Lamka ah LPG(gas) taksapna lian
Lamka, May-9: Indian Oil Corpn(IOC) nuai a LPG gas lakna munpi Assam state a Golaghat district sunga Numaligarh refinery ah apaisa April 7, 2012 nitakin helpawl te’n bomb a paihkhum uh puakzak ziakin North-east bial adiakin Manipur ah LPG gas kitaksapna lianpi om phah hi. Lamka khua a LPG gas kingahte Sekmai Bottling Plant apan Lamka puaktung hi a, thu kizadan in Numaligarh refinery siatziakin Manipur a Gas dstributor te’n Guwahati leh Silchar khawng ah nget thawh in gas lasek uh a, Manipur phaijang bial ate’n Lamka tana kipawtung LPG Gas tamtak heikoi(diverted) sek uh a, Lamka ading Gas kimtakin tung ngeilou chihthu om hi. Hibanga gas taksapna liantak om ziakin booking bawlte’n kha 2 leh 3 vel a ngak nung un leng deihbanga ngah theilou tamkhop om gige hi’n kigen hi.
ZHRF in North-east mite bawlsiat ahih ngai serious
Lamka, May 9: Zomi Human Rights Foundation (ZHRF) in India gamsung mun tuamtuam a North East mi omte bawlsiat leh muhsit ahih uh ngai siamlou in serious takin la uh ahihdan puang uhi. Adiakin New Delhi, Bangalore, Mumbai leh khawpi tuamtuam ah lehkha sim a omte bawlsiatna pai toutou chi uhi. January 2012 apan tunitan in India gama khawpi tuamtuam ah malsuahbial mi 9 sanga tamzaw soisak a om chih report om ngaihkhawk huai mahmah chih taklang kawm in mel-le-puam leh tawndan kibatlouh ziaka kinuaisiahna leh ki simmawhna ZHRF in poisa in mawhpaih mahmah ahihdan puang uhi.
Malsuah(NE) bial numei tamtak in bawlsiatna tuak ua, amaute’n khawtang lak ah minsiat ding alauh ziakun a puangkhe lou hunkhop om chi’n ZHRF thusuakin gen a, hibang gamtatna kuapeuh in tawpsan dia theisak kawm in India malsuah bial mipite leng pankhawm taktak poimawh chi uhi. India malsuahbial mite’n a omna uh India gamsung mah a bitna a neih theihna ding un National leh international law provision tuamtuam omte zat hihen chi’n leng ZHRF in ngetna bawl uhi.
Tedim Road line bandh ‘call-off’
Lamka, May-9: Lamka-Imphal kala passenger pua Tata-Winger neitu(All Lamka Taxies Owners’ Society(ALTOS) leh Imphal-CCpur Bus Owners & Workers’ Assn(Down service) te kala kitheihsiamlouhna ziak banah ALTOS te’n Imphal khawpi sunga parking mun a nget uh govt in a limsaklouh ziakin ALTOS pawl lungkimlou in April 29, 2012 akipan Tedim Road ah passenger pua Gari ‘bandh’ a puan uh tawh kisai in tuni nitaklam dak 4.00 akipan in Transport Minister Dr Kh. Ratan Kumar in a office chamber ah ALTOS pawl leh Bus pawl apan makaite meeting neihpih a, huai ah kilemna a om theih ziakin May 10, 2012 in Tedim Road line ah ngeina bangin passenger gari pai nawnta ding chihthu om hi.
Tuni a kihouna ah ALTOS pawl leng Raj Bhavan kong leh Keishampat kikal mun 1 ah parking mun piak ding chihthu om a, huailou in Imphal apan Lamka zuan Tata-Winger te zinglam dak 8.00 in Imphal pan kipankhe ding uh a,Lamka apan Imphal zuante zingsang dak 5.30 in kipankhe ding uh hi’n leng kigen hi.Transport Minister in pawl 2 apan makaite a meeting pihna hun ah CDSU, ZSF leh KSO/CCpur makaite leng tel uh hi’n kigen hi.
ADC khut a power piak thu genkhawm
Lamka, May-9: Chairman, ADC/CCpur makaihna in tuni’n a office chamber ah Vice Chairman,ADC/CCpur; CEO, ADC/CCpur leh Dist Level Officer te’ kimukhawm in Manipur govt in Dist Council khut ah deptt tuamtuam 23 a piak tungtang genkhawm uhi. ADC-te khut a power piak(devolution) tungtang Imphal a Head of deptt te’n Order a suah uh ahihziakin CCpur district a deptt tamzaw te’n thuchian theilou uh hi’n kigen a, govt deptt 23 tawh pangkhawm in grass root level in development thilte sepkhiak hileh mipite’n hamphatpih ding hidan in tuni a meeting ah gen uh chihthu om hi.
Dist Level Athletic Meet kipan
Lamka, May-9: Dist Administration leh ZEO/CCpur saina in tuni zinglam akipan in Lamka Public Ground ah District Level Athletic Meet kipan a, block tuamtuam akipan govt school leh private school a student te’n item tuamtuam ah kidemna nei uhi. DC/CCpur, SDO te, DC office staff te, ZEO, DI of schools- te leh school tuamtuam a heutute tel uh a, kidemna tuamtuam ah private school 20 leh govt school 29 apan student-te tel uhi.
SP/CCpur vaidawnna om
Lamka, May-9: KSO/CCpur district makaite’n tuni zinglam SP/CCpur thak L.Mangkhogin Haokip, IPS kipahpihna, vaidawnna leh kimeltheih tuahna neihpih uh a, KSO/CCpur makai te’n puandum khat SP thak pia uhi.
Guite Road Joint Assessmentbawl ding teamte kuankhe ding
Lamka, May-9: SDO/Thanlon makaih in May 10, 2012 in Thanlon sub-division sung Thuangtam village khua apan Sinzawl khua kikal Guite Road Joint Assessment bawl ding in team khat kipan ding uhi. Huai team ah 80- RCC/BRTF, Forest deptt, Agiculture deptt, Hort & SC deptt leh PWD a official- te tel ding uh hi’n thutut kingah hi.
Dr Mate in Award 50 val sang
Lamka, May-9: Dr HH Mate, founder Principal & Secretary, Dr S. Radhakrishnan Foundation School, Tuibuang in kum 1997 akipan in tutan in National Award leh International Award minthang taktak kigawm 51 hial sang hi’n thutut kingah hi. Dr Mate in tukum January, 2012 kha akipan May 1, 2012 kikal lelin leng National Award 6 leh Internation Award 3 kigawm Award tuamtuam 9 sang hi.
Bankers meeting hun kisuan
Lamka, May-9: DC/CCpur makaihna in May 10,2012 in BRGF Resource Centre ah ‘Dist Consultative comittee(DCC)&Dist level Review Comittee on Lead Bank Scheme’ meeting om ding himahleh buaina khenkhat ziakin ahun kisuan chi’n DC’s office a SDC/HQ apan kiza hi.
Dawr neitu in guta mankhia
Lamka, May-9: Central Lamka a Zomi-zial Centre ah April 28, 2012 in Phungchinthang Samte of Sinzawl in a khua a puak ding battery liante khat a koih guta kuahiam in gumang a, dukan neite kisuanglah in hahtakin suizui uh a, tuni zinglam in battery gutu Chinsuanlal (29) s/o Thangkhanlian of Saikul mankhia uhi. Dawr neite’n guta a matkhiak uh YPA Central Lamka khut ah pekhia uh a,YPA te’n thuhilhna hoihtak a neihzawh un khahkhia uh hi’n kigen hi.
Tech Expert lakna ding interview
Lamka, May-9: Executive Director/DRDA office chamber ah tuni zinglam dak 11:00 apan in Integrated Watershed Management Programme(IWMP)/CCpur dist ah contract basis Technical Expert ‘A’ semding lakna din interview om hi. Huai ah applicant 7 lak ah mi 4 tel uh hi’n kigen hi.
Indo-Myanmar Border Committee meet
Imphal, May-9: Indian Army a Dimapur Corps nuaia om Red Shield Division inntekna in Leimakhong a 57-Mountain division munpi ah Indo-Myanmar Regional Border Committee (RBC) Meet om a, huai ah Myanmar akipan in Commander, Northwest Command makaihna ah army leh civil kigawm mi 18 tel uhi. Huai Regional Border Committee (RBC) Meet kichi gam 2 kal a security leh border management tawh kisai kimuhna masa hi a, kitheihsiam tuahna ding leh gamgi kantan helpawlte dalna dia panlakna poimawhtak hi’n PIB(Defence Wing) thusuak in gen hi.
Meeting zawh in Indian army official te’n Myanmar apan hongzinte Loktak lake leh Imphal khawpi sung mun tuamtuam phakpih uh a, kithuahkhawmna hun hoihtak zatkhawm nungin Myanmar teamte’n Morteh tawn in Myanmar ah kiknawn uhi.
Dukan kong ah bomb mukhia
Imphal, May-9 : Moirang PS huamsung Moirang Lamkhai a om M.Nandakumar in tuni zingsang in a dukan(grocery store) hong kia kisa dukan kongkhak bul ah hand-grenade khat mu a, huai ah lehkhathem khat ah ‘Last Warning, KCP(Nongreng Khomba)’ chih kigelh leng mu hi. Aman police ah thil omdan report bawl pah a, police te’n kintak in bomb lakhia uh hi’n kigen hi.
Pasal 1 in azi dawtlum
Imphal, May-9 : Bishnupur PS huamsung Ngaikhong bazar ah zan nitaklam dak 5:30 velin Kh. Sana Mutum(40) in Bus parking mun a Jeep a tuanglai azi Meisnam Ningol Khwairakpam Ongbi Basanta Devi(27) tem in va dawtlum hi. Azi in midang’ naupai chihthu ziakin tuma in leng nupa 2te kal buai a, huai tawh kisai mah in Sana Mutum in azi thah hiding a ginthu kigen hi. Sana Mutum in azi a thah ziaka lungkimlou pawlin JAC bawl uh a, tuni’n Ngaikhong bazar ah public meeting nei uhi. Huai ah Sana Mutum leh a innkuante a veng ua om thei nawnlou ding in thupuk uh a, a vante uleng a tate kianga piak ding leh a sepna leng a tate’n a luahtheih chiang ua luah ding chi’n thupuk uhi. Nupate’n kum 12 a upa tapa 1 leh kum 9 a upa 1 nei uhi. JAC te’n thupukna a bawlte uh DC/Bishnupur kiangah May 10 in pe ding uh a, huaite sepkhiak ahih masiah Ongbi Basanta Devi luang lak hilou ding chi uhi. Sana Mutum bel DC/Bishnupur escort-te’ driver ahi hi.
Ultra-Sound machine thak
Imphal, May-9 : RIMS a emergency ward a zat ding a Ultra-Sound Maching thak kikoih zat patna ding in tuni’n Prof. Dr. S. Shekharjit, Director, RIMS in honna(commissioning) bawl hi. Hiai Ultra-Sound in RIMS emergency ward a damlou admit a omte don zangkhai tuan mahmah ding hi’n kigen hi.
A/R-te leh helpawl 3 kaplum
Imphal, May-9: Ukhrul district a Litan PS huamsung Tangkhul Hundung lak ah tuni zinglam dak 11:00 akipan in 23-Assam Rifles- te leh helpawlte kikap uh a, dakkal khat vel a kikap nung un helpawl atel mi 3 kaplup in om uhi.Assam Rifles te’n misite taksa tung apan in AK-47 rifles 1, M-16 rifles 1 leh Lethod gun khat mukhia uh chihthu om hi.
Board leh Council in result suahsawm in panla
Imphal, May-9: Council of Hr Sec Education Manipur(COHSEM) in Class XII(Hr Sec) examna result akinlama suahsak sawm in panla uh a,Board of Secondary Education Manipur(BSEM) in leng Class X/HSLC examna result suahsak sawm in hahtakin pan uh ahihdan puang uhi.Council thusuak in a gendan in major subject paper laka 50% vel etzawh hi a, avek a zawh hunhun in kal 1 bel evaluation adin hun la ding hi. Class XII examna March 22, 2012 in zawh hipan a, examna ah Arts stream 5441, Sc 13,677 leh Commerce 554 kigawm candidate 19,672 tel uhi. Result bel May,2012 sunga suak teitei ding hi’n gen uhi. Hibang kalah Class X/HSLC examna tawh kisai answer script teng etkhit hita a, evaluation nasepna pat ding lelin samta chi’n BSEM apan thutut kingah hi.
BBA examna result suak
Imphal, May-9: Manipur Uniiveirsity nuai a BBA 1st Semester, 3rd Semester leh 5th Semester examna apaisa January 2012 kha a om zanzek in a result suak hi. 1st Semester a candidate 87 exam lakah 34 pass in pass zah 30% tung hi. 3rd Semester ah examna atel candidate 62 lakah 39 pass uh a, pass zah 62.9% tung hi. 5th Semester examna ah candidate 36 lakah 30 pass uh a, pass zah 83.3% tung hi.
Commando te’n helte 2 man
Imphal, May-9: Thoubal Commando te’n zan zingsang baihtak in Lilong Nunggei area lak operation a bawlna uah KCP atel Soibam Basanta @ Atong Singh leh Soibam Bhim @ Yaitomba (49 of Iram Siphai Laithrakpam Mayai Leikai mankhia uh a, amau akipan in .32 pistol khat leh a tang 2 banah hand-grenade 2 mukhia uh chihthu om hi.
CNF leh Myanmar govt in kilemna point 15 bawl
Naypidaw, May-9: Chin National Front (CNF) palaite leh Myanmar govt a peace team te’n Chin state a Hakha town ah point 15 tel kilemna (15-point peace charter) suaikai uhi. Minister for Forest Affairs U Win Thun in a gendanin zanhal(May 7, 2012) in Hakha town a Union rest house ah zinglam dak 9 apan nitaklam dak 4 tan CNF palaite leh govt palaite’n kihouna a neihnung un point 15 ah kilem thei in suaikai uh chi hi.
Minister in a genna ah tutunga kihouna pen Union level peace talk 2nd phase hita a, kihouna in masawn mahmah in pawl 2 apan thusun omte pomvek theih ding dinmun ah kilangta chi hi. CNF thupuangtu Dr. Salai Andrew Ngunchung in a gendanin kihouna masa (1st round of peace talks) hun ah na kisemkhe dingte leh mawhpuakna tuamtuam omte point 9 genkhawm hi a, zanhal a kihouna ah point 6 genkhawm nungin nitaklam dak 4 in kilemna suaikaih theihin om chi hi.
CNF palaite leh govt in kilemna a bawlte uh ahihleh, ceasefire sutzop touh ding, Tedim, Thantlang leh Paletwa township ah CNF in liaison office neithei ding, CNF member teng in Burma gamsung a utna munmun uh phatheiding, Myanmar dan bupi nuai a kihouna sutzop touhzel ding, ethnic affairs leh democracy tawisang ding, international NGO te tawh pangkhawm in CNF in development na semthei ding, Chin state ah opium cultivation tawpsan ding, business leh development thil ah CNF leh Chin state govt pangkhawm in nasem theiding uh chihte hi’n kigen hi.
Tualou a kilemna dang abawl uh khenkhat ahihleh kumteng a February 20 pen Chin National Day a zat gige ding, Chin State Day in January 3 zat gige ding chih ahihbanah, gamdang a om Chin mite’ kiang ah visa piakding chihte leng tel hi. CNF te’n Chin state sung ah special commercial zone khat bawlkhiak ding chih thusun a bawl uh peace talks om nawn hun a genkhawm dingin koih lai uh chihthu om hi.
