Bohlui khawkiang ah lei(bridge) in Shaktiman kichippih
Lamka, June-20: M.Semuol khawmi te’n biakinn pucca a bawlsam in Shaktiman gari(No. MN-02A-5264) zangin mundang akipan suang (8mm) nawn uh a, tuni sunnung dak 2:30 vel in Shaktiman gari in Khuga left side canal apan Bohlui khua lutna a IFCD-te’ bawl lei (bridge) tunga tailai lei in kichippih hi. Thutut kingahdan in Semuol khuate biakinn omna canal side lehlam ahihziak in lei(bridge) omsa pen muanhuai lou a, Semuol khaw khen a Bohlui khua lutna bula lei(bridge) pen a muanhuai ziak in Bohlui khua lut in huai apan Semuol khawlam a taikawm in M.Semuol biakinn kiang ah suang omte suahkhe ding in gari tung ah mi 10 vel tuang uh a, gari ah full load suang pawlai canal tunga lei(bridge) in kichippih hi’n gen uhi.

Shaktiman gari tung atuangte lak ah mi bangzahhiam liam uh a, huaite lak ah Pautinmang(17) s/o Jamthang of M.Semuol leh Thanglunlian (16) s/o Khupzalian of Mualsan akhe (leg) uh liam a, Dist Hospital tut nungin doctor te’n dressing bawl in pawtsak uhi. Lei in a kichippih ziaka Khuga canal kuak a Shaktiman tang(stranded) leng chessis leh joint crossing kisia a, Bohlui leh M.Semuol khaw mipi pangkhawm in kai khethei uhi. Shaktiman neitu Thangchinlal of Mualpi hi’n kigen a, canal tung a lei(bridge) kichip hun in Shaktiman tunga tuangte nasataka liam om ding in patauhhuai mahleh vangphat huai takin aliam selua hi’n kigen hi.

Pensioner 2500 valte a inn chiat uah pension sum piak kipan -UBI
Lamka, June-20: United Bank of India(UBI)/ CCpur Branch apan sum la Old Aged Pensioner leh Pensioner dangdang kigawm mi 2,500 vel account neite’ kiangah UBI/CCpur in zan apan in Business Correspondence(BC) tungtawn in a kongkhak bul uh tawn in a pension sum uh piak kipan uhi. AN Jha, Chief Manager, UBI/CCpur Branch in tuni’n a genna ah pensioner-te’n bank a phak uh ngailou in a inn chiat uh sum piak hidi’n gen hi. BCs tungtawn in Lamka TD block sunga Rengkai ah Lamsianthan in hawmkhe ding a, Hill Town ah Bulsuanmang, Zenhang Lamka ah K. Rebia Devi leh Hiangtam Lamka ah H. Ramesh Singh in pension-te a inn chiat uah sum pe ding uh hi’n gen hi. Tunung in Bungmual leh New Lamka adin account honthak hidinga, huai chiang in Bungmual ah Thangkhenkhup leh New Lamka ah Donmuanching te’n enkai ding uh chi hi. Chief Manager in a genzelna ah hiai scheme thak poimawhna lian a, nasepna zangkhai sak mahmah ding hi’n gen hi. Mawhpuakna piak a omte bank in khalawh pia ahihman in customer-te akipan cheng 1 lel leng ngen theilou ding uh chi’n Chief Manager in gen a, thubuai omlouhna dingin sum piakkhiak hunchiang in account neitu mah in la(receive) dingin theisak hi.

Dist E-Governance thu meeting
Lamka, June-20: Maniram Sharma, IAS, i/c DC makaih in June 22, 2013 zinglam dak 11:00 in Dist Training Centre ah CCpur Dist sung a VLE-te, DeGS, DIT, MSITS, M/S Zoom leh M/S HUGHES te’n meeting neiding uhi. Huai ah Common Service Centres (CSCs) function leh function loute theih ding dan, VLEs te haksatna thu, E-Governance Schemes tuamtuam, online monitoring tools, ZOOM Online leh APANA CSC thu genkhawm ding uhi.

Foot path kibawldan lungtunglou
Lamka, June-20: Lamka khawpi leh akim lakah MGNREGS/Job card tungtawn a lampi nawla foot path kibawllel pe’n mun tamtak ah hoih leh muanhuaitak abawl ahihlai in khawpi sunga mun poimawh mahmah commercial area/posh area mun bangzahhiam ah ginatakin bawl hilou chih thutut kingah a, nulla guam omsate hahsiang tuanlou leh bawlbeh tuanlou in atung siin ding lel bawl maimah uh hi’n thutut kingah hi. Bangchidan a akisaipih Village Authority-te’n vantang adia poimawh mahmah napnul mai uhiam chih line department in a etzui poimawh mahmah ding chihthu kiza hi.

Nasemtu mi 2 delhlum kha
Lamka, June-20: Electricity deptt in Henglep sub-divn a Aina gamsung ah electric high tension gui(wire) khunna ding bawlin June 17, 2013 sun dak 12:20 velin nasem uh a, nasemtu(engaged labour) laka mi 1 in singkung phuk a, singkung kipuk in a seppih Mohon Mura (20) s/o (late) Shibudhon Mura of Unam Najar, Assam leh Khrishna Mura (19) s/o Babudhon Mura of Unam Najar, Assam delhkha in mi 2 teamun ah si uhi. Henglep Police-te’n siluang 2 te RIMS tun in postmortem bawl in om a, huai zawh in a tanaute uh kiang ah pekhia uhi. Police te’n Unnatural Death (UD) case No. 1/2013 HLP-PS U/S 174 CrPC registered uhi.

GRTCS pawlin Social work nei ding
Lamka, June-20: Guite Road Transport Co-op Society(GRTCS) Ltd makaihna in June 21, 2013 in Singngat sub-divn sunga Suangdoh leh Suangdai kikal a lamlian siatna munte bsaw; dingin mipi nasepkhawmna(Social work) om ding a, huai a tawmpen in leng mi 100 sanga tamzaw in nasem ding uh hi’n kigen hi.

ZYA in Block laklut ding bikhiah

Lamka, June- 20: ZYA Gen HQ a Central Executive Committee-te’ tuni’n Nehru Marg a Zomi Council office ah meeting uh a, ZYA Lamka Block Election June 28, 2013 sunnung in SYO hall ah neih dingin thupuk uhi. Huai ah ZYA town area a Unit 11 apan delegate 7 tel in Unit 1 apan candidate 2 sawlthei ding uh a, makai thakte kichiam zawh in ZYA Gen HQ in lalut ding uhi. ZYA Gen HQ, ZYA Lamka block a makai telching thak leh ZYA Unit 11 a makai teng in huaini mah in ZYA Lamka block lop ding hun bikhiah ding uh hi’n kigen hi. ZYA Constitution leng founder Secy H.Pau Za Cin in lehkhiak leh ZYA Website honna leng ZYA Lamka Block lopna omhun in thuahkhawm hidin thupuk uhi.

PTC HQ Mizoram-te hong zin
Lamka, June 20: H.Dalkhenkhai, President, PTC HQ, Mizoram makaih in PTC HQ Mizoram a makai 4 in Guite Road tawn in hongzin uh a, tuni nitak dak 6:00 in Hiangtam Lamka a PTC office ah PTC Gen HQ makaite’n vaidawnna bawl uhi. June 21, 2013 sunnung in PTC Gen HQ leh PTC HQ Mizoram makaite’n joint meeting nei ding uh a, meeting zawh in ankuang umkhawm ding uhi.

GS Haupu in siluang hongkha
Lamka, June- 20: Singngat sub-divn sung a Singheu khaw hausa Khupmuanlal (35) s/o (late) Paukhogin tuzing dak 3:00 velin RIMS ah sinna in si a, bialtu MLA Ginsuanhau @ GS Haupu in Imphal apan siluang Lamka ah hongkha hi. Khupmuanlal in azi’ Bebem tawh tanu 2 leh tapa 1 nei uh a, June 21, 2013 in Singheu khua ah kivui ding hi.
GS Haupu in a genna ah a pianna Khaukual khua leh Singheu khua kinaichik khaw 1 bang a omkhawm ahihziak ah a bialsung a hausa 1 sihna thuakpih ziak in misi hankuang ding leisak in Imphal apan Lamka tan hongkha tou a, Lamka apan Singheu khua tan puakna ding leng gari ngaihtuahsak hi’n gen hi. Tulai in Assembly session om mahleh Singheu hausa sihziak in Lamka ah siluang hong kha a, Assembly session lap din Imphal ah kiknawn pah hi.

Munluo Phungpi Organisation i/c kipiakna leh kipahpihna
Lamka, June-20: Munluo Phungpi Organisation(MPLO) saina in June 22, 2013 sunnung dak 1:00 in Zomi Colony Hausapa’ inn ah tukum a class X & XII examna lawhchingte kipahpihna banah M.Dongzalam, ex-Secy MLPO makaih in MLPO makai thakte leh aluite charge kipe ding uh a, Rev. M.G. Nehlian, ZPCS in class X &XII a lawhchinna ngahte Pathian kiang ah thumsak ding hi. ‘Hardwork & Dedication’ chih thupi pansan in Dr. D.K Mang, ex-President, MLPO; Michael Ginzasuan, DSO(CAF & PD); M.Haokhojang; M.Luokhanchin leh John Zamkhomang Munluo in thugen ding uhi.

Pahtakna piak ding in thukim uh
Lamka, June-20: K. Phaicham a innluah a om Khuplemsang (39) s/o (late) Tongneilam of Chongkhozo apaisa June 16, 2013 in Singngat sub-divn a M.Tanglian gamsung ah sing-at a giaklai Tuitha lui ah a kisil lai in tui a kia in si a, tuisung apan aluang lakhia Jamliankhup s/o Upa Hauthang of Hiangdung kiang ah ZYA Lamka block lopna neihhun ah pahtakna in memento leh sum bangzah hiam piak dingin ZYA Gen HQ in thupuk uh hi’n kigen hi.

Land Rights thu Workshop om
Lamka, June-20: Zolzam Community Hall ah tuni in Reformed Presbyterian Church, NE India nuai a Integrated Community Development Program saina in “Workshop on Land Rights” om hi. Huai ah Letpu Haokip, Chairman CoPTAM in thugen a,K.Haopu Gangte, Social Worker in sinsak hi.

ZEO leh DI in inspection bawl
Lamka, June-20: Leisang khaw kiang a Boljang LP school tunung sawtlou in New Boljang khua a sua (shifting) ding tawh kisai in tuni in Joseph Lalrothang, ZEO/CCpur leh Kaikhanlian Guite, DI of schools, CCpur in inspection bawl uhi.

SUUNNA
Luaigouching (56) w/o Kapkhanpau of Mission Veng tuni nitaklam dak 3:00 vel in cancer in si a, June 21, 2013 in Lamka hanmual ah kivui ding hi.
&&&&&&&&&&&&&&&&&&&&&&&&&&&&&&
ASSEMBLY NEWS
Assembly in demand 3 pass
Imphal, June-20: Tuni’n Assembly session ah department tuamtuam 3 in March 31, 2014 tana a sum zat ding Demands for Grants,2013-2014 nuai ah akigawm in Rs. 10,05,39,81,000 passed uhi. Huaite
1.Demand No. 10-Education : Rs.821,91,88,,000
2.Demand No. 21-Commerce & Industries: Rs. 92,10,99,000
3.Demand No. 39-Sericulture :Rs. 91,36,94,000

Education leh Healthcare ngai poimawh
Imphal, June-20: Chief Minister in tuni’n Assembly Session a Education deptt sum zat ding genkhawm lai in govt in education leh healthcare ngai poimawh in panla ding hi’n gen a, tukum a Class X examna a govt school 48 apan khat leng a pass a omlou hi a gen in govt school 28 in Class X exam ding khat mahleng a sawlkhiak theihlouh in CM in nuamlou sakthu gen hi. Hileleng tu dinmun ah Aided College-te govt college hihsak ding leh Part-time leh contract lecturer-re regularise ding thu bangmah omlou hi’n gen hi.

Urea fertiliser subsidy zah
Imphal,June-20: Agriculture Minister Md Abdul Nasir in tuni’n Assembly session ah Kh. Joykishan,MLA in Urea/fertilizer tawh kisai dotna a bawl a dawnna ah kum 2012-2013 sungin Imphal ah urea fertilizer bag 1 in Rs. 479/- man a, Manipur govt in bag 1 zel ah subsidy Rs. 213.50 pia hi’n gen hi. State govt in kum 2012-2013 sungin matric tonnes 10,000 tan koih(stock) theih dia a bikhiah dungzui in transporter te’n huaizah mah Imphal pawtung uh hi’n Minister in gen hi.

Hill districts a MGNREGS fund
Imphal, June-20: Smt Nemcha Kipgen,MLA in tuma a Panchayati Raj system hihbeina singtanggam district khenkhat ah tutan MGNREGS fund piak hilou hiam chih dotna a bawl RD & PR Minister Francis Ngajokpa in a dawnna ah tuma a Gram Panchayat hihbeina mun Toribari, Kalapahar,Koubruleikha leh Santalabari Parasain ah ah MGNREGS fund release louh hi’n gen hi. Minister in a ziak a genna ah huai munte ah Gram Panchayat a om nawnlouh banah Village Authority leng a om tuanlouh ziak hi’n gen hi.
&&&&&&&&&&&&&&&&&&&&&

IMPHAL NEWS
CPI in dakkal 12 sung bandh puang

Imphal, June-20: Communist Pary of India (CPI) Manipur State Council in Congress makaihna UPA Govt muanzawhlouhna leh nekguk takgukna beisak deihgna in June 21, 2013 zingsang dak 5:00 apan nitaklam dak 5.00 tan dakkal 12 sung bandh puang uhi. Akigen dan in CPI pawlin tuni’n party office apan Assembly complex tan protest rally pai sawm uh, police te’n theikhia in party office kim lakah a duty ban uah rally paite’n a totkhakna ding a gintakna munte’ ah police duty hi’n kigen hi. CPI te’n protest rally nei din party office apan kipankhia in sunnung dak 1:30 vel in BT Road ah police tawh kinawk tuahna piang in police te’n tear gas leh mob bomb tanpha zat khum in, huai ah party worker 1 liam in midang bangzah hiam leng liam mahle uh damdawi inn tut ngailou hi’n gen uhi.

Block 27 ah Bank honkhiak hiding
Imphal, June-20: Asst General Manager,SBI/Imphal in a gendan in Manipur phaijang bial leh singtanggam a Bank omlouhna Block 27 ah Bank honkhiak hiding chi’n gen a, huaite lakah SBI in 3 hongkhe ding in tuma a State Level Bankers Committee ah bikhiah a om hi’n gen hi. SBI in Manipur a bank honkhiak ding 3 telin tunung sawtlou in Branch 7 hongkhe ding hi’n gen a, infrastructure banah security om hunhun a bank branch hjongtak dfing in SBI mansa a om hi’n leng gen hi.

Security guard te’n pata 1 vua
Imphal, June-20: Manipur University(MU) ah admission bawl ding a kuan pata khat zan sun dak 12:00 vel in MU gate a security guard te’n ana vua uh hi’n kigen hi. Vuak a om Irom Sohadev(36) in a gendan in amah leh atapa Sandeep in atanu a ding admission form la ding in Maruti Car in kuan uh a, MU gate gei a security duty te’n foot path a pai ding a thu apiak dungzui un, amau leng gate gei a gari koih in MU main block tan khe in pai uh a, akik lam un gari tamtak MU campus ah lut amuh ziak in security guard te’ kiangah bangziak a amau lut saklou uhiam chih a dot leh security guard te’n vua uh hi’n gen a, thiltung tawh kisai Court ah tut banah Singjamei Police ah case file hi’n leng gen hi.

Journalist’ zi govt. sepna pia

Imphal, June-20: Chandel district ah Dec 2012 a Musical night hun ah Manipuri Actress Momoko in singtang mite’ muhsitna thugen kha chih ziak in NSCN (IM) a Livingstone Anal in mualphousak chih ziakin Manipur Film Forum leh Manipur Shumang Lila Council te’ makaina in Dec 23, 2013 in Thangmeiband ah kiphinna nasatak om a, police te’n kiphinna neite’ hawldalh sawm in thau a khah na uah NeTV banah Doordarshan Kendra, Imphal a Journalist Thangjam Dwijamani kaplup khak in om a, JAC in ex-gratia piak ding banah a innkuante’ khat govt. sepna piak dia demand a bawl dungzui un tuni’n govt. in Th. Dwijamani’ zi Narmada Devi kiangah Primary teacher sepna pia uh chihthu om hi. JAC kiphut khia leng tuni’n phiat in om a, govt. in ex-gratia Rs. 5 lakhs a piak leng misi innkuan te’ kiangah piak ahihdan JAC thupuangtu Leishangthem Pratap Meitei in gen hi.

URF Home Secy telin mi 3 pimang
Imphal, June-20: Manipur govt. banah Central govt. tawh Feb 13, 2013 ni a tripartite agreement atel United Revolutionary Front (URF) a Home Secretary telin cadre mi 3 te’ zan sun dak 12:00 velin a zite’ utawh ki-ensak dinga Adarsh laboratory clinic a omlai, civil dress a kichei security hidia gingtakte’n pimang uh chi’n URF Asst. Publicity Secretary Poinu Luwang in tuni’n Manipur Press Club ah gen hi. Pimang a om 3 te’ URF Home Secy P Mongyamba @ Ruhinikumar (55) of Khurai; H Shantikumar @Pamel (38) of Yumnam Huidrom Wangoi leh Y Shanti @ Raja (37) of Irom Meijrao te’ hi’n kigen hi. H Shandhya w/o H Shantikumar leh PMemton @ Savitri w/o P Mongyamba te’n press conference ah a gendan un, amau leh a pasalte’ uh ki-ensak ding a Adarsh laboratory a waiting room ah amau hun ding ngak a omlai Car (light green) sung apan civil dress a kithuam mi bangzahhiam te’n Mongyamba chi’n sam uh a, pasal 3te ava pai ua leh civil dress a omte’n pimang uh hi’n gen uhi. Poinu Luwang in a genzelna ah URF leh govt. kal a peace process pailel hihbuai sawmna hi’n gen a, mi 3 te 9-Dogra Regiment camp a om hi uh a, a potkhiak ding un leng phalna la uh hi’n gen hi. UNA