Oct 21-27, 2013 sung teng Dry Week in puan hi ding
3rd World Zomi Convention ziakin kitanauna omsak sawm
Lamka, Oct-12: Lamka Public Ground ah Oct 25-27, 2013 sung ‘The 3rd World Zomi Convention(3WZC)’ om ding tawh kisai kisakkholhna paitou zel a, tuni a Press briefing ah khawmpi ding tawh kisai in mipite’n Oct 21-27, 2013 sung ‘Dry Week’ zang dingin Zomi Council(ZC) in ngetna bawl uhi. Dry Week sungin mipite’n khawmpi tawh kihetkha thei ding thildang bawllou a, siangthou taka hunzang in khawmpi a telchiat dingin chial uhi.
Tuni in Nehru Marg a ZC Administrative office ah 3WZC tawh kisai Press briefing ah Convenor Dr. R. Sanga in deptt tuamtuamte’n amau nasep ding lawhchingtak a semsuah uh hi’n gen hi. Oct 25 in Inaugural function om ding a, ‘Be a Blessed nation’ chih thupi zang in nitaklam chiangin biakna kikhop om ding a, khawvel mun tuamtuam a omte’n biakna neikhawm thei ding chi hi. Convention a co-organiser din kha 2 vel paisa in ZoRO dawp uh chi a, lawhchingtak a khawmpi zang dia deihsakthu gelhthawh in hon khak uh chi hi. UN lam a hihding om ziakin ZoRO in kin-le-buang in Convention dang sai uh hi’n hon theisak uh chi hi. Convention lawhchinna di’n kuapeuh in thumna tawh bawhzui a, kikhopna leh programme hunte uap chiat dingin chial a, khawmpi hun ding ni 12 lelin samta hi’n leng gen hi.
Zomi Council lam apan K. William Vaiphei, Speaker, ZC in Convention lawhchinna din mipi a tamtheipen kisakhol dingin chial a, i hihna diktak kisutkhawmna seminar ah khangthak laisiamte’n uap a, tunung a khangthu tawh kisai theichian a lawhching leh hamphatpih dingin deihthu gen hi. School leh Institution te’n naupangte leng a tam theilam seminar hun a telsak dingin ngen hi.

Tuni’n TRATDA Silver Jubilee lopna om
Lamka, Oct-12: Tipaimukh Road Area Transport Dev Assn(TRATDA) kiphuh kum 25 chin Silver Jubilee lopna tuni in Hiangtam Lamka a YPA Gen HQ Hall ah om a, T.Manga Vaiphei, MLA & Chairman/MTDC khuallian apang in Silver Jubilee suang hong hi. Huai ah Guest of Honour in Vungzagin Valte, MLA & Parliamentary Secy pang a, Jubilee pa in Dongzakai Gangte , Chief of Hill Town leh Special Guest in Langkhanpau Guite, Chairman ADC/CCpur pang hi. Rev.D. Kamchinmang, Local Pastor, EBCC Hiangtam Lamka in TRATDA nuai a gari-te adingin thumsak a, teltuam mi 25 te’n Silver Jubilee dakpi khen ging uhi.
Chief Guest in Tipaimukh Road a lampi siatziaka gari paitheihlouh hun inleng TRATDA tawh pangkhawma nasem hi’n gen hi. Tipaimukh Road kichi lampi poimawh mahmah hi’n gen a, BRTF te’n lampi bawl lel uh hi’n gen hi. Gari taite condition hoihte ngen hileh mipi leh agari pute ading in bitna tuntu hidin gen a,passenger leng a vallua lalou din ngen hi. Aman TRATDA makaite kiangah Solar Set 2 piak hidin gen a, a poimawhna mun ah Waiting shed leng bawl hidin gen hi.
Guest of Honour in Tipaimukh Road bawl BRTF-te’ nasepna vanzat kimantak in zuak mahle uh kuaman leilou din ngen a,lamlian bawlna ah quality maintain pihchiat ding, vanzat zuakgu leh nasep hoihlouhna munte mipi leh TRATDA makai te’n report bawldin ngen hi. TRATDA-te totkhakna ah waiting shed a poimawh zah tunung in bawl hiding in gen hi.
Special Guest in TRATDA-te pahtakthu gen a, khawsakna haksat ziaka bahara ding neiloute manbei a gari a tuansak uh pahtakthu gen a, maban ahleng mipite khualna zia in gari taituahte pilvang semdin ngen hi. TRATDA ah tulelin member 94 om a, Assembly Constituency 5, Sub-divn.4 tawn in khua 45 ah taikha uh a, main station 10 leh sub-station 10 nei uhi.

JAC te’n Media-te kimuhpih
Lamka, Oct-12: JAC- Against the Eviction of Land Owners NH-150 (Kangvai-PS) makai te’n tuni in Media te kimuhpih uh a, Kangvai-CCpur Police Station kikal Tedim Road eviction ding theihkholhna omlou a DC in show cause notice a piak in mi tamtak lungbuaisak a, JAC-Against the Eviction of Land Owners NH-150 (Kangvai –PS) kichi phutkhiak ahihdan JAC Chairman Chungsei Haokip in gen hi.
JAC pawl 2/3 vei meeting uh a, Oct 9, 2013 in Chief Minister kianga memorandum pia in huai dawnna ngak lel uh hi’n gen uhi. Govt in maintown ah gari tam ziakin lampi khawchik mahleh eviction bawl sawmlou a, mihing leh gari tamlouhna Kangvai apan Police Station tan eviction a bawlsawm lamdang sakthu gen uh a, eviction bawl ahihvanglak leh main town sung leng bawl ahih deihthu gen uhi. Govt in Kangvai apan CCpur Police Station kikal Tedim Road kim laitak apan feet 50 tuak lamsak leh lamkhang ah eviction a bawlsawm theihsiam huailou sakthu gen uh a, Tedim Road lampi laitak apan feet 25 tuak lam sak leh khang lam ah eviction bawl in black topping bawl banah footpath hoihtak bawl hileh kum 50 tan leng kizang theiding hi’n gen uhi. Imphal zom Lamka himahleh land compensation ah CCpur Dist nelhsiah a om hi’n gen uh a, govt in March 20, 2012 in minimum guidance value of land tawh kisai Gazette a suahna ah Ukhrul ah feet sq in Rs.300, Senapati, Kangpokpi ah Rs 200/ tuak, Chandel ah Rs 50, Moreh ah Rs 60, Jiribam ah Rs 25, Thoubal ah Rs 390 a bikhiah lai in CCpur dist ah 1 feet sq ah Rs.20/- kia a bikhiah leng CCpur mipite muhsitna hi’n gen uhi.
JAC pawlin mipi khualna ziakin Tedim Road lampi laitak apat feet 25 tuak, lam sak leh khang ah keklet hileh pomsiam huai sakthu gen uh a, Imphal khawpi sung leng lampi laitak apan feet 50 tuak, akigawm a feet 100 alian hilou a, Kangvai apan Police Station kikal lampi laitak apan feet 50 tuak, lampi sak leh khang ah keklet ding chih thil hitheilou hi’n gen uhi.

NEC Adviser in Lamka hongpha
Lamka, Oct-12:NEC a Finance Adviser G.K Chin in tuni’n Lamka hongpha in mun tuamtuam ah NEC fund zanga nasepna banah nasep dingte enkhia hi. Aman JNV/Tuinom ah water supply tawh kisai a tanky kibawl enkhia a, nasep lungtung huai hi’n gen hi.Huai apan Dist Hospital pha a,NEC fund tungtawna Dist Hospital building kibawlte enkhia in CMO/CCpur leh Med Suptd/Dist Hospital tawh Hospital hoihsemna ding kikum uhi. Dist Hospital apan Khuga Dam pha a, Khuga Dam apan Lamka khawpi sung tuinekding kichingtak NEC fund tungtawn a omtheihna din enkhia a, project om naikei mahleh amun ding enkhia a, huaizawh in Imphal ah kiknawn hi. NEC Finance Adviser in Lamka hongphak hun ah official hunkhop in zui in kithuahpih uhi.

Video Album honna om
Lamka, Oct-12: Gangte’ Gospel Music Video Album ' Hehpihna Mak" kichi Miss Zami Gangte in a bawl tuni’n Chiengkawnpang Community Hall ah Soiminlian Lengen MCS, SDO/SDM Henglep in Chief Guest apang in hongkhia a, Pastor Mangkhokam in Pathian kiangah thumna in lan(dedicate) hi. Huai hunah Miss Zami, Miss Nunthar leh Miss Julie te’n phatna lasa uhi.

Siamsinpawlpi Flag Day zatna om
Lamka, Oct-12:YPA Hall New Lamka ah tuni’n SSPP Flag Day zatna kum 2014-16 sung SSPP Joint HQ Lamka President ding telna kithuah nei uhi. President dinga candidate 4 lakah S. Lam Khan Khual s/o Soizalal of IB Road telching hi a, D. Thangchinmoi, Chairman, Election Commission, SSPP Gen HQ in kichiamsak hi.

Youth Club Leader-te tawh houlim
Lamka, Oct-12: KSO/CCpur te’n tuni’n B.Vengnuom Community Hall ah khaw tuamtuam a Youth Clubs’ Leader-te kimuhpih in KSO leh Youth Club te pankhawm dingdan houlim pih uhi. Seiboi Haokip, ex.Gen Secy KSO/CCpur in social nasep kichi kuaman pakta lou a, akal lakin haksatna, lungkhamna leh lungkiatna kituak a, hileleng mipite khualna ziak a kisemtou theizel hi’n gen hi. KSO leh Youth Club tuamtuamte’n maban ah pangkhawm a nasep dingdan ngaihtuahna ziaka tuni program om hi’n leng gen hi. Huai ah khua 80 vel apan Youth Club makaite tel uh a, KSO Gen HQ apan makai hunkhop leng tel uhi.

Zozam Magazine hongkhia
Lamka, Oct-12: Zoveng a Zogal Memorial Hall complex ah tuni sunnung in Zozam magazine honna om a, V.Khaikhanmung, MDC khuallian apang in hong hi. Huai ah Guest of Honour in P.Tongthang, Contractor leh Chief Host in Mannuamching, CEO/CCpur pang uhi. Khuallian in laibu tuamtuam a gelhtute’n lungsim tampi seng a lai agelhte uh simnop in pahtakhuai uh a, hileleng a zuakkhiatna(market) neuziak in sum-le-pai ah haksatna liantak kituak chi’n gen hi. Magazine patkhiak ahihleh haksatna tuamtuam om leleng kuhkaltaka pangtou zeldin hasuan hi.

VPC Sangaikot Block election
Lamka, Oct-12: Vaiphei Peoples’ Council(VPC) Gen HQ thusuak in Nov 25, 2013 tan in VPC Block election zawhsiang ding hih dungzui in tuni in VPC Sangaikot Block election om a,khua/unit 18 apan palai 70 om laka 58 paikhawmte’n kum 2013-2016 sunga vaipaw ding tel uhi. Chairman dingin Seikholun Baite of Dongjang leh Secy dingin Zamlal Baite of Hengken telching hi uh a,Office Bearer ding leng mi 6 telching hi uhi. VPC Hq apan Jamsei Baite in election sai a,Khatkhotong Baite, President, VPC Gen HQ in telching thakte kichiamsak hi. Election zintun Dongjang khaw mipite’n bawng khat gou in ankuang lui uhi.

Lok Sabha election ah candidate ding
Lamka, Oct-12:Mani Charenamei, ex-MP(Outer Manipur) in tuni in Lamka hongpha a, mi tuamtuam kimuhpih hi. Aman a genna ah maban a 16th Loksabha election ah candidate sawm hi’n gen hi. Manipur a Hill Dist teng apan makai tuamtuam te kimuhpih zawh nung in party ticket ding hihfel hiding in agen a, Hill Dist atamzaw phakual in tribe leader te kimuhpih hi’n gen hi. Manipur a singtangmi te’n politics ah Autonomy poimawh a, singtangmi teng kipumkhat nangin nasem ding hi’n gen hi. Mani Charenamei ahihleh 2004-09 sung Outer Manipur ah independence in MP telching in om hi.

Numei naupang omna kitheilou
Lamka, Oct-12:Nemry(5) d/o Jang-a of Bethel zan sun dak 12.00 velin inn apan potkhia tungkiklou a, khawsung mipi’n mun tuamtuam a zon nung un leng mulou uhi. Tuni in Bethel, Saidan leh Khomawi mipi’n mun tuamtuam zong uh a, nikhat leh zankhat zong mahle uh mu tuanlou uhi. Akigendan in inn apan apotkhiak lai in Khawmawi lam zuan a pai hi’n gen uh a, pautheilou ahih banah lungsim lam buaina neimi, puan-ak vom silh hi’n kigen hi.

SUUNNA
Ginsuanpau (45) s/o Khamkhokam of Kavan Veng, New Lamka tuzing in sungna in si a, YPA hanmual, New Lamka ah kivui hi.

IMPHAL NEWS
CM in Railway line bawla nasem lai bomb paihkhumte mawsakthu puang
Imphal, Oct-12 : Chief Minister O. Ibobi in Imphal-Jiribam kikal a rail lampi bawl a om M/s Coastal Projects Ltd. te’n nasem a zatte un Tunnel anasem lai 2vei tak bomb zang a attack bawlte mawhpaih thu puang hi. Thusuak in a gendan in Chief Minister in a gendan in hibanga gamtatna mihing’ gamtatna ding in mulkimhuai khengval leh haihuai hi’n gen a, matkhiak ahih ua leh gawtna khauhtak piak hiding in leng gen hi. Railway line a semte Sept. 29 in bomb paihkhum ziakin mi 4 liam uh a, tua zawh Oct. 6 in attack in om nawn uh a, huai ah 7 liam uhi. Huai tawh kisai a liam a serious-te Rs. 50,000 piak hidin CM in gen a, a serious loute Rs. 10,000 piak hidin gen hi.

Home Minister leh MP in enkhia uh
Imphal,Oct-2: Deputy CM banah Home Minister Gaikhangam in zan a bomb puahna mun Sangakpham mun a District Council complex vapha hi. Bomb puahna mun ahihleh John Raleng, Chairman, ADC, Ukhrul quarter mun hi a, tuni a Home Minister in a phak hun ah ADC members- te tawh District Council Bhavan ah houlimkhawm uhi. Aman bomb paite mawhpaih kawm in kipuang dingin ngen a, a thiltupte uh thagum ziaka lawhching tuanlou ding hi’n gen hi. Hibang a gamtatna pen sum deihna ziak lel hidan in gen a, ADC member- te lauthawng hetlou dingin khamuan a,security tawh kisai leng enchian thak ding hi’n gen hi. Dy CM in bomb puahna mun a etkhiak hun ah Rishang Keishing,MP(Rajya Sabha) leh RD & PR Minister Francis Ngajokpa in zui uhi.

AMWJU makai te’n CM mu uh
Imphal, Oct-12 : All Manipur Working Journalists’ Union (AMWJU) President W. Shyamjai makaihna in member bangzahhiam in tuni in Chief Minister O. Ibobi a official chamber ah vamu uhi. AMWJU pawlin point 15 telna memorandum pia uh a, huai ah Manipur a Press Academy bawlkhiak ding a, Journalist family benefit scheme leh Journalists Housing Colony bawlkhiak ding banah Journalists pension scheme review ding, Assembly Secretariat ah press room khat koih ding, DIPR Card piakbeh ding, Moreh, Mao, Jiribam, Ukhrul leh Tamenglong ah journalists-te gam piak ding huchi hileh AMWJU branch nuamtak a honkhiak theih chih telin thu poimawh tuamtuam memorandum ah taklang uhi. Huai hun ah N. Biren,MLA leng tel hi.

MPP te’n Dy CM’ thugen mawhpaih
Imphal, Oct-12: Dy CM banah MPCC President Gaikhangam in zan in Kakching Block Congress Workers Conference ah Manipur gam leitang humbitna ding in Congress in panla gige ahihdan a gen banah party dangte election hun kia ah theihphak ahihdan uh a gen tungtan ah Manipur People’s Party (MPP) te’n a thugen mawhpaih kawm in Congress Party member-te himhim High Command thuthu a om uh hi’n soisel uhi. Huaiziakin Indo-Myanmar border fencing ah Congress in bangpi semkhe tuanlou uh a, civil society organisation tuamtuam leh Non-congress parties-te’n humbitna ding in panla zaw uh chi’n MPP te’n taklang uhi. Huaimai hilou in gamgi tungtang tawh kisai in Congress party in High Command ah huai issue a panla ding in a ngen theikei uh chihsan uhi.Congress Minister leh leader te’n Indo-Myanmar border a etkhiak sawm uh leng Congress High command apan thupiak om ziakin cancelled uh chi’n MPP pawlin Congress party soisel uhi.

Senapati dist ah dakkal 48 sung general strike
Imphal, Oct-12 : Saikul Area Naga Peoples Organisation leh Kuki Inpi Saikul kigawm in Oct. 14, 2013 zankim apan in Oct 16, 2013 zankim tan Senapati district sungah dakkal 48 sung general strike puang uhi. Amau a taklatna uah Police District Boundary leh Police Station kichi state govt in a bawltawm hi a, huaiziakin, Saikul Sub-divn sung a om khua 120 te Imphal East District a omsak ding thil hitheilou hi’n taklang uhi. Huai tawh kisai in Dy. CM Gaikhangam in Sept. 25, 2013 a Home deptt in Order a suah cancel a Saikul Sub-Divn a sung khua omte Imphal East Police Station sung ah a om khak ziakun Saikul Sub-Divn ah om theilou ding uh hidan in gen hi. Huaiziakin, pawl nihte’n huai thusuak mawhpaihna in general strike bawl a sawm uh ahi hi. Amau state authority te’n original district leh Sub-Divisional boundary pen subuai lou a ahihna tak a pom deihthu taklang uhi. Sadar Hills Chiefs Assn (SAHILCA) te’n leng General strike support thu puang uhi.