Railway Board a member dingin Editor,Manipur Express telkha

Ministry of Railways, Govt of India in April 13,2012 in Northeast Frontier(NF) Railway a Zonal Railway Users’ Consultative Committee (ZRUCC) member dingin North-eastern state tuamtuam apan mi 37 guang uh a, huai ah Manipur akipan in L. Chinkhanlian, Editor, Manipur Express tel hi. Amah Sept 16,2009-Sept 2011 sung leng ZRUCC member in pang a, Ministry of Railway in a guan thaknawn ziakin Dec 1,2011 akipan in Nov 30, 2013 sung ZRUCC member hinawn lai ding hi. NF Railway a ZRUCC pawl avangkim in Guwahatri(Maligaon a NF Railway HQ office) ah meeting om sek a, kuanlam leh kiklam paiman NF Railways in piaksak sek hi.

EVM ziakin Regional party-te vuallel ahi - Zoramthanga

Guwahati, May-18: Mizo National Front (MNF) President banah Mizoram Chief Minister- lui Zoramthanga in a gendan in India gamsung adiakin malsuahbial (northeastern ) state-te ah Electronic Voting Machines (EVMs) a kizat ziakin MNF kia hilou in Asom Gana Parishad (AGP) leh regional party tuamtuamte vuallel ahi chi a, Congress party in EVM naktak a soisa uh ahihdan chiang mahmah chi hi.Zoramthanga in EVM zat ahi leleng paper print-outs a om theihna dingin Election Commission ah i nawhkhawm ding uh ahi chi’n regional party tuamtuamte kiangah ngetna nei hi. Zan in Guwahati ah AGP te’n 9th triennial conference nei uh a, huai ah Zoramthanga khuallian in pang hi. Aman Centre a vaihawm Congress party mawhsakthu gen a, Congress te’n EVM naktakin a soisa uh a, adiakin India malsuahbial ah a hahbawl mahmah uh chi’n gen hi.

           Zoramthanga in a genzelna ah Mizoram ah kum 2008 in Congress te’n MNF a khetkhiakna ziak uh banah kum 2011 in Assam ah Congress naktaka a vualzawh uh EVM ziak ngen ahi chi hi. EVM a khoih thei uh chih a chianna mahmah ahihleh Mizoram Assembly election nanungpen ah Congress te’n seat 40 omna lakah seat 32 a ching ding uh hi a a gen uh dik taktak a, tualou in Assam ah leng hibang ‘trick’ zang uh ahi chi’n Zoramthanga in gen hi. MNF Chief in a genbehna ah, kum 21 sung a constituency ah ching zarzar a, a chinnate atangpi in vote 500 sanga tamzaw ngeilou hi’n gen hi. Kum 2008 Assembly election ah Chief Minister lenlai himahleh a langpa’n vote 1,000 valin zou a, huai gintak haksa mahmah hi’n gen hi.

       MNF in Election Commission of India ah EVM a kizat laiding leleng Paper print-out tawh kithuah zat hi ding a ngen ahihdan Zoramthang in gen a, AGP in leng tuabang a ngetna pe dinga ngen kawmin North-east a regional party te’n huchibang a ngetna bawlchiat ding in deihthu gen hi. EVM ah mahni deihpen vote dinga meek zawh in paper print-out om hilebel Congress te’n ut dandan in EVM soisa thei nawnlou ding uh chi hi. National party-te khetkhiak theihna dingin regional party te’n kipumkhatna tawh kalsuan poimawh chi’n leng Zoramthanga in gen hi. Delhi-te’ naubawm apan piangkhia hilou in mahni leitang sung mah a piang hihna ziakin regional party-te mah hatsak poimawh chi hi. Mizoram ah MNF in hatlam nawt mahmah a, election om nawn hunhun ah vaihawmna lata ding a, tuamah bangin Assam ah leng election hun ding ngaklah mahmah ahihdan Zoramthanga in gen hi.

Minister, Chairman/HAC leh MLA 2 ‘joint tour’ in zinkhawm ding

Lamka, May-18: Phungzathang Tonsing, Minister (Health & FW, GAD, CADA) makaih in Dr Chaltonlien Amo,MLA & Chairman,Hill Areas Committee( HAC), Vungzagin Valte, MLA(Thanlon A/C ) leh Ginsuanhau, MLA (Singngat A/C ) in Singngat, Thanlon leh Tipaimukh A/C a mun tuamtuam pha dingin May 22-26, 2012 sung Joint Tour in zinkhawm ding uh a, amau zin tawh kiton in khaw tuamtuam 7 ah Free Medical Camp leng om ding hi.

Free Medical Camp ah Dr O Ibomcha Singh, i/c Addl Director (MC) Medical Directorate makaihna in Dist Hospital/CCpur apan Dr Seikholet Kuki, ENT; Dr L.Arke Singh, Medicine; Dr L.Kimboi Tonsing, Gyanea; Dr Th Robi Singh, Eye leh Dr T.Thanglenlal Haokip, Dental Surgeon te’n damloute en ding uh a, Dr.HL Liensang, CMO/CCpur leh Dr Ginthianmung in Minister teamte zui in akul leh poimawh bangbang in gamtang ding uh hi’n kigen hi.

     Minister makaihna a zinkhe dingte May 22, 2012 zingsang in Thanlon zuan in kipankhe ding uh a, huaini mahin Thanlon ah Free medical camp om ding hi. Nitak dak 6.00 in Thanlon khua ah public meeting om ding hi.Azing May 23, 2012 in Thanlon apan Parbung zuan ding uh a,Bukpi khua tawn in huai ah Free Medical Camp om ding hi.May 23 ni mahin Parbung tungsuak ding uh a, huai ah Free Medical Camp a om banah nitaklam dak 6.00 in public meeting om ding hi.May 24,2012 in Parbung apan Songtal zuan ding uh a, Sinzawl khua ah Free Medical Camp om ding hi.Huchi’n huaini mah in Songtal tungsuak ding uh a, huai ah Free Medical camp a om banah nitaklam dak 6.00 in public meeting in zui ding hi.

     Minister leh a teamte’n May 25,2012 zingsang in Songtal apan Singngat zuan ding uh a, Mualnuam khua a tun hun uah Free Medical camp om ding hi.Huai zawh in paisuak ding uh a, Singngat tungsuak ding uhi. May 26, 2012 zingsang in Singngat akipan Behiang khua pha ding uh a,huai apan Singngat a tunkik hun uah Free Medical camp om ding a, Minister in Singngat Primary Health Centre(PHC) building thak hong ding hi. Huaizawh in Minister, HAC Chairman leh MLA 2 te’n Singngat apan Lamka tawn in Imphal zuan ding uh chihthu om hi.

ZEPADA in kipahthu puang

Lamka, May-18: ZEPADA in Tualnuam gam ah 2500 MT tan koihtheihna ding FCI Godown bawlna dinga nasep kipan ziakin kipahthu puang uh a, govt in ‘food security’ tawh kisai a pan alakna phattham ching mahmah chih taklang kawmin huai dinga panla Chief Minister O.Ibobi , Minister-te, MLA-te leh MDC te’ banah District Administration; FCI official-te, Civil Societies leh Media community te’ tungah kipahthu puang uhi.

Kuapeuh kithutuak taka pankhopna ziaka hibang lawhchinna leh khantouhna om ahihman in mipite’ tungah leng ZEPADA kipak mahmah uh a, in state govt in Godown capacity 2500 MT apan 5000 MT ah dopsang(upgrade) sawmlai uh hi’n leng ZEPADA thusuak in taklang hi.

Godown nasepna a implementing agency (Manipur Dev society) leh local Agency-te’ kiangah building bawlna ahi ding bangtak a semkhe ding in ngen uh a, hunchiam sung a zouding in leng ngen uhi. District mipite’ kiphatmawhpen godown hi a, huaiziakin India gama godown hoihpen a suahtheihna ding a “Model Godown” bawl khe ding in ZEPADA in a kisaipihte ngen uh a, mipite’ adia lungtunhuaipen dinga semkhe din leng zasak uhi. Mipite’n leng FCI godown kipahhuai taka a zar zouthei ding in official, leader tuamtuam leh mipi kuapeuhin hihbuailou a kithuahpihzaw dingin ngen uhi.

Kipahpihna leh Video Album honna

Imphal, May-18:T. Chhungi Prayer Hall(opposite Lee Faith School), Paite Veng ah March 19, 2012 in Lee Faith School apan BSEM saina a Class X passed-te leh COHSEM saina a Class XII passed-te kipahpihna leh thilpiakna banah Lee Faith Home a om naupangte’n a pi uh (late) T. Chhungi itna la leh Pathian phatna la a sak uh ‘Hon taisan ken’ kichi Video Album thak honna om ding hi.

     Hun masa ah T. Phungzathang,Minister(Health & FW, GAD & CADA) leh Chairman, Lee Faith School & Faith Home in thugenna leh Class X & XII passed student-te pahtakna thilpiak pe ding a, huaizawh in Pastor T. Tunthianmang in lawhchinna ngah student-te adingin thumsak ding hi.Hun 2na ah T. Phungzathang,Minister & Chairman, Lee Faith School & Faith Home in ‘Hon taisan ken’ chih Video Album thak hong ding a,Rev M. Zalian Guite, Divn Supdt/EBC Imphal in thumna in lan(dedicate) ding hi.

Chairman, ADC makaih in IWMP meeting

Lamka,May-18: Langkhanpau Guite, Chairman ADC/CCpur office chamber ah tuni in IWMP tawh kisai Dist. Watershed Development Committee meeting om hi. Huai ah IWMP 2010-2011 project nasepna leh IWMP 2011-2012 project sepkhiakdan ding genkhawm uhi. Meeting ah IWMP 2010-11 sunga project 4 a nasepna pailel a hoihthei bangpen sepkhiak ahih theihna din a kisaipih BDO ten pan alak ding, IWMP 2011-12 ading a SLNA in approved a bawl project 7te tulela project nasepte sanga hoihzaw dinga panlakdan ding leng genkhawm uhi. Project hongpaite hoihtaka sep ahih kei aleh maban ah IWMP scheme hongpai louthei hi’n kigen hi. Huaiziakin IWMP scheme tawh kisai block level ah leng training programme neih hidin kigen hi.

Lawhchingte kipahpihna neiding

Lamka, May-18: Tutunga Class X leh Class XII result suak ah Thanlon A/C sunga lawhchinna ngahteng bialtu MLA Vungzagin Valte in May 20, 2012 (Pathianni) sunnung dak 1:30 in a New Lamka a a tenna inn ‘Niangzen Khualbuk’ ah kipahpihna program zatpih sawm hi. Huai ah lawhchinna ngah candidate teng kimtaka telchiat dingin leng chial hi.

Maruti Van 2 kiphutuah: mi 3 liam

Lamka, May-18: Tuni zingsang dak 7.00 velin Chullouphai khawsung ah Imphal manawh Maruti Van(No. No. MN-1K/1874) leh Lamka manawh Maruti Van khat kipelbuai in kiphutuah kha uh a, Imphal manawh a Van atuang mi 2te liam uh a, Lamka manawhte lakah mi 1 liam zek hi. Imphal manawh Van sunga tuang a liam 2-M. Richard Haokip(50) h/o Nenei of Laizon veng, Tuibuong leh Molun(53) etkol dingin dist. hospital puaktung nung in Imphal a etkol dinga puak in om uhi. Lamka manawh a taite laka liam Romesh(35) h/o Biaki of Kangvai bel dist. hospital tut nungin aliam nasatlouh ziakin paisak a om hi’n kigen hi. Maruti Van 2tel a malam glass tuak kisia a, Imphal manawh pen a body leng kisezek hi.

IG Zone-II in Lamka hongpha

Lamka, May-18: T.Pachuau, IPS, Inspector General Police, Zone-II in tuni zinglam in Lamka hongpha a, SP office ah SP leh Police officer teng tawh dist a law & order tungtang, numei leh naupang tunga tatsiatna tawh kisai panlak dingdan tel in thu tuamtuam genkhawm uh a, nitaklam in Imphal ah kiknawn hi.

ED/DRDA makaih in meeting

Lamka, May-18: C.Hangshing, ED/DRDA makaihna in tuni sunnung in DC office a BRGF Resource centre ah MGNREGS tawh kisai meeting om a, huai ah BDO teng, Programme officer, SO leh akisaipih official-te tel uhi. Huai ah MGNREGS scheme a nasepte a hoihthei pena etkai ding leh sepkhiak ding dan genkhawm uh hi’n kigen hi.

ZYA GHQ makai te’n joint meeting nei

Lamka, May-18: ZYA, Gen HQ a Central Cabinet Committee te’n tuni’n Nehru Marg a Zomi Council Administrative office ah joint meeting nei uh a, May 19, 2012 in Lungthul area a khua 10 ah ZYA Unit honkhiat ding thu genkhawm uhi.

     Huailou in May 23, 2012 zingsang in Joutung khua ah ZYA Bukpi block nuai a Unit 6 te lopna program om ding a, Phungzathang Tonsing, Minister in khuallian hihna tawh uap ding hi. Huai ah Functional President in Ginsuanhau, MLA; Chief Host in Vungzagin Valte, MLA; Guest of Honour in Dr Chaltonlien Amo, Chairman HAC hiding a, Special Invitees in MDC-te pang ding uhi.

District Topper Award peding

Lamka, May-18: CCpur District Students’ Union(CDSU) makaite’n kum paisa a ahih bangun tukum in leng ‘District Topper Award,2012’ piaksawm uh a, huai dingin CCpur district sunga School a Headmaster-te leh College a Principal te’n amau institution a mark mutampente’ particulars chiat May 21, 2012 tan in CDSU Administrative building hiam Songbul News Agency a submit ding in theisak uhi. Huaiah self-attested copies -marksheet, domicile certificate, institution head in a recommend-na, passport lemlak 2 leh personal details(curriculum vitae) atel ngai ding chih hi.

Village Level Awareness programme

Lamka, May-18: NYK/CCpur saina in tuni zinglam in Kholmun khua ah ‘Awareness and education for Prevention of Drugs Abuse and Alcoholism’ kichi Village Level Awareness kipan a, October 2012 tan in khua 150 vel ah village level awareness programme neih hiding in kigen hi. NYK/CCpur te’n awareness programme tawh kisai Dist Level, block level neikhin uh hi’n kigen hi.

     Nehru Yuva Kendra Sangathan (NYKS),Gen HQ, Delhi-te’saina in Ministry of Social Justice and Empowerment tungtawn a ‘Awareness and Education for Prevention of Drugs,Abuse &Alcoholism ‘Save Youth-Save Nation- Say No to Drugs &Alcoholism’ kichi project thak Ajay Maken,Union Minister of State(YAS) in B.Vengnom Community Hall ah    

April 5, 2011 in CCpur Project hongkhia hi.

Numei pawl tumkhawmna

Lamka, May-18: CCpur Christian Women Fellowship leh Ladies Prayer Fellowship vaisaina in May 19,2012(Kiginni) zingsang dak 7.00 akipan sunnung dak 2.30 tan Lailam Veng a Chhim Presbyterian biakinn ah Lamka khawpi sung Christian pawl tuamtuam apan numei pawlin thumkhawmna(mass prayer) hun zang ding uhi. Huai ah Mrs Chingngaihlun, CBA/New Lamka; Pastor(retd) Genlal,EOC/Lingsiphai leh Upa L. Thualthang,Adviser, Priscilla Home abanban a kikhel in thumna hun ah pitu in pang ding uhi.

‘2- days State level seminar’ kipan

Lamka, May-18: All colleges Tribal Students’ Orgn, Manipur (ACTSOM) saina in tuni zinglam in Zogal Hall Memorial Complex ah ‘2-days state level seminar on the Present Scenerio of Education Policies and its Impact in the Hill District of Manipur’ kichi thupi zangin kipan a, Pastor Thangliankham in Seminar thumna in hong hi. Huai ah Chief Guest in Jacintha Lazarus, IAS, DC/CCpur pang a, Guest of Honour in Thathang Vaiphei, Asst. Professor, Manipur University leh Functional President in L. Pangamte, Vice Principal, Ccpur Govt. College pang hi.

CWC meeting leh MLA-te kipahpihna

Lamka, May-18: Paite Tribe Council(PTC) Gen HQ pawlin May 21, 2012 zinglam in Central Working Committee(CWC) meeting nei ding uh a,session masa ah (late) V. Hausawm, President, PTC Tuitha Block & CWC member suunna nei ding uh a,huaizawh in agenda tuamtuam genkhawm ding uhi. Session 2na sunnung dak 1.00 in kipan ding a, huai ah Paite community apan Phungzathang Tonsing leh Vungzagin Valte tuma a Assembly election ah MLA a chin ziakun Pathian kianga kipahthu genna hunzang ding uhi. Programme zawh in kipahpihna ankuang umkhawm ding uhi.

PM’ Adviser in Moreh khua pha

Imphal, May-18: Adviser to Prime Minister TKA Nair in tuni’n ni 2 sung om ding in Manipur hongpha a, Imphal hongtun nung sawtlou in Helicopter zang in Moreh pha hi. PM’ Adviuser in Moreh a Indo-Myanmar Trade Centre enkhia a, huai Trade Centre a vanzat(infrastrutures) tuamtuam omdan tangpi leng enkhia hi. PM Adviser ib Moreh a phakna ah Dr. Anup K. Ujja Rai, Director General of Foreign Trade; Lieutenant General S. Ravi Shankhar, Director General BRO leh Prime Minister Office a Director Shamjai Nohya in zui uhi. Amau tuni nitaklam in Moreh apan Imphal tungkik uh a, tuzan Imphal ah giak uhi. Prime Minister Dr Manmohan Singh in May, 2012 khatawp kuan in Moreh a Trade Centre enkhe kawm dingin Manipur hongpha ding chihthu om ziakin Adviser to Prime Minister in tuni’n Moreh vapha hi’n kigen hi.

Annual Plan tungtang meeting om ding

Imphal, May-18 : Manipur Annual Plan 2012-13 tawh kisai in New Delhi ah May 21-22 sung meeting om ding hi’n kigen hi. Annual Plan tawh kisai meeting a tel dingte Manipur Chief Secretary DS Poonia,IAS in May 16, 2012 in preparatory meeting neihpih khin a, department tuamtuam apan a tel dingte May 20, 2012 in Delhi a tunkim vek uh ngai ding hidan inleng thusuak in taklang hi. Amau Delhi a tun nung uh May 21 in Manipur Bhavan ah Chief Secretary in briefing mmeting makaih ding a, May 22, 2012 in Planning Commission a official-te tawh kimu ding uhi.

Imphal-Mao kikal lamlian

Imphal, May-18: Works Minister Dr Kh. Ratan Kumar in Imphal-Dimapur lamlian(National Highway No. 37) a Imphal leh Mao kikal lamlian dinmun nasataka sia tukum tuktui luan hunma(rainy season) ma a bawlhouh man hiding chi’n gen hi.Works Minister in May 7, 2012 in leng Imphal-Jiribam lamlian dinmun va enkhia a, huaia nasem BRO-te nasepdan lungkim huailou a sakthu gen a, adiakin Awangkhul leh Barak kikal lamlian se mahmah hi’n leng gen hi.

Assam Rifles te’n school panpihna pia

Imphal, May-18:Red Shield Division nuai a om 27-Sector Assam Rifles te’n tuni’n CCpur distict sunga Tollen khua a om JM English School ah vapha in student-te laka thugenna banah huhna thilpiak leng pia uh chi’n PIB(Defence Wing) thusuak in gen hi. Students te’n cultural event tuamtuam lahna nei uh a, Commander, 27-Sector, Assam Rifles in a thugenna ah student-te’n a tup uh tangtun theihna ding in kuhkal taka pang ding in hasuan a, student-te society kingakna leh tunung a gam nu-leh-pate hiding ahihna uah mi hoih hihchiat sawm ding in hasotna thu gen hi. Huai School a Principal Mrs Khoneng Khongsai in Assam Rifles-te nasep hoih ziakin kipahthu gen hi’n thusuak in taklang hi.

Protection of Child’s Rights makaite hongzin

Imphal, May-18: National Commission for Protection of Child’s Rights a Chairperson makaihna in Commission a team khat in Manipur hongpha uhi. Amau May 19, 2012 in SP/Imphal West kimuhpih ding uh a, tuazawh in Home Secretary, DGP, Chief Secretary, Home Minister leh Chief Minister abanban in muding uhi. Tuni a Chairperson hongzinte D. M. Mishra, Special Adviser; Dr. Kathikeyan, former Director CBI; Ajay Kumar, Project Director leh S. Tiwari, Deputy Director in te hi uhi.

Siluang a innkuante’n ladin theisak

Imphal, May-18:Imphal West district sunga Ghari Makha Leikai Maning Loukon a nga khoina(fish farm) ah zana pasal siluang kimukhia zan mah in RIMS morgue tut himahleh tuni tan in leng a innkuante leh tanaute theihkhiak hilou a, Lamphel Police thusuak in a gendan in May 19, 2012 sun dak 12.00 tan in misi innkuante leh a tanaute a kilang a om tuan kei aleh dan dungzui in misi koihkhiak(disposed) hiding chi’n thupuan bawl uhi.

.