDC/Thanlon te'n uap ding uhi.

DC office a Biometric machine buai
Lamka, Sept-28: DC/CCpur office ah Handron Tech.Pvt Ltd apan Biometric machine January 30, 2013 in fit in om a, huai a kizat nung office staff-te’ kuanhun leh paihun machine in chiamteh hi. Hileleng Sept. 21, 2013 apan in huai Biometric machine buai a, adiak in Grade -IV te office suty ni chihlouh niteng in office kai mahle uh bio-matric machine ah ni 10-19 kikal absent in om uhi.

Golden Jubilee project Jumble sale
Lamka, Sept-28: New Lamka CBA office kong Tedim Road ah October 2, 2013 zingsang dak 6.00 akipan in Chin Baptist Youth Fellowship Golden Jubilee Project sepkhiakna ding in Jumble Sale om ding a, huai ah van chituamtuam- um le bel ban ah nikten puansilh chi tuamtuam zuak ding uh a,Pathian nasepna dinga panlakpih hiding in kuapeuh in valei dingin Youth Secretary,CBA in chial hi.

Annual Conference-cum-Freshers Meet
Lamka, Sept-28: Zillai Shillong Block (ZSB) in Oct. 2, 2013 zinglam dak 10:30 in Don Bosco Technical Hall, Laitumkhrah, Shillong ah ‘32nd Annual Conference -cum- Freshers Social 2013 program’ nei ding uhi. Huai ah Genlal Khaute, Special Contractor khuallian hiding a, Guest of Honour in Kh. Benlian Vaiphei, Editor Thuhiltu pang ding a,Functional President in C. Sangpu Vaiphei, AGM, RBI/Shillong pang ding hi. Huai ah HSLC(class X) pass mi 8, HSSLC(class XII) pass 10, Graduate mi 4 leh Post Graduate 1 kiang ah Meritorious Awards 2013 pekhe ding uhi.

Excursion adin sum sanction
Lamka, Sept-28: Dist Council/CCpur a function nawn nungin Council nuaia school omte naktakin puah uh a, kum 20 nunga Dist Council nuai a school omte tel masakna dingin Aug 15, 2013 in Lamka Public Ground a Indian Independence Day lopna ah Misao Lhahvom JB school-te’n kipahman 2na( 2nd prize) ngah uhi. Dist Council nuai a school 3/4te Manipur state sung mun tuamtuam ah excursion paithei ding om uh a, huaite lakah M.Lhahvom JB school a Jr. Girls te’n Independence Day a 2nd prize alak uh kipahpihna in Chairman ADC in October 2013 sungin Manipur gamsung mun tuamtuam pha a excursion paina ding in sum sanction hi’n kigen hi.

Medical Assessement Camp om ding
Lamka, Sept-28: SSA/CCpur saina in Nov 4- 8, 2013 sungin TD block 3 ah ‘A Child with Special Needs-te ading in ‘Medical Assessment camp 2013’ om ding hi. Nov 4, 2013 in Samulamlan TD block ah om ding a, Nov.7, 2013 in Thanlon TB block leh Nov.8, 2013 in Henglep TD block ah om ding hi. Medical Assessment Camp tuamtuam ah Opthalmologist & Clinical Psychologist doctor te'n damlou en ding uhi.

SUUNNA
Mrs Niangkhonei(70) w/o Laltinlel of Go Cin Khup Veng,New Lamka upat tak ziaka kumzawn leh sungna ziakin tuni zingsang baihtak dak 2.20 velin si a,New Lamka YVA Hanmual ah kivui hi. Mrs Niangkhonei ahihleh New Bazar/Central Lamka area a Manipur Express hawmtu Khailianthang’ nu hi a,Express hawmtu khatin hibang lusunna a tuahna tungah Manipur Express a semte’n suunpihthu ka puang uhi.Anu beisan ziakin zan issue Manipur Express leng hawmkhe theilou in tuni issue tawh hong hawmkhawm a amah hawmna area a News latute’n theisiam dingin kon ngetpih uhi.

IMPHAL NEWS
CM tuni’n Imphal hongtung ding
Imphal, Sept-28: Manipur Chief Minister O. Ibobi Singh in official programme tuamtuam neih ziakin Sept 12, 2013 in New Delhi a zin huai apan China leh Japan gam leng vapha a, a programme hi a kigen dan in amah Sept. 29, 2013 in Imphal hongtung ding hi.Chief Minister in China leh Japan gam phadia a zinkhiakma in Indo-Myanmar gamgi tawh kisai in Centre a leader tuamtuam leng kimuhpih a, huai ah PHED Minister I. Hemochandra, Parliamentary Secretary M. Prithviraj leh officials bangzahhiam in zui uhi.

Phoilen ah TV enlai bukap in om
Imphal, Sep-28: Chandel district sung Sugnu leh Karong kiang a Phoilen village ah zan nitaklam dak 8.00 velin hausapa inn a TV enlai mi 8-te bukap in om uh a, huaite lakah thautang leng in Lunkhanlen Touthang (15) s/o Khamthang of Phoilen kha in liam a, tuni in Lamka puaktung in om hi. Mit a mute gendan in Phoilen khua a thiltung lamdang mahmah a, innsung a TV ente naupang sim ngen ahihziak un bang tum a bukap hi uhiam chih bel theichianlou uhi. Kapliam a om Lunkhanlen Touthang taklam ban ah thautang lut in tang a, doctor-te’n operation bawl ding uh hi’n kigen hi. Phoilen village ah helpawl omlou in, khawsung ah leng security force-te omlou uh a, khawnawl ah A/R post khat om hi’n kigen hi.

13th Integrity Day tuni’n zang uh
Imphal, Sept-28:Apunba Manipur Kanba Ima Lup (AMKIL) leh National Identity Protection Committee(NIPCO)-te saina in tuni’n Konung Mamang a Lamyanba Shanglen ah ‘13th Manipur Integrity & Solidarity Day’ zang uhi. Huai hun ah Phanjoubam Shakhi Leima, President of AMKIL; Sunil Karam, President of NIPCO; RV Mingthing, ex-Minister; Thangkhosei Khongshai, President Kuki INNPI Manipur; Pastor Kungsong Wanbe, Treasurer, Koireng Bible Translation; Areng Zatak, President, Chiru Union NEI; Akhup Serto Aimol, President, Aimol Tribe Union Manipur (ATUM); S. Boilen Kom, Chief of Khongnangpolpi Village leh Lengkham Thangal, Chief of Thangal Surung Village te’n Presidium members hikawm in uap uhi.

Press-te vaupawl a makai man nailou
Imphal, Sept-28: Home Minister Gaikhangam in zan nitaklam in Manipur a journalist-te leh Newspaper hawmkhia(hawker)te vaupawl atel Thokchom Priyokumar @ Pathoi (30) s/o Hayen Hangul of Uchiwa Lai Umang Imphal West zan in Kakching Khunou mun a matkhiak ahih thu puang a, hileleng mi vautute laka makaipen tunitan matkhiak hinailou in kigen hi. All Uchiwa Development Assn a Secretary Sh. Dinamani in a gendan in Priyokumar in journalist-te computer vanzat tuamtuam zang in emails tungtawn a vau hidan in gen a, hiaipen amah mimal a ahih hidan in tuni in gen hi. Priyokumar matkhiak ahih tawh kiton in midangte leng matkhiak hingei dingin gintakthu kigen hi. Priyokumar tuni in CJM Court ah dinsak in om a, police custody a om dinga thutankhum in om hi.

CPI te’n Press-te kimuhpihna nei
Imphal, Sept-28 :Communist Party of India (CPI) te’n tuni in Irabot Bhavan mun ah press-te kimuhpih uh a, huai ah CPI National Secretary Atul Kumar Anjan in Manipur gamgi keksiat ding tawh kisai in CPI-te naktak a pang ding hidan in gen hi. Aman a genna ah Indo-Myanmar gamgi fencing dikloutaka kibawl Parliament a tangkoupih omsun CPI te hi’n gen a, tua ziakin a dinmun uah nungtolhlou ding uh hi’n gen hi. Manipur gamgi neuchik leng gamdang khut ah a lut kei ding a, border fencing kibawlpen diktak a bawl ahihna ding a panlak hidin gen hi. Aman Manipur a Chief Minister O. Ibobi makaih government ‘kitchen without fire’ leh ‘Hospital without drugs’ ahi chi hi. Huaiziakin, Manipur a Ibobi makaih government in gam leh leitang itna neilou uh ahi, chi hi. Food Security tawh kisai in koimun peuh ah government in mipi lakah antang kg. 5 hilou in kg. 35 a piak ngeingei ding hi a, tulel in mipi laka kg. 5 a hawmkhiak a om pen mipite khemdaihna maimai leh Congress in vote zonna a neih uh ahi, chi hi.

Kum 12 sungin NH 37 ah mi 6500 si
Guwahati, Sept- 28: Assam state sung a National Highway 37 ah kum 2000 akipan kumlui 2012 kikal tanin accident tuamtuam 13,000 vei om a, huai lakah mi 6500 valin in sihlawh uhi. A site lakah pasal 5,044 leh numei 698 tel hi’n Transport Minister Chandan Brahma in gen hi. Accident tamzawte zukham ziak, lampi hoihlouh ziak leh lampi nawl a gari ut dandan a khawlziak ban ah traffic rule leh lampi ut dandan a kaan pawl om ziak hisek chi hi. Assam state sung adingin National Highway 37 luunpen a, nitengin accident tawh kisai case 2/3 om gige a, state govt in leng recovery van mansa in koih gige hi. Tukum 2013 sungin accident bangzah a omlai dia chih theih ahih nailouh banah accident ziaka si leh liam leng tuni tan in tamtak omta dingin ginhuai chih ahi hi..