DGM,SBI in Manipur hongpha
Lamka, July-15: Deepak Kumar Lalla, Deputy General Manager(B&O), State Bank of India(SBI) in zan in Shillong akipan in Manipur hongpha a, tuni in Moreh khua vapha a, SBI branch thak honkhiak ding ding tawh kisai in thil omdan enkhia hi’n kigen hi. DGM/SBI in July 16, 2013 in Imphal a om James Thatlinga, Asst General Manager(AGM),SBI tawh Lamka hongpha ding a, SBI, Tuibuong branch; SBI CCpur branch leh SBI Pearsonmun Branch hong enkhe ding hi’n kigen hi.

Case 1000 val genkhawm uh
Lamka, July-15:, DC/CCpur makaihna in tuni in Dist Level Disaster Management Authority (DDMAs) Committee meeting om a, member te’n SDO te’ akipan case tuamtuam report om 1324 genkhawm uhi. Case thakte CCpur sub divn apan 842; Thalon sub divn apan 30; Singngat apan 30; Parbung apan 365 leh Henglep sub divn apan 57 hi’n kigen hi.Format kimlou omteng SDO te’n hihfel ding leh July 16, 2013 in DC’s office a submit ding in thupuk uhi. Screening Committee in approval abawlteng Imphal ah thon ding uh a, state govt in fund peding hi’n kigen hi. Govt rule dungzui in disaster tawh kisai fully damaged te inn 1 ah Rs. 15,000/; severely damaged te inn 1 ah Rs. 3,200/-; partially damaged te Rs 1,900/- leh destroyed huts te 1 ah Rs. 2,500/- hiding a, tunia case kigenkhawm teng panpihna piak hileh Rs. 52,93,700/- poimawh ding hi’n kigen hi.

Lamka khawpi ah US Dollar Store
Lamka, July-15: Lamka khawpi changkang(develop) deuhdeuh a,tuma deuh akipan in New Bazar, Tedim Road ah ‘L.R. Agency’ min in ‘US Dollar Store’ kichi vanzat poimawh chituamtuam zuakna dukan/dawr hoihtak khat kihong thak hi. Huai US Dollar Store neitu Ms Lawmruali in a gendan in ‘US Dollar Store’ kichi Company om a,aman huai zom(joined)hi’n gen hi.Aman a gendan in US Dollar Store kichi Imphal leh Lamka ah khat tuak lel om hi’n gen a,a van zuakte uh India gamsung mun tuamtuam akipan kia hilou in leitung gam tuamtuam(foreign countries) akipan leng van tamtak zuak a, Lamka a Vai Mahajonte’ van zuak sangin aman tawmzaw deuh hi’n gen hi.

Rural Bank/CCpur branch hon hiding
Lamka, July-15: New Lamka a Damkam Bazar ah July 17, 2013 zinglam dak 10:00 in Ms Jacintha Lazarus, IAS, DC/CCpur khuallian apang in Manipur Rural Bank, CCpur Branch hongkhe ding a, Ms Mannuamching, MCS, CEO/CCpur in Guest of Honour hihna tawh uap ding hi.

Gari park-dan kilawmlou omsek

Lamka, July-15: Traffic Police te’n traffic tawh kisai a nawngkai omlouhna dingin niteng a duty in khawpi sung fangkual uh a, lampi nawl a gari kikoihte ahiding banglou a muhte uh mankhia in Police Station tunzel uhi. Lamka khawpi ah Traffic Rule kizatna sawtsim mahleh gari neitu khenkhat in midang khuallou in utna mun peuh a gari park pawl om lailai uhi. Zanhal in leng Tedim road-PKT street junction ah PKT Street lutna ding dal in two-wheeler 2 parking om a, bangtanhiam sung mi a hunkhop hihbuai uhi.

Army te’n KCP member 1 mankhia
Lamka, July-15: Police apan kizadan in 9-Dogra Regt leh 1/11 Gorkha Rifles te’n July 12, 2013 zingsang dak 2:00 velin Monglenphai ah joint operation nei uh a, KCP active member Haokholal (40) s/o Sehtingou of Monglenphai mankhia uh a, amah’ apan 5.56 mm tang 3, Nokia mobile handset 1, demand letter FD/14 ‘A’ 1980 kichi 1 mukhia in Imphal Police ah pekhia uhi. CCpur Police te’n case lasawn in court ah pawkhia uh a, Court in July 19, 2013 tan Police custody a omdin phalsak hi. Haokholal kipuanna apan kum bangzah hiam paisa in UTLA apan kitawp a, Aug 2012 in KCP zom in organisation ading in sum leh pai kaikhawm hi.Police te’n Haokholal tung ah FIR No. 64 (7) 2013 CCP-PS U/S 17/20 UA (P) A.Act & 25 (1-C) Arms Act registered uhi.
Singnou manbei in hawmkhia

Lamka, July-15: Divisional Forest office/CCpur in Vana Mahotsava zatna kawm in tuni in manbei in singnou (tree seedlings) hawmkhia uh a, abei masiah hawm ding uhi. Tuni’n Tuibuong a Environmental Park, Signgat leh Sagang a Range Office ah singnou chi (species) 10 hawmkhia uh a, tuni in singnou 18000 vel hawmkhia uhi. Range Office 3 ah singnou 20000 chiat hawmkhiat hidin kigen a, tuni a kihawmkhiate NGO, V/A leh School te’n la tampen uh hi’n kigen hi.

ZYA Pangzawl Unit honna om

Lamka, July-14: ZYA Lamka Block saina in zan in Pangzawl Community Hall a kikhopna ah ZYA Lamka Block President Damliansiam in ZYA Pangzawl Unit hong a, Upa Dou Za Lang in Unit makai thak dingte Pathian kiang ah thumsak hi. ZYA Gen HQ apan President T.Goukhomang makaih in ZYA Gen HQ, Block leh Unit tuamtuam apan makaite’n uap uh a, ZYA Gen HQ in ZYA Pangzawl Unit-te’ kipatna ding thil poimawh tuamtuam banah Rs 2000/- pia uhi.
ZYA Pangzawl Unit bel July 4, 2013 in TK Mang, Inf Secy ZYA Gen HQ leh Tonglal, Social Worker te’n phutkhia in huai ni mah in kum 2013-15 sunga Unit makai ding mipi’n tel uhi. President -T.Sian Pau; Vice President- Dai Khan Suan; Secy-Thang Lian Khual Shoute; Joint Secy-S.Kap Suan Mung; Finance Secy- Zam Sian Mung; Treasurer -Zam Khawl Kim leh Inf & Pub- Awi Nem Cing hi uhi.

Zan issue Express suak theilou
Zan nitakin Manipur Express zan issue print laitakin vangtah huaitakin a part poimawh khat theihkholhlouh in sia a,zan nitaklam bek a hawmkhiak man tup himahleh zan nitak khawmial tan in lng mechanic te’n na a seplai ziakun zan issue Newspaper suak theilou hi. Hibang haksatna ziaka zan issue hong suah theihlouh ziakin latu leh simtute’ non theihsiam uh ka hon ngen uhi. Circulation incharge,Manipur Express

IMPHAL NEWS
Bollywood actor Priyanka Chorpra

Imphal, July-15: Bollywood actor Priyanka Chopra in London Olympic bronze medalist MC Mary Kom kimuhpih dingin tuni’n Imphal hongpha a, tuni mah in Mary Kom tenna inn ah kimuhpih a, huai ah Manipuri film a actor/actress khenkhat leng tel uhi. Film Director Sanjay Leela Bhansali in boxer Mary Kom tanchin leh tangthu akaihkhawm film a bawlkhiak hiding a, Mary Kom mun ah Bollywood lemchingtu Priyanka Chopra pang ding hi. Tuni a Tulihal airport hongtun in mipite’n dawn uh a, huaizawh in Hotel Classic ah hun sawtlou zangkhawm in Langol a Mary Kom official quarter ah tuni nitaklam in hun zangkhawm uhi. Priyanka Chopra bel July 16, 2013 in kiknawn ding hi.

UPF makaite tawh Imphal ah genkhawm
Imphal, July-15:UPF a kikhaikhawm UKLF, ZRA, KNF (P) leh HPC (D) makaite’n govt. in stipend hoihtak peding leh meeting neihpih dinga ngetna abawl nung un Joint Monitoring Group (JMG) on Suspension of Operation (SoO) leh UPF makaite tuni’n 1st Manipur Rifles complex a banquet hall ah meeting uhi. Thusuakin a gendanin huai hunah stipend, re-verification leh camp position tawh kisai genkhawm uh a, Phaiphatang a ZRA designated camp zawhsiangna dingin leng ngen ui.JMG in khateng a stipend Rs. 3000/- piak zel dingin chiam a, himahleh camp bawlhoihna ding leh stipend ginatak a piak theihna dingin cadre omzah diktak piak masak ngai hi’n gen uhi. Tuni a meeting hunah Principal Secretary (Home) leh JMG chairman telin ADGP (L/O), SP CID (SB), Assam Rifles , Army, Border Security Force, CRPF leh govt. lam apan SIB tawh UKLF, ZRA, KNF (P) leh HPC (D) officer-te tel uhi.

Sumlem tawh kisai sinsak
Imphal, July-15: Manipur Police saina in Reserved Bank of India, Guwahati leh Manipur Police te’n 1st M/R Banquet Hall ah tuni zinglam dak 9.30 apan nitaklam dak 1.30 tan “One day training programme on Fake Indian Currency Note” kichi nei uh a, Police dept nuai a ASI rank apan DSP tan, DSP, CO MR leh CO IRB telin dist. tuamtuam a Police officer mi 102 tel uhi. Huai hunah Y Joy Kumar Singh, DGP in programme hong a, resource person N Nagaraj, Asst. General Manager, RBI Guwahati in Fake Indian Currency Note tawh kisai sinsak hi.

Ni 3 sungin hilhchian uhen- KLO/KLA
Imphal, July-15: Seikhohao Khongsai@ LH Marvin, Home secretary, KLO/KLA thahna mawhpaih kawm in, KLO/KLA(KNO) adinga vangsiatna vuak hilou in Manipur mipite adia vangtahna ahihdan, general secretary L. Timothy Kuki in gen hi. Aman agenzelna ah hihkhelh banghiam nei ahih leleng numei naupang tela innkuan a khualzinlai ambush ding ahi kei chikawm in tualthatte tuni akipan ni 3 sunga kipuang in theisak a, suizuina pailel ahihman in pawlpi leh mimal kigolh peuhmah action khauhtak lak hiding chi hiTuabang kalah hiaithu tawh kisai a KSO general HQ, Kuki inpi Sadar Hill, Saikul leh Khongsai Inpi Manipur banah KNO/KNA makaite leh mipite panlakdan KLO/KLA (KNO) in phattham ching ahihdan gen in kipahthu puang hi.

BJP in special campaign bawlding

Imphal, July-15: BJP youth wing Bharatiya Janata Yuva Morcha (BJYM) pawlin Yuva Sadasya Yuva Mitra Abhiya kichi singtangmite lakah special campaign pan ding uh a, BJP ah min pelut dingin tuailaite chialna bawlsawm uhi. Manipur Pradesh youth wing President O Manas in BJP Manipur pradesh office, Imphal ah tuni’n huai hongkhia a, nationwide campaign ahihleh July 15 apan 23 kikalin om ding a, Anurag singh Thakur, MP(Lok Sabha), National President, BJYM makaihna tawh nei ding uhi. Member hihtheihna dingin kum 18-25 mi hihngai hi’n gen uhi.

Imphal ah Rs 69.38 in Petrol kizuak
Imphal, July-15: Petrol litre khat Rs. 2.14 vela apun ziakin Imphal area ah Rs. 69.38 in kizuak a, Diesel leng Rs 50.73 per litre tung hi. Thautui khang mahleh mi tamzaw in poimawh salou in ahibang bang in lei uh chihthu om hi.

HPC(D) palai dite puangkhia
Lamka, July-15: Kalnawn Ningani (July 18, 2013) chiangin Mizoram khawpi Aizawl ah Mizoram govt leh HPC(D) in kihouna a neih hun ua, HPC (D) palai dingte puankhiakin omta uhi. Amaute HPC(D) working chairman LP Hmar leh Member-Secretary Lalthalien in makaih ding ua, member dangte ahihleh, Lalmuanpuia Punte, Lalremruata Varte, Lallenmawia Jongte, Rohringa, Joseph R Hmar leh F Shanhima te hiding uhi.

Female Health Worker kila ding
Imphal, July-15: Govt. of Manipur nuaia Directorate of Health Service leh Directorate of Family Welfare Services in academic session 2013-14 akipan Female Health Worker zil ding lading uh a,Aug 11,2013(Sunday) in written examna om ding hi.
tuni apan July 31, 2013 tan Medical Directorate leh dist. chih a CMO, MO i/c, CHC Jiribam & Kangpokpi leh Moreh Hosptial ah application form kihawm ding hi. www.manipurhealthdirectorate.in ah leng download theih ding hi. July 25-31, 2013 sung zinglam dak 10-12 tan submit theih ding a, Admit card ahihleh Medical Directorarte, Lamphel ah Aug 5-8, 2013 dak 10-4.00 sungin lak theih ding hi. Kum 17-35 kikal mi hihngai a, siamna ah NIOS telin recognized board apan 10+2 in Arts / Maths, Physics, Chemistry, biology, biotechnology, economics, political science, history, geography, business studies, accountancy, homescience, sociology, psychologoy, leh philosophy. English /English elective or science or health care science, vocational stream hithei hi.