NEC Adviser hongzin ding
Lamka, Oct-10: NEC a Finance Adviser G.K Chin,IP & TAFS in Shillong apan Manipur hongpha ding a, Oct 12, 2013 zinglam dak 9:00 velin Lamka hongpha in JNV/Tuinom ah water supply tawh kisai enkhe ding a, Imphal apan official hunkhop in hongzui ding uh chi’n kigen hi.

Lamka leh Delhi ah hon hiding
Lamka, Oct-10: S Chingnu in "Kon ngilhzou diam" chih DVD album a bawlthak Oct 11, 2013 in mun 2 ah honkhiak hiding hi.SYO Hall, Simveng ah nitaklam dak 3.00 in K. Vungzalian,ex-Minister in hongkhe ding a, Delhi a JNU SSS-I Auditorium ah nitaklam dak 6.15 in LT Ngaihte, IFS in hongkhe ding hi. Huai album kum 2010 vela recording kibawl hi a, la tuamtuam 10 kikhum hi’n kigen hi.

DC’ makaih in certificate kihawm
Lamka, Oct-10: Skill Upgratation Training Programme Committee saina in tuni in New Lamka, Zion Veng a Alpha Trailoring Training Institute ah kha 3 training ding hun honna leh certificate hawmkhiatna om a, Ms Jacintha Lazarus, IAS, DC/CCpur khuallian apang in training ding hong hi. Huai ah Functional President in Saheb Singh, Zonal Director NYKS, Manipur Zone pang a, Guest of Honour in Thangboi Haokip, Asst Co-ordinator, IGSSS pang a, Chief Host in M.Gouzamang, EM, ADC pang hi. Huai hun ah ATTI a 1st batch training zou mi 27te kiang ah DC’ makaih in khualliante’n certificate hawmkhia uhi.

CCpur dist ah sepna zong 69,010 om
Lamka, Oct-10: District Employment Exchange/CCpur ah August 2013 khabei tan i sepna deih ziaka min pelut mi 69,010 pha a, huaite lakah pasal 51,196 leh numei 17,814 om uhi. August,2013 khasung a min pelut thak 43 hi uh a, huaite lakah numei 20 leh pasal 23 tel uhi.

RSBY card hawm sunzom ding
Lamka, Oct-10: Vungzagin Valte, MLA(Thanlon A/C) & Parliamentary Secy tenna inn Dorcas Veng ah RBSY/National Health Insurance Scheme adia lim kilate lakah tuni in RBSY (smart card) hawmkhiak hi a, applicant 800 vel lakah mi 500 in vala uh a, adang 300 te PRO to MLA Chinkhanmang Ngaihte’ tenna inn, Sahei Road bul, New Lamka ah hawmkhiak hiding a, lem kila kuapeuh in ngaihven dingin a saite’n theisak uhi.

HM English School ah Cultural Program
Lamka, Oct-10: Leijang khawpi a om H.M English School ah tuni zinglam dak 10:00 apan Cultural Day zang uh a, Demmang Haokip, Vice Chairman ADC/CCpur khuallian in pang hi. Cultural Day hun ah student-te, teacher leh staff te’ mahni cultural dress in kicheivek uh a, Manmasi Cultural Troupe leh student te’n cultural dance lahna nei uhi. Khuallian in HM English School a student-te tunung a mahni culture hoihtak tawh khanglian ding uh hi’n gen a, school kichi mawka bawltheih hilou in laisiam ngai hi’n gen hi. Student-te lak apan IAS, IPS, IRS, MCS telin officer lian taktak hong omkhiat chiang in teacher-te nasep gah hiding a, huai ding Nam inleng ngaklah hi’n gen hi. Principal Mangcha in tuni a Cultural Day kizang pen tunung a student te’n custom & culture dettak a neihna ding ua kizang hi’n gen hi.

Footpath ah gari koih leh vanzuak omlou di’n ngen
Lamka, Oct-10: Lamka khawpi a Tedim Road lamsak leh lamkhang a footpath mi khenkhat te’n meh leh van zuakna in zang nei uh a, mi khenkhat te’n gari neu(2-wheeler) koihna in zang uh a, footpath tungah khe a paite adin nawngkai mahmah hi. Tuban kuama’n footpath tung ah meh leh van tuamtuam zuaklou ding, kuama’n 2-wheeler gari koih nawnlou ding leh footpath tungah kuama’n tuipuan/silpauline khuhlou dingin Traffic Police te’n ngen uhi. Oct 14, 2014 apan footpath tung a gari koih, meh leh van zuak teitei leh paina ding dongkholh a tuipuan/silpauline khuh teitei te’ TR-5 cut a liausak hidin gen uhi.’

Teacher 140 velin ngaihven gai
Lamka, Oct-10: Computerization of Paybill tawh kisai Directorate a MIS select bawlte’n CCpur dist apan teacher 140 val object uh a, huaite list ZEO office a Notice board ah takkhiak hi a, akisaipihte’n document poimawhte tawikawm in ngaihven a, saifel kin poimawh chihthu om hi. Teacher 140 vel te’n Computerization of Paybill ahihfel pah kei ualeh Sept 2013 khalawh la theilou ding uh hi’n kigen hi.

Police te’n Bike gu 3 mankhia
Lamka, Oct-10:Police apan kizadan in Oct 6, 2013 nitak dak 9:00 velin Axis Bank gei, Tedim Road ah Lalnuntluanga (25) s/o Siamawi of IB Road in a zatlai Yamaha R-15 , No. a A/F kigelh, Chesis No. ME11CK042D2003128, Engine No. 1CK4003134 (red & white colour) gutate’n gumang uh a, Police te’n hahtaka suizui in zan nitaklam in Yahama R-15 gutu mi 3- Md. Abdul Latif (23) s/o Md.Tayad Ali of Mantop Leikai; Ningombam Rajesh Singh (18) s/o N.Basanta Singh of Mantop Leikai leh Md.Ismail Ali (18) s/o Md.Pir Muhamad of Zenhang Lamka mankhia uhi. Police te’n tuni’n mi 3 te JMIC/CCpur court ah dingsak uh a, Court in Oct 12, 2013 tan Police custody a omdi’n phalsal a, Police te’n FIR No. 84(10) 2013 CCP-PS U/S 379/34 IPC registered uhi.

SUUNNA
Hatkhokim (77) w/o (late) Mangkholal of Gangpimuol zan nitak dak 9.00 velin sungna ziakin Dist Hospital ah si a, tuni in Gangpimuol hanmual ah kivui hi.

IMPHAL NEWS
64th Territorial Army Day zatna om
Imphal, Oct-10 : 1st Bn Manipur Rifles Banquet Hall ah tuni in ‘the 64th Territorial Army Day-2013’ zatna om hi. Huai hun ah Chief Guest in Chief Minister O. Ibobi pang a, Functional President in Deputy CM Gaikhangam pang hi. Chief Minister in Territorial Army te’ panlakna kipahpihthu genkawm in amau banglam peuhah army-te thuap uh hidan in gen hi. Territorial Army-te Manipur a hong om ziakun tuailai tamtak in hamphatpih uh a, mi nautangte leng humbit uh hi’n gen hi. Huai hun ah Territorial Army 165-Bn a CO Col. K. Bishwas leh a innkuante leng tel uhi.

Manipur ah sepna zong 6,93,177 om
Imphal, Oct-10: Manipur a Employment Exchange tuamtuam ah August 2013 tan in sepna deih ziaka min pelut teng kigawm 6,93,177 om a, huaite lakah pasal 4,95,283 leh numei 1,97,894 tel uhi. August 2013 khasung a min pelut thak teng 702 hi a, huaite lakah numei 358 leh pasal 344 tel uhi. Manipur district tuamtuam a sepna deih a min pelut zah tulelin Imphal west ah 1,81,502 (pasal 1,18,552 leh numei 62,948); Imphal East ah 1,10,618(pasal 17,779 leh numei 31,839); Thoubal ah 1,17,158(pasal 92,419 leh numei 24,739); Bishnupur ah 67,895(pasal 50,574 leh numei 17,321); CCpur ah 69,010 (pasal 51,196 leh numei 17,814) ; Ukhrul ah 27,138 (pasal 19,116 leh numei 8,022); Senapati ah 57,474( pasal 41,537 leh numei 15,937); Tamenglong ah 24,584( pasal 18,661 leh numei 5,923); Chandel ah 28,681 (pasal 19,740 leh numei 8,941); Physical Handicap registration kibawl teng 2,567pasal 1,730 leh numei 837) banah UEI & GB a registration bawlteng 6,300(pasal 2,927 leh numei 3,373) hi uhi.

Agri Minister in tuni’n District 3 veh
Imphal, Oct-10 : Agriculture Minister Md. Abdul Nasir in tuni in Imphal East, Imphal West leh Senapati District veh in lou munte enkhia hi. Aman lou bawlna munte etkhiakna ziak bel agri department in National Food Security Mission-Rice nuai a project a neihte sepsuahna ding tawh kisai hi’n kigen hi. Huai hun ah Minister in loubawlte nasepna lungtung mahmah ahihdan genkawm in buh tamsem piansak tupna ziakin hill areas-te special attention piak hiding chi’n gen hi. Senapati district Agri Officer M. Gogendro in Senapati District ah National Food Security Mission-Rice kichi kum 2012 in kipankhin hidan in gen a, lougam hectares 5 apan 10 tan a neih hidan in gen hi.

Medical treatment ading ngetna Oct 31, 2013 tan in submit theih ding
Imphal, Oct-10: Director of Tribal Affairs & Hills apan thusuak in a gendan in singtangmi damlou te’n Medical Treatment,2013 ading Financial Assistance ngetna form kimtaka fill-up in October 31, 2013 tan submit theih ding a, hun bikhiah bei nungin submit theih hinawnlou ding chi’n leng huai thusuak in gen hi.

Mi 7 lakah mi 5 zan in court ah kipia
Imphal, Oct-10 : PIB(Defence Wing) a PRO-lui Col Ajay Choudhury telin Rs. 25 lakhs man ding khamtheih tawh Pallel a matkhiaka om mi 7te Manipur High Court in Oct. 3. 2013 apan ni 7 sung in court ah kipekhe dinga thupiak a bawl tawh kiton in zan in ND & PS Special Court ah mi 7 laka mi 5 kipekhia uhi. Mi 5 kipekhiate Judicial Custody ah ni 15 om ding in ND & PS Judge incharge M. Ibohal in thutankhum hi. Zan a kipekhiate bel Colonel Ajay Chaudhury, Indigo Airlines Assistant Manager Ng. Brojendro, Army-men RK Babloo, Lunkhohao Haokip leh Seikholen Haokip hi uhi. Himahleh Jangmingthang Tuboi leh Letminlal Haokip kipekhe nailou uh chih ahi hi. Justice N. Kotishowr makaih Single Bench in Oct. 3 apan ni 7 sunga kipekheloute mat theih hidan in thusuah a, tuatawh kiton in ni 7 a chin chianga a kipiak khiak kei ua leh mi 2te mat hiding un kigen hi.

Tamenglong rape case hearing om ding
Imphal, Oct-10 : Tamenglong district sung Khoupum ah Oct. 5, 2012 a Latjanthai Kamei in numei naupang kum chinglou mi 4 pimang a a sualluih tawh kisai in Oct. 23, 2013 in a thu Session Court Manipur East ah hearing om ding in kigen hi. Latjanthai Kamei bel tu in Imphal Sajiwa Jail ah om a, aman Oct. 5, 2012 in Khoupum a Don Bosco School a kai numei kum chinglou 4 pimang in sual a, tua banah thah sawm zawmah chih ahi hi. Tu in Latjanthai Kamei kum 20 ching ding hidan in kigen a, Medical Board te’n naupang hinawnlou in kumching mahmahta hidan in report bawl uhi.
Thudang khat ah tuni in Imphal East Session Court ah Tamphasana Hr Sec. School a student khat sualluih tawh kisai hearing om hi. Hiai tawh kisai in mi sualluihtu Manipur Police Commando driver Yumnam William of Khagempalli Panthak leh Thongam Tarun of Thangmeiband Sinam Leikai te court a akilat phet in mipi thangpaiten suang (stones) khawng in deng uhi. Buaina om ziakin sutzop theihlouh in om a, Oct. 26 a hearing neih hi nawn din kigen hi. Thongam Tarun bel Manipuri Digital Film a actor leng hi a, mi 2te Sajiwa Jail ah om uhi.