Health Minister in Lamka a District Hospital enkhia

Lamka, Oct-16: Phungzathang Tonsing, Minister (Health & FW, GAD, CADA) in tuni zinglam dak 9:40 in Lamka hong pha in Dist Hospital dinmun enkhia hi. Minister in Blood bank, CT Scan machine, Solar Power plant, building kibawlthak te, DFWoffice leh Dist Hospital morgue a lampi ding enkhia hi.
Health Minister in agenna ah Khengjang Power Sub Station akipan Dist Hospital ah dakkal 24 sung electric power supply ding ‘dedicated line’ nasepna pailel a, tukha sunga zawh hiding in gen hi. Aman agenbehna ah CT scan tawh kisai report diklou tamtak om a, tuni’n amun mahmah a hong enkhia in machine part 1 /2 omloute ngaihtuah pah hiding chi’n gen a, Oct 17, 2013 akipan zattheih dinga koihdin akisaipite thupia hi’n gen hi. Dist Hospital ah lupna 100 om mahleh damlou mi 200 phial om gige a, huaiziakin govt in lupna 300 tan om dingin upgrade ding chi’n gen hi.
Minister in Dist Family Welfare office leng building thak lam hidin gen a, Dist Hospital morgue lampi ding leng CMO leh Med Suptd in gam(land) donate khawm a, Tipaimukh Road apan direct a lutsuakding lampi bawl hidin gen hi. Dist Hospital building kibawlthak honkhiat naihlouhte room partition omteng lakkhiat a, damlou omteng kimusuakvek ding a bawl hiding in gen a, huai zawhsiang ahihna ding in kha 1 vel lutding hi’n gen hi. Dist Hospital ah tui kiningching tak om theihna dingin nasepna pailel hi’n leng gen hi. Dist Hospital a semtu leh doctor-te kuaman hihbuailou ding leh mipi’n kituahpih ding in ngen hi. Dist Hospital ah numei doctor (Gyaneacologist) taksap ziakin tuni’n Dr. Imochaobi in hong join chi’n leng Minister in gen hi.
Health Minister in Blook Bank ah Donor’s room, refresherment room, Labolatory Room leh Bood Storage room ah Oct 17, 2013 in AC khat chiat koihvek ding in akisaipihte thu pia hi. Dr A.Bijoy, Director Health Services kiangah CT Scan leh building partition hihsiat a bawlthak ding in mawhpuakna pia a, Dr Ibomcha, Director FW kiang ah blook bank tawh kisai mawhpuakna pia hi. Imphal akipan Dr A.Bijoy, Director , Health Services; Dr Ibomcha, Director, FW, Dr Surchand, Dy Director, Health Services; Rowat Kumar, Drug Inspector leh A.Atom, SE (Electricity) te’n Minister hong zui uh a, Lamka ah EE/Electricity leh a staff te, CMO, Med Suptd/ Dist Hospital leh a staff-te ban ah SDO/CCpur te’n kithuahpih uhi.

Mizo Literature Society,Manipur -Golden Jubilee lopna om

Lamka, Oct-16: Mizo Literature Society, Manipur(MLS-M) kiphuhkhiat nung kum 50 chinna ‘Golden Jubilee’ tuni zinglam dak 10.30 akipan in IB road a Synod Hall ah lopna om a, Lungmuana, IAS, Commissioner (Vety&AH) khuallian in pang a,aman Souvenir leng hong hi. Huai ah ‘Jubilee pa’ MIL-S founder President H. Darkhuma pang a, Chief host in Upa M.B. Sanghnuna, Chairman, MLS (founder Secretary) pang hi.Jubilee lopna in teltuam mi bangzahhiamte’n Jubilee dakpi 50 vei khen ging uhi.
Khuallian Lungmuana in agenna ah MLS-M te’n na tamtak semkhia in student-te ading syllabus a buaipih uh pahtakthu gen a, Golden Jubilee loptheih ahih leng makai masate ziak hi’n gen hi. Nam kibawlkhiatna ding in ‘pau’ poimawh a, ‘pau’ hausate literature hausa hi uh a, khawvel pumpi ah English kingai sangpen a,huai leng literature ah a hauhsak ziak uh hi’n gen hi. Literature hatsemna dingin laigelh leh ‘la’(song) kiphuakte gelhkhiat poimawh chi’n gen hi.
Hmar Literature Society, Paite Literature Society leh Thadou-Kuki Literature Society makaite’n leng huai hun uap in thugen uhi. MLS-M Golden Jubilee ding tawh kisai essay writing ah mi 5 tel uh a, Upa L.Lalropianga in 1st la in kipahman Rs 4000/-mu a, Lalhmachhuana in 2nd hihna la in kipahman Rs. 3000/- mu hi. Lalhmingliana Torrel in 3rd hihna la in kipahman Rs 2000 ngah a, kipahmante khuallian in pekhia hi.

One day District Level Seminar om

Lamka, Oct-16: Manipur State Co-op Union-te’saina in tuni in B.Vengnuom Community Hall ah ‘Participation of Youth as Co-operative Workers will enhance the Co-operative movement’ chih thupi a nei in ‘One Day District Level Seminar’om a, TN Haokip, MLA (Saikot A/C) khuallian apang in hong hi. Huai ah Functional President in L.Tompishak, President, Manipur State Co-op Union pang a, Guests of Honours in Demmang Haokip, Vice Chairman ADC/CCpur; Kaikhankap, DCO/CCpur leh Jamkhosei Baite, retd DCO/CCpur pang uhi.
T.N Haokip in agenna ah midang te’n Co-operative Society a zatdan uleh eite zatdan kibanglou hi’n gen a, eilak ah mimal asai tamlua hi’n gen a,khantouhna dinga zatding hizaw in gen hi. Manipur ah society paidan khekngai om a, society hindan i siam kei leh khangtou ngeilou ding i hihziak un society bawlhoih masak poimawh chi’n gen hi.
Sunnung a technical session ah Kh.Tomba, DCO/Bishnupur; Y.Ningthemba Singh, DCO, Imphal West leh K.Joychandra Singh, Reporter te’n sinsak uh a, mi ahunkhop tel uhi.

Chairman ADC in Laibu hongkhia

Lamka, Oct-16: Elder Lienkhopau Thangjom in abawl ‘Hetkimna Bu (Encyclopadia in Gangte)’ kichi tuni in Chiengkonpang a a tenna in ah Langkhanpau Guite, Chairman ADC khuallian apang in hongkhia hi. Huai ah Guest of Honour in Kamsuanlun, EM/ADC pang a, S.Thienlaljoy Gangte, SDO/Thanlon leh Rev Dr Luaichinthang, President ZOLLS te’n leng uap uhi. Chairman ADC in agenna ah mi tengin laibu gelhtheihlou a, Pathian in talent apiakte kia in gelhthei hi’n gen hi. Literature masawnna din laibu gelhtute’n a tamtheipen gelh dingin leng hasuan hi.

YMA General Conference
Lamka, Oct-16: Mizoram state sung Khawbung ah zan akipan in Young Mizo Association 68th General Conference om a, Oct 17, 2013 tan sunzom ding uhi. Huai ah YMA Manipur Group a President Mangcha Thangjom makaih in mi 55 in Tata Sumo 6 zang in General Conference ah vatel uhi.

Police-te’n Special drive pan uh

Lamka, Oct-16: SP/CCpur apan thupiak dungzui in tuni’n Police, Traffic Police leh VDF te’n khawpi sung mun 4- Lailam Lei (bridge) gei, CCpur College kong, Nehru Marg-Rengkai Road junction leh Dist Transport Office kong ah special drive pan uh a, Oct 18, 2013 tan sunzom ding uhi. Huai ah driving licence leh gari RC book check uh a, gari ah ‘A/F’ kigelh te, kumchinglou a gari hek, helmet khulou leh zu/khamtheih khamkawm a gari hekte check uhi. Mi hunkhop matkhiak hi uh a, huaite TR-5 cut in liausak uhi.

Apaneu in thil omdan hilhchian
Lamka, Oct-16: Thangkhankhup (40) s/o SK Ngaihte of Lower Chapellane tulelin Dimapur, ah Union Bank of India Probationary Officer semlai zan zingsang in bathroom ah pukphut in si chih kigen vengvung tungtang ah tuni’n a paneu S. Ngulzamang in thil omdan gen chian a, bathroom sunga si hilou in lupna tunga lumkawm a si hi’n gen hi.Thangkhankhup’ zi in a van uh la dinga Guwahati a a zinkhiak laitak tawh a kituah ziakin a paneu Ngulzamang leh azi in a etkol theih dandan ua a etkol uleh keplai ua si hizaw in gen hi.Huailou in apa SK Ngaihte in leng a tapa Thangkhankhup zunkhum damdoi insulin a kikap gige himahleh ni bangzah hiam kikaplou in omkha a,huaiziakin a zunkhum(blood sugar) sang gawp hidan in gen hi.

KFC Silver Jubilee celebration
Lamka, Oct-16: Khawvaiphei Film Company Ltd kum 25 a chin ‘Silver Jubilee’ lopna hongtungding Nov 29, 2013 in Lamka khawpi ah thupitheipen a om ding in kisakkholhna pailel hidan in Secretary(Organising Committ) KFC Silver Jubilee Celebration apan thusuak in gen hi.

Sept 30 a thiltung gen fel hita
Lamka, Oct-16: Secretary(Info & Pub)Vaiphei People’s Council(VPC) akipan thusuak in a gendan in Sept 30, 2013 in S. Munnuam khua a thiltung tawh kisai in Mangbeldam in Oct 16, 2013 zinglam dak 9.00 in KhatkhotongBaite,President, VPC Gen HQ tenna inn ah VPC Cabinet-te ma a thupha chawina’n salam sat in buaina tawh kisai a kitheihsiamlouhna omte hihfel hita a, tuban huaithu tawh kisai kuama’n bangmah gen nawnlou ding in thutawpna bawl hita chih ahi hi.

SUUNNA
Mrs Niankhongai (90) m/o Thangkhanmuan of Khominthang, New Lamka zan nitak dak 10:00 vel in teknat in si a, tuni’n YPA Hanmual, New Lamka ah kivui hi.
Thangkhankhup(45) s/o SK Ngaihte of Lower Chapel Lane,Hiangtam Lamka tulelin Union Bank of India a Probationer Officer sem a Dimapur a om ataksa damlouh ziakin zan zingsang baihtaka si aluang tuni sun dak 12.10 in Lamka hong kipawtung a, nitaklam in Lamka hanmual ah kivui hi.

IMPHAL NEW
KIM in Manipur govt mawhpaih
Imphal, Oct-16: Kuki Inpi Saikul Gamkai (KISG) leh Saikul Area Naga Peoples Organization (SANPO) ngetna limsaklou chi’n Kuki Inpi Manipur (KIM) in Manipur govt mawhpaih hi. KIM General Secy Khaimang Chongloi in tuni’n a genna ah Indian constitution nuaia article 371(c) dungzui in Hill Area Committee (HAC) theihpihna tellou in a state govt in thutanna bawl theilou himahleh Home deptt in HAC theisak masalou in June 2011 in Senapati district sunga Saikul Gamkai leh Ukhrul district a khua 120 te Imphal East leh Thoubal dist adingin suan uhi. Govt. thilhih kintaka khawlsak dingin KIM in ngen a, khua 120 suankhiak KIM in pom ngeilou ding hi’n leng gen hi. KISG leh SANPO te’n Senapati district sungah dakkal 48 sung bandh a puan uh bei ding himahleh tutan a state govt a daih dide mipite’ adia vangtah huai hi’n KIM Gen. Secy. in taklang a, state govt. in hiai tawh tawh kisai a thupukna alak kin keileh thiltung dingte’ mawh a kipuak ding uh chi’n leng taklang hi.

Tuni in Eid-Ul-Zuha zat in om
Imphal, Oct-16: Muslim sahkhua zuite’n adia hun poimawh Eid-Ul-Zuha tuni’n Manipur a om Muslim-te banah Meitei-Pangal te’n leng zang uhi. Governor leh Chief Minister in leng deihsakna thuchah a bawl ban uah Manipur a mi poimawh tamtak in leng Manipur gamsung ah ki-itna, ki-lainatna banah kituahna omna ding deihin mipite’ kiangah ngetna bawl uhi.
Eid-Ul-Zuha ziakin tuni’n Manipur govt nuaia office teng kikhak(suti) a, Imphal akipan suak Newspaper office teng leng tuni’n a kikhak ziakin Oct 17, 2013 issue Newspaper teng suaklou ding chihthu om hi.

Educational tour dingte flag-off

Imphal, Oct-16 : Commander, 10-Sector Assam Rifles a Brig. AK Pandey in zan in Shangshak a govt High School student-te Delhi a educational tour a zinkhe dingin khakhia(Flag-off) hi. Huai govt H/S, Shangshak education tour bel Op Sadbhavana Project tungtawn a 16- Assam Rifles te’n a sponsored uh ahi hi. Huai tour ah student 28 leh teacher 3 tel uh a, amau Delhi ah Red Fort, Raj Path, India Gate, Jantar Mantar, Rashtrapati Bhavan, Qutab Minar, Lotus Temple, Raj Ghat, National Zoological Park leh mun dangdang en ding uhi.
Manipur ah security khauh
Imphal, Oct-16: Indo-Myanmar gamgi zulah helpawlte om ziakin security hihkhauh in om a, security force tamkhop in gamgi km 396 asau enkai lel uhi. Helpawl khat in Assam Rifles personnel-te leng attack bawl ngei uh a, himahleh Seppatni a thiltun hun in pawl nihte lakah aliam omlou hi’n kigen hi.

Traditional boat race kidemna om

Imphal, Oct-16 : Kumtenga kizang gige ‘Heeyang Tanaba’ kichi traditional boat race tuni in Mera Houchongba Thousil Lup-te saina in Imphal Wangkhei Thangapat mun ah om hi. Huai traditional boat race bel Oct. 19, 2013 a Mera Houchongba festival om ding tawh kisai a neih hidan in kigen hi. Hiai hun Manipuri filmstar RK Kaiku leh Rojesh Saikhom te’n leng uap uhi.

Numei vualphalou sual
Imphal, Oct-16: Imphal east district sung Lamlai PS bial Tangkham Awang Leikai ah pasal zi neisa kum 42 mi in numei kum 22 mi vualphalou sual(rape) hi’n kigen hi. Police thusuakin a October 11, 2013 a thiltung hi a, Manipur pansan NGO’ Relief Centre pawlin thiltung buaipih in amun ah suichian uhi. NGO-te kianga numei in a genna ah Laishram Joykumar(42) kichi in a innkuante omlouh hunlem a la in innsung a valut in sual(rape) chi hi. Thusuakin a gendan in numeinu leh a sualtupa tanau nai mahmah uh hi’n gen hi.

National Sepaktakraw ah
Manipur in champion hihna la
Imphal, Oct-16: Kohima a Indira Gandhi Stadium a 24th National Sepaktakraw Championship 2013 ah Manipur in numei leh pasal category ah vualzou in Chsampion hihna la uhi. Pasal final match ah Manipur in Delhi zou a, Manipur women` teamte’n leng Nagaland teamte zou uhi. Nagaland leh Uttar Pradesh men`s team semi-final ah Manipur leh Delhi zoulou uh a, Women`s section ah Odissa leh Assam in Manipur leh Nagaland zoulou in semi-final match ah a vuallelh ziakun 3rd ah pang uhi. Huai championship bel Nagaland Sepaktakraw Association (NASTA) in Sepaktakraw Federation of India (STFI) leh Department of Youth Resources and Sports, Govt of Nagaland huhna zanga a sai uh hi’n kigen hi.

Gari gu mi 3 matkhiak in om
Imphal, Oct-16: Imphal East Narcotic Cell te’n Imphal area a gari gutu mi 3 mankhia uh a, amaute Noren (20) of Chingku Mamang Leikai, Mohammad Atomba (23) s/o (late) Md Basi leh Irompathou (23) of Yaorabou Mamang Leikai hi’n kigen hi. OC in tuni a Press-te ma a pulak kawm in a enna ah amaute tuma in leng guktak ziak leh helpawl a member hihziakin jail tanpha tang ngeita uh a, gari tamtak mang ahihdan leng report om ziaka matkhiak hi uh chi hi.

Awareness Campaign on HIV/AIDS
Imphal, Oct-16 : Manipur State AIDS Control Society(MACS)-te sponsored na a Imphal Block YPA te saina in tuni zinglam dak 11:00 apan in YPA Hall, Paite Colony Laimainai, Imphal West ah ‘One-Day Awareness Campaign on HIV/AIDS, Hepatitis B & C and Blood donation programme’ om hi. Huai hun ah resource person T. Benzamin, DIS, DAPCU; Dr. T. Vumchinpau, DFWO, CCpur leh Dr. T. Kambiakdik, MD student RIMS pang uh a, mipi tamtak tel uhi.

World Food Day zatna om
Imphal, Oct-16: Hotel Classic ah tuni’n 35th World Food Day kizang hi. Huai hunah O Nabakishore, Principal Secy banah Commerce & Industries, Animal Science lam apan official-te banah official tuamtuam leng tel uh a, official website leng hongkhia uhi.