LM Khaute in VPC te lecture stand pia
Lamka, June-16: L.M Khaute, IPS, Addl DGP leh a innkuante’n tuni’n Lamka hongpha ua, sunnung dak 1:20 in Vaiphei Peoples’ Council (VPC) Office, Bethel Veng, New Lamka ah VPC makai te tawh kithuah khawm in VPC te’ zatding lecture stand 1 pia hi. L.M Khaute in agenna ah VPC General Assembly neih hun ah thiltuam deuh, VPC neih nailouh 1 piakding in ngaihtuah khia a, azi’ tawh kikum in lecture stand 1, teak a kibawl piakding a thupukna bawl uh hi’n gen hi.

Amah leh a innkuante’n VPC vanzat ding apiak uh thil neuchik himahleh VPC ngaihnatna ziaka apiak uh hi’n Khaute in gen hi. Aman agenbehna ah VPC vanzat ding symbolic om leh chih ngaihtuah in huai semkhia hi’n gen a, lecture stand ah VPC logo, amai ah ‘VPC’ chih kigelh bawlsak hi’n gen a, VPC adia pan nang tampi om a, huai te leng mangngilhlou ahihdan leh VPC nungthuap gige dia mansa ahihdan gen hi.

Khatkhotong Baite, President,VPC in agenna ah mipi leh Officer tamtak-te kithuahpihna ziak in VPC in thil hihding leh sepding aneihte uh zouzel hi’n gen a, LM Khaute leh a innkuante’n VPC vanzat ding apiakna tung uah kipahthu gen hi. ST Liana in L.M Khaute’ apan thilpiak Pathian kiang ah thumna tawh lan hi.

PTC 64th Raising Day lawm ding
Lamka, June-16: Pearsonmun Community Hall ah June 27, 2013 zinglam dak 11.00 akipan Paite Tribe Council (PTC) GHQ phuhkhiak nung, kum 64 chinna Raising Day lopna om dinga, Thanglianpau Guite, President, Zomi Re-unification Organisation(ZRO) HQ; Phungzathang Tonsing, Minister (Health&FW, GAD &CADA) leh Vungzagin Valte, Parliamentary Secretary,(Hort, SC&CADA) te’n exhortation speech hunah thugenna nei ding uhi. Huai hunsungin ‘Open Debate’ ah Langkhanpau Guite, Chairman, ADCC in Inn pipa hihna tawh Innpi ngaihdan ‘Khua-le- tui kepbit Hausa te mawhpuak ahi' chih move ding hi. L. Tual Khan Hau President, PTC/GHQ in PTC puanlap (flag) kaihpalhna nei ding hi.

Dy. RO di’n foresters 16 kaisang
Lamka, June-16: Principal Chief Conservator of Forests AK Rana in order asuahna ah Departmental Promotion Committee (DPC) in a recommend dungzui in foresters 16 te Deputy Rangers Officer dingin Secretariat Forest Department in kaisangsak chi hi. Scale of pay ahihleh Rs 9300-34800/- Grade Pay Rs 4200 hiding hi. Foresters 16 lakah singtangmi (ST) 6 telkha ua, huaite ahihleh N Tualzachin, Mimin Sitlhou, Mashangva Alexander, SR Marson Anal, Angam Kom leh H K Seima Hmar te hi uhi.

CIPET form submit theih
Lamka, June-16: CIPET nuai a course tuamtuam training ding a application form la te’n june 17, 2013 (seppatni) tan in submit theih ding hi. Manpur Express office a submit ut te’n zinglam dak 10:00 tan in submit theih ding a, dak 10 nung in CIPET staff te’n Imphal lam ah paipih ding uhi.

ZHRF Mumbai Cell in PM ah lehkha khia
Lamka, June-16: Zomi Human Rights Foundation (ZHRF) Mumbai Cell in Prime Minister Dr Manmohan Singh kiangah lehkha khia in, Manipur’ singtangbial ah thautui lakkhiak sawmna tawh kisai tu-le-tu a hitheilou ding ahi chi uhi. Leitang neitu (Indigenous people) te’ theihpihna leh lemsakna tel hetlou a hibanga leinuai hauhsakna aneih sunsunte uh tawpkang sawmna pe’n leitang sunga teng mi-le-sate muhsitna liantak ahi chi uhi.

ZHRF Mumbai Cell thusuakin ataklatna ah, N-E India a singtangmite dopsan naksanga nendet utna lungtang Govt of India in nei hia ahihkeileh Manipur govt in bangtan thuguk phum nei uhiam chi ua, private elite company te’ hauhsakna dinga Mnaipur singtang bial leitang leh a mite zuakkhiak pen ZHRF in naktakin nang ding chi uhi. Tualsuakmi (Indigenous people) te’ zalenna hih chimit a, Multi National Company’ Jubilant Gas and Oil Private Limited te’ khut ah singtangmite’ leilung hauhsakna tawpkangsak tupna pen ngaihsiam theih vual hilou idng chi uhi. Manipur govt in kihhuai taka “Dirty Politics” sai uh ahihleh khentuam neilou zalentaka kivaihawmna gam India bang chi hita ding hiam chi uhi.

GoI in ‘lemna, kipumkhatna leh khantouhna’ om ding deihna ziak mah in Manipur govt theihpihna tawh singtangmi helpawl tuamtuamte tawh lemna thukhun (SoO) paitouhpih ua, huchih lai a, Manipur singtang bial a aguk-agal a leilung hauhsakna thagum a kisuhsak sawmna pe’n singtangmite’n ngaisiam ngeilou ding chi uhi. Prime Minister kianga memorandum kipia ah, ZHRF Mumbai Cell sik-le-tang in Jamminlian Vualnuam Convenor leh Ms Kimthianhoih Co-Convenor te’n suaikai uhi. Tuma zekin leng ZHRF Shillong Cell te’n Veerapa Moily Union Minister of Petroleum and Natural Gas kiangah Manipur’ singtangbial a Oil exploration tawh kisai khawlsak dingin ngetna leh theihsakna ana pekhinta uhi.

Traffic rule bawhsia 16 mankhia
Lamka, June-16: Lamka khawpi sunga ‘One way traffic rule’ leh ‘Gari parking’ dan Police, VDF leh traffic Police te’n enzui zel uh a, June 10-15, 2013 sung in traffic rule bawhsia 16 mankhia uh a, TR-5 receipt cut in luau sak uhi.

Mun 2 ah naupang camp om ding
Lamka, June-16: EBCC Bethany, Bungmual inntekna in zingchiang June 17 apan June 21, 2013 sung Mission compound ah Naupang camp neiding uhi. Thugentu in Rev K Kamchinkhup Director (Min) EBC Headquarters pang ding hi. Tualou in, Baptist Children Deptt, EBCC Pethuel, New Lamka saina in June 18-22, 2013 sung SSPP Residential School, Ngathal ah ‘Naupang Hotdamna Camp om ding a, T.Damkhothang, Lecturer GBC leh Dr G.Suankhanhau, Lecturer GBC te thugentu in pangding uhi.

EBC’ Gen Secy in Album thak hongding
Lamka, June-16: Baptist Youth Fellowship, EBCC Pethuel, New Lamka in Gospel Music Video Album Vol. II ‘Ka gam uh damsak in’ kichi abawl uh zousiang uh a, June 17, 2013 nitak dak 6:45 in Rev S.Vungminthang, General Secretary, EBC in honna leh latna neiding hi.

IMPHAL NEWS:

MBBS/BDS entrance exam cancelled thu sousang
Imphal, June-16: Manipur government in kumdang bangloutaka tutunga MBBS/BDS entrance examination omdek lai a cancel guih utawh kisai soiselna nasatak om a, huchih lai a Manipur Students’ Federation (MSF) volunteer 4 police te’n amat ziakun tu in thiltung tawh kisai sousang semsem dingin kilang hi. Hun paisate in ahihleh, MBBS/BDS entrance exam pe’n state medical directorate in saisek mah leh tukum in Ibobi government in hihbei chi’n ngohna sangtak om hi. Manipur govt in ahihleh tutunga entrance exam om dek pen Supreme Court thupiak dungzui a Notifying Eligibility Entrance Test (NEET) a a hih hoih mahmah (merit list)a telte chauh in ngahtheih ding uh chi’n exam om dek pen cancel ahihdan puang uhi.

Hiai MBBS/BDS entrance exam om dek tawh kisai a last hour a cancelled a ompen thil hithei mah ding hiam chi’n Manipuri Students’ Federation (MSF) in dotna khauhtak state govt tungah bawlkhum in kiphinna tanpha nei ua, Imphal a medical directorate leng khaksak uhi. Tua hunin, MSF makai president Longjam Umakanta, vice president Aheibam Boynao, finance secretary Soibam Devlong leh Imphal East MSF unit President Keisham Romeo man uhi. Thiltung zakphet in MSF volunteer aza asimte kipunkhawm in “We want Justice” chi’n Imphal khawpi sung ah kipum kou ua, medical directorate office lam manawh in pai uhi. MSF general secretary RN Koireng in thiltung mawhpaih mahmah a, examination centres tanpha puankhiak ahihnung a examination cancel thak chih a om pen state govt adia zahlakna tawpkhawk ahi chi hi. All Manipur MBBS/BDS Entrance Examination Parents/Guardians' Association te’n leng MSF te’ nasep gupthu puang uhi.

TT coaching camp zousiang
Imphal, June-16: Khuman Lampak Sport Complex a National Sports Academy indoor hall ah Table Tennis Federation of India panpihna in North Korea apan table tennis coach Song Han Kim coach na nuai leh Manipur Table Tennis Association (MTTA) saina a “21 days residential table tennis coaching Camp” tuni’n zawh siang hi a, hun khakna programme leng om hi. Table Tennis coaching camp hunsung in North East state tuamtuam te’ lakah Assam leh Sikkim chihlouh siah apan table tennis player (kum 12 apan 18 kikal te) 50 val te training hoihtak piak hi uhi.

North Korea Coach Song Han Kim in agenna ah, “hun a om ding leh Manipur phak nawnding ka lunggulh” chi a, tutung a ni 21 sung lel training hun tom lua hi’n gen a, maban a hiai bang a training sai touh ahih zel leh North East a TT player te’ International competition tung ban ding uh hi’n leng gen hi. Camp khakna hun ah Chief Guest in Chief Minister O, Ibobi panga, functional president in Works Minister Dr. Kh. Ratankumar pang a, Guest of Honour in Parliamentary Secretary/Youth Affairs & Sports, M. Prithviraj leh Manipur Olympic Association President, Bijoy Koijam pang uhi. CM in a thugenna ah Rio a kum 2016 a Olympic Games om ding ah Manipur in Gold Medal lak theihnang in sportsmen teltuam khenkhat te’ ah state govt. in world class sportsperson bawl khiak ding a thiltup khat a nei hi’n taklang hi.

Gaikhangam in NPF te dawngkik
Imphal, June-16: Manipur’ Deputy Chief minister banah Manipur Pradesh Congress Committee (MPCC) President Gaikhangam in tuni in thuthaksaite’ kiang a agendanin, thu ka gensa ka paipih a, huai mah ah ka dingkip ding chi hi. Aman ataklatdanin, Nagaland apan hong kipan Naga People’s Front (NPF) te’ election manifesto te’n thupilua hitaleh, hichilou ding hi a, bangmah ahihlouh ziak mah ua, hichi ahi uh chi nawn hi. NPF Manipur unit in ahihleh MPCC president kiangah na thugen enthak nawn inla, kintakin hilhchetna bawlin, chi’n phut uhi.

Gaikhangam in ahihleh zanzek mahmah in NPF te’n election agenda/manifesto kichian neilou in Manipur kipumkhatna (territorial integrity) hihsiat sawm maimai ahi uh chi a, hiai pe’n Nagaland leh Manipur a NPF om te’n nna sa mahmah uh chih ahi. 2014 general election om ding ah Manipur singtangbial apan Lok Sabha member dinga Congress candidate chinsaklouh teitei sawmna a NPF te’ thuvawkte kuaman gingta keini chi tanpha in Dy Chief Minister Gaikhangam in campaign bawlta a, huai in NPF te’ thangpaihna behlap tuan mahmah chih ahi.

Home Secy thakding leh CM houlim
Imphal, June-16: Union Home Ministry a Officer on Special Duty (OSD) leh Union Home Secretary designate Anil Goswami in Manipur hongpha a, Chief Minister Okram Ibobi Singh tawh houlim in, North East border state te’ ah law & order dinmun tawh kisai enkhe dinga hong zin ahihdan zasak chi uhi. Aman ahihleh July 2013 apanin Union Home Secretary hihna lending, RK Singh tha khengkhe ding hi. Chief Minister’s Official secretariat ah Goswami makaihin tu nitaklam in meeting om a, huai hun ah Deputy CM Gaikhangam, Chief Secretary DS Poonia, Principal Secretary (Home Affairs) Dr. Suresh Babu leh Director General of Police, Yumnam Joykumar te leng tel uhi. Anil Goswami bel Jammu & Kashmir cadre IAS officer 1978 batch hi a, aman June 30, 2013 in RK Singh apan Union Home Secretary mawhpuakna la ding hi. Tu in bel home secretary ngakna kawmin, Union home ministry ah OSD len phot hi.

Gamdang apan dancer hunkhop hongtung
Imphal, June-16: Free Dance workshop sai dingin gam tuamtuam apan dancer 7 leh film maker 2 te tuni’n Imphal hong tung uh a, amau a project uh “2nd Home-India” kichi amau laam tungtawnin numei te panpihna leh empower na ding banah gender equality om na ding a panlakna hi’n gen uhi. Dance leh film maker te’ Israel, US, Canada, Denmark leh Poland apan hi uh a, June 17,19 leh 20, 2013 in Lee Faith Home School, Iboyaima Shumang Leela Shanglen leh Hafta Kangjeibung mun te’ ah Free Dance Workshop on gaga, contemporary, contact improvisation chih te’ sai ding ua, Manipur ah a om sung un Artist tuamtuam te’ tawh kihouna nei ding uh hi’n leng kigen hi.

Manipur a petrol leh diesel man
Imphal, June-16: Zan nitak zankim akipan petrol man litre 1 ah Rs. 2 a akhan ziakin Manipur ah leng VAT (Value Added Tax) tel in Rs. 2.40 in khang a, diesel man ahihleh khang tuan lou hi. Huaiziak in Imphal leh a kiim lak a oil pump tuamtuam ah petrol litre 1 Rs. 65.35 in ki zuaka , diesel litre 1 ah Rs. 50.21 in kizuak hi. Lamka leh Jiribam ah paisa tamlou chik in kilamdang a, Lamka ah petrol litre 1 ah Rs. 65.36 in ki zuak a, diesel ahihleh litre 1 ah Rs. 50.22 in kizuak hi. Jiribam ah petrol litre 1 Rs. 65.71 in kizuak a, diesel ahihleh litre 1 ah Rs. 50.36 in ki zuak hi.