ZYA Unit thak 10 honna om ding

Lamka, May-17: Singngat sub-divn sunga Lungthul(T) khua ah May 19, 2012 zinglam dak 11.00 akipan in Lungthul area a khaw tuamtuam 10- G. Bualjang, Enpum, Tuilakjang, Lungthul(T), Ngaljang, Tonglon(P), Tonglon(T), Lungchin,Sialbu leh Chiangpi khua ZYA unit thak honna leh lopna programme om ding hi.

       Huai ah Chief Guest-Ginsuanhau,MLA; Chief Host-Thanglianpau,President,ZRO; Functional President-Langkhanpau Guite, Chairman,ADC/CCpur; Guests of Honour-Mangchinkhup,EM; Gouzamang EM; Kamsuanlun,EM; Lalhossan,EM leh Genneikhup,EM hiding uh a, Special invitees –MDC-te, CEO,ADC/CCpur leh SDO/Singngat hiding uhi.

       ZYA Gen HQ a President T. Goukhomang in ZYA Unit thak 10-te hongkhe ding a, Pastor Thanggoulian in Unit thak 10 a vaipaw dingte thumsak ding hi. Huaizawh in khualliante apan thugen ngaihkhiakna om ding a, programme zawh in mipi in anluang umkhawm ding uhi.

Award piakna leh Class X zouthakte kipahpihna

Lamka, May-17: H. Mangchinkhup, EM,ADC/CCpur in anu (late) Pauzaching theihgigena dinga ‘(late) Pauzaching Memorial Award-2012’ a patkhiak Gou Cin Khup Veng,New Lamka a CYA Hall ah May 19, 2012 zinglam dak 10.30 in 16-New Lamka(West) ADC Constituency sunga HSLC Topper Award piakkhiakna function leh BSEM saina a HSLC examination,2012 ah 16-New Lamka(West) ADC constituency sunga passed-te kipahpihna, hanthawnna leh thumsakna kithuah programme om ding hi.

     Huai ah Rev Dr Kh. Khaizakham, Principal,ECT in student lawhchingte thumsak ding a, Mrs Roui Kullai,IFS, DFO(Central Forest Divn) leh M. Jamchinthang,Chairman, SSPP Gen HQ Standing Committee in hasotna thu gen ding uhi.

Music Video thak honna om ding

Lamka, May-17: PCL Thuoma in abawl Music Video thak “Chungmuvanlai” kichi May 19, 2012 sunnung dak 2.00 in Chiengkawnpang Community Hall ah Langkhanpau Guite, Chairman, ADC/CCpur in khuallian apang in hongkhe ding hi. Huai ah Guest of Honour in L. Mangkhogin Haokip, IPS, SP/CCpur pang ding a, Functional President in S. Kamsuanlun, EM/ ADC pang ding hi. Huai album thak ahihleh Joseph Tonsing in abawl(produced) hi a, honna hun ah lasiam tuamtuam Donny Guite, Benny Khongsai, Lien Baite, B. Muan Ngaihte, Muan Hangzo, Zami Hauzel, Nancy Biaklun banah  lasiam tamkhop in lasa ding uhi.

Pasal khat in numei rape sawm

Lamka, May-17: Police apan thutut kingahdan in Thangzahau s/o Lienthang of Hmar Veng zanhal(May 15, 2012) nitak dak 8:00 velin Chungzalien of Hmar Veng te’ inn ah vahawh a, Chungzalien zi’ naunu kum 15 lela upa kuva haiding chi’n pawtkhiatpih hi. Thangzahau in huai numei pen Hmar Veng field lama paipih in sual(rape) sawm a, numei nu kipeksuah zou in nitak dak 9:00 velin inn tungkik hi’n kigen hi. Numei nu puansilh leh ten teng buan gawp hi’n kigen hi. Police te’n Thangzahau mankhia in tuni’n CJM court ah dingsak uh a, CJM in May 21, 2012 tan Police custody a om ding in phalsak hi. Police in Thangzahau tung ah FIR No. 49 (5) 2012 CCP-PS U/S 354/377 IPC registered uhi.

Line bus in mehzuakte lak phukha

Lamka, May-17: Lamka-Imphal kikal a line bus tai(No. MN-05/1389) “Vaishno Devi” kichi tuni nitaklam dak 5:30 velin New Bazar a Bus parking apan Imphal zuandek lai taisuak kha in YMA Waiting Shed khangzeka mehzuakte lak phukha chihthu om hi. Bus in  Nahaton of Kwakta dawr phukha a, mehzuakte bel aliam omlou hi’n kigen hi. Police- te’n gari leh driver M.Binoi Singh (45) s/o M.Babu Singh of Phubala mankhia in Police station koih uh a, Bus neitu Kh Ibopishak Singh of Thinunggei hi’n kigen a, Bus mailam glass kimkhat kisia a, amai lak leng kuakzek hi’n kigen h.

Attestation Parade om ding

Lamka, May-17: BSF Subsidiary Training Centre/CCpur a training zouthakte ading in May 19, 2012(Kiginni) zingsang dak 8.30 in STC a BSF Parade Ground ah ‘Recruits Attestation Parade’ om ding hi.Huai ah Ashok Kumar Sharma, DIG/PSO khuallian in pang ding a, aman Attestation Parade a tel contingent-te akipan in salute la ding hi.

IWMP leh MGNREGS meeting omding

Lamka, May-17: Chairman ADC/CCpur makaih in amah office chamber ah May 18, 2012 zinglam dak 11:00 in IWMP & Dist. Watershed Development Committee meeting om ding hi. Huai ah IWMP 2010-2011 project nasepna pailel genkhawm ding uh , IWMP 2011-2012 project sepdan ding leh IWMP 2012-2013 project proposal telin thu tuamtuam genkhawm ding uhi. Huailou in May 18, 2012 sunnung in DC office a BRGF Resource Centre ah C.Hangshing, ED/DRDA makaih in MGNREGS tawh kisai meeting om ding a, huai ah BDO teng, Programme officers leh SO teng telding uhi.

Khamangthang matdan sinkhawmna

Lamka, May-17: EBC, Lamka South Division saina in New Lamka Hebron Veng a Hebron EBC biakinn ah tuni zinglam in ‘Kha mangthang matdan sinkhawmna’ kichi om hi. Huai ah Rev V.Khamvum, Sr Lecturer, GBC; Upa T.Khupzatun, Evangelist, EBC HQ leh Rev M.Khamkhanchin, Sr Lecturer YCLT te’n sinsak uh a, May 18, 2012 in zouding uhi.

Lamka College in accreditation ngah

Lamka, May-17: Lamka College in Bangalore a National Assessment and Accreditation Council(NAAC) akipan kum 5 sung daih dingin accreditation ngah a, huai in April 21, 2012 apan simtouh in kum 5 sung daih hi’n kigen hi.Original ‘accreditation certificate’ bel tunung in “NAAC Accreditation Awards Ceremony” om hun ah piakkhiak hiding chi’n Director,NAAC in Lamka College Principal laithon tungtawn in theisak hi.

Police te’n Jail ah koih uh

Lamka, May-17: Assam Rifles te’n May 9, 2012 in Zoukhonuam village(Singngat sub divn) ah Myanmar apan hongzin Gintungthang(52)s/o Ngamzakam of Phaisat village mankhia in a vanpuak AK 47-rifles 2 leh atang 30 tawh Singngat Police ah pekhia uhi. Singngat Police te’n CJM court ah dingsak uh a, CJM in tuni tan Police custody a om ding in a phalsak a, tuni’n CJM in Judicial custody(jail) a om ding in thutan khum a, Police te’n tuni mahin jail ah koih uh a, FIR No.8 (5) 2012 SGT PS-U/S 19/39 UA (P) A.Act 25 (1-C) A.Act & 14 Foreigners’Act registered khum uhi.

Meithai Fellowship 5veina om

Lamka, May-17: Central Lamka EBC biakinn ah tuni’n EBC Lamka North Division sunga khaw tuamtuam apan pasal om nawnlou meithaite ading in Meithai Fellowship 5veina om a, Rev. T. Lalzagin, DS/Lamka North Division in “Meithaite ngaihtuah Pathian ahi” (Sam 68:5) chih thupi zangin thugen a, division sunga meithai mi 250 vel paikhawmte’ adingin Pastor S. Thangchinlun, EBC/Central Lamka in vualzawlna ngetsak hi.

State Level Open Chess Tourny kipan

Lamka, May-17: CCpur Dist Progressive Chess Assn pawlte saina in tuni apan Hiangtam Lamka a YPA Gen HQ Hall ah ‘State Level Open Chess Tournament’ om a, May 19, 2012 in zou ding uhi. Huai ah Manipur pumpi apan chess player 40 tel uh a, Imphal akipan in 13 tel uhi. Imphal kipante lak ah International Rating mi 4 tel uh a, huaite O. Ningthem, K.Sanjoy Sing, Y. Dhanabir Singh leh H. Jocky Singh banah Lamka apan International Rating ngah omsun K. Thangkhanpau tel hi. Huai Chess Tournament ah 1st in Rs 5000, 2nd in Rs 3000 leh 3rd in Rs 2000 ngah ding a, mi 7 in consolation ngah ding uhi.

Malaria positive 2 mukhia

Lamka, May-17: Dist Malaria office te’n May 1-15, 2012 sungin damlou 950 velte’ sisan test uh a, huailak ah malaria positive 2 mukhia uh a, huaite avek in PF ngen hi’n gen uhi.

Mawhpaihthu puang uh

Lamka, May-17: ZRA te’n khamtheih(kani) kg. 2 a matkhiak uh zan issue Newspaper a kisuah ah aneitu in Esther of Zellang Veng hi’n kipuang mahleh Zellang Veng ah huchibang mi   omlou ahihman in Veng minsiatsakna hi a ngai in tuban huchibang ching nawnlou ding in Zellang Veng Development Committee in deihthu puang uhi.

Soft Skill training omding

Lamka, May-17: Emmanuel Hospital Associaton (EHA) nuai a Project Axshya-te saina in May 29 & 30, 2012 zinglam dak 9:30 zel in CMO/CCpur office a Conference Hall ah ‘One day Training Programme on Soft Skill of RNTCP’ kichi omding a, huai ah mi 19 telding uhi.

Minister-te’n gou(assets) a neihzah uh a puankhiak chiat uh ngai ding

Imphal, May-17: India phualpi a Congress makaihna a vaihawm UPA govt in corruption doudal uh ahih latsakna dingin Centre leh state tuamtuam a Minister te’n gou(assets) a neihzah uh puangkhe sek uh a, Manipur ah leng term beisa a Minister te’n a gou neihte uh van leh sum tanpha puang uhi. Manipur ah Chief Minister O. Ibobi makaihna mah in Congress(I) kia in govt thak bawl uh a, huaia Minister te’n a kichiamni ua pan kha 3 sungin a gou neihzah uh a puankhiak ding uh chihthu om hi’n kigen hi. Huai sepkhiak kipatna ding in Cabinet in thupukna a bawl masak ngai ding chihthu om hi.Huai tawh kisai Cabinet Sub-Committee a Chairman Th. Debendra, Minister(Revenue, Law & Legislative Affairs) in a gendan in Cabinet thupukna om hunhun in sepkhiak hiding chi hi.

Mi 1 apan opium kg. 1 mukhia

Imphal, May-17:Narcotic Control Bureau, Imphal West te’n Singjamei area ah opium zuak leh pawvial om zel chihthu a zak ziakun tuni in Imphal West Addl. SP(Law & Order) makaihna in operation bawl uh a, zinglam dak 11:45 velin pasal khat a check ua leh opium kg. 1 mukhia in amah leng man uhi. Opium tawh matkhiak a om Quayamuddin (36) s/o Saheruddin of Thoubal Moijing Awang Leikai hi a,aman Imphal khawpi sung mun tuamtuam ah opium zuak a, kg. 1 ah Rs. 16,000-18,000 lak in zuak hi’n gen hi. Manipur state pua ah bel kg 1 Rs. 30,000 vela zuak zel hi’n kipuang hi.

Nga khoina ah siluang 1 kimu

Imphal, May-17: Lamphel PS huamsung Gari Makha Leikai Maring Loukon a nga khoina(fish farm) ah tuni a nga man dia kuante’n tui sungah ah siluang khat mukhia uhi. Amau Police ah thil omdan report pia uh a, police te’n siluang vala in RIMS morgue ah koih uhi. Huai siluang ni 3/4 vel paisa asi hiding a gintak hi a, ataksa tungah liamna ma muh hilou hi. Aman jean khekol teng a T-shirt ngou silh hi’n thutut kingah hi.

A/R te’n Pangolin Shells mukhia

Imphal, May-17: Zan in 42-Assam Rifles pawlin Bongyang lak operation a bawlna uah Maruti Van (No. DL-3C-AW/0652) a check ua leh gamsa (Pangolin Shells) kg. 4 vel ding mukhia uhi. Huai Maruti van bel Senapati apan Moreh zuan a tailai hi a, a neitu Gigin Haokip(23) s/o Jamthang Haokip of Senapati tawh mankhawm uh a, Assam Rifles te’n zan mah in amah apan van muhkhiakte tawh Wildlife department/ Imphal ah pekhia uh chihthu om hi.

Kuki inn ah General Assembly

Imphal, May-17: Kuki Inn, Imphal ah May 19, 2012 zinglam dak 11:00 in All Manipur Hill Districts Contract Basis Teachers’ Associaton pawlin Emergency General Assembly nei ding uh a, huai ah huai ah Hills Districts Contract Basis Teachers pawla mi 772-te kimtaka telchiat ngai ding hi’n thutut kingah hi.

Application form kihawm

Imphal, May-17: DM College of Arts ah May 18 akipan June 5, 2012 sungin academic session 2012-2013 a BA 1^st Semester ading Prospectus leh Application form kihawm ding chihthu om hi. A deihte’n office hours sung in Rs. 250/- pia in laktheih ding a, huai dingin . ST student te’n aggregate in 45% marks muh ngai a, 10+2 original marksheets leng tawi ngai ding hi. Huai tawh kisai a haksatna neite’n DM College a Tribal Students Union makaite contact theih ding a, Ph. No. 9615178114 leh 9206156081 tungtawn in thuchian kantheih ding chihthu om hi.

State thak pawng bawltheih hilou - GoI

New Delhi, May-17:India govt thusuakin a gendanin hun bangtanhiam paisa apan in India gamsung mun tuamtuam ah state thak phutna leh state tuamtuam ngetna ziaka kiphinna nasa mahleh huai tungtang ah broad consensus a om kei aleh state thak pawng bawlkhiak theih hilou chi hi. Ministry of Home Affairs in leng state thak ngetna tawh kisai Lok Sabha ah luikhia ua, huaithu sau gen kul nailou chi’n koihdap in om hi. Minister of State for Home Affairs Jitendra Singh in Lok Sabha a theihsak danin separate/new States bawlkhiakna ding thu namai hilou a, amasapen in a bawlkhiakna/ akekzak ding state (parent state) te’ ngaihdan dot masak penpen hiding chi’n gen hi.

KSDC in press kimuhpih

Arunachal leh Tripura ah tribal-te soisakna uang

Agartala, May 17: National Crime Records Bureau (NCRB) te’n crime report abawlna uah India malsuahbial a om Arunachal Pradesh leh Tripura state ah singtangmite soisakna uang mahmah a, India gamsung pumpi adingin leng chiamteh tham hiban uh chi uhi. NRCB agency in ahihleh Arunachal Pradesh leh Tripura ah singtangmite soisakna a ot mahmah ziakin hibang report suahkhia uh hi’n kigen a, maban ah leng uangzaw sem theilai ding dinmun ah om chilai uhi.

Official thusuakin agendanin, Arunachal Pradesh abel kum tamtak paisa apan singtangmite soisakna uang himhim ahi chi ua, himahleh, kum 3 paisa apan Tripura ah singtangmite sikdenna leh soisakna (crime against tribals) hong otluat mawkpen lamdang mahmah in chiamteh tham hi a, mi soisatute mat hisek mah le uleng amaute’ tung ah gawtna kichiantak lak vang mahmah in om ua, atamzawte matlouh a a om banuah tamtakte bangmah lawhlou in khah in om zel uh chi uhi.

NCRB ten agenbehna uah 2010 sung chauh in Tripura ah singtangmite soisakna tawh kisai in case registered 35 om a, register kibawllou leng hunkhop om dia gintak ahi chi uhi. Mizoram, Manipur, Nagaland leh Meghalaya abel singtangmite’ tung a tatsiatna tawh kisai in record bangmah omlou chi uhi. Sikkim abel case khat om a, Assam ah 3 leh Arunachal Pradesh ah incident 54 om chi uhi. Tripura ah 2008 kum in tribal community te soisakna case 14 chiamteh hi a, 2009 in 27 leh 2010 in 35 tunga, tu hut a panlak ahihkei leh thil khawkzawsem tungthei gige chi uhi.

Hibangkalah, Tripura state mah ah Scheduled Caste (SC) te soisakna tawh kisai in case 3 bulhin om a, Mizoram, Manipur, Nagaland, Assam, Arunachal Pradesh leh Meghalaya abel khat leng record omlou thepthup chi uhi. Hiamgamna tawh kisai in Mizoram leh Nagaland in case a take-up dan uleh mi soisate’ tung ah dan tawh kituak a gawtna apiakdan uh ettontham ching mahmah chi uhi.

Mizoram state in RMSA fund zang hoihpen

Aizawl, May-17: Central government in India pumpi adia thilhoih(scheme/project) mahmah patkhiak Rashtriya Madhyamik Shiksha Abhiyan (RMSA) mission tungtawn a nasep leh fund zatdan tawh kisai-in India malsuah bial(North-east) adingin Mizoram in fund ki-sanctioned te zang hoih in zang manphapen hi’n kigen a, India gamsung pumpi adingin leng a 2na in pang ban lai chih hi. India gam pumpi etin Haryana in hih hoihpen a,huai zom Mizoram hi’n kigen hi.

       Official thusuakin a gendanin kum 2009 apan 2012 kikal a RMSA fund zatna ngenteltak a sui ahihnung in Mizoram state in nasem hoih mahmah ahihdan theih hi a, Rs 71.72 crores a muhna lak uah 63% manphatak a zang uh ahihdan theihin om hi. Union government in Centrally Sponsored Schemes(CSS) a neihte’ lakah adiakin MGNREGS, SSA leh RMSA te Supreme court thupiak dungzui in hoihtaka etzui(monitor) ding chihthu om hi.

     Huai Mission nuai mah ah India malsuahbial a state omte’n fund a laklut dan uah Mizoram a 3na in pang a, Assam in tam mupen a, 2na Manipur leh a 3na Mizoram state ahi hi. Assam in kum 2009-2012 sung in Rs 109.16 crore mu a, Manipur in Rs 81.03 crore mu hi. Meghalaya in Rs 13.45 crore, Nagaland in Rs 44.44 crore, Tripura in Rs 42.07 crore leh Arunachal Pradesh in Rs 47.51 mu hi. Manipur in fund a muh teng lakah 22% zangkhia (utlised) a, Nagaland in 2% lel, Sikkik in 25%, Arunachal Pradesh in 22% zang ua, Assam leh Meghalaya state ngialin zero per cent zang uh chih hi.

KSDC General Strike tuni nitaklam in bei

Lamka, May-15: Kuki State Demand Committee(KSDC) in May 12, 2012 nitaklam dak 6.00 akipan dakkal 72 sung General Strike a puan uh tuni nitaklam dak 6:00 in bei hi. General strike sungin mun tuamtuam ah volunteer duty-te khauh mahmah uh a, khawpi sung mun tuamtuam ah gari tyre halkuang uhi. Tuni’n khawpi sung mun khenkhat ah volunter duty om a, hileleng Tuibuong area ah bel kimu tamlou hi. Thingkangphai ah tuni’n bandh volunteer-te’n singtum leh nahpa sawl zangin lampi khaktan uhi. Police te’n volunter te nawhkhia in lampi khakna teng lakhe mahle uh volunter te’n khaktan nawn in lamlian ah gari tyre halkuang uh a, nitaklam in Police te’n delkhe nawn uhi. Hileleng General Strike sungin buaina thiltung thupilua zak leh theih omlou hi.

IG(Zone-II) in Lamka hongpha                    

Lamka, May-15: T.Pachuau, IPS, Inspector General of Police(Zone-II) in tuni zinglam in Lamka hong pha a, SP/CCpur office ah SP telin Police officer-te’ tawh Law & Order dinmun genkhawm uh hi’n kigen hi. Huaizawh in IGP in SP/CCpur tawh kithuah in khawpi sung mun tuamtuam pha in security dinmun enkhia uh a, nitaklam in Imphal ah kiknawn hi.

Naupang khat tuikulh ah kia

Lamka, May-15:Tuni sunnung dak 1.00 velin Tuibuong a Ambedkar School apan gamlalou a tuikulh(well) kibawl zawhsiang nailouh ah Ningmuankim (5) d/o Ginthianlal tuakkhia in minute 20 vel buaipih nung in Khamchinsiam of New Lamka in lakhe thei hi’n kigen a, naupang in atunglam in khua a phawklouh ziakin dist. hospital puaktung in om hi. Ningmuankim leh alawmte lampi a kimawl kawmin kiton uh a, huchihlai in lampi nawl lam neh kha in feet 12 vela thuk well ah kia a, huai well leng feet 10 vel ding tui in tum hi. Ningmuankim hun sawttak glucose khai in etkol ua, tuni nitak dak 6.30 velin a dinmun in hoihlam a nawt ziakin hospital apan a innkuanpihte tawh pawtkhia uhi.

Tuibuong ah vankoihna inn 1 kangtum                  

Lamka, May-15: Zan nitak dak 8:00 vel in Tuibuang a DHQ Part-I a om Seimang (38) s/o Ngamjang’  inn compound sung a thautui leh carpentry van koihna inn atung langva, abang langva leh atuang(foor) cement kizut kangtum hi. Fire Brigade te’n meikuang a theih un delh pah uh a, meikuang in inndang a pehsawn ding dalzou uhi. Meikuang kipatna theihchet hikei mahleh inn-neipa Seimang leh alawm T.Khailal te’n petrol a teituahna lam ua meikuang kipan hidin ginthu kigen hi. Meikuang phelh ziakin Seimang leh alawmpa T.Khailal kangliam uh a, Seimang’ taksa tung 60 % vel kang in doctor te’n Imphal ah refered uh a, T.Khailal’ taksa tung 20 % vel kangliam hi’n kigen hi. Innkang ah petrol litre 50 vel ban ah carpentry van hunkhop kangtum a, akigawm in Rs 1 lakh val man kangtum hi’n kigen hi.

Hmar Martyrs’ Trophy final                  

Lamka, May-15: Rengkai Ground ah Hmar Martyrs’ Trophy football kimawlna pailel May 16, 2012 sunnung dak 1:30 in final kimawlna leh closing ceremony kithuah om ding a, huai ah Chief Guest in Dr Chaltonlien Amo, MLA & Chairman/Hill Areas Committee( HAC) pang ding hi. Muolbem leh Langza HYA teamte football final kimawl ding uh hi’n kigen hi.

Go Chin Khup Veng in mawhpaih                

Lamka, May-15: Zomi Youth Association(ZYA), Go Chin Khup Veng unit in mawhpaihna thupuan a bawlna uah May 11, 2012 in a vengsung ua naupang kum 12 vela upa khat in Gangpimual ava phak lai-in papi sa khat in ana luppih(sodomised) a, huai tawh kisai inndongta vai a kilemna om kipahpihthou mahle uh hibang thil a tunnawn ding deihlouhna ziakin ZYA Go Chin Khup veng Unit in naupang khoihtu mawhpaihna sangpen puankhum uhi.

CDDU vaipaw ding tel uh

Lamka, May-15: CCpur District Disabled Union (CDDU) pawlin zan in vaipawthak ding tel uh a,President dingin T Sianmuanthang,Secretary dingin Nemboi Zou leh Fin Secretary-cum-Treasurer dingin N Kailianthang telching uhi. Hun lem masapen ah Executive Committee keklian ding uh a, by-law draft etkhawmna leng om ding hi’n gen uhi. CDDU nidang in CCpur District Tribal Disable Union (CDTDU) chih hi a, hun sawtpi function lou a om zanzek in puahthak uh hi’n gen uhi.

ZRA te’n ganja kg. 25 mukhia                               

Lamka, May-15: Zomi Revolutionary Army(ZRA) pawlin Guite road ah khamtheih-guihtheih doudalna pan lak uh sunzom zel uh a, Aizawl a puaklut ding lai ganja Kg 25 vel Songtal khua ah mankhia uh chihthu kiza hi. Ganja neitu Manzadim (39) d/o Khamkap, tulel a Aizawl a om hi a, aman ganja-te puankawm ah tun himahleh muhkhiak a om veve hi’n kigen hi. ZRA te’n kal 2 vel paisa apan khamtheih pua mi tuamtuam 3 mankhia uh hi’n thutut kingah hi.

Manipur ah electric hoihdeuhta- CM

Imphal, May-15: Chief Minister O. Ibobi Singh in a gendanin Manipur ah electric /power dinmun hoihdeuhta a, power department in naktaka pan alak ziakin office hour sungin dakkal 3 sung meivak hon behlapta uh chi hi. Chief Minister in media-te kianga a gendan in hun paisa ah zing leh nitak in dakkal 3 apan 4 kikal lel khawng electric vak chi hi. Power deptt a official te’n a gendan un office hour sung bek regular taka electric paisak tup hi a, tu in dakkal 3 sung behlap in om chi uhi.

     Chief Minister in zan in power tawh kisai in Chief Secretary, Principal Secy(Power), Chief Engineer leh Executive Engineer-te tawh meeting in genkhawm uhi. Official-ten Paona bazar leh Thangal bazar area ah pre-paid metre system pat hita a, khawpi sung mun tuamtuam ah sutzop tou zel hidin gen uhi. Pre-paid system pat ahih apan electric dinmun in hoihlam nawt a theih hi a, meivak gu leng kiam tuan mahmah chi uhi. Central govt in Tipaimukh Multi-purpose project paisuakpih sawm in panla a, tunung sawtlou in central govt official-te hong zin ding uh a, Tipaimukh dam etkhe ding uh hi’n leng gen uhi.

Lions Eye Hospital ah ki-etsak theih

Imphal, May-15: Lions Eye Hospital & Services Trust pawlin Sangaiprou a Lions Service Centre ah Eye Hospital a bawl uh Manipur Governor Gurbachan Jagat in May 4,2012 a a honkhiak nungin May 13, 2012 in ‘Free Eye Care camp’ om a, zan akipan in nitengin huai Eye Hospital kihong a, mit lam buaite leh mit natna tuamtuam neite adin vanaih theih ding hi’n kigen hi.

Bomb expert te’n IED 2 hihsia uh

Imphal, May-15: Zan nitak dak 6.45 velin 28-Assam Rifles team patrolling paite’n Wakha Baruni tang(hills) bul ah bomb(IED 2 kikam) mukha uh a, huai thu Police-te kintakin theisak uh a,Manipur Police a Bomb squad te’n huaimun va delhpah in lakhia uh a, mun tuam ah hihsia(defused) uh chihthu om hi. Thusuak in a gendan in huai IED bomb 2te khat lel leng kg. 4 vela gik hi’n kigen hi. Thudang kizadan in 22-Grenadier te’n zan in New Khumakok mun ah IED 1 mukha uh a, amun ah hihsia uh chihthu om hi. Huai IED bel inches 6 velin sau a, gram 250 vela gik hi’n kigen hi.

Minister-te boycott din theisak

Imphal, May-15: United Naga Council (UNC) in Manipur a Naga Minister-te hi in hikei le uleng Naga bial ah Minister leh ruling MLA kuamah lutsaklou ding leh public platform pelou dingin Naga mipite theisak uh chihthu om hi. Nagate’ ngaihtuahna lungsim leh policy/program tuamtuam omte kalhthei ding minister/MLA kuamah Naga khuate ah lutsaklou ding leh boycott chiat dingin UNC in theisak uh a, Manipur govt nuai ah Nagate om nawnlou in alternative administrative arrangement kidelh ahi chi uhi.

Dakkal 48 sung General Strike

Imphal, May-15: Scheduled Castes student te’n kum 2010-2011 sunga Post Matric Scholarship a ngah ding zah uh May 22, 2012 tana hawmkhiak ahih kei aleh May 24 & 25, 2012 in dakkal 48 sung Manipur pumpi ah General Strike puyan hiding chi’n Post Matric Scholarship Affected Guardians’ Committee pawlin govt ah thutawp pia uhi. Thusuak in a gendan in Post Matric Scholarship Affected Guardians’ Committee pawlin kum 2011-2012 ading Post Matric Scholarship hawmkhiak hun leng hihial mahleh tutan in kum 2010-2011 ading Post Matric Scholarship hawmkhiak ahih nailouh poisakthu puang uh a, May 22, 2012 tana hawmkhiak ahih kei aleh May 24, 2012 zingsang dak 6.00 akipan in May 25, 2012 nitaklam dak 5.00 tan dakkal 48 sung General Strike puan hiding chi’n thusuah bawl uhi.

BSEM ah particulars piaklut ngai

Imphal, May-15: Board of Secondary Education Manipur(BSEM) in Class X(HSLC) examination,2012 zan zeka result suak ah 1^st akipan 25^th position tana passed student te’n May 21, 2012 tan in BSEM office ah 1) parents’ income certificate, 2)communication address with contact No. leh 3)SC/ST/OBC (if any) pelut ding in theihsak hi uhi.

Nightingale Nurses Award sang

New Delhi, May-15: India President Pratibha Patil in May 12, 2012 in Rashtrapati Bhavan

ah International Nurses Day-2012 zatna kawmin Florence Nightingale Nurses Award hawmkhia a, huai ah AMRI hospital, Kolkata ah December 2011 a mei akat lai a damloute a hutkhiakna lam ua sih lawh nurse 2 -Vineetha PK leh Remya Rajappan leng Award pia hi. Nurse sisa pahtawina piak a om a khatveina hi’n kigen hi. India gamsung a nasem hoih Nurse 36 pahtawi a omte’ lakah S Hoikholhing leng telkha hi. National Florence Nightingale Awards 2012 sangte ahihleh- Naw Lachu Ahtee, Sunita R Dhonde, Harbans Batra, Agrawal Dinesh, Satish Kumar, Suresh Kumari, Rehana Akhter, Aruna Kumari Sinha, VG Padmini, Usha Dinkar Talele, S Hoikholhing, Udasi Sahu, Sheela, R Geetha, Petsy R Massey, Subrata Das, Bhawani Dev, Sujatha Surendran, Jayasri Maiti, Brig Tshering Khendo Bhutia leh Satwant Kaur hi uhi.

Mizoram ah August 2012 apan Helicopter service ding

Aizawl, May-15: Mizoram in hun sawtpi apan Helicopter service om theihna dia a buaipih uh Centre in phalna a piak ziakin August 2012 sungin kipan thei ding hi’n kigen a, huai hun ah lenna thukna ding(Helipad) om thei ding hi’n leng kigen hi. Mizoram in Helicopter service thei ding firm tuamtuante lak ah Tender call uh a, huai adia lunglut te’n June 11, 2012 tan dawnna pethei ding uh chihthu om hi. Chief Minister Lal Thanhawla makaihin zan in Cabinet Meeting ah Helicopter service ding tawh kisai genkhawm uh a, Centre in lemsakpihna a piak leng Mizoram govt in zan a mupan uh hi’n thusuak in gen hi. Centre in phalna a piak zekai ziakin Helicopter service tungtang leng fel pah theilou in sawtpi kidiah hi’n kigen hi.

       Mizoram state sung mun tuamuam ah July leh August khasung in helipad thak 10 bawlkhiak hiding chih hi a, tulel a helipad kizangthei hunkhop omte leng puahthak hidingin Chief Minister makaihna a Cabinet Meeting ah genkhawm uhi. Union Finance Ministry in tukum bul apan Helicopter service theiding chi’n thupuan bawl a, Union Home ministry in leng Helicopter service tawh kisai clearance peta hi’n kigen hi.

     Tulel in North-east India( malsuahbial) state-te lakah a state sung ua kikawmtuahna dinga Helicopter service nei state-te Arunachal Pradesh, Meghalaya, Nagaland, Sikkim leh Tripura hi a, tu in Mizoram leng hita ding hi. State sung mun kigamla taktak a khua om ahihziakin damlouhna tawh kisai leh emergency case tuamtuam a dingin helicopter service kizen mahmah hi’n kigen a, leilam (by road) a dakkal tam taktak Gari a paina munte leng helicopter zat ahih hun ah minute tamlou sungin tung hi’n kigen hi.

     Mizoram govt nuai a Officer-on-Special Duty(OSD) for civil aviation wing Lalzawma,    

Wing Commander (retired) in a gendan in Mizoram state sung ah vuahzuk hun chiangin menchim nasathei mahmah a, kikawmtuahna hihbuai zel chi hi. Singtanglam a omte’ adingin Helicopter service phatuam mahmah ding a, adiakin damlou-hitan tuahni ading mahmah in phatuam ding chi hi. Chief Minister makaiha Cabinet Meeting ah Minister te’ banah Chief Secretary Van Hela Pachuau, GAD Secretary Renu Sharma, Principal Consultant (GAD Civil Aviation Wing), Wing Comdr. (retd) Lalzawma leh mi poimawh hunkhop chialtuam hi uhi.

Naga Reconciliation Meet ah NSCN(IM) tellou ding

Kohima, May-15: National Socialist Council of Nagalim (NSCN-IM) thusuakin a gendanin May 21, 2012 chiangin Thailand khawpi Chiangmai ah Naga helpawl tuamtuam te’n reconciliation meeting neinawn ding chih hi a, himahleh NSCN-IM in tuma a GPRN/NSCN (Khole-Kitovi) faction leh Union Home Ministry in thukimna(thukhun) khenkhat a bawl uh deihlouhna ziak leh GPRN/NSCN (Khole-Kitovi) faction in thil omdan mipi theihding a a taklat ding deihna ziakin huai meeting ah tellou ding uh hi’n puang uhi.

      NSCN(IM) a ‘Chief Principal Secretary’ Samson Jajo in tuni’n a gendanin zan in Dimapur kianga Camp Hebron ah Steering Committee te leh ‘Council of Kilonsers’(ministers) te’n joint meeting poimawhtak nei in huai thu genkhawm ahihnungin Reconciliation Meet ah NSCN(IM) in tellou dingin thupukna bawl chi hi. Khole-Kitovi group te’n Union Ministry of Home Affairs (MHA) a Joint Secretary(North East) Shambhu Singh tungtawnin Union Government ah lehkha khat pelut uh a, huai ah Nagaland state sung mah apan a thilnget uh lawhching thei ahihdan zasak uh a, huai tawh kisai in thukhun banghiam kiselgu om chi’n Jajo in gen hi.

     Kum 14 val bang haksatna tuamtuam kal ah Indo-Naga peace talks neih touhtouh ahihlai a GPRN/NSCN (Khole-Kitovi) faction te’n thu mumalloupi thusun abawl uh pomtheih vual ding hilou chi’n NSCN(IM) thusuak in gen hi. Indo-Naga peace talks tawh kisai in NSCN (IM) hi’n govt lam hitaleh top level talks a omlai a, Naga inhabited areas genlou a, Nagaland sung mahmah ah a thilnget uh om ahihdan a gen un Naga mipi thangpaisak chi uhi. Reconciliation process in atup Naga mipite gam khat a gawmkhawm ding chih hi a, himahleh GPRN/NSCN (Khole-Kitovi) faction te’n Nagaland state sung lel a et ziakun huai in reconciliation process sukha mahmah chi uhi.

Army officer in Chungrothanga kiangah ngaihdam ngen

Aizawl, May 15: Kum 12 paisa a Mizoram apan pasal naupang kum 11 a upa pikhetu army officer Lt Col Kulwan Singh in palai sawlin kiginni paisa in naupang
 pianna pa kiang ah ngaihdam ngen dingin lutsak hi. Naupang’ pa Chungrothanga in agendanin, Lt Col Kulwan Singh in palai hon sawl in ngaihdam hon ngen a, tua banah atung a case kibaang omte leng zukkiksak dingin hon ngen chi hi. Ken leng hiai thu tawh kisai court case om ahihman in court in hon sai dandan himai ding ahi chi’n ka na genkhum chi’n leng gen hi.

Chungrothang in agenbehna ah, Kulwan Singh in hihkhial ahihdan leh mawhmah ahihdan a palaite tungtawnin hon pulak a, ka tapa kum 12 paisa a a pikhiak Shillongthanga tungthu a case omte leng zukkik sakdingin hon ngen chi hi. Shillongthanga ahihleh kum 11 lel a upa ahih hunin huai hun lai a Vairengte a Counter Insurgency and Jungle Welfare School (CIJWS) a Administrative officer Lt Col Kulwan Singh in a nulepa phalna la in a ompih (domestic helper) dingin ngen a, Singh in leng a upat deuh chiangin army ah ka khum ding chi’n chiam hi. Himahleh, hun bangtanhiam nungin a tapa uh thuzak thei nawnlou uh chi uhi. Shillongthanga ahihleh a hin leh dam kitheikei mah leh si khin hidingin kuapeuhin gingta ta uh chih ahi.

Chungrothanga in ahihleh human rights activist te tawh pangkhawm in Gauhati High Court, CBI, state chief minister leh home minister te’ kiang tanpha ah a thu tunsek ua, 2007 kum in CBI in la pan hidanin kigen hi. Gauhati HC order dungzui in Shillongthanga sikhin ahih leh dan dungzui a exgratia kilawm huntawk piak ding chih ahi. May 30, 2012 chiangin hiai thu court ah genkhop hinawn ding hi. Army officer in ngaihdam ngetna bawl mah leh sum le pai bangzaha zangnadopna bawl ding hiam chih bangmah genlou hi’n kigen hi. Chungrothanga in a tapa case a sualna in a inn le lou tanpha zuakkhia in inn gam phialin om lel chih ahi.