Seri deptt in machine hawmkhia
Lamka, June-17: Sericulture office ah tuni in beneficiary-te kiang ah khau khekna machine Motorised Reeling machine 5 leh Motorised Spinning machine 19 hawmkhia uh a, Vialkhanthang, Dy Director(Seri) in machine-te hawmkhe kawmin sericulture kichi nek zonna dia hoihpen, tawldam taka nasep theihna hi’n gen hi. Tuni a khau khekna machine tangkha tengin khau khek ding zong din thuhilh a, a muh kei ua leleng lungnou khoithei ding uh hi’n gen hi. Machine kihawmte subsidised rate a piak hi a, Central Silk Board in 80% piak sak a, state in 10% piak sak in beneficiary te’n 10% kia uh hi’n kigen hi.
Election Officer di’n LM Lien Singsit
Lamka, June-17: Chief Electoral Officer (CEO)/Imphal office apan Dist Election Officer/CCpur ding in L.M. Lien Singsit in tuni’n DC’s office ah join hi. Kum bangzah hiam Dist Election Officer/CCpur omlouh ziak in Maniram Sharma, IAS i/c DC/CCpur & Addl DC in Election Officer hihna len hi.
Maiteh zik chituam mahmah om
Lamka, June-17: Lalthangzovi of Tedim Road (Lamka) in a inn gei uah maiteh tuh a, azik a sihtan aleh huai apan adang dawnkhia pen feet 8 tan vel lian mahmah in chituam mahmah a, a letna muntak inches 5 velin lian a, azik mong chituam mahmah in azik dang kakhe ding tamtak om teltul a, a mukha leh theikhate’n lamdangsa in mi tamtak in en sek uhi.
Teachers Summer Condense
Lamka, June-17: EBC a School Managing Committee leh Directorate of Institution, EBC saina in tuni in GBC campus a Jelshyam Chapel ah ‘Evangelist Teachers Summer Condense Course’ kichi Rev V.Thangkhangin, Director of (Inst) EBC in hong hi. Huai Evangelist Teachers Condense Course hunsung in T. Damkhothang, Lecturer, GBC, Rev. Dr. V. Ginsianthang, Vice Principal GBC, T. Vunga, Proprietor Lalpuithuaii Foundation School, Manzavung, Proprietor, Dawn School leh Hoih Betty, VK Tawna High te’n thupi tuam tuam pansan in sinsak ding uh a, June 29, 2013 in zouding uhi.
Lourup Committee in enkhia
Lamka, June-17: Ngathal Brick Field khanglam deuha tuilou (paddy field) nei mi 43 kipawl khawm ‘Lanva Dam Lourup Committee’ pawlin June 14, 2013 apan JBC zang in Lanva lui apan canal ding bawl uh a, himahleh tui luan zawhlouh ziak in tuzing in huai bawl hoihdab ding enkhia uhi. Lanva Dam Lourup Committee-te gendan in kum 1970 velin Lanva Dam hoihtak kibawl a, himahleh huai kise gawp in akisaipih deptt te’n kum 2011 in canal bawl in dam bawlthak mahle uh zattheihlouh a kisia hi’n gen uhi. Lanva Dam apan tuilou (paddy field) 40-50 acres vel tui omlouh ziak in lou kai theilou uh hi’n gen uh a, tuilou neitu mi 43 te’n Rs 1000/- chiat thawhkhawm in June 19, 2013 in tukum sung a tuilou bawl theihna din social work in canal leh dam bawlsawm uhi.
Malaria positive 2 mukhia uh
Lamka, June-17: Dist Malaria deptt te’n June 1-15, 2013 sungin damlou mi tuamtuam 1117 sisan test uh a, huai lakah malaria positive 2 mukhia uhi. Malaria positive 2 lak ah 1 pen malaria PF 1 hi a, June 1-15, 2013 sung in official record ah malaria ziaka misi omlou hi’n gen uhi.
Vacation Bible School
Lamka, June-17: Evangelical Orgn Church (EOC) Central Church a Sunday School Union te saina in tuni apan June 22, 2013 tan daihding in Nehru Marg a ECT Chapel ah ‘Shine for Jesus’ chih thupi a nei in Vacation Bible School (VBS) pan uh a, Thangkhopau in hongkhia a, huai ah naupang tamkhop tel uhi.
Vok sisa kipai ngaisiamlou
Lamka, June-17: Hemkholun of Hmuia Veng(Tongzagen Road) leh Upa Tinkhohao of Compound Veng’ inn kikal guam ah June 15, 2013 zan kalin vok sisa khat kipai a, huai kiangnai a inn neite’n amau inn apan naichik ah hibang ganpul paite mawhsakthu puang kawmin tunung in huai mun ah kuama’n gan pul pai nawnlou dingin theisak uhi.
SUUNNA
Mrs. Chinzaning(85) m/o S.Kamchinlian of Vengnuam, New Lamka tuni nitaklam dak 5:00 velin sungna in si a, June 18, 2013 in CYA hanmual ah kivui ding hi. S.Kamchinlian ahihleh CBA Agape Church Compound, New Lamka (G) a chowkidar semlel ahi hi.