Manager apan Sr.Manager in kaisang
Lamka, Oct-13: Siam Khuptong @ K. Nengliansiam s/o Upa K. Gouzagin of Mission Road, Hiangtam Lamka in North Eastern Electric Power Corpn (NEEPCO) a Manager (HR, Executive Level-5) semlai zanzek in Senior Manager (HR, Executive Level-6) in kaisang hi. Amah tulelin Nagaland a Wokha Dist sung Doyang Hydro-Electric Project a posting hi a, a kaisang tawh kiton in Shillong ah kisuan hi. Akigendan in Shillong ah posting mahleh a poimawhdan zil in Manipur leng enkai ding hi.

Footpath tunga gari koih leh vanzuakte fine sak hiding
Lamka, Oct-13: Khawpi sung Tedim Road lamsak leh lamkhang a footpath kibawlte khe paite zuih ding himahleh khenkhat in meh leh van zuakna in zang uh a, khenkhat te’n gari neu (2-wheeler) koihna in zang uhi. Tuban kuama’n footpath tungah meh leh van zuaklou ding, kuama’n 2-wheeler gari koihlou ding leh footpath tungah kuama’n tuipuan/silpauline khuhlou dingin Traffic Police te’n theihsak uh a, Oct 14, 2014 apan footpath tung a gari koih, meh leh van zuak teitei banah paina ding dongkholh a tuipuan/silpauline khuh te’ Traffice Police te’n TR-5 cut in liausak ding uh chihthu om hi.

ZoRO Conference-cum – 68th UN Day
Lamka, Oct-13: Zo Re-Unification Organisation(ZoRO) saina in Oct 24, 2013 in Moreh a Galngam Lentol ah ‘Salvation for the Zo People’ chih thupi anei in ZoRO Conference-cum-Celebration of 68th Anniversary of United Nations Day- 2013 zang ding uhi. Huai ah Chief Guest in R.Thangmawi, President ZoRO Gen HQ pang ding a, Khaijang Haokip, President, ZoRO Northern Zone in vaidawnna leh keynote address gen ding hi. Program ah Cultural dance tuamtuam banah Mizoram, Assam, Tripura, Chittagong Hill Tracts, Bangladesh, Chin State( Mynmar), Kachin( Mynmar) leh Manipur apan lasiam tuamtuam in lasa ding uhi.

Khaw omdan kikhek panta
Lamka, Oct-13:Tu October 2013 khabul akipan Lamka leh akim ah khaw omdan kikhek in zingkal leh nitaklam in khua vot hiaihiai a, himahleh sun nisat lai in 32.9 °C vel tungtou zel hi. Tukha sunga khawvot hunpen Oct 10, 2013 zingkal dak 5.00 in khaw omdan tehna 15.4 °C tung a, Sept leh Oct khasung a khawvot hunpen a chiamteh in om hi. Tukum adia khawlumpen(Highest Temperature) ahihleh Sept 23, 2013 nitaklam dak 1.30 in 37.1 °C hi a, khawvot pen hun Jan 11, 2013 in 2.5 °C tung hi.

Cycle tuahsia in a khut guh bawhtan
Lamka, Oct-13: Chinghoihkim (8) d/o Thangkhanlam of V. Munhoih tuni nitaklam in alawmte tawh cycle taidan kizil hattaka tailai kipuk in ataklam khut ngawng guh bawhtan kha hi’n kigen hi.

‘Dr Kalam’s Day’ zang ding
Lamka,Oct-13: Dr APJ Abdul Kalam in India President ahihlai Oct 16, 2006 a Bunglon High School a phak phok thakna kawm in Oct 16, 2013 in Bunglon H/S ah ‘Dr Kalam’s Day’ zat hiding a, huai ah Chief Guest in Genneikhup Vaiphei,EM,ADC/CCpur pang ding a, Guest of Honour in Thangkhomang Haokip,MDC(1-Khousabung) pang ding hi.Huai ah khaw tuamtuam apan hausate leh Bunglon mipite kikhawm ding uh a,kum paisate a kizang bangin cultural programme tuamtuam om ding a,Bunglon H/S pha dinga Dr APJ Kalam chial khetu banah huai School a Headmaster-lui Dr Gin Gangte,IIS in Dr Kalam hong phak hunlai tanchin gen ding hi.

Traffic rule bawhsia 20 mankhia
Lamka, Oct-13: Lamka khawpi a ‘One way traffic rule’ leh ‘Gari parking’dan ban ah gari kileithak a A/F kigelhte Traffic Police, Police leh VDF ten nitengin enzui in Oct 7-12, 2013 sung in traffic rule bawhsia leh Gari No.omlou a A/F kia kigelh 20 mankhia in liausak uh a, gari kileithak himhim ah dakkal 48 val A/F kia kigelhte matkhiak theih hi’n kigen hi.

Kha 1 sungin damdoi tamtak zang
Lamka, Oct-13: District Immunisation office te’n National Child Survival & Safe Motherhood Program nuai ah Sept 2013 sung in titenus(TT) in nupi naupai (pregnant women) 558 kap uh a, TB dalna(BCG) damdoi in naupang kum 1 nuailamte 450 in kap uh a,naupang 1619 vel jeng dalna damdoi dawnsak uhi. Khuhhip dalna (DTP) damdoi in naupang 1619 kap uh a, Sensidalna (measles) damdoi in naupang 569 in kap uhi. Hepatitis B dalna damdoi in naupang1366 kap uh a, JE (Japanese Enphylitis) damdoi in naupang 1890 kap uh a, titenus damdoi in kum 1-16 kikal mi 327 kap uhi.

FMPB National Youth Conference
Lamka, Oct-13: Dimapur a General Coundown Youth Centre ah Oct 11-13, 2013 sung Friends Missionary Prayer Band (FMPB) National Youth Conference om a, Upa L.Vungzamuan, Youth Co-ordinator, EBC makaih in EBC Central Choir member- te leh EBC saptuam apan mi 32 huai ah vatel uhi.

Dist Level Sc Exhibition omding
Lamka, Oct-13: ZEO/CCpur office a Science Unit saina in Oct 29 -31, 2013 sung Lamka ah ‘Dist Level Science Exhibition for school children’ om ding hi. Huai ah class IX-XII kikal sim student-te telthei ding uh a, Oct 20, 2013 tan in ZEO office ah a telding student-te list submit ngai ding hi.Dist Level Science Exhibition a telkhiak a om student-te State Level Exhibition leh Manipur State pawlam a Eastern India Science Seminar ah kuan ding uhi.

IMPHAL NEWS
Manipur Civil Services prelims exam ah candidate 15,000 vel tel
Imphal, Oct-13: Manipur Public Service Commission(MPSC) in MSC 22, MPS 25, MFS 28, SDC 15 leh Election Officer 1 lakna ding in tuni zinglam dak 10.00 in ‘Manipur Civil Services Combined Competitive (Preliminaray)Examination 2013’ conduct uh a, exam centre tuamtuam 43 ah candidate 15,000 vel exam uh a, candidate teng laka 82% vel exam ah tel uhi. Tuma lam in Manipur Cabinet in tutung examna ah candidate-te kum 35 tan a upate telthei ding in thupukna bawl a,MPSC in kumteng in hibang examna conduct zel ding hi’n leng kigen hi. Hun paisa a examna tawh kibanglou in answer key-te taklat hiding in kigen a, Commission office ah notice board ah kal 1 sung takkhiak ahih ding banah Commission website www.mpscmanipur.gov.in ah October 14, 2013 akipan in muhtheih ding chihthu om hi.

Lamlian khenkhat keklet hiding
Imphal, Oct-13: Works Minister Dr Kh. Ratankumar in tuban kum 40/50 nunga Manipur state dinmun ding ngaihtuahna kawm in state sunga lamlian khenkhat keklet(widening) hiding chi’n gen hi. Huai dungzui in market area lakah metres 100 in lian ding a, huailou mundangte ah metres 150 alian in keklet hiding in gen hi.Minister in lamlian keklet dingte a genna ah Imphal-Yaingangpokpi, Imphal-Pallel, Sekmai-Kangpokpi, Imphal-Churachandpur leh Imphal-Keithelmanbi hiding a,huailou in Thoubal-Kasom Khullen kikal lamlian bawlna nasep tunung sawtlou a pat hiding chi’n gen hi.

Dakkal 18 sung General strike puang
Imphal, Oct-13: Manipur a helpawl tuamtuam 6 kigawm Co-ordinating Committee(CorCom) pawlin Oct 15, 1947 in Indian Union ah Manipur alut(merger) pomlou in Manipur independent gam hilai India in diklou taka opkhum hi a taklang kawm in Oct 14, 2013 zankim akipan Oct 15, 2013 nitaklam dak 6.00 tan dakkal 18 sung General strike puang uhi.Hileleng essential service tuamtuam medical, water supply, media leh sahkhua tawh kisai thilte bel khahkol uhi.
Huailou in Maoist Communist Party, Manipur te’n leng Oct. 15, 2013 zinglam dak 5:00 akipan nitaklam dak 5:00 tan Manipur pumpi ah general strike puang uhi. Secretary(Publicity & Propaganda) Nonglen Meitei in tuni a Press Statement a suahna ah Oct. 15, 1949 in Indian Union in thagum in Manipur opkhum ua, huai mawhpaihna in Oct. 15, 2013 in General Strike om dinga puan hi’n taklang hi.

Observer in Imphal East enkhe ding
Imphal, Oct-13: Special Summary Revision of Photo Electoral Rolls tawh kisai in Imphal East district adia Roll Observer dinga CEO, Manipur in a guan JC Ramthanga,IAS, Commissioner in thil omdan enkhe ding in Oct 14, 2013 in District Election Officer/DC Imphal East office vapha ding a, huai hun ah recognised National & state Political parties leh mipi alunglut kuapeuh in kimuhpih thei ding chi’n RK Dinesh Singh,DC/Dist Election Officer,Imphal East in thupuan bawl hi.

MSF 15th Foundation Day zang uh
Imphal, Oct-13 : Manipuri Students’ Federation (MSF) pawlin tuni’n Konjeng Hajarika Leikai Community Hall ah 15th Foundation Day zang uhi. Huai ah BSEM Chairman P. Dhanakumar Singh khuallian in pang a, Guests of Honour in Solomon Zingkhai, Jt. Director, Tribal Research Institute,Imphal leh Maibam Dhanabir Meitei, Executive Editor Imphal Free Press pang uhi. Chief Guest in a thugenna ah tulel dinmun in Manipur society ah lemna leh muanna omlouh ziakin maban ah student-te adin lamet ding omlou tawh kibang, chi hi. Students’ Union te’n khawtang hoihna dingin panla mahle uh teacher community-te a zahtak uh poimawh hi’n gen hi. Foundation Day lopna kipat hun ah MSF President Longjam Umakanta Meitei in MSF flag kaipalh hi.

Imphal West CDO te’n KYKL 1 man
Imphal, Oct-13 : Imphal West District Police Commando te’n zan nitaklam dak 4:00 velin Yumnam Budhachandra of Kakwa Ningomthongjao Awang Leikai tenna inn ah KYKL atel mikhat mankhia uhi. Matkhiak a om bel Yumnam Kendra @ Ken (39) s/o Yumnam Budhachandra hi a, amah akipan in Chinese handgrenade khat leh mobile phone khat Commando pawlin mukhia uhi.

Gym thak honkhiakna om
Imphal, Oct-13 : Manipur Development Society (MDS)-te apan huhna zang in Haobam Marak Keisham Leikai a om Ima Haoreima Sambubi Keithel & Friends Gym kichi tuni in RK Anand,MLA in hong hi. RK Anand in Gym kim a lampi, lei(bridge) leh water pipeline-te enkhia a, tuahun ah Water pipeline system bawlthak deihthu gen hi. Haobam Marak Keisham Leikai te’n kum 10 vel tap water mulou uh a, a muhtheihna ding ua panlak hidan in MLA in gen hi. Huai area ate’n Chingkham Leikai Water Supply tungtawn in tuinek ngah uh a, Mayang Imphal Main road keklet ziakin nawngkai zek a, maban ah hoihpah ding hidan in RK Anand in gen hi.

USRA in 9th Reformation Day zang ding uh
Lamka, Oct-13: United Socialist Revolutionary Army (USRA) in October 14, 2013 zinglam dak 11:30 in HOREB Camp, Chawngkhozo khua ah USRA 9th Reformation Day zang ding uh a, huai ah Khatkhotong Baite, President VPC GHQ; Lamkhogen Vaiphei, President, Zillai GHQ leh Paulianlal, President YVA GHQ te'n Chief Guest, Functional President leh Guest of Honour hina tawh uap ding uh a, Chief Host in Lalminthang Vaiphei, President USRA pang ding chihthu kiza hi.