Centre in Manipur telin North-east a state 3 ah High Court piching khat chiat dinkhiak sawm
Imphal, May-7: Union Home Minister P. Chidambaram in North-east biala state tuamtuam 3 ah High Court 1 chiat dinkhiak ahih theihn ding in Lok Sabha ah ‘North-eastern Areas(Re-organisation) and Other Related Laws(Amendment) Bill,2012’ luikhia a, huai dungzui in Manipur, Meghalaya leh Tripura a Gauhati High Court bench 1 chiat omte High Court piching a koih ding tungtang pichin ahih theihna ding hi’n kigen hi. Prime Minister Dr Manmohan Singh makaihna in December, 2011 a Union Cabinet meeting ah Manipur, Meghalaya leh Tripura ah High Court piching khat chiat dinkhiak theihna ding in ‘North-eastern Areas(Re-organisation) Act, 1971’ baw lemthak(amend) dingin thpukna bawl uh chihthu om hi.
Home Minister P. Chidambaram in Manipur, Meghalaya leh Tripura ah High Court tuam 1 chiat dinkhiak theihna ding in April 26, 2012 in Lok Sabha ah ‘North-eastern Areas(Re-organisation) and Other Related Laws(Amendment) Bill,2012’ pawlut a, huai Bill a Clause 4na dungzui in a ‘North-eastern Areas(Re-organisation) Act, 1971’ a section 28na amendment bawl ding chih hi’n taklang hi. Home Minister in a gendan in state 3te ah High Court piching khat chiat dinkhiak hileh mipi te’n dan(law) tawh kisai akul leh poimawh bangin hamphatpih thei ding uh a,thubuai labuai thilah leng case omte kintaka hihveng theih hiding in gen hi.
Thutut kingah dungzui in Manipur, Meghalaya leh Tripura akipan kum tamkuamtak paisa akipan in High Court piching koih dingin Centre ah ngetna om a,Tripura state in apaisa kum 1987 akipan High Court tuam koih dingin ngen uh chihthu om hi.Tuni tanpha in North-east biala state 7 te Gauhati High Court jurisdiction nuai ah om uh a, state 7 s khawpite ah
Gauhati High Court bench 1 chiat om hi. Gauhati High Court leh huai High Court apan mun gamla deuh a om bench tuamtuam ah tulel in case 53,000 vel pending in om hi’n kigen hi.
HT Sangliana,IPS(retd) in tuni’n Khuga Dam enkhia
Lamka, May-7: HT Sangliana, IPS(retd),Vice Chairman,National Commission for Minorities in tuni zinglam dak 9:00 in Khuga Dam leh Khuga Dam apan Lamka khawpi tuinek piakna ding Water supply Zone –III mun enkhia hi. Huai hun ah IFCD official te, SDO/CCpur, PHED official te ban ah DC office staff hunkhop in zui uhi. HT Sangliana in Khuga Dam a IB ah hun sawtlou tawldam a, huai apan Lamka lam a kiknawn in Thingkangphai khua ah MSDP 2008-2009 fund zang a JB School kibawl leng enkhia hi.
HT Sanglian in tuni nitaklam in Raj Bhavan leh Manipur Secretariat ah officer-te tawh review meeting nei a, Manipur DGP tawh leng atuam in meeting uhi.Aman May 8,2012 zinglam dak 10:00 in Hotel Imphal ah State Minorities Commission makaite meeting pih ding a,sunnung dak 2:00 in CM tawh meeting ding uhi.Nitaklam dak 4:00 in Manipur Governor tawh meeting ding uh a, May 9,2012 in Delhi zuan in kiknawn ding chihthu om hi.
People’s Chicken Centre hon in om
Lamka, May-7: Hmar Veng ah zan nitaklam dak 3.00 in aksa(chicken) siangthou leh kan minsa(fried chicken) lei theihna ding ‘People’s Chicken Centre’ kichi L. Chinkhanlian, Editor:Manipur Express in hongkhia a, Rev Lalrosiem Songate in Pathian kiangah thumna in lan(dedicate) hi. Huai Chicken Centre neitu Jangkholet Haokip in a gendan in tagah kepna (orphanage home) ah aksa zuakna apan sum pung kimu laka 20% piak hiding chi’n gen a, kg. 20 apan a tunglam deihte inn-mun a piaktheih ding hi’n leng gen hi. Huai Chicken Centre ah tuni’n aksa zuak kipan a, tuni kia in leng deihsaktu mi tuamtuam in kg. 60 sanga tamzaw leikhia uh chihthu kiza hi.
Tukum adia lei leh kha kinaihpen ni
Lamka, May-7: Zan nitak dak 9.05 ahih laitak tukum 2012 sung adia lei(earth) leh kha(moon) akinaihpen hun laitak hi a, khalik ni(full moon day) ahih zawkmah ziakin nitak tunga kha a vak in leng nidang sangin lianzaw leh chiangzaw in kilang hi.
MLA chin lopna leh CD honna
Lamka, May-7: Bungpilawn khawsuakte’ kipawlkhawmna Chilawkget Welfare Society te’ saina in zan sunnung in Royal Academy campus MLA a chin lopnq leh ‘the Ist Chilawkget khawmpi-2011’ laia recording kibawl CD honna kithuah om hi. Huai ah Chief Guest in Phungzathang Tonsing, Minister (Health & FW, GAD &CADA) pang a,aman CD a hon banah kithuahpihna in CD khat Rs 10,000/- in lei hi. Functional President in Vungzagin Valte, MLA(Thanlon A/C) pang hi.
Minister in a genna ah Thanlon A/C a MLA ahih nawnlouh nungin kum 15 paita hi’n gen a, tutan in leng Bungpilon khua ah gari lutna ding lamlian kibawl nailou hi a gen in bialtu MLA tawh pangkhawm in kum 5 sungin Bungpilon khua ah gari lutna ding lampi bawl hiding chi’n hi. Aman a genzelna ah district a MLA/ MDC teng tawh pangkhawm a nasep hiding in gen a,maute tawh tunung sawtlou in singtanglam ah joint tour pai ding uh a,huai hun ah Thanlon, Singngat, Henglep leh Tipaimukh area ah medical camp tamtheipen neih hiding in gen hi.
Tuni in Missionary Day kizang
Lamka, May-7: Manipur simlam bial CCpur district ah Pathian thu honglut ni May 7, 1910 theihgigena kawm in tuni’n Missionary Day kizang a, Lamka khawpi leh CCpur district sunga biakinn tamzawte ah Missionary Day zatna kawmin Gospel hong pawlutte’ ziakin Pathian kianga kipahthu genna hun in kizang hi.
Chairman leh Vice Chairman in vamu
Lamka, May-7: Langkhanpau Guite, Chairman ADC/CCpur leh Demmang Haokip, Vice Chairman, ADC/CCpur in zan nitaklam in Hmuia Veng ah HT Sangliana,IPS(retd),Vice Chairman , National Commission for Minorities kimuhpih uh a, Chairman leh Vice Chairman in puandum 1 tuak pia uhi. Amau National Commission for Minorities Vice Chairman tawh
singtangmite dinmun tawh kisai thu tuamtuam houlimkhawm uh hi’n kigen hi.
DC in Traffic awareness prog. hong
Lamka, May-7: ZSF Gen Hqtrs saina in zan sunnung in Synod Hall ah Diesel Auto driver-te ading in ‘One day Traffic Awareness Programme’ om a, Ms Jacintha Lazarus, IAS, DC/CCpur khuallian a pang in hong hi. DC in Lamka khua ah Diesel Auto tampi om ahihdan tuni’n theichian pan ahihdan genkawm in Auto driver-te’ tung ah passenger-te’ hinna kinga ahihman in business kia hilou in mipite panpihtu hidin hasuan hi. DC in a genzelna ah driver te’n zukham kawm a auto heklou ding leh pilvang din thuhilh a, student-te’n traffic rules theilou uh ahihman in amaute puak hun ah pilvang semding in hasuan hi. Chiklai peuhin traffic rules & regulation zuichiat din leng DC in auto driver-te thuhilh hi. Awareness hun ah Kamzathang, OC/Traffice Police in Traffic Rules & Regulation sinsak a, Siamzading Valte,Advocate in Rules of the Road chih thupi zangin sinsak ding himahleh damlouhna ziak in tel theilou hi. Tuni a programme zatna hun ah khawpi sunga diesel auto driver 400 vel om lakah 364 tel uhi.
Tuibuong Post office a Cyber sia
Lamka, May-7: Tuibuong a Post Office a Cyber tuni sunnung in kisia a, huai bawlhoih nawn ahih masiah Computer zanga nasepna teng khawlvek phot ding chi’n Post Master apan thutut kingah hi.
Bankers meeting om ding
Lamka, May-7: DC/CCpur makaihna in May 10, 2012 zinglam dak 11:00 akipan in DC office a BRGF Resource Centre ah DCC (Bankers) meeting om ding a, huai ah Bank tuamtuam apan Manager-te banah akisaipih official tamtak telding uhi.
Missionary Day-cum-Revival
Lamka, May-7: Leijangkhopi a om HM English H/S ah tuni’n Missionary Day-cum-Spiritual Revival zang uh a, huai ah Rev Jangkholam Haokip, Executive Director, ECA in Danial hinkhua zangin naupangte thuhilhna nei hi.Aman a genzelna ah Misionary kichi holiday dan lela zanglou in Pathian biakna hun a zat kichi manpha ahihdan leng gen hi.Tuni a rogramme zatna ah HM English H/S Principal in teaching staff leh student-te sik le tang in ECA Mission field nasepna a dingin kithuahpihna(contribution) Rs. 10,000 pia hi.
Misi om hun a galna thil piak
Lamka, May-7: Tulai in niteng phialin misi om gige a, sigalna mun a receptionist- te’n sigalna sum leh van piate amin uleh omna(address) uh theiseng vuallou uh ahihman in galna sum leh thilpiate’n lehkha khat ah min, address leh sum piakzah hiam van piak pen gelhkhia in piak khawmzel hileh thouveng tuan mahmah ding chi’n mi tamtak in gen uhi.
SUUNNA
Mrs Sumkim(86) w/o(late) Thangtindal of HQ Veng,Lamka West teknat ziakin tuni sunnung dak 12.30 velin si a,May 8, 2012 in GBA inntekna in HQ Veng hanmual ah kivui ding hi.
Manipur in gamgi vengdin BSF deih
Imphal, March-7: India-Myanmar gamgi km. 1,643 asau lakah Manipur-Myanmar gamgi km. 398 asau leng telkha a,Manipur govt in huai gamgi jula duty dingin BSF deihthu Union Home Ministry ah theisak a, Assam Rifles-te ahihleh para-military force dangte leh CRPF-te bangin helpawl douna(counter insurgency operation) kia a kizang zaw dingin deihthu leng theisak chihthu om hi. BSF personnel 200,000 vel omte India in Pakistan leh Bangladesh gamgi jula duty in koih a, adangte anti-Maoist operation adin zang hi.Manipur in Myanmar tawh gamgi laka BSF-te duty dia a deihthu Home Ministry in Cabinet Committee on Security(CCS) in thupukna a bawl dingin CCS meeting hun hungaih lai hi’n thusuak in gen hi.
Dr. M. Nara in Karnataka CM mu
Imphal, May-7: CPI Manipur state Council a Secretary Dr M. Nara in zan in Karnataka a zin in tuni’n Bangalore ah Karnataka Chief Minister Sadananda Gowda tawh kimu a, Bangalore a Acharya NRV school of Architecture a student Richard Loitam sihna tawh kisai in dakkal khat val kihouna nei uh a, aman CM kiang ah memorandum leh Richard sihna lemlakte pia hi. Karnataka CM in Richard sihna pen tualthahna hidan a gen in suizui hidin chiam chihthu om hi. Dr. M. Nara in May 8, 2012 in Karnataka Home Minister leh DGP leng kimuhpih ding a, tuazawh in Bangalore a student union tuamtuam omte leng kimuhpih ding chihthu kiza hi.
Assam Rifles te’n medical camp nei
Imphal, May-7: HQ IG/AR (South) a 10-Sector nuai a om 23-Assam Rifles te’n zan in Ukhrul district a Koso village ah medical camp nei uhi. Huai ah 23-Assam Rifles a Medical officer leh para-medical staff te’n khawsung mi damlou 100 vel ding en uh a, damdoi leng manbei in pia uhi. Tuazawh in natna tuamtuam apan kivendan ding tawh kisai mipi paikhawmte sinsak uhi.
Richard leh Naba sih thu ah procession
Imphal, May-7: Bangalore a Richard Loitam leh Okram Naba sihna tawh kisai a kigolhkhate mawhpaihna in tuni in Manipur a students’ organisation tuamtuam 6 kigawmte’n lampi zui(procession pai) uhi. Amau Thangmeiband a THAU Ground akipan in lampi zui uh a, MG Avenue alut a sawm ua leh City Police te’n dal in kiksak uh a, procession paite kiknawn in THAU Ground mun ah public meeting nei uhi. Huai ah misi 2te innkuante leng tel uh a, tuni a thupukna a bawlte uh May 8, 2012 in CM kiangah memorandum dan in pe ding uh chihthu om hi.
Dukan meikang ah Rs. 20 lakhs man kangtum
Imphal, May-7: Zan zingsang baihtak in Imphal Police station bialsung a om Kwakeithel Mayaikoibi a Grocery store leh Furniture zuakna dukan kangtum chihthu om hi. Huai dukan 2te laka Grocery store neitu Kumar of Moirang hi a, furniture zuakna neitu ahihleh Salam Dwijamani of Kwakaithel Mayaikoibi hi a, meikuang kipatna pen Grocery store hi’n kigen a,candle(monbati) kuang akipan hi’n kigen hi. Huai meikang ah Car 1 leh van tuamtuam akigawm in Rs. 20 lakhs vel man ding kangtum hi’n kigen hi.
Works Minister in lamlian enkhia
Imphal, May-7: Works Minister Dr Kh. Ratan Kumar in tuni’n Imphal-Jiribam lamlian va enkhia a,BRO-te nasepna lungkim huailou hi’n gen hi.Adiakin Awangkul leh Barak kal lamlian kiselua hi’n leng gen hi.
.