Lamneilhing Chongloi in ‘Miss Bharat 2013’ hihna la
Lamka, June-25:Gandhi Film Production saina nuai ah June 22-23, 2013 sungin Madhya Pradesh khawpi Bhopal a Ronak Plaza mun ah Miss Bharat "Beauty Pageant" 2013 kidemna om a, June 24, 2013 nitakin Grand finale atel mi 12 lakah Manipur akipan Miss Lina Lamneilhing Chongloi (21) in ‘Miss Bharat 2013’ title ngah hi. Miss Lina Lamneilhing Chongloi in Miss Bharat 2013 title a ngah tawh kitonin cash prize Rs. 50,000 leh Trophy piakin om hi.Aman Miss Gladrage Super Model kitelna adingin direct entry ngah in Hindi movie khat adi’n leng offer mu a, France khawpi Paris a International show ah Photoshoot nei ding leh mun tuamtuam adia telkhiak in leng om chihthu kiza hi.

Outside CCpur team in goal 4-3 in vualzou uh
Lamka, June-25: CDSA saina in tuni nitaklam dak 3:00 in Lamka Public Ground ah CCpur dist a omlel (inside team) leh Outside CCpur team-te’n Exhibition Football Match 4veina kimawl uh a, Lamkhosem Khongsai, DTO/CCpur khuallian apang in exhibition football match kik-off hi. Inside team sik in Zomi Football Club leh Hringsolal Thomte(Air India) makaih in Outside CCpur team apan National Prayer tamtak tel uh a, Ouside CCpur team in goal 4 -3 in zou uhi. Outside team apan Lalzarzo in goal 2 khum a, Henry Gangte leh Khamminthang in goal 1 tuak khum uhi. ZFC apan Lalminlien, Lalminlun leh Thangginbieksang te’n goal 1 chiat khum uh a, kimawl etnuam mahmah in public ground kim vel ah mipi tamtak in en uhi.

ZRA Drugs Cell in khamtheih hunkhop mukhia
Lamka, June-25: ZRA Drugs Cell pawlin khawpi sung ah khamtheih doudalna a pan alak uh sunzom zel uh a, tuni sunnung dak 2:00 velin Vunglianlal (29) s /o (late) Kaikhanlam of New Lamka, Gouchinkhup veng atenna inn uapan mankhia uh a,amah akipan khamtheih chi tuamtuam Spasmo Proxivan (SP) tang 328, Relipen (RP) tang 7 leh Dendrite 3 (50 ml), sum atuat in Rs 6470/- value ding mukhia uhi. Khamtheih matkhiak teng uh tuni nitak dak 6:00 in Media-te muh in haltum vek uhi. Vunglianlal’ akipuanna a a gendan in Terakhong akipan Ansari in damdoi khamtheihte supply zel a, Tuibuong Forest gate ah kipetuahzel in aman zuaksawn zel a, Dendrite-te ahihleh Chiengkawnpang a Hardware Store apan alei hi’n gen hi. ZRA Drugs Cell te’n Vunglianlal thuhilhna hoihtak neizawh un khahkhia uh a, khamtheih dou dalna ah kuapeuh in ZRA Drugs Cell-te kithuahpih dingin ngen uhi.

H. Vumnang in lampi bawl ding
Lamka, June-25: India leh Myanmar gamjijul India gamsung a om Behiang khua ah Border Trade Centre honkhiak hiding a, huai akipat hun ah sumdawnna(trade) lam feltaka a paitheih ding in H. Vum Za Nang @ Vum Nang, President, Zogam Rural Development Programme in Behiang khawkiang a Khenman khua leh Chikha khua kikal lampi bawlhoih sawmin tunung sawtlou in nasep patsawm hi.Vum Nang in nasepna ding JCB lei kawmin Lamka hongpha a,JCB driver ding hungaih lel lai hi’n kigen hi.

CCpur district in zintun ding
Lamka, June-25: Kum bangzah hiam paisa apan Inter Hill District Badminton Championship om sek a, kumteng in Dist tuamtuam in zintun (host) kikhel uhi. Tukum in CCpur Dist Badminton Assn te’n October 2013 kha in zintun (host) ding uhi. Huai hun ah CCpur Dist Badmintion Assn(CDBA) nuai a club affiliation leh membership fee (old & fresh member)a lunglut tengin July 2013 kha in registration bawl ngai ding a, huai hihloute Inter Hill Dist Badmintion Campionship ah tel theilou ding chi’n CDBA apan thusuak om hi.

Ni 2 sung om ding Seminar kipan
Lamka, June-25: EBC, ECA, Christian Institute of Management leh Glocal Volunteers te saina in tuni in New Lamka a Dorcas Hall ah ‘2-days management seminar for churches and public and charitable institute/organisation’ kipan a, Rev. D.Hlunkholal, Superintendent, Christian Education in seminar hongkhia hi. Seminar sungin Prof SD Jeyakumar in ‘Constitution of India leh Organisational Management’ sinsak a, Varghese Jacob in ‘Finance management, Foreign Contribution Regulation leh Income Tax’ tawh kisai sinsak hi. June 26, 2013 sunnung in Seminar a telteng certificate piak hiding a, Rev. S.Vungminthang, General Secretary, EBC in hunkhak hi.

Doctorate Degree ngahthak
Lamka, June-25: Mary Nengneichong Baite w/o D. Khuala Vaiphei of Tualnuam, CCpur in Professor Tanika Sarkar, CHS/SSS/JNU supervise-na nuai ah thesis a gelh “Ethno-History of a Tribe in Manipur: A Vase Study of the Vaipheis from Colonial to Post-Colonial Times” chih tungtawn June 24, 2013 in New Delhi a Jawaharlal Nehru University nuai ah Doctorate degree(Ph D) ngah hi’n kigen hi.

PMEGP loan form kihawmkhia
Lamka, June-25: Tuibuong a DIC/CCpur office ah PMEGP loan 2013-14 ading application form kihawmkhia a, CCpur district PMEGP loan a piaktheih (quota) KVIC ah 31; KVIB ah 31 leh DIC ah 26, ave a kigawm 88 hi’n kigen hi.

Video Album thak latna leh honna
Lamka, June-25: H Pau Za Cin of New Lamka(G) in a laphuahte Video Album a kibawlkhia June 26, 2013 zinglam dak 11.00 in Simveng a SYO Hall ah Rev Dr Sut Khan Thang,Executive Secretary,CBA in lan(dedicate) ding a, huaizawh in Zomi Council Chairman LB Sonna in hong ding hi. Huai hun ah functional President in T. Goukhomang, President, ZYA HQ pang ding hi.

CMO office akipan ngahtheih ding
Lamka, June-25: Medical deptt in Stafff Nurse 5, Pharmaciest 1, LDC 1 leh Male Health Worker 1 a lak ding ua apply te’ adingin June 26-July 4, 2013 sung CMO office ah application form kihawm ding hi. Application form kimtaka fill-up zawh in July 5-12, 2013 sung in CMO office ah examination fee ST/SC te’n Rs 300/- leh Geneal/OBC te’n Rs 600/- tawh submit ngaiding hi. Post tuamtuam apply ding te’n Dist Employment Exchange ah registration bawl masak ngaiding hi’n kigen hi.

ZSF hilou in ZSP hizaw
Lamka, June-25: Manipur Express zan issue ah ‘ZSF leh KSO makaih n kilemna om’ chih kisuah ah ZSF kichi khapen ZSP Gen HQ chih ding hizaw hi.

Biometric Awareness paitou zel
Lamka, June-25: 58-CCpur A/C bialsung ah Biometric Awareness campaign paizel a, L.T Puii, SDO/CCpur leh Kamsuanlun, EM/ADC makaih in tuni’n mun 4 ah awareness campaign om hi. Hiangtam Lamka leh Awnchinkap Veng te’ ading in Hiangtam Lamka a a YPA Hall ah Awareness campaign om a, New Zo Veng, Hiangzou, Zoumunnuam, Zenhang Lamka, Luoia Veng leh Khumujamba Meitei Leikai te’ ading in Zogal Memorial Hall complex ah awareness campaign om hi. Rengkai leh Neihsial Vengte’ ading in Rengkai Community Hall ah om a, Salem Veng, Hmuia Veng leh Lailam Veng te’ ading in Hmuia Veng a YMA Hall ah om hi. June 26, 2013 in SYO Hall, PT Sports complex, New Lamka a YPA Hall, New Lamka a CYA Hall leh Dorcas Veng a YPA Hall ah om ding hi. June 27, 2013 in Kawnpui Community Hall, Lanva a TCCC Hall leh Thingkangphai Community Hall ah om ding a, June 28, 2013 in Mata Community Hall leh Geljang Community Hall ah om ding hi.

SUUNNA
S.Thangbiakdong (27) s/o S.Kamzamung of New Lamka, Vengnuam zan nitak lam in sungna in si a, tuni’n YPA hanmual, New Lamka ah kivui hi.

ASSEMBLY NEWS
Assembly ah Demand 3 pass uh
Imphal, June-25: Manipur Assembly session ah tuni’n department tuamtuam 3 in March 31, 2014 tana a sum zat ding Demands for Grants,2013-2014 nuai ah Rs.1,20,87,41,000 passed uhi. Huaite
1.Demand No. 38-Panchayat :Rs. 61,32,63,000
2.Demand No. 43-Horticulture & SC :Rs. 33,96,18,000 3.Demand No. 49-Economics and
Statistics t :Rs. 25,58,60,000

Singnou tamtak hawmkhia
Imphal, June-25:Tuni’n Assembly Session ah Th. Shyam Kumar,MLA in singnou hawmkhiak tungtang dotna a bawl Th. Debendra Singh,Minister(Forest) in a dawnna ah Forest deptt in tukum sungin singnou chi tuamtuam 6,30,000 hawmkhia chi’n gen hi. Mipi te’n district tuamtuam a Divnl Forest Officer-te kiang ah lehkha gelh in singnou ngetna a piak uh ngai a,Forest Nursery naipen ah manvei in singnou lathei uh chi’n Minister in gen hi.

Beneficiaries te’n panpihna ngah
Imphal, June-25:O. Lukhoi Singh,MLA in tuni’n Assembly session ah Tribal Affairsd deptt tungtawn a beneficiaries tungtang dotna a bawl Tribal Affairs & Hills Minister Gaikhangam in a dawnna ah kum 2012-2013 sung adia beneficiaries-te Rural Shelter Scheme chihlouh a dangte selection list suahkhiak hita chi’n gen a, beneficiaries-te leng Rural Shelter Scheme chihlouh adangte piakkhiak vek hita chi’n gen hi.

IMPHAL NEWS
Dakkal 24 sung bandh puang
Imphal,June-25:Irengbam Irabanta pimang ahih ziaka a kibawlkhia Joint Action Committee (JAC) pawlin June 26, 2013 in Manipur pumpi ah dakkal 24 sung bandh puang uh hi’n kigen hi. Akigen dan in NSCN(IM) pawlin May 27, 2012 apan Irengbam Irabanta a pimang uh tutan khahkhiak ahihlouh banah a omna leng kitheilou hi’n kigen hi.

Damsung suangkulh tangdin thutankhum

Imphal, June-25: Bishnupur Police 2 telin mi 4 in March 21-22, 20012 zankim lai in malta zuak ding pua nupi khat Bishnupur district sung munkhat ah a kisualhuan (rape) ziakun Court in mawhpaih a, tuni’n Imphal West Session Judge Salam Ingocha Singh in mi 4te tungtang court ah ngaihtuah a, Indian Penal Code a section 376 (2) pansan in mi 4-Rojit, Ingocha, Bijen leh Kenedy te’ tungah kidnapping, robbery, armed act leh gang rape bulhkhum in, damsung suangkulh tang dingin thutan khum a, pawngsual a om nupi leng compensation piak dingin thusuah bawl hi

BJP President in mi 3 guang
Imphal, June-25: BJP Manipur Pradesh a President Th. Chaoba in kum 2013-2015 sung in BJP Manipur Pradesh ah Sports Cell a State Convenor ding in W. Ibomcha Singh of Takyel Khongbal Mayai Leikai guang hi.Huailou in BJP Manipur Pradesh a Mahila Morcha Secretary ding in Smt L. Bobi Devi of Khonghampat,Lamshang Mandal guang a,Imphal West district BJP a President ding in L. Chamba Singh of Changangei Makha Leikai,Patsoi leng guang hi.

Orissa ah Press Tour pai ding uh
Imphal, June-25: Directorate of Information & Public Relations(DIPR) panlakna ziakin tunung sawtlou in Manipur as Journalist pawl in Press Tour in Orissa state khawpi Bhubaneshwar pha ding uhi. DIPR in tukum March, 2013 beima in Press Tour a zindingte kuankhiaksak sawm mahle uh lemtanlouhna om ziakin ahun kisuan hi’n gen uh a, huaia teldingte’n DIPR card a neih teitei uh ngai chihthu om hi. Atel dingte’n June 28, 2013 tan in min piaklut ngai ding hi.

Scholarship muloute’ account update ngai
Imphal, June-25: Tribal Affairs & Hills thusuak in a gendan in Post-Matric Scholarship 2012-13 apply ST applicant khenkhat in minor (kum 18 phakma) a Bank account a hon uh kum 18 nung in account details a update louh ziakun SBI Imphal Secretariat branch in applicant- te’ bank account ah scholarship thun sawm mahle uh a system in automatic in transaction khawlsak a, applicant-te’n account ah scholarship a lut theihna dingin minor hihlai a account hongkhate’n a Home Branch chiat uah Major account a update sak dingin theisak hi.

One day Consultative meeting
Imphal, June-25:Hotel Imphal ah June 8, 2013 a All Tribal Intellectual-te kikhopna a thupukna dungzui in Expert Committee te’n ‘Manipur Village Authorities’ leh ‘District Councils Act’ amendment bawlna ding a final drafting a bawl uh zawh hita a, huai tawh kisai in July 2, 2013 zinglam dak 11.00 in Tribal Research Institute ah ni 1 sung ‘Consultative Meeting’ om ding chi’n All Tribal Chiefs’ Forum,Manipur pawlin meeting sam uhi.