Education Minister in SSA Residential school hongkhia
Lamka, April-15: New Lamka (Khominthang area) a SSA Residential School bawlzawh ahih dungzui in tuni sunnung in Education Minister M.Okendro khuallian apang in hongkhia a, Rev Ph Rothuam, Local Pastor EBCC Khominthang in Pathian kiang ah thumna in lan(dedicate) hi. Huai hun ah Chief Host in Phungzathang Tonsing, Minister (Health & FW, GAD & CADA) pang a, Guest of Honour in Vungzagin Valte, Parliamentary Secy (Hort & SC, CADA) leh H.Deleep Singh, IAS, State Project Director SSA/Manipur pang uh a, Special invitees in EM/ADC &MDC hunkhop pang uhi.
Chief Guest in agenna ah SSA Residential school’ fencing bawl dingdan ngaihtuah hiding chi’n gen a, Right to Education(RTE) nuai ah scheme tuamtuam tamtak om a, huaite up-date touh zel theih hi’n leng gen hi. Private school a kaizoulou student te’ govt school ah akai theihnan ding un govt school- te puahna paitouzel hi’n gen a, SSA Residential school leng maban ah a hoihtouh zel leh upgrade touh zel theih hi’n gen hi. SSA tungtawn in class VI-VIII kikal student-te etkai hi a , RMSA tungtawn in class IX-XII kikal etkai hi’n gen hi.
Health Minister Phungzathang Tonsing in CCpur dist adia om ngei nailou tuni’n SSA Residential school kihong khia a, community khat ading hilou in Dist pumpi ading hizaw chi’n gen hi. Education Minister in CCpur dist mipite ading in Polytechnic Institute 1 hon piaksawm a, amun ding 2 kisaikak lel in tuni’n amun ding etkhiat ding chih himahleh India President hongzin ziakin lemtang nailou suak a, DC/CCpur khut ah side selection ding mawhpuakna piak a om hi’n gen hi.
M.Gouzamang Guite, EM/ADC in SSA Residential School tawh kisai a genna ah Health Minister’ panlakna ziak a omthei ahihdan gen in Manipur Cabinet ah thupukna omma apan building bawl kipan a, ama’ gam(plot) lianpi pia ahihdan gen hi. Aman a genbehna ah siamsinna (education) omlou in i gam ah khantouhna taktak om theilou a, mizawng leh gentheite govt school ah kai le uh economic dinmun azia om pan phet ding ahi muhkholhna om ziakin SSA Residential school honkhiak a om hi’n gen hi. Tulel in SSA Residential school ah Class I-VIII kikal student 164 vel in enrolment bawl uh a,April 16, 2013 apan staff te’n nasep pan ding hi’n gen hi. PT School complex Hostel ah student te om ding uh hi’n gen hi.
Gandhi Memorial H/S ah Golden Jubilee lopna
Lamka, April-15: Molnom khua ah April 15,1963 a kiphutkhia Gandhi Memorial High School kum 50 chin ziaka Golden Jubilee lopna tuni zinglam dak 11:00 in huai School ground ah om a, M.Okendro, Minister( Education) khuallian apang in Golden Jubilee monument hongkhia hi. Huai ah Special Guest of Honour Vungzagin Valte, Parliamentary Secy, (Hort& SC, CADA) in GM H/S flag kaipalh a, huai zawh in Golden Jubilee dakpi 50 vei khet in om hi. Chief Host in T.N Haokip, ex-Minister & MLA (Saikot A/C) pang a, Guest of Honour in Health Minister Phungzathang Tonsing pang hi. Special Guests in Ms Jacintha Lazarus, IAS, DC/CCpur leh L.Mangkhogin Haokip, IPS, SP/CCpur pang hi.
Khuallian in a genna ah Prime Minister package tungtawn in CCpur district a GM H/S leh Mata a Vungzagen H/S ah boys & girls hostel a tuam tuak a bawl hiding in gen hi. GM H/S model school tungtawn in class I-V te’ room ding bawl hidin leng gen a, contractual lecturer te’ khalawh tu April kha sung a piak hiding a genkawm in n kuama’n strike bawllou ding in Minister in ngen hi. Manipur a dist tuamtuam lak ah education tawh kisai in CCpur district khanghat pen a, CCpur district akipan state danga kai student te’n hihhoih mahmah uh hi’n leng gen a, govt H/S te naktaka puah hiding in gen hi.
Huaima in T.N Haokip in Jubilee Souvenir hongkhia a, Holkhomang Haokip, ex-MP & Chairman & founder Headmaster in keynote address gen hi.Programme bangtanhiam zat nung sun dak 12:00 velin vuah leh huih kithuahziak in Hall kibawlteng sia a, program sutzop lemtanglou a a om ziakin khualliante leh Golden Jubilee Celebration Committee-te Teachers’ common room a tukhawm in houlimna nei uhi.
Vungzagin Valte vaidawnna leh Award 3 a ngah loppihna
Lamka, April-15: Thanlon A/C apan MLA Vungzagin Valte @ V. Valte, Parliamentary Secretary(Hort & SC and CADA) in a nasep hoihte ziakin April 7, 2013 in Friendship Forum of India(FFI) akipan pahtawina in National Award chi tuamtuam 3 leh Gold Medal a ngah kipahpihna ziakin 56-Thanlon A/C a Central Committee-te vaisaina in April 16, 2013 zinglam dak 11.30 akipan in Dorcas Veng,New Lamka a a tenna inn uh(Niangzen’ Khualbuk) ah ‘Vaidawnna leh Award loppihna’ programme om ding hi.Huai ah Parliamentary Secy V. Valte akipan thugen ngaihkhiakna, Pastor K. Thualkhothang akipan Award-te latna leh recipient adia thumsakna banah item tuamtuam om ding hi.
Rev V.Thangkhangin in hong ding
Lamka, April-15:Health Minister Phungzathang Tonsing’zi (late) Mrs T Chhungi theihgigena mualsuang honna program April 17, 2013 zinglam dak 10:00 in Hebron Veng, New Lamka ah Salem House ah omding a, huai ah Rev V.Thangkhangin, Director (Institutions) EBC in mualsuang honna leh Pathian kiang ah latna (dedication) nei ding a,
Rev S.Langzakham, Dist Suptt, EBC Lamka South in (late) Mrs T.Chhungi theihgigena dia Souvenir kibawl hongkhe ding hi.
School kichim ziakin student 12 liam
Lamka, April-15: Thanlon sub divn a Dialkhai Govt Jr H/S ah student te’ class laklai tak in tuni sun dak 12:00 vela vuahpi leh huih hattak kithuah in school mutchim a, student 12 liam hi’n thusuak kingah hi. Dialkhai govt Jr H/S ahihleh atung langva, abang(wall) teklei (brick) akibawl himahleh akhuamte ah sik(iron) omlouh ziak in school building kichim in a sung a om student-te leh teacher te delhkhum hi’n kigen hi. Teacher khenkhat leng akhut uh nasa pawl om hi’n kigen hi.Aliam student te’ BRTF’doctor te’n first aid a piak ban uah BRTF’ gari zang in Thanlon PHC puaktung hi uh a, aliamte lakah Muanlal a khabe mun 3 khui ngai hi’n kigen a, midangteng innlam ah paikik thei mahle uh Niangngaihlun d/o Khupminthang of Dialkhai tulela class IV simlel in aliang tuak nasa a, April 16, 2013 in Thanlon apan Dist Hospital tunpih ding uh hi’n kigen hi.
PHED Tanker in tuihawm
Lamka, April-15: Lamka khawpi ah tui haksat ziakin CCpur Joint Women Orgn pawlin Th. Baite,EE/PHED CCpur Divn kiang ah a nget dungzui un niteng in cveng tuamtuam ah zingsang dak 7.00-8.00 kikal in Tanker 4 zelin tui hawm ding chihthu om hi.Huai dungzui in Seppatni(Monday) in Chiangkon area ah hawm ding uh a, Sepnawnni(Tuesday) in Upper Tedim Road ah, Nilaini(Wednesday) in New Bazar ah, Ningani(Thursday) in Rengkai ah, Sintawpni(Friday) in Old Bazar akipan Light House Lane kal ah, Kiginni(Saturday) in HQ Veng leh Tipaimukh Road kal ah hawm ding uh chihthu om hi.
Zukhamte’n kum 18 mi vua uh
Lamka, April-15: Ginsianlun (18) s/o (late) Sianchinhang of Kullian, tulel in Manniang veng pansan in school kai a om zan nitaklam dak 3.30 velin Awnkap veng ah top-up thun dinga pawtkhia zukham pawlkhat in Chinkham Modern School kong lak ah vua uh hi’n a innsung mite’ apan thutut kingah hi. Lampi a pai mi 4 te’n lamnawl a a phut ziak un aman leng bangziak a honphu na uhiam chi’n a dot aleh huaiphet in kivuak huan uh hi’n kigen uhi. Ginsianlun’ ngawng mun 3 vel liam hi’n kigen a, Vengsung mipite’n Dist. Hospital tun in tuni’n doctor-te’n Shija Hospital ah referred uh hi’n kigen hi.
Vungzagin Valte in Uniform hawmkhia
Lamka, April-15: Ngathal a SSPP Residential School ah tuni in Vungzagin Valte, MLA & Parliamentary Secy(H&SC and CADA) in Chief Guest hikawm in school uniform hawmkhia hi. Chief Guest in student-te tunung a gam nu-leh-pate ding a hihman un kuhkal taka laisim dingin hasuan hi. Kum 1998 in Ministry of Tribal Affairs, Govt. of India sponsor-na nuai ah SSPP Residential School patkhiak hi a, lawhching touzelin school building leh hostel building kiningchingtak nei uhi. Tulelin Class A akipan Class X tan ah naupang 550 vel kai uh a, HSLC exam 2013 ah 1st batch matric candidate 16 te’n result ngaklel uhi.
Vungtheiching select in om
Lamka, April-12:Miss Vungtheiching @Chingbawi d/o Upa G Khamgoupau of RK Puram, Delhi a om in CBSE nuai ah Class XII (Commerce) 87.8% a a zawh nungin Indian Institute of Management(IIM) Ahmedabad ah Master of Business Administration (MBA) zildingin selection ngah chihthu kiza hi.
LFS student-te’n tablet zangta
Lamka, April-15:Lalpuithluaii Foundation School(LFS) te’n tu academic session akipan text book sik in electronic vanzat(device) Tablet kichi zang uh a, tuni’n school authority-te’n student-te kiangah piakkhiakna nei uhi. Huai ah Rev. V.Thangkhangin, Director(Institutions)/EBC in Tablet-te latna nei a, tukum akipan Class-VII & VIII te’n tawi ding uh hi’n kigen hi. Tablet khat in Rs. 13,310 vel man hi’n gen uh a, khateng in nu-le-pate’n instalment in Rs. 1042 pe ding uhi.
SSC CGL Admit Card
Lamka, April-15:Staff Selection Commission(SSC) saina in April 21, 2013 Northeast bial a pan candidate-te’n Combined Graduate Level exam ding uh a, huai a tel ding candidate te’n tuni akipan Tier-I Exam-2013 ading Admit Card download thei ding uhi. Thu kingahdanin roll no. theihna dingin (http://tinyurl.com/cxd8vey) lut masak ngai ding a, huaizawh in roll no. zangin (http://tinyurl.com/cdsq96h) ah admit card download theih ding hi.
Kangvai khua ah vaidawn
Lamka, April-15: Vungzagin Valte, Parliamentary Secy (Hort & SC, CADA) leh L.Mangkhogin Haokip, IPS, SP/CCpur in tuni zinglam in Kangvai khua ah Education Minister M.Okendro ana vaidawn uh a, huai ah Vungzagin Valte’ worker hunkhop in leng zui uh hi’n kigen hi. Kangvai akipan Minister tawh kizui in Molnom a Gandhi Memorial H/S a Golden Jubilee lopna progam ah tel uhi.
Zan a kisuah bawldikna
IBPS saina a Bank’ PO ngahthak hunkhop zan issue a kisuahte lak ah
Jamkhanlian Valte s/o V Ginkhanthang of Zenhang Lamka kichi kha pen thuchiang zaw kingah in Jamkhanlian Valte s/o V Sumkhokam of New Lamka chih ding hizaw hi. (Gelhkhak louh leh gelhkimlouh a om leh gelhthak zel theih ahi. – Editor)
SUUNNA
H.Nengzamuan (45) s/o (late) H. Ginzaneng of Eden Huan, Hiangtam Lamka tuni nitaklam dak 5.00 velin sinna in si a, April 16, 2013 in Lamka hanmual ah kivui ding hi.
Zamzathang (78) f/o Suanzagin of New Lamka, Vengnuam, tuni zinglam in ashma in si a, tuni mah in New Lamka YPA Hanmual ah kivui hi.
*********************************
IMPHAL NEWS
BSF camp ah bomb paihkhum
Imphal, April-15: Zan nitak dak 8.30 velin Thoubal PS huamsung Wangjing Tekcham Leikai a om 116-Bn BSF ‘Delta company’ te omna camp ah meltheihlouhte’n bomb a paihkhum uh camp sung a lut khalou in a pawlam deuh ah puakzak a,BSF personnel kuamah asi leh liam omlou chihthu kiza hi.Camp akipan suahlam Heirok Part-I lam akipan Bike a kipua meltheihlouh pasal 2 in BSF camp sunga paihlut sawm in deng uh a,kintakin taikhiaksan uh hi’n kigen hi.
Petrol man litre 1 Re. 1 in kiam
New Delhi, April-15 : State owned Oil Marketing Companies te’n tuni nitak nunga zat pat dingin India gamsung pumpi ah Petrol man litre ah Rs. 1 in kiamsak uhi. Petrol man tawh kisai bel April 1, 2013 in revised in om a, tua hun in paise 85 in kiam a, tua nung adin tuni’n Re. 1 akiam nawn ahi hi. Ahihziakin Diesel man ahihleh kikhek lamdang tuanlou a, March 23, 2013 in 45 paise in punsak in om hi. January 2013 in government in Oil Companies te kiangah diesel man khateng a 40-50 paise a khangsak thei ding in theisak a, himahleh huai zuihtheih taktak hilou hi. Oil Companies te’n India gamsung pumpi ad diesel litre 1 ah Rs. 6 mang zel uh hidan in gen uhi. Huai tawh kisai in govt in cooking gas leh kerosene subsidized rate a zuak dingin theisak a, a mannate uh compensate ding hidan in kigen hi.