Power deptt Privatise ding thu om nailou -CM
Imphal, June-18: Manipur Assembly Session ah tuni’n Power deptt in a sum zat ding ‘Demand No. 23-Power’ tungtang genkhawm lai in Chief Minister O. Ibobi in tu dinmun ah Power deptt Privatise ding thu bangmah omlou hi’n gen hi.Power/Electricity deptt tawh lenkhawm Chief Minister in a gendan in amsa in Public Sector Undertaking a etkhiak phot hiding a,huai zawh a Privatise ding thu gen phak in om pan phet ding hi’n gen hi.Imphal kia hilou in Manipur a Municipalities area-te ah leng Prepaid Meter System zat ding a ngaihtuah hi’n gen a, singtanggam district-te lak ah Lamka(CCpur) ah Prepaid Meter System zat dinga ngaihtuah lel hi’n gen hi.Huaiding ziakin Prepaid ading meter 100,000 kilei hi’n leng CM in gen hi.

Chief Minister in a gendan in Power deptt privatise hilou in Corporation a khen hileleng a sem(employee/staff)te adin a siatna bangmah omlou ding hi’n gen a,Silchar akipan Yurembam Power Sub-station tan ah 400-KV line kikhung leng Dec 2013 tana zawhsiang hiding in gen a,huai hun chiangin Manipur ah electric meivak haksatna kiamtuan mahmah ding hi’n gen hi.Imphal-Dimapur kikal banah Imphal-Moreh kikal ah leng 400-KV line khun hiding chi’n CM in gen hi. Tulelin Manipur a electric meivak la mipi(public) in electric fee a bat uh Rs. 350 crores om hi’n CM in gen a, amasa in Rs. 60 crores khonkhiak masak tup a om hi’n gen hi.

Chairman, HAC in abial vehzou in hongtung kik
Lamka, June-18: Dr Chaltonlien Amo, MLA (Tipaimukh A/C) & Chairman, Hill Areas Committee (HAC)) in June 14-17,2013 sung abial Tipaimukh area a Civil Supply dinmun enkhe kawm leh Biometric Census Awareness campaign bawl a zinkhia zan nitak dak 6:00 in Lamka hongtung in Imphal ah paisuak hi. Chairman,HAC in Tipaimukh bial a phakna ah Vice Chairman INC/Manipur; Lal Hossan, EM/ADC; Lalhmangpui Fimate, MDC; Lalditsang, MDC; HNU makaite, Congress makaite leh MLA worker 70 vel in zui uhi.

HAC Chairman in June 14, 2013 in Lamka apan Pherzawl leh Taithu tawn in Parbung ah giak a, June 15 zinglam in Parbung Community Hall a public meeting ah tel hi. Aman Parbung khua a bank kibawla nasepna, Parbung a godawn leh Parbung PHC enkhia in huai apan Lungthulien tawn in Senvon ah giak hi. June 16 in Senvon Community Hall a Public meeting ah tel a,huaizawh in Senvon PHC enkhia in huai ah giak hi. June 17, 2013 zinglam in Pherzawl a public meeting ah tel hi.

Dr Chaltonlien Amo in khaw tuamtuam a phakna a public meeting a a thugenna ah Tipaimukh A/C ah MLA chingzel, chinglou zel a a om ziak in a nasepna(louma) tulgawp in a thaka patthak vek ngai hi’n gen a, MDC te tawh pangkhawm in development ban ah Civil Supply thil ah theihtawp suah a sem ding hi’n gen hi. Biometric photo kilanailoute hoihtaka kila din chial a, setan No.666 kichi Biometric photo kilak tawh kizawmlou ahihdan leng gen hi. Biometric photo kilaloute’ tunung hun ah poi petmah ding ahihziak in kuapeuh in Biometric teamte kithuahpih ding in ngen hi. Tipaimuk A/C a mipite itna ziaka Manipur Assembly session neih laia leng bial veh akuan ahihdan gen hi.

Lal Hossan, EM in a genna ah Tipaimukh A/C ah Dr Chaltonlien Amo nasem theitak, MLA a chinlouh hun a leng Manipur a INC Vice Chairman hikawm in mipite adia nasem ahihdan gen a, amah tawh pangkhawm a development work tuamtuam semkhawm ding a MDC-te mansa ahihdan gen hi. Tipaimukh MLA’ nominee Samson in truck 14 dim PDS antang pawlut a, MLA in khaw tuamtuam ah hawmkhe kawm hi’n kigen hi.

Dr Chaltonlien Amo leh teamte’ zan in Pherzawl apan Lamka hong zotlai un Santing khua ah YMA makaih in mipi’n ana vaidawn in MLA & HAC Chairman lopna neihpih uhi.

Chairman in Waiting Shed hongkhia
Lamka, June-18:New Bazar Bus Parking kianga Dustbin omna munah ADC/CCpur te’n Tribal Affairs & Hills tungtawn in Waiting Shed 1 a bawl uh tuni zing dak 8:00 in Langkhanpau Guite, Chairman ADC/CCpur in hong a, Upa Kaikhokam, SO/ADC in thumna in lan hi. Chairman in a dustbin omna mun a Waiting Shed kibawlna ziak thildang hilou in New Bazar a nektheih leh meh kizuakte a sianthou ding deihna ziaka kibawl hi’n gen hi. Mipi-te khut ah sianthouna kinga ahihdan gen a, Waiting Shed kibawl kuaman hihse mailou in kembit ding leh kuama’n huai kimlak ah niin painawnlou ding in ngen hi. Waiting Shed ah tuttheihna silver chair pair 4 om a, pair 1 ah mi 3 zel tuthei a, abang (wall) leh nunglam plastic glass in kibawl hi. Waiting Shed honna hun ah Vice Chairman, ADC, EM/ADC-te, MDC-te , CEO leh staff te’n uap uhi.

NEHU a topper in pang
Lamka, June-18: North Eastern Hills’ University (NEHU) in tuni in Bachelor of Science (B. Sc) final result a puankhiakna uah Lamka mi khat topper in pang hi. St. Edmund’s College apan Gou Khan Muan Suante s/o S. Gin Sian Thang of Lanva in BSc (Bio-Technology) ah 75.25% mu in NEHU pumpi a B.Sc ah topper in pang chihthu kiza hi.

Numei pawlin inn 1 phelsia
Lamka, June-18: Bijang Women Welfare Assn pawlin Bijang area ah June 10, 2013 apan khamtheih chi tuamtuam doudalna pan uh a, niteng in khawsung ah duty gige uhi. Tuni zinglam dak 10:00 in Bijang Family Lane a om Thongkholun @ Lunneo in zu, No.4 ban ah khamtheih chituamtuam a zuak ziak in atenna inn phelsiatsak uhi. Bijang Women Welfare Assn pawlin maban ah leng khamtheih doudalna sunzom zelding uh a, khamtheih zuaktute warning piak nunga zuak teitei a om ua leh khawsung apan nawhkhiat a, a tenna inn uh phelsiatsak zel hidin gen uhi.

Council Sitting hun suannai
Lamka, June-18: Tuibuong a Dist Council Hall ah June 28, 2013 zinglam dak 11:30 in Council member te’n District Council sitting a 6 veina neihding chih himahleh June 26, 2013 zinglam dak 11:00 ading in ahun suannai (pre-poned) uh a, huai ah akisaipih District Council member-te telkim chiat ding in CEO, ADC/CCpur in theisak hi.

Kipahpihna leh Topper Award hawm
Lamka, June-18: V.K Tawna College ah tuni in class XII a lawhchingte kipahpihna banah Topper leh Achiever Award hawmkhia uh a, Rev Dr J.L Songate, Executive Secretary, ICI in hasotna thugen in student leh staff-te adin thumsak hi.

Arts ah topper hihna Nemliankim (marks 84%) in la a, Rs. 5000/- + memento ngah hi. K.Ruthy (marks 77%) in 2nd Topper & Greatest Achievers Award hihna la a, Rs 3000+ Rs 1000+ memento sang hi. Ngamminlien (marks 75%) in 3rd Topper hihna la a, Rs 2000/- + memento ngah hi.

Science stream ah Florence Thangmalsawm (marks 77%) in topper hihna la a, Rs 5000/- + memento sang hi. Kim Rose Hauneikim (marks 73.2 %) in 2nd topper hihna la a, Rs 3000/- + memento sang hi. Zensonkim (marks 73%) in 3rd topper hihna la a, Rs 2000/- + memento ngah hi. Mangneilal in class X ah marks 47.8% leh class XII ah marks 67.8% amuhziak in All Round Greatest Achiever Award hihna la in Rs 1000/ + memento ngah hi.

Chairman,DRDA in ngaihdam ngen
Lamka, June-18: DRDA nuai a Integrated Watershed Development Programme tungtawn in DRDA staff te’n ‘CCpur Diary 2013’ kichi bawlkhia uh a, a telkha ding zenpi Tribe, Student Organisation leh Philantrophic Oganisation omkhalou omzek a, adiakin official a complaint bawl Thadou Tribe Council leh Thadou Students Associations tung ah DRDA staff teng sik leh tang in Langkhanpau Guite, Chairman DRDA/CCpur in press tungtawn in ngaihdam ngen hi. Maban ah hibang thil om nawnlouhna ding in Thadou Tribe Council tawh kilemna bawl in hihveng thei uh a, ‘CCpur Diary 2013’ ah leng correction bawl uhi. Manipur govt ah kum 1956 in Thadou Tribe Council recognised a om hi’n kigen hi.

Student Uniform tawh zudawn 6 mankhia
Lamka, June-18: CDSU pawlin student kuaman uniform silh a zu zuakna inn (vendor) a lutlou din dalna bawl uh a,huchi kalah tuni sunnung dak 1:30 velin New bazar a zu zuakna ah uniform tawh zudawn class XI student 4 leh class XII student 2 mankhia uhi. CDSU makaite’n thuhilhna hoihtak a nei in College Principal kiang ah student 6 te pekhia uh a, maban ah zuzuakna te’n student uniform tawh kuamah lutsaklou ding in ngen uhi.

Khawvaiphei.com Toppers Award
Lamka, June-18: Sterlite Computers sponsor-na in June 22, 2013 (Saturday) in Synod Super Market building, Tedim Road a Cozy World ah Class-X a lawhchinna ngahte lakah Khawvaiphei.com MIL Toppers Award 2013 hawmkhiakna om ding a, Vaiphei MIL a sangpente kipahman pe ding uhi.

Pearsonmun ah Gospel Concert
Lamka, June-18: Chester United pawlte’ saina in June 19, 2013 nitaklam dak 6.00 akipan Pearsonmun Community Hall ah ‘Rejoice In The Lord Always (Phil.4:4)’ chih thupi a nei in Gospel Concert om ding hi. Pastor Dr Hs.Chinsuanthang in Gospel Concert honna leh thumna nei ding a, Moria Trio, Dony Guite, Dolly Neihhoihte telin lasiam tuamtuam 12 velin lasa ding uh a, choreography lahna leng om ding hi.

ZSF Singngat Block in kipahpihna neiding
Lamka, June-18: Zomi Students Federation(ZSF) Singngat Block in Singngat sub-division leh Tuaitengphai area(Singngat A/C bialsung) apan tutung Class-X leh XII passed-te kipahpihna neihsawm uh a,lawhchinna ngahte’n June 25, 2013 ma in President Gouchinkhup kiangah Xerox copy a marksheet piaklut ngai ding hi’n thutut kingah hi.

SUUNNA
Mrs Thangmawi (85) m/o Dr. H.Singkhojam of Mission Road, Hiangtam Lamka tuni zinglam dak 10:00 vel in teknat in si a, Lamka hanmual ah kivui hi.
T.Songkhopau (47) s/o T.Chinzatuan of Dorcas Veng, New Lamka tuzing baihtak dak 2:00 vel in kalna (kidney fail) in si a, YPA Hanmual, New Lamka ah kivui hi
Nu Vungkim (78) w/o Upa P Sutzachin of Saikham Road, New Lamka zan sun dak 12 in sinna (liver problem) ziakin si a, nitaklam in YPA Hanmual, New Lamka ah kivui hi.
&&&&&&&&&&&&&&&&&&&&&&&&&
IMPHAL NEWS
Kekrupat ah ‘The Great June Uprising’
Imphal, June-18: AMUCO leh UCM saina in tuni’n Kekrupat ah June 18, 2001 a “The Great June Uprising, Unity Day” kichih Manipur gam leitang humbitna dinga hinna pia martyr mi 18te theih gigena ding a memorial site kibawl mun ah nam tuamtuam apan mipi paikhawm, community leaders, social activists, politician, student leh govt. official a sang a sim paikhawm te’n zahna thilpiak tuamtuam pia uh a, huai hun ah Dy CM banah Home Minister Gaikhangam, Commerce & Industry Minsiter Govindas Konthoujam leh MLA khenkhat te’n leng thilpiak nei uh a, hiai tawh kizawi tawn in Kekrupat mun ah blood donation camp sai a om in mi tamtak in sisa pia uh hi’n leng kigen hi.

Helpawl a tel mi 2 mankhia
Imphal, June-18: Imphal West Commando te’n zan in mun tuamtuak ah helpawl a tel mi 2 makhia uh hi’n kigen hi. Commando te’n zan nitaklam dak 4:25 vel in Thanggal Bazar ah KYKL a tel Irom Mikoi @ Henba (36) s/o I. Dhamu of Salam Maning Leikai, Imphal West dist. man khia uh a, zan nitaklam dak 5:30 vel in Deulaland a War Cemetry mun ah KRA a tel Thangneilal Khongsai @ Boineo (34) s/o Thangkholal of Chongjon village, Saikul of Senapati dist. mankhia uhi.

Police personnel apan khamtheih mankhia
Imphal, June-18: Working Group of Manipur Movement (WGMM) leh Naoriya Kendra Welfare Association (NKWA) pawl in zan in joint drive operation a bawlna uah state police personnel 1 apan khamtheih hunkhawp mankhia uh hi’n kigen hi. Zan nitaklam dak 6:00 vel in WGMM leh NKWA te’n Soraisam Bijoykumar (29) s/o (late) S. Jugindro of Mongsangei Mamang Leikai, tenna inn apan SP (Spasmo Proxivon) capsule mankhia uh a, khamtheih neitu a kigen Bijoykumar ahihleh taisuah thei hi’n kigen hi. Khamtheih nek leh pua tawh kisai in pawl 2 te’n thusuah bawl dungzui un Mongsangei area ah niteng in drive bawl hiding a, mat a om te’ tungah action khauh tak piak hi ding in leng taklang uhi.
A zi khawl lai ah vua
Imphal, June-18: Laxmi Ima market ah tuni sunnung dak 1:30 vel in pasal khat in a zi mipi mai ah vua hi’n kigen a, Ima market a nupi pawl te va kigolh in nupa te’ thudong uh a, amau kalah kiselna a nasat sem laitak in Maruti Gypsy a hon pai Imphal west commando mi 4 te’n huai mun apan pasal pa pikhia uh hi’n kigen hi. Ima market a nupi pawl a makai khat in vuak a om inn nupi, Kangjabei Leirak apan hi’n gen a, himahle a min puang khe utlou hi’n kigen hi.

Siamsin Lampi kichi career counselling om
Imphal, June-18: Siamsinpawlpi Imphal Block (SSPP-IB) saina leh Paite Officers’ Forum sponsor na in tuni’n EBCC, Jubilee Hall, Lamphel ah “ 1 Day Siamsin Lampi Career counselling programme” om in Rachel N. Guite, MCS, SDO, Singngat, T. Khamsuanmung, IFS, Dr. T. Kambiakdik, Dr. R. Sanga, T. Kaizasong, EE leh Rev. S. Ginmalsawm, DS, EBCC Imphal Division te’n sinlai naupang te’ Civil Service, Medical, Entrepreneurship, Engineering leh Theology lam tawh kisai sinsakna pia uh hi’n kigen a, huai hun ah Class VIII apan atunglam sim te’ banah a zousa mi 150 vel paikhawm uh hi’n kigen hi.

NE in Parliament leh flag tuam nei pah ding
Imphal, June-18: Kekrupat ah tuni’n “The 12th Great June Uprising, Unity Day” zatna hun a Dr. Dhanabir Liasharam, Social Scientist, in a thugenna ah NE a mipi om te’n gam leh leitang hum bitna ding in Parliament leh flag tuam neih pah ding in gen a, ni khat nichiang a Kuki, Naga leh Meithei te’ niteng nekmuhna ding (livelihood) a kigawm khawm pah ding hi’n leng gen hi. Aman a genzelna ah tulel in nam tuamtuam te’n amau a ding kia in panla mahle uh hun hon pai ding ah ki gawm khawm vek ding hi’n taklang a, Manipur ah tulel in Natural oil leh uranium deposit tamtak om a, khawvel pumpi in mit suan mahmah in hiai in hon gawm khawm vek ding hi’n leng gen a, khawvel pumpi a mipi te’n global warming control ding dan a buai pih lai in Manipur ah te’ seki ( penny) kituh a kisual ngaplai hi’n gen a, Manipur innveng te’ lakah Assam mun ah tulai in khaw luam a nasat luat ziak in a si leng om ta a, Manipur ah leng hong tung pah ta ding hi’n leng taklang hi. UNA

PDS anntang hawmkhiak sianglou
Imphal, June-18: Consumer Affairs nuai a Food & Public Distribution Department in mipi kiangah Super fine anntang a khawm khiak na uah urea leh diamond fertilizer kihel hi’n kigen hi. Iroisemba a Central Agricultural University in state tuam apan Super Fine anntang laklut te’ ah urea leh diamond fertilizer kihel hiam chih chetna ding in anntang sample mun tuam ah etkhiak ding a thonkhiak ahihlai in Consumer Affairs nuai a PDS dept in June 10, 2013 in Super finne anntang kg 50 a gik bags 23 vel ding rice agent Thokchom Rajen of Takyel Kolom Kholomthem Leikai kiangah piakkhiak hi a, aman leng anntang bag tamzaw amah area a mipi te’ kiangah a hawm khe ta a, anntang ah thilsiang lou kihel chih thu complain tamtak a muh ziak in bag khat hong in a etkhiak leh urea leh diamond fertilizer kihel mah hi’n taklang a, mipi te’ khualna in hiai tawh kisai a thuneite’n enkai ding in leng ngetna bawl hi.