Indo-Myanmar border fencing leh border pillar enkhia
Imphal, Dec-7: Centre akipan High Level team leh Manipur a All Political Parties akipan palaite’n tuni’n Moreh pha uh a, Indo-Myanmar border fencing leh gamgi suangphun(border pillar) omdan leng enkhe kawm in thil omdan suizui uhi. Thil omdan bangtanhiam etkhiak nungin Ministry of Home Affairs a Joint Secretary(Northeast) Shambhu Singh in banghiam thil ahiding banga omlou mah hi’n gen a,huai issduer akinlama vensak theihna ding in India leh Myanmar kigawm in December,2013 kal tawpna ahihkeileh kumthak 2014 bulin bilateral forum bawlkhiak hiding in gen hi.

Deputy CM Gaikhangam makaihna in All Political Party palaite tuni zinglam dak 11:00 in Moreh tung uh a, Shambhu Singh makaihna Central teamte’n Helicopter zang in sunning dak 12.30 in Moreh tung uhi.Central teamte Moreh a tun phet un Border Pillar No. 23 omna Hollenphai mun pha pah uh a,huai khua ah Myanmar officialte’n Myanmar gamsung a om hi a pangin dai(fence) a bawlna mun uh enkhia uhi. Border pillar kiphuhna mun Central official te’n a etchet ua leh ginlelhhuai sakthu gen pah uh a, huaizawh in Border Pillar no 77 omna mun enkhe nawn uh a, Central official te’n Border pillar omna mun akipan Myanmar gamlam yard 130 a lut thukzaw a phuh ding hizawdan a thei uh hi’n kigen hi. Huaikhit in Border Pillar 78 omna Tamil Sangam fencing omna bul a etkhiakna uah huai leng diklou dan in thei uh a, Tamil-mi upa khat in fencing mun leng Myanmar gamsung lam metre 300 ah suan ngai hi’n gen chihthu om hi.

Central team in Muslim Basti, Moreh, a Border Pillar 79 kiphuhna mun a et ua leh huai leng tuma sawtlou a kiphut hidan in theikhia uh a, Border Pillar 80 leng Govajang village laizang a gamgi paidana a om ziakin huai leng diklou ding hi’n ngaihdan gen uh chih ahi hi. Centre official te’n Border Pillar 79 leh 80 a kimuhlouh ziakin gintak thu a fencing bawl a om hidin ngaihdan gen uhi. Sambhu Singh in border fencing leh border pillar thu issue 2 hi’n gen a, Centre in thil omdan ngai serious mahmah ahihman in huai thubuai a fel masiah fencing nasepna khawlsak hiding chi’n gen hi.Aman a gendan in India leh Mytanmar official-te kimuhkhawmna hun ah thudik pansan a report omte genkhawm hiding chi’n leng gen hi.

Tuni a Central official-te lakah Border Management a Joint Secretary SK Mishra, BRO Project Sewak Chief Engineer VK Agarwal, Surveyor General of India Director Srinivas leh Assam Rifles official-te tel uhi.

Mizoram akipan mi 160 vel Israel ah pemlut ding
Aizawl, Dec-7: Israel nam mangthang(the Lost Tribe of Israel) kichi Bnei Menashe community atel Juda sahkhua zui Mizo Jews mi 160 in December 2013 sungin Aizawl nusia in Israel gam ah pemlut ding uh chihthu om hi. Amau bana batch-te kumthak 2014 bulin Israel a pemlut ding uh hi’n Bnei Menashe community akpan thutut kingah in gen hi.Mizoram leh Manipur a Juda sakhua zui Jews 889 vel Israel gama pemlut dingin Israel Govt a Interior Ministry in pom uh a,huaite laka masa ding Mizo Jews 160 te tu December 18, 2013 velin pemkhe masa ding uh chih hi.

Mizoram akipan Israel gama pemlut masa dingte News Delhi ah ni bangzahhiam sung gamdang a pemlutna ding lehkha tuamtuam ngakna in om tuantual zek ding uh a,Dec 24, 2013 in Delhi akipan lenna a lengkhia in azing in Israel gam tung ding uh chih ahi hi. Israel gama pemlut ding mi 889te group 4 a khen hiding uh a,Manipur akipan pemlut dingte’n kum 2014 bul lam in Manipur potsan ding uhi. Mizoram akipan pemlut dingte Israel gam mallam bialah khawsa ding uh a, huaizawh in Manipur apan pelut dingte ban ate bel kum 2015 chiangin pemkhe pan ding uh chih ahi hi.

Israel based Jewish organisation ‘Shavel Israel’kichi leitung gam tuamtuam a Israel nam mangthangte suipawl kichite’n Mizoram leh Manipur a Jews omte Israel ah a pemlut theihna ding uh travel document adiakin passport leh via banah paina ding tanpha buaipih uh hi’n kigen hi.Mizoram akipan Israel a pemlut nanungpente kum 2006 in pemlut uh a,Manipur ate kum 2007 ahi hi.Northeast bal adiakin Manipur leh Mizoram akipan Jews(juda sahkhua zui) mi 3,000 val Israel gamah pemlut khin uhi.

SUMKONG Bazar honna om
Lamka, Dec-7:Tuibuong bazar a KSO complex ah tuni zinglam in SUMKONG bazar kibawl Langkhanpau Guite, Chairman ADC/CCpur khuallian apang in hong a, Rev Hemjalen Doungel in Pathian kiang ah lan hi. Huai ah Guest of Honour in Demmang Haokip,Vice Chairman, ADC/CCpur leh Ngamhao Touthang, MDC pang uh a, Chief Host in TN Haokip, MLA(Saikot A/C) pang hi. Special Guests in Lunminthang Haokip, IAS, Director(Tribal Affairs&Hills) leh L.Mangkhogin, IPS,SP/CCpur pang uhi.

Chief Guest in Lamka ah bazar tuamtuam- Old Bazar, New Lamka a Damkam bazar om mahleh private a hi a, New Bazar a Super Market leng a sawngah kuamah tu nuamlou hi’n gen hi. Lamka business control-tu singtangmi hilou uh a, tunung hun ah singtangmite mah a control apan poimawh hi’n gen hi

Socio-economic development Orgn. (SEDO) etkaina nuai ah Oct 21, 2013 in Sumkong bazar nasepna kipan a, ni 45 sung nasep nung in tuni’n honkhiat in om hi. Bazar bawlna ah Rs.34.49 lakh vel bei a, toilet zawhsiang hinailou hi. Sumkong bazar letdan area 9500 sq feet hi a, asung ah room 28 om a, huaite ah nikte’n puansilh telin thil tuamtuam zuak hiding hi.

Central team in Hospital enkhe ding
Lamka, Dec-7: Dist Hospital ah damlou tamluat ziakin lupna omte kidaihzoulou in damlou hunkhop varandah ah lum mai uh a,huaiziakin Dist Hospital leng 100-bedded akipan 150 bedded a keklet ding proposal omtawh kisai in Regional Research Centre, Guwahati apan Central teamte’n Dec 11, 2013 in Dist Hospital enkhe ding uhi.

GBC ah Graduation Service om
Lamka, Dec-7: Grace Bible College (GBC) campus ah tuni in Graduation Service 31veina om a, Rev Dr Richard Howell, General Secretary, EFI in graduate thakte hasotna thugen hi. Rev. Dr. Kamkhanthang, Principal, GBC in graduate thakte degree pia a , Rev.S. Vungminthang, General Secretary, EBC in graduate thakte thumsak hi. Tukum in GBC ah akigawm in mi 54 graduate uh a, huaite Master of Divinity 17, Bachelor of Theology 32 leh Diploma in Theology 5 hi uh a, amaute Rev K.Kamchinkhup, Director of Ministry, EBC makaih in Award & Gift piak hi uhi’

Seminar on Micro Finance Approach
Lamka, Dec-7: Tribal Reseach Institute (TRI) akipan huhna tungtawn in MHJU saina in Dorcas Hall campus a Dorcas Guest House ah tuni in ‘One Day Seminar on Micro Finance Approach’ om hi. Programme kipat hun ah Maniram Sharma, IAS, Addl DC/CCpur khuallian in pang a, Guest of Honour in Khaikhopau Ngaihte, SDC BO/DC’s office/CCpur leh Functional President in Ramngaining Zimik, A/O, Tribal Reseach Institute pang uhi.

Seminar hun ah Abhinanda Jha, Chief Manager, UBI/CCpur Branch; S. Kaikhanthang Ngaihte, Chief Manager, SBI/CCpur leh Khaisiamlal Guite, DGM/NABARD in thupi tuamtuam zangin sinsak uhi.

CDSU in mawhpaih thu puang
Lamka, Dec-7: CCpur Dist Students Orgn(CDSU) in Kom Students Union Manipur(KSUM) President Shonkholien @ Mark Kom pimang a soisate mawhpaihthu puang uh a, meltheihlouh te’n poikhoihlou a soisakna uh mawhpaihna sangpen puang uh hi’n taklang uhi. CDSU in orgn tuamtuamte kiangah leng ngetna bawlin, hibang gamtatnate tawpsan dingin ngen uh a, tuabanah Dist. Police-te’ ahuntak a a gamtat ziakun leng pahtak thu puang uhi.

EBC Kumsim Khawmpi 65veina kipan
Lamka, Dec-7: Hiangtam Lamka a EBC biakinn ah tuni nitak dak 5:30 in Evangelical Baptist Convention (EBC) Kumsim Khawmpi 65veina kipan a, Rev L.Kham Kho Lun, Director (Missions) in hong hi. Tunitak in Pastor telna om hi. Pastor 7 kitelte-T.Dinkhansuan of Hebron Veng, New Lamka; V.Pauthianmuan of Pethuel, New Lamka; K.Paulianmung Mimbung, H.Chinkhanlian of D.Phailian; B.Goutunlian of Bungmual; S.Khamzalam of Vengnuam, New Lamka leh Vanlalhminglian Guite of Zenhang Lamka hi uh a, amau kum 1 sung Pro-Pastor semkhin uh a, zingchiang in Pastor Ordination hiding uhi.
Rev S.Vung Minthang, Gen. Secy EBC in Annual report pia a, EBC Cenus 2013 dungzui in inn 10131,saptuam 173 , milip 58922 (pasal 28910 leh numei 30014), Saptuam dan zoukim 33888, Pastor semlel 100, Missionary Pastor 26, EBC semtu 336, mimal a Missionary vak/chawm 9519, upa ordain 858 pha a, kum 2013 sunga naungek piangzah 829, misi 281, piangthak 2206, baptisma tang 1384 om hi. Khawmpi sungin Rev Dr Richard Howell, General Secretary, EFI leh Rev Dr Ginnei Thang Ngaihte, OMF, International, Bangkok in thugen ding uh a, Rev Dr Ginnei Thang Ngaihte in Bible study ah makai ding hi.

ASHA Day &Annual Untied-fund hawmna
Lamka, Dec-7: Singngat Community Hall ah Dec 10, 2013 in ASHA Day-cum-Distribution of Annual Untied Fund hawmna program omding hi. Huai ah Ginsuanhau, MLA (SIngngat A/C) leh Lalrobul Infimate, SDO/Singngat te’n program uap ding uh a, Singngat Block nuai a ASHA te kiang ah Annual Untied Fund hawmkhe ding uhi.

KSO leh School neite kimukhawm
Lamka, Dec-7: KSO/CCpur dist. leh educational institution makaite Dec 6, 2013 in kimukhawm uh a, siamsinna ah student orgn tawh pangkhawm dingin kithukim uhi. KSO thusuakin a gendanin education tawh kisai a KSO tawh pangkhawm in maban hoihzaw bawlkhiak ding, tulela society in ‘multi-polar education system’ a poimawh bang a nasep khawm ding, discipline, dress code leh student-te’n gari a zat uh tungtang KSO in draft code of conduct abawlte school chih in zuihchiat ding chihte kithukim uhi. Huailou in naupangte laka Gang group omte leh khamtheih tawh kisai thilhoihlou omte KSO in khawtang hoihna dia khauhtak a etkai dingin leng thukim uh, chi’n thusuakin taklang hi.

Dist Level Media Panel discussion
Lamka, Dec-7: National Rural Health Mission /CCpur tungtawna scheme tuamtuam omte tuni sunnung in Dist Hospital a Seminar Hall ah Dist Level Media Panel discussion om a, huai ah Dr H.L Liensang, CMO/Dist Mission Director/CCpur makaih in Dr N. Paul Ginthang, Med Suptd/Dist Hospital, Dr VC Pau Tonsing, DFWO/DNO (ASHA/JSY/JSSK) , D.Khuala Vaiphei, DPM, NRHM/CCpur leh Vung Mary, DCM, NRHM/CCpur tel uhi. Huai hun ah JSY leh JSSK tawh kisai mipi’ theih chetding in hilhchian uhi. JSY nuai a hamphatna tuamtuam omte- nupi naupai(pregnant) te’n Dist Hospital ah ANC 3 vei check-up ding, Dist Hospital a nau neite’n damdoi man din Rs.700/- ngah ding uhi. Nupi naupai PHC khat peuh a registered kibawl, inn-mun ah nurse te’n nau aneihsak (home delivery) te’n damdoi man in Rs.500/- ngah ding uh a, Dist Hospital a naunei ding operation kibawlte’n damdoi man in Rs.1500/- ngah ding uhi. Nupi naupai(pregnant women) te ASHA member te’n ANC check-up 3 veitan neihpih a, ANC card ah ASHA te’n signature abawl uh leh kipahman Rs 300 leh Dist Hospital/govt Institution a nau neiding atonpih ua leh kipanman Rs 300 ngah beh ding uhi. Nidang in JSY hamphatna ngahte nau 1 leh 2na tan himahleh tuchiang in ANC 3 vei a check-up uleh ta neihzah bikhiah leh kum bikhiah om lou in JSY hamphatna ngah ding uhi.

JSSK tawh kisai Dist Hospital in Pharmacy 3- Emmanuel Medical Store; Emergency Pharmacy leh L/K Pharmacy ah damdoi lei in govt in Rs.350 tan re-embursement peding hi.

IMPHAL NEWS
Minister-lui Ibotombi sih champha kizang
Imphal, Dec-7:Thoubal district sung Heirok ah tuni in M. Ibotombi Memorial Trust-te saina in ex-Minister Moirangthem Ibotombi sih kum 19 chinna zang uh a, Chief Minister O. Ibobi in leng huai hun va-uap hi.Aman a thugenna ah mi’n thil a hihkhelh aleh a bawldikna ding hun pelou a thah kichi mawhpaihhuai pen hi’n gen a,mihing kuamah a bukim omlou a, thil hihkhial thei chiat mah i hi chi’n gen hi.M. Ibotombi Singh bel Education, CAF & PD Minister Okendro’ pa ahi hi. Tuni a hun zatna ah Chief Minister, Council of Ministers, MLAs,VIP leh mipi paikhawkte’n M Ibotombi’ statue ah zahna in pak(wreath) leh thlpiak tuamtuam koih uhi.

Plan sum laka 85% zang theilou
Imphal, Dec-7:Tu financial year 2013-2014 kipatnung kha 8 tan bei mahleh Manipur govt in Plan sum bikhiah Rs. 3650 crore lakah tuni tan in 85% leng zang nailou hi’n kigen a, huchi kalah deptt khenkhat in gentham chinglou khop a tawm zangpan uh hi’n kigen hi. Hiai thu Finance Minister hihna tawh lenkhawm Chief Minister O Ibobi makaihna in CM Conference Hall ah Plan Review meeting ah Chief Minister in hiai thu theikhia hi’n kigen hi.

Plan Review meeting ah Minister-te, Chief Secretary, Manipur DGP banah deptt tuamtuam a Commissioner, Secretary leh Heads of deptts tuamtuam tel uh a, CM in deptt tuamtuam a Head tengin a nasepna progress uh hatsak chiat ding leh financial year beima ngei in Plan sum omte ahiding bangtaka zangchiat ding leh huai din na semkhe chiat dingin thupia hi.

ICP nasepna khawlsan din theisak
Imphal, Dec-7: Central official-te leh Manipur a All Political Parties palaite’n gasmgi suangphuh(border pillars) border fencing enkhe dia Moreh a phakma uh dakkal 2 velin Tamu a om Myanmar official-te’n Moreh vapha in huai khua a Integrated Check Post(ICP) kibawl nasepna khawlsak dingin theisak uhi.

Tuni zinglam dak 10.00 velin Tamu(Myanmar) akipan DC, SDO leh SP in Moreh vapha uh a, ICP kibawlna mun Myanmar gam hi a genkawm in nasepna khawlsan ding in theisak uhi. Huai phet in Balaram,MPS, SDPO/ Moreh in thuneitu sangzawte akipan thupiak om ziaka nasep hi a gen in huaite apan thupiak tellou in nasepna khawlsan theih hilou ding chi’n gen a, huai takin Muanmar official-te leng Tamu ah kiknawn uh chihthu om hi.

Editor’s Guild Manipur bawlkhia uh
Imphal, Dec-7 : Manipur a Editors tengin tuni’n Hotel Classic a kimukhawm in “Editor’s Guild Manipur” kichi bawlkhia uhi. Amau media sungah kuamah khentuam omlou ahihdan genkhawm uh a, makai ding leng tel uhi. Manipur ah freedom of press hoihtak a zat theih ding dan telin thu tuamtuam leng genkhawm uh a, President ding in Sanaleibak Editor-lui Ahongsangbam Mobi telching uh a, General Secretary dingin Yumnam Rupachandra tel uhi.