State Bank of India a DGM leh AGM in Lamka pha
Lamka, July-16: Deepak Kumar Lalla, Deputy General Manager, State Bank of India(SBI) Administrative Office, Shillong leh James Thatlinga, Asst General Manager (AGM), SBI Regional Business Office, Imphal in tuni zinglam dak 10:00 in Lamka pha uh a,  SBI/Tuibuong branch; SBI CCpur branch leh SBI/Pearsonmun branch enkhia uhi.

Deepak Kumar Lalla, Dy.GM in a gendan in mun tuamtuam a om SBI branch-te’ nasep dan enkhe kawm leh akisamte theichian ding a hongpha uh hi’n gen hi. CCpur dist mipi’n bank tawh kisaia  haksatna a tuahte dawnzangkhai tupna in kha 3 sungin ATM booth 5 koihbeh hi dingin gen a,huai  ATM booth 5te ah Cash Deposit Machine (CDM) leng koih hiding chi’n gen hi. Kha 3 sung in Self Service Kios (SSK) kichi bank sunga lutngai lou in  ATM booth-te ah passbook update theihna ding leng koih hidin gen a, huaite tungtawn in SBI in customer-te lungkim leh kipaktaka koihsawm hi’n genbeh hi. Deepak Kumar in agenbehna ah tulel in Kishan Credit Card (KCC) kichi patkhiak hi a, huai sanga policy hoihzaw, KCC mah adang khat kipan nawn ahihdan gen hi.

James Thatlinga, AGM, SBI in agenna ah CCpur district ah SBI branch 3- SBI/CCpur branch; SBI/Tuibuong branch leh SBI/Pearsonmun branch om a, mipi’n SBI/CCpur branch kia phalou in SBI branch dangte leng phak a, sum deposit leh draw khiat poimawh hi’n gen hi. Tuma hun bangtan hiam paisa apan SBI/CCpur Branch in currency chest ding a pan alak uh lawhching ding dinmun ah omta a, SBI/CCpur branch ah currency chest zattheih ahih hunhun in SBI/CCpur branch ah sum lam tawh kisai haksatna om nawnlou ding chi’n gen  hi.

State Bank of India/CCpur
Tunitak apan Currency Chest Branch hita
Lamka, July-16: State Bank of India(SBI)/CCpur Branch ah  hun bangtanhiam apan Reserve Bank of India(RBI)  sik-le-tanga sum keptheihna(Currency Chesh Branch) buaipih in  a poimawhteng leng zoufel uh a, tuni nitak dak 8.15 akipan in SBI/CCpur Branch leng Currency Chest Branch hita chi’n Chief Manager S. Kaikhanthang apan thutut kingah hi. Huai tawh kiton in SBI in leng direct in RBI apan sum poimawhzah  keptheihna(remittance) neita ding uh a, SBI in amau apan nationalized bank dang SBI Tuibuong branch,SBI Pearsonmun branch,Vijaya Bank, Central Bank of India  banah  Axis Bank, HDFC Bank leh adangdangte kiangah sum pesawn ding uhi.  CCpur dist. ah tuma in  UBI/CCpur Branch kia Currency Chest Branch  hisek a, mipi in  sum taksap ziaka haksatna tuaksek  hi.

Gilsung apan suang tamtak lakhia
Lamka, July-16: District Hospital a doctor-te’n tuni’n numei khat operation abawl  ua leh a gilsung apan suang(stone) tamtak lakhia uh chihthu om hi. Thu kizadan in Laltinkim (38) w/o Roulawm of Sielmat in hun bangtan hiam apan agil nasa in damlou a, doctor-te’n operation bawlin a gilpi apan suang tamtak lakhia uhi.

MGNREGS tawh kisai joint meeting
Lamka, July-16: DC/Exe Director DRDA makaih in DC’s office ah tuni sunnung in MGNREGS tawh kisai joint meeting om a, huai ah MGNREGS 2012-2013 a 4th phase a ni 16 thaman ding Block tengin amau’ block chiat ah singnou suan ding in genkhawm uhi. Lamka TD block leh Tuibuong TD block te’n catchment area ah suan ding uh a, block dangte’n  amau utna mun chiat ah suan ding uhi. Huai ding in line deptt- Forest leh Agri  deptt  tawh kithuzak ngai ding chih ahi hi. Ni 16 thaman ding sum sanction bawl khit hi  a, hileleng singnou suan ding tawh kisai a BDO te’n detail a submit hun uah  sum release hidin DRDA lam apan thutut kingah hi.

Kuki Students Assn ngetna tawh mi 2 hunkhia
Lamka, July-16: Kuki Students Assn(KSO), Bangalore panlakna tawh Praja Rajakiya Vedike pawlin Bangalore khawpi sunga kizuak a om Lamka mi numei 2 hunkhia uhi. Thu kizadan in amaute beauty parlour asem ding leh khateng a innluahman tawh nekman piak a Rs. 5000 lawh ding chi in Moirang apan Manipuri pasal khat in pikhia a, Bangalore atun un Mala kichi human trafficking agent khat in lasawn hi’n kigen hi.

Nungak 2te a omna uh theihlouh ziakin a innkuante uh  patau in CCpur PS leh Bangalore Police  ah FIR thehlut uhi. Tulelin North East Welfare Assn, Karnataka te’n numei 2 omna leh bitna pia in kem uh a, huai tawh kisai police (DCP South and Adugodi Police) theihsak hi uh a, Praja Rajakiya Vedike teamte’n mihing zuaka kipei omlai ahihdan a theih ziak un Police-te kiging dingin theisak uhi. Thiltung tawh kisai thuzak theihna ding amau pawlin Manohar # 963 222 3460 or 94839 50202 guang uhi.

Case 24 teng Imphal ah thon ding
Lamka, July-16: DC/CCpur makaih in ama’office chamber ah tuni zinglam in June 30, 2013 nitaka Police Station ah Police leh mipi kinawktuahna ziaka liam mi 23 leh damzoulou a si Lunminsiam Guite (20) s/o Lunkhopau of Zenhang Lamka tungtang screening om a, SDPO/CCpur; SDO/CCpur leh CMO/CCpur te tel uhi. Huai ah aliam 23 te a serious dan dungzui in category-wise  in khen  uh a, aliam damlou zou asi Lunminsiam  thu ah ex-gratia leh aliamte govt in panpihna piakding in document kimtaktawh state govt ah thonding uh hi’n kigen hi.

Cadre 1 jail ah:1 Juvenile home ah
Lamka, July-16: Police apan kizadan in 46-A/R te’n July 8, 2013 in Tuibuong a Canan Veng ah KNF(Nehlun) cadre 2- Kaiminlal(18) s/o Lunjang of Bongbal Khullen leh  Mangkhohao (22) s/o Lunkholam of Bongbal Khullen  mankhia in galvan khenkhat leng mukhia uh a, Lamphel PS ah a piakkhiak uh  CCpur Police te’n  a case lasawn in JMIC court ah dingsak uh a, Court in July 15, 2013 tan Police khut a omdi’n phalsak hi. Police te’n zan in JMIC/CCpur Court ah dingsak nawn uh a, Court in Mangkhohao pen Jail a omdi'n pekhia a,  Police te'n Jail a koih in  Kaiminlal pen Juvenile Home ah koih uhi. KNF (Nehlun) cadre 2 te tungah FIR No.61 (7) 2013 CCP-PS U/S 400 IPC & 25(1-C) Arms Act registered uhi.

MBBS Foundation Course kipan
Lamka, July-16: Dr. Liangoumuan Samte in tuailaite’ MBBS lunglut mi bangzahhiam kaikhawm in St. Paul Institute ah tuition pia a,  huaia telte laka mi 16 in National Eligibility Entrance Test(NEET) ah lawhching  uhi. Zan sunnung in “3 Months MBBS Foundation Course” kichi Chairman, ADC/Ccpur in hongkhia a, July 15-Oct 15, 2013 sung om ding course ah student 30 vel tel uhi.

Imphal Centre ah exam ding
Lamka, July-16: Staff Selection Commission( SSC) saina in July 21, 2013 in Prasar Bharati a Technician leh Engg Asistant  sem ding lakna dingin written test om ding hi. Huai tawh kisai in  FR Tariang, Deputy Director, Regional Office/NER, SSC in  thusuah abawl dan in CCpur district ah SSC exam centre om mahleh tutung a examna  ding ah candidate a tawmluat ziakin Lamka a candidate tengin Imphal a SSC exam centre ah  exam vekding in thusuah bawl hi.

House Tax  assessment
Lamka, July-16: DC/CCpur makaih in July 17, 2013 sunnung dak 2:00 in ama’ office chamber ah SDO teng tawh Hill House Tax, 2013-14 tawh kisai assessment bawlkawm in meeting ding uhi. Huai hun ah SDO tengin amau sub- divn a Hill House Tax Assessment latest figure tawi chiat ding uh a, huai enkhawm ding uh chihthu om hi.

Songtal ah Evangelistic Week
Lamka, July-16: Songtal Govt H/S leh Convention English School pangkhawm in Songtal Govt H/S ah July 17-19, 2013 sung Evangelistic Week, 2013 om ding a, huai ah Songtal Govt H/S leh Convention English School a student-te telding uhi. Evangelistic Week hunsung in Pastor Thangzamang, EBC leh Pastor Kamchinthang, PCI (R) te’n thu gen ding uhi.

Gospel Music Video Album
Lamka, July-16: ‘Sapna aw’(volume 11) kichi Gospel Music Video Album thak hongtungding July 20, 2013(Kiginni) zinglam dak 11.00 in Chiengkonpang Community Hall ah Mrs Mawite Doungel,khuallian apang in hong ding hi. Huai ah Guest of Honour in Dr Gin Gangte,IIS pang ding a,Functional President in Mangcha Thangzawm, President,GYMA(M) pang ding hi.

Delhi ah inntung apan  kia in si
Lamka, July-16:  G Nengsuanlal (19) s/o G Zamkhothang of  Hebron Veng, New Lamka tuni zingsang dak 6.10 velin inntung sawng 2na  apan kia in AIIMS puaktung himahleh nitaklam dak 4:15 velin AIIMS Trauma Center ah  si hi. Thu kingahdanin Nengsuanlal ahihleh St. Paul's Institute  a Class XII zoukhia Delhi University nuaia Ramjas College adia admission bawlkhin, Panchsheel Vihar ah innluah a omlai khawsik leh sungkhawh ziaka damlou etkol a omzel hi a,tuni zingsang baihtakin inntung apan khe-kha hi’n kigen hi.

IMPHAL NEWS
Delhi ah tuni’n NEC meeting om
Imphal, July-16: Union Minister of State (Independent Charge) for Development of North Eastern Region(DONER) leh North Eastern Council(NEC)  Chairman Paban Singh Ghatowar makaihna in tuni’n Delhi ah NEC Plenary Meet 52veina om a, huai ah Northeast state tuamtuam apan Governor leh Chief Minister-te tel uh a, Manipur apan CM O. Ibobi tel hi.   Delhi da pangthokkhre. NEC Chairman in a genna ah NLCPR(Central) kichi scheme thak regional ah major project tuamtuam sepkhiakna ding patkhiak hi’n gen a,huai ah tulelin fund leng Rs. 19,000 crores om hi’n Chairman in gen hi.

Huailou in NERCOMP-III(North Eastern regional Community Resource Management project) kichi Rs. 540 crore bei in sepkhiak hiding a, huai Project a phase 3na ah Manipur a Chandel leh  CCpur district banah   Arunachal Pradesh aTirap leh Changlang district leng telkha hi. North east a  institution omte ah Auxiliary Nursing Midwifery (ANM) leh mashung General Nursing Midwifery(GNM) zil numeite sum a huhna piak hiding chi’n leng NEC Chairman in gen hi.

Kohima lampi zousiang phial
Imphal, July-16: Ni 4 paisa a Imphal-Dimapur-Guwahati lampi NH-39 in atotkhak Kohima kianga menchim ziakin lampi metre 100 vel kisia a, Border Road Task Force (BRTF) te’n sun-le-zan in nasem in lampi bangtan hiam bawlzou mahle uh ngeina bang in gari paithei nailou a, himahleh gari neu khenkhat bel paithei hi’n kigen hi. Lampi siat sungin Manipur vanzat ding state danga laksawnna nawngkai mahmah a, huchihlai in gari bangzah hiam in Imphal-Jiribam-Silchar (NH- 53) tawn mahle uh kingakna tak ahihlouh man in buaina tuak veve uh hi’n kigen hi

All India Demand Day in Manipur
Imphal, July-16: Manipur Shillang Loumee Lup (BKMU) pawlin Manipur Press Club  ah tuni’n “All India Demand Day” zang uhi. Huai hunah MNREGS nuaia nektawm zonga kivak loubawl mite kumkhat sung in  ni 200 tan na semsak din govt. phu uhi. Demand dangte lakah Indira Awas Yojna nuaia sum sanction zah Rs 3 lakhs chiat a punsak ding, public distribution system hoihtaka paisak ding,  singtangmite dikna kepbit ding, state  leh central level agricultural worker-te kiang a vanzat tuamtuak piak ding, SC leh backward class-te muhsitna beisak ding chihte telin ngetna tuamtuam bawl uhi.

Priyanka in Ccpur dist. pha
Imphal, July-16: Bollywood actor Priyanka Chopra  in tuni zinglam in MC Mary Kom’ pianna khua CCpur district sung a Kangathei village pha a, huai hunah  khawsung mipite’n ana  vaidawn in Kom traditional dance  telin lam chituamtuam lahna nei uh a, zing-an nekhawm uhi.  Priyanka Chopra in Mary Kom’ film tungtawn in  Manipur mipite’ lungsim khek lamdang thei ding hi’n gen a,aman tuni a  Imphal a nutsiat ding kuan in Classic Hotel ah hun nanung zang hi.

ICDS a semte’n kha 12 lawh ngen
Imphal, July-16: Social Welfare Minister AK Mirabai  in Anganwadi worker leh Helper-te lak ah kha 5 lawh hawmkhiak masak hidin puang mahleh ICDS asem Anganwadi Worker leh Helper-te’ kha 14 lawh piak dia ngen in nuakna chikhat pan in office sungah sit-in-protest nei uhi. All Manipur ICDS Employees Union saina a sit-in-protest ah employee 700 val kiangah kha 12 ading lawh pekhe dingin ngen uhi.

SP muanglou in DGP pekhia
Imphal, July-16: Numei pawngsual(rape) pasal khat  matkhiak nungin  JAC kibawl khiate leh Shyamkumar,MLA  in dan tawh kituakin SP/Thoubal khut a piak ding himahleh a muanlouh ziak unDGP Manipur kiangah tuni in Md. Itocha @ Rafi Ahmad (28) pekhia uhi. Thusuakin a gendan in numei sual Md. Itocha  in amah gamtatna hilou ahihdan gen in, tulel a VDF sem Md. Tajkhan (26) s/o Zahiruddin leh Md. Sahid Khan (25) of Yairipok Singh ngawh hi.

Langol View Clinic ah bomb
Imphal, July-16: Kombirei Keithel a om Langol View Clinic ah tuni zingsang dak 7.00 in Chinese  handgrenade khat ah mukhia uh a, mipi pataute’n Lamphel police station theisak uh a, Police a Bomb disposal squad  team in kintaka delhzui pah uh bomb lakhia uh a, mun thoveng khat ah hihsia uhi.

UNLF active member mankhia
Imphal, July-16: Imphal West commando te’n zan nitak dak 7:00 velin Taothong Apheiba Lamsathou Maning ah UNLF active member Naorem Daben Kumar(42) s/o N. Nobin Chandra of Taothong mankhia uhi.

RPF in hilhchetna thusuah
Imphal, July-16: Thoubal police commando-te’n Chandel district sung a Moreh apan People's Liberation Army (PLA) member Athokpam Geeri(41) s/o (late) Menjor of Wangkhei Ningthem Pukhri Mapal Mamang Leikai part-B leh akep naupang 2 mankhia uhi. Huai tungtang RPF/PLA pawlin tuni’n hilhchetna bawlin Athokpam Geeri pen RPF active member hilou chi’n taklang uhi.