Opposition party te’n Public Meeting leh kiphinna pan ding; Dist Hospital 4 leh Moreh Hospital privatise hiding
Imphal, April-10: Manipur govt in District Hospital 4 leh Moreh Hospital tunung sawtlou in Public Private Partnership(PPP) model in privatise sawm in process kipanta a, March 25, 2013 in huai tawh kisai in Manipur Secretariat a Health & Family Welfare deptt in ‘Expression of Interest’ sapna thusuah bawl hi. Thudang kizadanin Manipur a Opposition party 11 kigawm in Manipur ah numei tunga tatsiatna uang deuhdeuh mahleh govt in huai dalna dingin bangmah panla zoulou chih banah District Hospital 4 leh Moreh Hospital privatise dinga panlak lungkimlou in kiphinna patna dingin April 16,2013 in public meeting sam uh a, huai tawh kiton in panlakna chi tuamtuam pat hiding in puang uhi.

State govt in privatisation atupte 100-bedded Thoubal District Hospital, 100-bedded CCpur District Hospital, 50-bedded Bishnupur District Hospital leh 50-bedded Ukhrul District Hospital hi a,tuma deuhin Moreh Hospital leng privatise dingin govt in thusuah dang bawl hi.Huai dinga lunglut Companies, Private Hospital leh Nursing Home-te khut ah kum 20 sung piakkhiak hiding a, huai private parties te’n sum senna, vanzat poimawhte kaihkhawm,operation, management leh, maintenance mawhpaw ding uh chih ahi hi. Hospital apan sumpung muhkhiakte govt leh private parties kalah 50:50 dana kihawm(sharing) hiding chihthu om hi. Hospital a sem doctor-te ahihleh Manipur govt nuai ah om ding uh chih ahi hi.

Hospital etkolna leh puahna tawh kisai ahihleh private parties-te tung ah kinga ding a,Hospital tawh kisai kumteng a Budget bikhiah a omte Hospital enkoltu Private parties-te khut a piakkhiak hiding chihthu om hi. Principal Secretary (Health & Family Welfare) Ram Muivah,IAS in a gendan in mipi vantang adia damtheih huai health care service piak tupna ziaka hibang PPP patkhiak sawm a om hi’n gen a,khawsakna haksa leh mizawngte khualna in govt in aminpu a admission fee kila leng kheng lamdang tuanlou in zattouh zel hiding chi hi.

Hibang kalah Congress tellou Manipur a political party tuamtuam 11 a makaite Irabot Bhavan a CPI office ah zanhal in meeting uh a, numeite tunga tatsiatna leh bawlsiatna dalna ding in govt in panla zoulou hi a ngawh banah mi genthei leh mizawngte hehpihna tellou in Hospital tuamtuam 5 privatise ding thu genkhawm uhi. Meeting zawh in CPI Manipur State Council Secretary Dr M. Nara Singh in a gendan in Manipur mihing tamzaw khawsakna haksa leh dinmun niamtaka a om hizenpi amaute etkolna ding Hospital-te privatise ding chihthu mizawng leh gentheite thahna tawh kibang ahi chi hi. Huai thiltup dalna a kiphinna patna leng hiding in April 16, 2013 in Public meeting sap hi a, huai ah mipi tamtheipen kikhawm in thil omdan genkhawm hiding a, huai pansan in panlak pat hiding chi’n gen hi.

ADC Chairman in Mela hongkhia
Lamka, April-10: Autonomous Dist.Council/CCpur saina in tuni zinglam in Hiangtam Lamka a YPA Gen HQ Hall ah Langkhanpau Guite, Chairman ADC/CCpur khuallian apang in ‘Handloom Mela’hongkhia hi. Huai ah Joseph Lalrothang, ZEO/CCpur, A.Umarani Devi, DSWO, Manmuanching CEO, Henlianthang Thanglet, Addl CEO leh MDC hunkhop kihel uhi. Khuallian in a genna ah Pathian in talent tuamchiat hon piakte a zatdan siamsiam in hamphat pih ding hi’n gen a, puandum, ze tuamtuam nei i chih leng a zatna ding bangtak a kizang khalou in, misi tuamna ding lel akizang mah bang a, a value a om zawkna ding in kikupkhawm a, aman (cost price) tamsak hileh value neizaw theiding hi’n gen hi. Program hunsung in YPA Zenhang Lamka leh HYA Rengkai te’n Cultural show lahna nei uh a, Rev L.Sata, Executive Director ESC in thumna in hunkhak hi.Huai Mela zinglam dak 9:00 apan nitaklam dak 4:00 kikal kihong zel ding a, van tuamtuam deihte’n leithei gige hi.

Vice Chairman in hongkhia
Lamka, April-10: United Green Farmers’ Co-op Society Ltd/CCpur Administrative office ding tuni zing dak 7:30 in Hmar Veng a Jamsei Baite’ inn ah Demmang Haokip, Vice Chairman ADC/CCpur in hong a, Rev Jangkhongam Baite, Exe Secretary, EMP/MPCS in Pathian kiang ah thumna in lan hi. Huai hun ah Functional President in Kaikhankap Samte, District Co-op Officer/CCpur pang a, MDC hunkhop in uap uhi. Chief Guest in genna ah, mundang, gam changkang lamte’n farm liantak bawlin nasemtu tampi la in khalawh hoih taktak in pia uhi. Himahleh ei lam ah huchibang chet hizou kei mahleh hibang a society khat a hong kipat khiak kipahpih thu gen in mipi a tamthei pen in a phattuampih deih thu gen hi.
Kaikhankap Samte in a genna ah maban khualna ziaka hibang society hoihtak patkhiak na tungah pahtakthu gen in lou bawlna lam tawh kisai financial a support tu ding NABARD te omta a, technical a support tu ding Agriculture Technology Management Agency (ATMA) te om ta uh ahihdan gen in, amaute kiang ah thu dot theih gige hi’n gen hi.

Ringwell sung apan sisa in kilakhia
Lamka, April-10: Zion Street a om C.Lalzomliana-te’ well bawl mi 1 tuni sunnung dak 12:40 velin ringwell sungah kia a, lakkhiat zawh in Hospital puaktun himahleh sikhin hi’n kigen hi. Akigendan in huai ringwell ahihleh feet 38 vela thuk hi a, kal khat vel paisa apan a tuitawm ziakin mi bangzah hiamte’n tawhbeh thak uh a, tuni’n nasemtu James of Salem Veng, Robert of Salem Veng , Lalrongbawla of Salem Veng te’n nasem uhi. Ringwell sung ah tui tamluat ziakin nasep sunzom theinawnlou uh a, ringwell sungah tui tawpkhiat nang in generator koihlut in start uh a, tui tawpkang ma in generator sia hi’n nasemtute’n gen uhi. Huaitak in Tedim Road, Zion Street a Pakhangba Battery Worshop bawltu S.Jawanjit Singh (22) s/o Samungou of Khumujamba sam uh a, aman Ringwell sungah generator bawl hoih hi’n gen uhi. Generator bawlkhin, pot dia kaltou lai akimkhat vel sanga sauzaw kaltou man in ringwell sung ah kesuk hi’n nasemtute’n gen uhi. Nasemtute’n hotkhiat sawm mahle uh ringwell sung ah generator khu (smoke) tamluat ziak in amau’ leng chaugawp uh a, S.Jawanjit Singh hunkhe zoulou uh hi’n gen uhi. Huaizawh in Police leh Fire Frigade te’n Zion Street delh uh a, oxygen bulhkawm in ringwell ah lut mahle uh oxygen beidek ziak in pawtkhe nawn uhi. Huaizawh in oxygen buk 1 lakbehuh a, huai zangin Foire deptt a Omega Thangsuan in ringwell a lutin khauh in Jawanjit vakhih a,sunnung dak 1:40 ve in kaihkhiat zawh in om hi. Jawanjit kintakin Dist Hospital tut himahleh Hospital tunma in sikhin hi’n kigen hi.

Organisation 3 in bial vehding
Lamka, April-10: B.Dongzalian Simte, President, Simte Tribe Council, HQ, makaih in STC HQ, Simte Youth Organisation Gen HQ leh Khangthah Zuun Pawl (KZP) HQ makai te'n Education leh Nam hihna tawh kisai in April 13-18 , 2013 sung Thanlon bial a khua 10 vehding uhi. Organisation 3 te’n Sumtuh khua, Joutung, Thanlon, Suangpehmun, Gamhui, Talllian, Leijangphai, Sainoujang, Pamjal leh Mong-awn khua phading uh a, April 19, 2013 in Lamk hongtung kiknawn ding uhi.

Morgue a siluang theih hita
Lamka, April-10:Tuithapi khawsung ah zanhal nitak in galvan tawite’n pasal 1 a kaplup uh Police te’n zan in Dist Hospital morgue a tun uh a, tuni zinglam in kuahiam chih theihchet hita hi. Amah Lalthangrem(40) s/o (late) Kambuong of Kwaklung, Cachar District, NC Hills hi’n kigen a, Post mortem zawh sunnung dak 1:00 velin Police te’n HYA Gen HQ khut ah pekhia uhi. Lalthangrem in zi Tleite tawh ta 5 nei uh a, tuni’n Saidan a Upa Khumvel inn pansan in Saidan hanmual ah kivui hi. Lalthangrem sihna tawh kisai Police te'n FIR No.33 (4) 2013 CCP-PS U/S 302/34 IPC & 25(1-A) Arms Act registered uhi.

SUUNNA
Goukhanpau Shoute (60) s/o (late) Lamkhoneng of Khawminthang, New Lamka zan nitak dak 9:30 vel in Dist Hospital ah khawsik in si a, tuni’n YPA Hanmual, New Lamka ah kivui hi.
*******************************

IMPHAL NEWS
Dy. CM in Noney khua pha
Imphal, April-10 : Deputy Chief Minister Gaikhangam in tuni in Noney khua vapha a, zan in Noney khua a dukan 50 kangtum neitute va veh hi. Aman huai ah Relief Committee te kiangah Rs. 1 lakh a piak banah nek ding thil tuamtuam tamtak pia hi. Deputy CM in Noney khua a phakna ah Tamei AC apan MLA Z. Kibhonbou Newmai, Tamenglong DC leh ADC Chairman te’n zui uhi. Zan zingsang baihtak in Noney Bazar mun ah dukan tuamtuam 50 vel ding a kipatna theihlouh in mei in kangtum hi.

Commando 1 telin mi 2 kaplup in om
Imphal, April-10: Moreh a Indo-Myanmar gamgi a Gougajang mun ah tuni zingsang in Moreh a Police Commando Unit a om khat telin mi 2 kaplup in om uhi. Amaute Police Commando Birjit leh civilian Anil kichi ahi hi. Akigendan in amau zan zingkalin nga(fish) man dingin Lokchao lui ah kuan uhi a, Moreh PS apan km. 7 vela gamla Gougajang village mun ah tuni zingsang dak 7:00 in Moreh Police te’n sisa in mukhia uhi. Siluang 2te akhut uh nung leh hensawmsa a om uh hidan in kigen hi.
Huaia tel midang 7 tutan a omna uh theih hilou a,amaute 1)Thangjam Ahanjoa (28) of Moreh ward no. 5, 2) Khaidem Deven (37) of Moreh ward no. 5, 3)Sorokhaibam Bhogendro (29) of Moreh ward no. 4, 4) Paonam Bhim of Moreh ward no. 4, 5) Paonam Mote (31) of Moreh Ward no. 4, 6)Saleibam Tanu (24) of Moreh ward no. 4 leh 7) Aheibam Dinesh of Moreh ward no. 3 hi uhi. Thiltung ziakin Moreh khawsung sousang mahmah a, tuni in Moreh khawsung a dawr teng khak in om a, tua zawh in Moreh a Premnagar Mandop mun ah public meeting om hi. Huchi’n Youth club 2 leh civil organisationte makaih in mipi in lampi zui uhi. JAC leng bawlkhia uh a, mi 7 te ni 3 sungin damtaka khahkhe ding in phut ua, tua hunsung mah in tualthatte mankhe dingin govt nawh uhi. Ni 3 nung a banghiam thuthak a om kei leh kiphinna sutzop ding in thukim uhi.

Centre in state govt theisak
Imphal, April-10 : Manipur ah electric power haksatna thupitak om mahleh India govt in Manipur Chief Secretary kiangah a kinlam in Myanmar kiangah power supply ding in theisak hi. India govt in Myanmar a Mandalay tan 400-KV/500-KV electric khungsuak ding in theisak a, hiai tawh kisai mah a North East state teng pangkhawm dingin thupia hi. India in Myanmar ah power piak a sawmna ziak bel Myanmar gam a power generating plants hoihtak om a, huai etlahna ziaka mei piaksawm hizaw chipawl om hi. Myanmar in Mandalay mun ah 17000 MW Cycle Gas Turbine based plants koihsawm uhi.

Numei 1 sisa in kimukhia
Imphal, April-10 : Ukhrul district sung Kasom Khullen a Leiyathang village mun ah tuni in numei khat sisa a muhkhiak in om hi. Misi bel Khumukcham Ongbi Loidang Devi (47) w/o Kh. Kora Chandra of Andro Chingel Leikai hi a, akigendan in April 5, 2013 pek a thah hiding in muanmawhthu kigen hi.

Corcom in General Strike puang
Imphal, April-10 : Manipur phaijang a helpawl tuamtuam kigawm CorCom (KCP, KYKL, PREPAK, PREPAK (PRO), RPF leh UNLF) te’n India President Pranab Mukherjee in North-East State tuamtuam hongphak sawm tawh kisai a Manipur a hongphak ni ding April 15, 2013 in general strike puang uh hi’m thusuah uhi. Thusuakin a taklatna ah, April 15, 2013 zingsang dak 6:00 akipan in April 16, 2013 zinglam dak 8:00 kikal dakkal 26 sung general strike om ding in kigen hi. General strike sungin media, medical, water supply, electricity leh fire service khahkol hidan in gen uhi.

Everest Expedition teamte khahkhia  
Imphal, April-10 : Parliamentary Secretary(YAS) M. Prithviraj in a Mount Everest ading Expedition teamte tuni in Kangla Fort ah khakhia(flag-off) hi. Expedition teamte Wood-Stalk school Principal N. Surendro Singh in makaih a, Kumari Educational Research and Development Society (KERDS) apan in student 4 tel uhi. Amau trekking expedition din Nepal a Jiri mun ah kipan ding ua, huai akipan ni 24 sung a Mount Everest Base Camp tung ding uh hi’n kigen hi. Jiri akipan Mount Everest Base Camp ahihleh km. 170 hi a, Nepal a Solu, Khumbu leh Gokyo regions a om ahi hi.

Form issue leh submit hun bikhiah
Imphal, April-10: Manipur Univerxity in BA/B.Sc/B.Com/B.Sc Biotechnology/B.Sc Food Technology/BSW 2nd, 4th & 6th Semester Examination,2013(June) tawh kisai examination form issue leh submit hun ding bikhiah hi.April 15, 2013 tan exam form hawmkhiak(issued) hiding a, huai kimtaka fill-up zawh in fee telin April 20, 2013 tan fine tellou in submit theih ding a,fine telin April 25,2013 tan submit theih ding hi.Examination detail programme tunung in suahkhiak hifing chi’n Controller of Examination apan thusuak in gen hi.

NSCN(IM) in gari man: Aneitu’n laktheih  
Kohima, April-10: Zunheboto town command, NSCN (IM) thusuakin tuni’n a gendanin, NSCN(IM) cadre te’n guk a om soft top Gypsy (ngou) (No. NL-05-1464) chassis number SJ41-IN203197 leh engine number FOAIAN156231 mankhia uh a, aneitu diktakin ahihna chiangzaw sem genkawmin a gari lakik theiding chi uhi. Huai tawh kisai in aneitu in mobile number-8974573258 contact dingin ngen uh a, huai kawmin ama gari ahihdan chetna ding document kichian tawi poimawh ding chi uhi.

State govt in MCS(probationer) 19 training ding in sawlkhia
Imphal, April-10:Manipur govt in MCS(probationer) officer mi 19 in kal 2 sung New Delhi a ‘Institute of Secretariat Training & Management’ a training dingin sawlkhia a, amau April 8, 2013 in training kipan uh a,April 19, 2013 tan sunzom ding uhi. MCS(probationer) 19te lakah singtangmi 5 tel uh a, huaite :-
1)Lalrobul Fimate,
2)S.Thienlaljoy Gangte,
3) Joel G. Haokip,
4)Daryal Juli Anal
5)Soiminlien Lengen hi uhi.