Satyabhama Devi thahna tawh kisai in Police in a ngaihzawngpa telin mi 3 man
Imphal, April-9: RIMS a Pathology deptt a Jr. Research Fellow N. Satyabhama Devi (31) apaisa April 3, 2013 nitak a potkhia April 5, 2013 zingsang in Irilbung PS a Loumanbi Loukon ah mulkimhuai taka thahsa in a luang muhkhiak hi a, tualthahna lungkimlou a kibawlkhia JAC pawlin April 6 zingsang dak 6.00 a kipan hunchiam omlou ding bandh puang uh a, tualthatte matkhiak masiah bandh paitou ding chi uhi.

CM leh JAC makaite zan a kihouna ah CM in tualthatte ni 2/3 sunga matkhiak dia a chiam dungzuiin Police te’n tuni’n Satyabhama Devi ngaihzawngpa telin mi 3 mankhia uhi. DGP Y. Joykumar in tuni’n SP/Imphal West Conference Hall ah Press-te kimuhpih in huai ah mipi thangpaite khouhzawhlouh ding lauh ziaka puankhiakpah hilou danin gen hi. Mat a omte Toijam Theus @ James @ Aboi (27) of Thambalkhong Sabal Leikai; Thoudam Jibon (27) of Irilbung Macha Ahal Mayai Leikai leh Kshetriyum Biju @ Holendro (28) s/o Kshetrimayum Ibochou (1st M/R a rifleman) of Irilbung Bazar hi uhi. Police in amau akipan in Maruti car (No.AS-01 0397) leh 2-wheeler khat (No. MN 01-Y 6310) leng mukhia uhi.

Amaute lakah James pen Satyabhama ngaihzawngpa hi a, Kshetrimayum Biju in Satyabhama that hidan in kipuang hi. DGP tualthahna tawh kisai a mi 3te gendan kikalh hi’n gen hi. Huaima in a ngaihzawngpa James in athah hidan in kigen mahleh akhawnung in a lawmhoih mahmah Biju in thah hidan in kipuang hi.

Thusuak in a gendan in Biju @ Helendro in James leh Satyabhama kal hoihlou ahihdan thei in April 3, 2013 nitak in phone tungtawn in Satyabhama samkhia a, a ngaihzawngpa leng omdan in gen hi. James bel zi neisa leh ta khat nei hi a,huai nitakin hun lemtang ala in luppih sawm hi. N. Satyabhama Devi a utlouh takin Biju in that hidan in Biju thudotna akipan a kipuang hidan in DGP in gen hi. Hiai thu in mun tuamtuam pehsuak pah a, mipi thangpaite leh JAC pawlin tualthahna a kigolh mi 3te’ inn hihsiatak uhi. N. Satyabhama Devi thahna tawh kisai in Meira Paibi te’n tualthahna a tel mat a om mi 3 te a veng chih uapan nawhkhiakthu puang uhi. Tua banah KCP (MC) Paikhomba Meitei in, numei tunga tatsiatna tawpkhawk hidan a gen in tualthahna atel mat a om mi 3 capital punishment piak hiding in leng puang uhi.

SSC exam question paper hongtung
Lamka,April-9: Staff Selecton Commission(SSC) saina in April 21, 2013 (Sunday) in Lamka a SSC Exam centre ah ‘Combined Graduate Level (Tier-I) Examination 2013’ om ding hi. Huai tawh kisai in Tuibuong a Post Office ah tuni’n question paper hongtung a, huaite DC/CCpur office ah koih in om hi.

Vice Chairman in a bial veh
Lamka, April-9: Demmang Haokip, Vice Chairman ADC/CCpur in March 27, 2013 apan a constituency Leimatak bial veh in development scheme tuamtuam ban ah Dist Council nuai a school 13 enkhia hi. Aman Housing scheme, toilet a zatding Kumut kihawmte, BRGF fund a nasepna leh SSA tungtawna school room extension-te enkhia hi. Vice Chairman in S.Nahbil, Tonglhang, Lamdan Kabui, Majuron Kabui, Kokodau, Tokpa Kabui, Satu Khoroi leh Nahlon school ah SSA tungtawn a room extension kibawlte leng enkhia a,huaite lakah Nahlon school kia ah nasep kizoupan hi’n gen hi.

Meltheihlouh pasal 1 kaplup in om
Lamka, April-9:Police apan kizadan in zan nitak dak 9.40 velin Tuithapi khawsung ah meltheihlouh galvan tawite’n pasal 1 kaplum uh a, Police te’n tuni zingsang in siluang la in Dist Hospital morgue tun uh a, tuni nitak dak 7:00 tan in misi kuahiam chih kitheilou a, a innkuanpihte leng kithei nai tuanlou hi. Thusuak in a genbehna ah zannitak in galvan tawi pawl in pasal kum 45-50 kikal vela upa , jean khekol (blue) teng kaplum uh a, huai zawh a kihemkhia in blank fire 2 kap uh hi’n kigen hi. Misi taksatung anung(back) lam ah thautang lutna ma 2 om hi’n Police thusuak in gen hi. Police te’n siluang kiangah 5.56 mm thautang hawm 8 mukhia uhi.

KZP Gen HQ in veh ding
Lamka, April-9: Khangthah Zuun Pawl(KZP) Gen HQ makaite’n siamsinna hahbawl ding chih thupi a nei in Thanlon biala Simte tribe tenna khua a school omte April 13-18, 2013 sung amun mahmah ah veh in etkhiak sawm uhi. April 13 in Sumtuh pha ding uh a, huaizawh in abanban in Joutung, Thanlon, Suangpehmun, Gamhui, Leijangphai, Sainoujang leh Pamjal pha ding uh a, April 18 in Mongawn pha in zou ding uhi. Tuabang thupukna ahihleh KZP Gen HQ Year Plan laka khat hi a, March 28, 2013 a Executive Meeting dungzui a kibawl hi’n kigen hi.

School 13 ah class IX hon hiding
Lamka, April-9: Board of Secondary Education Manipur(BSEM) in March 22, 2013 a Order suah in school 13 ah academic session 2013 akipan class IX tan hontheih dingin thusuah bawl uh a, huaite lakah CCpur district akipan New Lamka a om Cambridge School leng telkha hi.

Accident ziakin mi 3 liam
Lamka, April-9: Khaiminlien (13) s/o Zamkhogin of Leikot tuni nitaklam dak 5.00 velin huansunga thei-he kunga tuanglai feet 15 vela sang ah kia in atungin khua phawklou a, Dist Hospital tut in om hi. Ginneilal (5 ) s/o Thanglunmang of Tuining tuni sunnung dak 2.00 velin thauvui kikoih halpuak kha in amai mei in kang a, Lalthang (30) s/o (late) Paukhai of Gochinkhup Veng, New Lamka tuni dak 10.00 velin cycle tailai Gangpimuol ah accident in liam hi.Aliam mi 2te leng Dist hospital ah etkol in om uhi.

Main office ding hon hiding
Lamka, April-9: United Green Farmers’ Co-operative Society Ltd/CCpur main office ding April 10, 2013 zingsang dak 7:00 in Hmar Veng ah Demmang Haokip, Vice Chairman ADC/CCpur khuallian apang in hongkhe ding a, Rev Jangkhongam Baite, Executive Secretary, EMP/MPCS in Pathian kiang ah thumna in lan ding hi. Huai hun ah Functional President in Kaikhankap Samte, District Co-operative Officer pang ding hi.

Most Distinguished/Oustanding Ward
Lamka, April-9: Manipur a district teng apan mi 2 zel ‘Most Distinguished/Oustanding Police Officer’ award ngahthei ding in Febuary 2013 in Police HQ ah submit hi a, Screening Committee te’n Inspector C.Lalropuia @ C.Puia, Readers to SP/CCpur telkhia uhi. Huai award ‘163rd Death Aniversary Commemoration of Maharaja Nara Singh’ tawh kituak in April 11, 2013 zinglam dak 9:30 in Kangla ah piakkhiat hiding a, award ah Certificate of Excellence + Rs 10,000/- tel ding hi’n kigen hi.

Candidate list submit ngai
Lamka, April-9:Thanlon khua ah April 22, 2013 in ‘Literary Competition’ om ding a, huai ah painting, elocution, skits, essay writting, singing leh choreography kidemna omding hi. Thanlon block a govt school leh private school a Headmaster/ Headmistress ten student candidate list April 15, 2013 tan in submit ngai ding hi. Kidem category 3 in kikhen ding a, Sub- Junior ah class III - V, Junior ah class VI - VIII leh Senior ah class IX & X hiding a, thuchian kimzaw SDO/Thanlon camp/office (Jion Street) ah kantheih ding hi.

‘Student Tribute’ magazine
Lamka, April-9: Ricky Vanlallawm Guite, Principal, CCpur Govt. College in tuni zinglam dak 11.00 in khatenga suakding ‘Students’ Tribute’ kichi monthly magazine hongkhia hi. TKSU CCpur Govt. College etkaina nuaia Ccpur dist. a siamsinte phattuampih theih dinga magazine kibawl hi’n gen uh a, tuni a issue suahkhiak nungin khatengin bi-lingual in suak ding chihthu om hi.

‘Zogam Muzin’ film honna om ding
Lamka, April-9:Thado-Kuki film ‘Zogam Muzin’(‘Darkness in fatherland’ kichi) April 13, 2013 in Jubilee Hall, Mongpijang, Sadar Hills ah Pastor Lal Daniel Haokip, Chairman, KNT in thumna tawh hong ding hi. Huai ah Chief Guest in L. Thangkholun, DSWO/Senapati pang dinga, Functional President in Ngamkhohao Haokip, Principal Mission School, Kangpokpi pang ding hi. Huai ah ahihleh singtangmite khawsakdan lahna film hi’n kigen hi.
*******************************************
IMPHAL NEWS
Manipur ah sepna zong 6,88,125 om
Imphal, April-9: Manipur a Employment Exchange tuamuam ah February 2013 bei tan in sepna deiha min pelut 6,88,125 om a, huaite pasal 4,93, 012 leh numei 1,95,123 hi uhi. District tuamtuam a Employment Exchange ah Feb 2013 tana sepna deih ziaka min pelut omzah Imphal West district ah 1,19,019 hi a, Imphal East district ah 1,09,645 om uhi. Thoubal district pumpi ah sepna zong a chiamteh a omzah 1,16,082 hi a,Bishnupur district ah 67,434 hi uhi. CCpur district ah Feb 2013 sungin numei 33 leh pasal 84 in min pelut thak uh a, tu dinmun ah sepna deiha min pia teng 68,232 pha hi. Ukhrul ah 30,206 pha a, Senapati ah 56,646 hi uh a, Tamenglong 23, 692 pha hi. Chandel ah min prlut teng 28,402 hi uh a, Physically handicapped-te lakah tutan in 2543 in min pelut uh a, UEI & GB ah 6234 pha uhi.

Noney ah dukan 50 mei in kang
Imphal, April-9 : Tamenglong District sung Noney bazaar ah tuni zingsang baihtak dak 2:00 velin akipatna theihlouh in dukan 50 vel mei in kangtum hi. Huai mei kat hun zanlai hi a, Fire Brigade-te a omna uh Imphal pek hi a, km 60 vel dingin gamla hi. Huaiziakin, a huntak in amun tung manlou uhi. Huai meikang ahihleh a kipatna theih hilou a,van bangzah man kangtum hiam chih leng suichet theih hinailou hi.

UGC team in enkhe ding
Imphal, April-9:Manipur state sung mun tuamtuam a govt college omte ah University Grant Commission(UGC) fund zanga scheme leh project tuamtuam kisemkhia leh kisemlelte dinmun enkhe ding in Director,UGC makaihna in official team khat in hong enkhe ding uh chihthu om hi.UGC team apan official-te’n Manipur hongphak hun uah Manipur govt a Education(U) apan officialte tawh kithuah in Manipur a College tuamtuam 36 pha ding uh a, kum 2007 akipan 2012 sunga UGC fund tungtawn a nasepte dinmun enkhe ding uhi.

Gang member khat kiman
Imphal, April-9 : Thoubal police commando te’n zan nitaklam dak 4:30 velin Kakching Thongam Leikai mun ah search operation a bawlna uah gang member khat mankhia uhi. Mat a om bel Naorem Bikash Singh @ Ongocha (21) s/o N. Mohon Singh of Kakching Shumang Leikai Makha Lou hi a, amah akipan in thautang 45 leh Nokia mobile handset telin demand letter khat mukhia uhi. Thudotna akipan in Kakching leh akimlak a mipite kiangah helpawl tuamtuam min zang a, thagum in sum laksak zel hidan in gen hi.

Gas news(Imphal) :
Hrangchal Old Lambulane
Booking Upto Valid from
2/3/2013 23/2/2013 (Stock 612)
Misao Gas
Booking Upto Valid from
15/3/2013 26/02/2013 (Stock 612)

Transfer/posting
1.Ameishing Luikham,IAS,Principal Secretary(Rural Dev/Panchayati Raj) as Secretary, North Eastern Council(NEC) on deputation.
2.N. Herojit Meetei,MPS, Addl Supdt of Police(Law & Order)/Imphal West as incharge Commandant, 6th IRB in his grade pay.