ZSF Gen HQ,KSO/CCpur leh CDSU in CM ah memorandum pia
Lamka, Aug-30:Zomi Students’ Federation(ZSF) Gen HQ, Kuki Students’ Organisation (KSO)/CCpur leh CCpur District Students’ Union(CDSU) in H. Chinkhokam @ C. Hangshing,MCS, ED/DRDA & Addl DC/CCpur tenna inn huangsung ah Aug 25, 2012 nitakin meltheihlouhte’n bomb a paihlut uh puakzak ziakin anaupa H. Nengkhanpau(53) leh a tanu Baby Thiankim(1 yr) liam a, huai thiltung mawhpaihna banah govt in security ginatak a piaklouh ziaka huchibang thiltung hi a taklang kawmin lungkimlouh latsakna in ZSF,KSO leh CDSU kigawm in Aug 29,2012 in CCpur district ah total bandh puang uhi. Student pawl tuamtuam 3 kigawmte’n DC/CCpur tungtawn in Chief Minister ading Joint Memorandum pia uhi. Huai ah Manipur ah muanna leh bitna(law & order) dinmun bangmah hilou khop a kisia ahihdan taklang kawm in state thuneitute’n leng law & order leh security dinmun enkol zoulou uh hi’n taklang uhi.
Thusuak in a taklatdan in C. Hangshing in Head of deptt ahihna ziakin helpawlte apan phutluih a sum ngetna lai mu a,sum piak thil hitheilou ahihziakin vauna in July 15,2012 in a innkong ah bomb kimukhia hi. Huai tawh kiton in C. Hangshing vengtu ding security pe dingin Home Minister leh Manipur DGP ah ngetna piak himahleh limsaklouh in om hi. Govt in security piak ding a limsaklouh ziak mah in Aug 25, 2012 nitakin C. Hangshing tenna huangsung ah bomb paihlut hi a,huai puakzak ziakin mi 2 liam hi.
Indian Constitution a Article 21na ah India khua-le-tuite “Right to Life and Personal Liberty” piak himahle uh gamsung mite humbit zawh ahih kei aleh huaipen state govt fellahna ziak hizaw chi’n leng thusuak in gen hi.Huai dungzui in student pawl tuamtuam 3te’n CM kiang ah C. Hangshing’ bitna din security kintaka piak ding,aliamte govt in panpihna a piak ding, tunung in hibang thil a tun nawnlouhn din district a Law & Order dinmun kituptak a bawl ding leh hiamgam taka gamtangte matkhiak ding in phu uh a, govt in huai a sepkhiak kei aleh kiphinna khuahsem pat hiding a, huaia thiltung a om leh state govt in mawpaw ding chi’n CM ah thutawp pia uhi.
Bomb koihtu hidia gintak mankhia
Lamka, Aug-30:Singngat Thadou Veng ah Aug 28, 2012 zingsang dak 6.30 velin 39-Assam Rifles te'n KNO/KNA cadres a panglui Tinlal Haokip(56) s/o Paojathang mankhia uh a, amah apan in 9mm pistol 1, magazine 1 leh atang 4 mukhia uh chi’n Police apan thusuak kingah hi. Army te'n Imphal Police ah pekhia uh a, CCpur Police te'n a case lasawn in CJM court ah dingsak uh a, CJM in Sept 4, 2012 tan Police custody ah om ding pekhia hi. Police apan kizadan in Tinlal’ tapa Sanglun Haokip tulela Myanmar a om KNLF active member hi a, Aug 25, 2012 nitaka C.Hangshing, ED/DRDA tenna inn a bomb kipai a puakzak tungtang Tinlal Haokip in thei ding hi’n ginthu gen uhi. DC/CCpur leh midang hunkhop apan kizadan in July 15, 2012 a C.Hangshing tenna gate bul a hand-grenade koihtu lreng Tinlal Haokip hidia ginthu kigen a, Singngat Police te'n amah tung ah FIR No.13 (8)2012 SGT-PS U/S 400 IPC & 25 (1-C) A.Act registered uhi.
CoPTAM makaite Delhi ah zin
Lamka, Aug-30: Committee on Protection of Tribal Area, Manipur (CoPTAM) Chairman Letpu Haokip makaih in CoPTAM Executive member Thangkam Lupheng, H Pauzalal leh Lamkhogen Vaiphei zan in Delhi ah zin uhi. Amau Delhi a om sung un Chairman, National Commission for Schedule Tribe leh Union Minister of Tribal Affairs kimuhpih ding uh hi’n kigen a, Delhi a om singtangmite tawh leng ‘ 3rd Consultative Conclave’ nei ding uh hi’n thutut kingah hi.
CDSU Annual General body meet
Lamka, Aug-30: CCpur District Students’ Union(CDSU) pawlin Aug 31, 2012 zinglam dak 11.00 in CCpur Govt College ah Annual General Body Meeting-cum-Assembly nei ding uh chihthu om hi.Huai ah CCpur district sunga educational system establishment, Flagship programme, CCpur district ah B.Ed course sinna ding tungtang, Private school a additional material & fee tungtang, Consumers’ Club leh thu tuamtuam genkhawm ding uh chih thutut kingah hi.
De-duplicate ah 3000 val mukhia
Lamka, Aug-30: CCpur district ah electoral roll a min leh lemlak double a omte suina(De-duplicate Campaign for Electoral Rolls) pailel a, Singngat A/C, Henglep A/C leh Tipaimukh A/C a electoral rolls ah double a min leh lemlak leng double a om mah 3000 val mukhia uh hi’n kigen hi. DC/CCpur apan kizadan in electoral rolls a double a omte tunung sawtlou in public notice kibawl ding a, DC/CCpur office leh SDO office a Village Notice board ah takkhiat hiding a, double a min leh lemlak omkha te’n Sept 4, 2012 tana a ngaihven kei ua leh electoral rolls a polling station khatzaw sam pen ah paihkhiat hiding gen hi. Double a omkha te’n polling station deihzawk teltheih hi’n leng gen hi.
DDT 2nd round kap kipan ding
Lamka, Aug-30: HL Khai, Male Health Supurviser leh Lemruolsang, Multipurpose Worker makaih in Aug 31, 2012 in DDT 2nd round kap dingin kuankhe ding uhi. Amau Thanlon PHC nuai ah khua 12, Pherjol PHC nuai ah khua 4, Singngat PHC & Behiang PHC nuai ah khua 37 ah DDT kap ding uhi. Huailou in Sept 4, 2012 in Patpuihmun PHC leh Sibapurikhal PHC nuai a khua 26 ah DDT 2nd round kap ding in Lalbiakthuom, Male Health Superviser makaih in malaria teamte kuankhe ding uhi.
Sinzawl PHC ading Ambulance
Lamka, Aug-30: Border Area Development Programme (BADP) 2009-2012 fund tungtawn in District Administration leh CMO/CCpur in Sinzawl PHC a zatding Ambulance Gari thak khat lei uh a, huai zanhal in Lamka hongtung hi. Tunung sawtlou in DC/CCpur in Medical deptt khut ah Ambulance gari a piakkhiak ding banah Sinzawl PHC azat ding mah in solar leng peding hi’n kigen hi.Tulelin Sinzawl PHC ah doctor 2, nurse 6, phamacy 1, grade IV mi 3, malaria deptt staff 2 leh accountant 1 in nasem uh hi'n kigen hi.
5-days training om ding
Lamka, Aug-30: National Rural Health Mission (NRHM) nuai a ASHA Felicitator te'n Sept 3-7, 2012 sung CMO Conference Hall ah ni 5 sung training nei ding uh a, training hunsung in Imphal apan expert team in sinsak ding uh hi’n kigen hi.
Manipur Pineapple Festival
Imphal, Aug-30: ‘5th State Level Manipur Pineapple Festivcal-2012’ kichi Sept 1, 2012 in Bishnupur District a Sendra om ding hi. Zinglam dak 11.00 session ah Home Minister Gaikhangam khuallian hiding a, Functional President in IFCD Minister Ngamthang Haokip pang ding hi. Guests of Honour in Social Welfare Minister AK Mirabai, Y. Surchandra, MLA; Yamthong Haokip,MLA; J. Panmei,MLA leh Col N. Bhardwaj, CO, 33-Assam Rifles pang ding hi. Sunnung dak 2.00 akipan ding session ah PHED Minister I. Hemochandra khuallian hiding a, Functional President in Works Minister Dr Kh. Ratankumar leh RD & PR Minister Francis Ngajokpa pang ding uhi.Guests of Honour in Agri Minister Md Abdul Nasir, Dr Chaltonlien Amo, Chairman,HAC; Victor Keishing,MLA; Ginsuanhau,MLA; S. Bira Singh,MLA; Z. Kikhounbou,MLA leh Vungzagin Valte,MLA pang ding uhi. Zinglam programme ah Manipur Pineapple Farmer’s Award piakkhiakna leh cultural session om ding a, sunnung a programme zat hun ah Manipur Pineapple Queen Contest leh Manipur Pineapple Queen contest banah kipahman piakna om ding hi.
Phalna beia lut zonkhiakna kipan
Imphal, Aug-30 : Ministry of Home Affairs apan thupiak om dungzui in Bangladesh, Myanmar leh state tuamtuam apan phalna beia Manipur a honglut Muslimte tuni’n zonkhiakna kipan hi.Tuni zingsang baihtak dak 3:00 apan nitaklam dak 6:30 kikal in Thoubal Commando, Bishnupur Commando leh IRB te’n Lilong Ushoipokpi, Lilong Mairenkhul, Lilong Hanggam Thabi, Lilong Tamyai, Lilong Chingkham leh Lilong Upukthou lak operation bawl uh a,mi 146 mankhia in Lilong Haoreibi College campus ah kaikhawm in huai akipan 2nd M/R ground ah thudot din pawkhia uhi.Hoihtak a thudotna om nungin mi 19 te Burmese Muslim hi ua, Bihar apan mi 32, Bengal apan mi 62, Silchar apan mi 33 hi’n theikhia uhi.
Huaizawh in Imphal East leh Imphal West Comnmando kigawm in Hapta Golapati lak operation bawl uh a, huai ah phalna bei a Manipur lut Muslim mi 24 mankhia uhi. Huai ah L. Kailun,IPS, Inspector General of Police(Law & Order) leng tel a,aman phalna bei a Manipur honglut Muslim matkhiak a omte Foreigners Act nuai ah case file hiding uh a, dan (law) dungzui in a gam mah uah sawlkik hiding un gen hi. Manipur DGP in leng Moreh leh Mao area ah leng phalna beia Manipur lut Muslim mite zongkhe dingin Police-te thupia hi.
Mi dawtlum matkhiak in om
Imphal, Aug-30 : Airport Road Changangei Uchekon a Usha Café Restaurant ah zanhal zinglam dak 10:00 velin Thongam Ibochouba (38) s/o Gambir of Nambol leh RK Reena Devi tukhawm lai pasal khat in Thongam Ibochouba tem in vadawt a si hi. Mi dawtlumtu tuni’n police te’n mankhia in CJM court ah dingsak uh a, court in Sept. 4 tan police custody a om dingin phalsak hi. Matkhiak a om Salam Pradeep hi a, a zi RK Reena Devi leh Thongam Ibochouba zan in Usha Café Restaurant tukhawm lai muh ziakin thangpai in Thongam Ibochouba va dawt a, JNIMS zotpih himahleh damzoulou in lamkal ah si hi.
Helpawl hidia gintak mi 11 kimankhia
Bangalore, Aug-30 : Karnataka State police chief Lalrokhuma Pachuau,IPS in a gendan in Pakistan pansan helpawlte’n Karnataka a politician tallang deuhte, journalist khenkhat leh Hindu sahkhua makaite that dia a sawl lut uh mi 11 zan in matkhiak a om uh hi’n gen hi. Aman a gendan in matkhiak a omte kum 20-30 kikal mi ngen hi uh a, Bangalore apan mi 6 leh Hubli apan mi 5 hi uhi. Amaute Pakistan pansan helpawl Lashkar-e-Taiba(LeT) leh Saudi Arabia pansan Harkat-ul- Jehad-e-Islami (Huji) te’n a sawl ahih dan Bangalore Police Commissioner B.G. Jyothiprkash Mirji in gen a, kha 2-3 sung a sulnung uh suizui ahihnung a matkhiak hi uh a,amaute apan in 7.65mm pistol leh atang round hunkhop leng muhkhiak in om chi hi. Police Commissioner in a genzelna ah investigations a buailouhna dingin mat a om te detail in puankhiak hinailou dingin gen a, mat a omte lak ah khat Bangalore a English daily Newspaper a journalist ahihleh ahihlouh donna pe kei mahleh Bangalore apan mi 6 matkhiakna mun Jayachamarajendra Nagar veng mite’n bel mi 6te laka 1 reporter(working journalist) hi’n gen uhi.
Tulaiin Water Supply lam buai
Imphal, Aug-30: Executive Engineer,Water Supply Maintenance Division No. II, PHED Manipur in thusuah a bawldan in July, 2012 kal 2na tan ah electric meivak/power ahiding bang ngah ahih ziakin Porompat Water Supply Scheme apan tui kichingtak piakkhiak theih hi a, hileleng huainung in electric power voltage kiching ngah ahihlouh ziakin Porompat Water Supply Scheme, Khurai Laiwangma Zonal Reservoir,Minothong Zonal Reservior leh Khurai Sajor Zonal Reservoir akipan mun tuamtuam a tui supply-na area-te ah nidang banga tui hawmkhiak theih dingin pump theih hilou a, huaiziakin electric meivak voltage kiching ngah ahihnawn masiah mipite’n theisiam ding leh tui chilsiam taka zang phot ding in theisak hi.
Haj Committee a Chairperson
Imphal, Aug-30: Manipur Haj Committee pawlin Aug 10, 2012 a meeting a neihna uah kum 2012-2012 sunga Manipur Haj Committee Chairperson ding in Md Amin Shah,MLA s/o(late) Md Muhammuddin Shah of Kshetri Bengoon, Kshetrigao A/C kituak takin telching uhi. Manipur a Haj Committee pawl bel Muslim sahkhua tawh kisai a gam tuamtuam a munsiangthou phakna dia khualzinna ding tawh kisai vaisaipawl ahi uhi.
.