Candidate-te lakah pasal sangin numeite'n hih hoihzaw

Mizoram Board(MBSE) in Class X result puang

Aizawl, April-21:Mizoram Board of School Education (MBSE) in zan nitakin High School Leaving Certificate (HSLC) Examination 2012 result puangkhia uh a, school 527 apan candidate 15,206 lakah 10,989 in passed in, pass zah 72.27% tunga, full mark 500 laka mark 468 mutu C Laldintluangi d/o. C Lalnunkima of Mamit in topper hihna la hi. Result puankhiak apan kitheidan in candidate-te lak ah numei 5,640 in passed uh a,pasal 5,349 in passed uhi. Top 10 a telbante numei 15 leh pasal 5 hi uh a, khatna apan gukna tan numei kizom suak a, pasalte sangin numeite'n hih hoihzaw uhi.

Tutung Mizoram a HSLC result suak ah mi 751 in distinction ah passed uh a, 1st division ah 2,363, 2nd division ah 3,703 leh 3rd division ah 4,172 lawhching uh a, compartmental chance nei student 377 om uhi. Student passed-te' lakah 9,421 te regular candidate hi ua, regular student pass zah 83.86% tung hi. Private candidate 1,568 leng passed uh a, 39.48% tung hi. Top 10 ah mi 20 om a, huai lak ah 12 te St. Paul's HSS apan hi a, Home Missions School, Aizawl apan 4, Mt. Carmel School apan 3 leh Donbosco School, Seling apan 1 tel hi.

School 178 apan candidate-te lawhching vek (100% passed) ua, student khat mah leng a pass louhna school 9 om hi. Letter marks (80% tunglam) mu English ah 735, MIL ah 2,350, Maths ah 660, Science ah 777 leh Social Sciences ah 1,112 hi uhi. Government school apan candidate 4,295 lakah 3,342 (77.81%) in passed ua, deficit school apan candidate 777 lakah 751 (97.94%) in passed uhi. Aided school apan candidate 1,752 lakah 1,390 (79.34%) passed a, lump-sum school apan candidate 439 lakah 383 (78.13%) passed uhi. Private school apan exam atel candidate 3,971 lakah 3,585 (90.28%) in passed a, private candidate 3,972 lakah 1,568 (39.48%) in passed uhi. MBSE nuai a HSLC exam 2012 a topper C Laldintluangi in subject teng ah letter marks mu a, Science-ah full mark hi.Amah ahihleh July 14, 1995 in piang hi.

HSLC 2012 EXAM-A TOP 10

1 C Laldintluangi St.Paul's HSS 468

d/o. C Lalnunkima

2 RK Lalbiaksangi Mt. Carmel School 464

d/o. RK Lalthlamuana

3 Zarzokimi Tlau Mt. Carmel School 461

d/o. Lalhmachhuana

4 Malsawmzuali Sailo Home Missions 458

d/o. Saitluanga Sailo

5 F Lalnisai St.Paul's HSS 457

d/o. F Hmingthanzauva

5 V Lalrinhlui St.Paul's HSS 457

d/o. JV Lalthangluaia

6 Lalremruatpuii St.Paul's HSS 456

d/o. B Lalbiakliana

6 Teresa Lalhruaiengi St.Paul's HSS 456

d/o. Lalduhawma

7 Lalruattluanga Sailo Home Missions 455

s/o. Hmingthanzauva

8 C Lalmuanpuia St.Paul's HSS 454

s/o. C Laltanpuia

8 Vansangpuii Donbosco, Selling 454

d/o. CK Lallunghnema

9 Chawngdingliana Home Missions 453

s/o. C Lalramliana

9 Lalbiakzauva Home Missions 453

s/o. B Lalmalsawma

9 C Lalhruaizeli St.Paul's HSS 453

C Lalbiaksanga

9 Debas Mita Singha St.Paul's HSS 453

d/o. HP Singha

9 Lalhlimpuii St.Paul's HSS 453

d/o. C Zoramchhana

9 Lalhlunchhungi St.Paul's HSS 453

d/o. Lalchhuanmawia

9 Sultana Sabhana Begum St.Paul's HSS 453

d/o. Afsar Ali

10 K Lalrindika Mt.Carmel School 452

s/o. K Lalnithanga

10 Gaby Lalmuanpuii St.Paul's HSS 452

d/o. Eric Zomawia

Chialpina neilai Pastor khat mat in om

Bangalore, April-21: Karnataka state sung ah zanin chialpina(Gospel crusade) bawllai Pastor khat Mahadevapura police te'n man uhi. Thusuakin a gendanin Whitefield kianga Kundalahalli mun a Hebron Prayer Hall ah summer camp om a, camp ah numei 14 telin naupang 23 tel uhi. Huai ah kum 31 a upa trainee pastor Victor Babu @ Victor in thugen a, huchih lai in police-te valut in mankhia uhi. Pastor Victor Babu ahihleh Andhra Pradesh a Dharmavaram khawmi hi a, Police-te'n amah apan in thumna laibu (prayer books), Pathian thu tawh kisai laibuta(pamphlets) leh material tuamtuam mu uh a, a matzawh un Indian Penal Code nuai a Section 295A case bulhkhum uhi.

Police te'n a gendan un nu-leh-pa khenkhat apan complaint om ziak in huai summer camp valuh uh hi a, Victor in naupang 23 te sahkhua tawh kisai a chialpina abawl laitak ahi chi uhi. Victor in naupangte' nu-leh-pate' kiang ah naupangte a school khawl(suty) laitak uh ahihman in kha 1 sung free summer camp ka neiding ua, na tate uh hon sawl un chi'n ngen hi. Huai camp ni 3 paisa akipan om hi a, Mini-bus (No.KA- 03D/8949) in naupangte Mahadevapura leh Kundalahalli area apan nitengin vapi zel hi. Pastor Victor in a genna ah naupangte thuumdan ding leh la tuamtuam ka sinsak zel a, thagum a amau ginna khek(forcible conversion) sawm ka hi zenzen kei chi hi.

Tuining akai student 1 electric in man

Lamka, April-21: Lamka police station apan suahlam km 21 vela gamla Tuining khua ah zan zinglam, dak 11:20 velin Tuining govt Jr H/S a class VII sinlel Lallemguat (13) s/o Paotinlal of Dumlien village in zinglam a examna zoukhin phet alawmte tawh a khua uh zuan a short cut lampi tawn a pailai electric in man chihthu kiza hi. Amah tu'n RIMS ah om lel a, doctor-te'n a taklam khut tansak ngaiding hi'n a gen ban uah a dinmun leng lauthawnghuai mahmah hi'n gen uhi.

Tuining Jr High School a headmaster Doukholim Haokip in press a thutut hong bawldanin, electric naked wire pen shortcut lampi ah leitual hetkha phialin om a, Lallemguat in a gui nawkkha hiam ahihkei aleh sukha hidingin gintakthu gen hi. Electric in Lallemguat amat phet in alawmte'n a teacher-te uh sam in kikou uh a, amau leng delhpah chi hi. Hun bangtanhiam nungin Lamka lam zuan MSF (medical team) te' gari hong tai kha a, district hospital tan damlou puaksak dingin ngen mahle uh amau 'lamkal ah damlou ka paw ngeikei uh' chi'n puaksak utlou uh chi'n Headmaster in gen hi. Tuaphet in teacher te'n Tuining apan km 2 a gamla Sangaikot a Army-te' outpost ah panpihna ngen dingin va tai ua, himahleh gari ana om lemchanglou chi hi.

Army te tawh pangkhawm in Leingoi pua Truck khat khamkhawl uh a, huai apan district hospital tan damlou pawtung thei uh hi'n Headmaster in gen hi. Lallemguat dinmun a serious mahmah ziakin doctor te'n kintakin RIMS a etkol dingin referred uh hi'n kigen hi. Thiltung tawh kisai-in damlou puaksak Truck driver leh Assam Rifles te' tungah school authority kipak mahmah uh ahihdan gen uh a, huai lou in power department in leng electric pole leh wire(electric khuam leh agui kikhung) te enkai thei le uh chih deihthu Press ah hongtun uhi.

Bihar in Primary teacher-te enkhia

Eligibility test a fail teacher 151 tawpsak

Patna, April-21: India khangthu adia chiamteh tham banah state tuamtuamte'n leng Bihar state -te' paidan a zuihsawm uh ahihleh Bihar govt in Primary Teacher a neihte uh school-pu dia chin(qualified) taktak hina uhiam chih etkhiakna in Eligibility Test sai (conduct) uh a, 2veina tan a failed(lawhsam) teacher 151-te a sepna ua panin paih (terminated) uhi. Thusuakin a gendanin Education department in teacher-te' siamna etkhiakna dingin State Council for Educational Research and Training(SCERT) tungtawnin kum 2010 in Eligibility test nei uh a, huai a lawhsamte' adingin kumlui 2011 in chance penawn uh a, huai tan a lawhsam laite paihkhiak dingin education department in govt ah recommend hi.

Ashutosh, Director of Primary education in a genna ah 2vei tan test a lawhsam teacher 151 te ahihna ua pan paihkhiak ahi uh chi a, dotna (question) haksalua leng kihihlou in Class V te' standard ding English, Mathematics, Hindi leh General Knowledge-te tanpha theilou tel ahihman in paihlouh theihlouh ahi chi hi. District tuamtuam a education official te'n tu apan ni 15 sung ngei in mi 151 te tawpsakna order a piakkim chiat ding uh chi'n official thusuakin gen hi.

Dist Level Monitoring Committee

Lamka, April-21: Ms.Jacintha Lazarus, IAS,DC/CCpur makaih in DC office a BRGF Resource Centre ah tuni sun dak 12:00 apan in 'District Level Monitoring Committee (DLMC)' meeting om hi. Huai ah CCpur district sung a flagship programme tuamtuamte pai dan leh nasepdan genkhawm uh a, kumlui, 2011-2012 sung a work-order omsa tunitan a nasep zawh nailouhte' akinthei lama nasep zawhdan ding leh bank loan tawh kisai thu tuamtuam genkhawm uhi.

Heipi in a veilam khepek toukha

Lamka, April-21: Mrs Ningkim (40) w/o Zilzang of Zoulien(Tollen kiang) in tuni zinglam in gamlak ah a singpuakna ah sing-ek khial kha in a heipi in veilam khepek toukha a, dist. hospital ah etkol in om hi. Huailou in zan nitaklam dak 6.00 velin bike khat in Rengkai HSA hostel kiangah lampi kan dinga kisalai Mrs Mary John (50) w/o Thangsiem of Rengkai phukha in a kongbom leh alu nasa a, dist. hospital ah admit in om hi. Zan nitak mah dak 7.20 velin Bike leh Activa kiphukha in huaiah Activa atuang Lhunchen(50) s/o Haukholet of Molnom naktak aliam in dist. hospital puaktung himahleh doctor te'n RIMS ah n refered uhi. Tuni sunnung dak 2.00 velin table tunga kikoih singpi sa in Chingzawlkim(2) d/o Thanglianlal of Zomi Colony buakkha in a awmlak teng dulh a, dist. hospital ah etkol in om hi.

Dental Camp ah mi tamtak tel

Lamka, April-21: New Lamka a Hebron Veng YPA Unit leh College Veng YPA Unit saina in tuni zinglam in New Lamka YPA Hall ngei zeka Village Authority House ah Free Dental Camp om a, huai ah ha(teeth) tawh kisai a buaina nei tamtak tel uhi. Dr.Nilachandra,MDS leh Dr.Thangginmang, BDS te'n ha na leh buaina neite manbei in en uh a, tunung in ha bawhkhiak ngaite leh hahsiang ngaite buaipih ding uh chihthu om hi.

Itanagar ah EBC biakinn thak

Lamka, April-21: Arunachal Pradesh state khawpi Itanagar ah kum 1999 akipan in Evangelical Convention Church(EBC) saptuam dingkhia in masawn touzel a, huai khua a biakinn building thak kibawl tuni sun dak 12.00 in Rev Kamchinkhup, Director of Missions/EBC in honna a neih banah Pathian kiang ah thumna in lan chih thutut kingah hi.

Special Hindi Worship Service

Lamka, April-21:Hindi zanga Pathian biakna saipawl 'Gospel for India' pawlte saina in April 22, 2012(Sunday) sunnung dak 1.30 velin Rayburn College ah Special Hindi Worship Service om ding a, huai ah Rev Randy Sizemore, Director, GMC in thugen ding a, Miss Hatmuanting leh Miss Mary in phatna lasa ding uhi.

Champion's Trophy leh Doctorate Degree lopna

Lamka, April-21: Bungmual a Angels' Place a student te'n March 4,2012 in Khuman Lampak Main Stadium a 5th Inter-Children Home Sports Festival ah Gold medal 10, Silver 6 leh Bronze medal 5 kia hilou in 'best player'(boys & girl) hihna tanpha a lak uh lopna ban ah Angel's Place a Co-ordinator R. Sanga in doctorate degree a ngah lopna tawh kithuah 'Champion's Trophy-cum-Doctorate Degree celebration' April 23, 2011 zinglam dak 11 in neiding uhi.

PLS OB kitelna om ding

Lamka, April-21: Hiangtam Lamka a Paite Literature Society (PLS) office ah April 23, 2012 zinglam in kum 2012-2015 sunga PLS Board of Directors ding a telching mi 15 te'n Office Bearer ding tel ding uhi. Huai ah President, Vice President, Secretary, Asst Secy-cum-Finance Secy leh Treasurer ding tel ding uh a, nominated post ading mi 10 leng guang ding uh hi'n kigen hi.

SSPP General body meeting

Lamka, April-21: Bungmual a SSPP complex April 22,2012 sunnung in SSPP Gen.HQ General Body meeting om ding a, huai ah Bukpi Govt H/S tungtang,CDSU election ding tawh kisai ,SSPP Lamka Joint HQ, SSPP Imphal Branch thu telin thu tuamtuam genkhawm ding uhi.

Examna a telding candidate-te ading in Bus pai ding

New Bazar a Songbul News Agency-te saina in Imphal ah April 22, 2012 in SSC nuaia Constable/Rifleman lakna dingah exama teldingte adin Bus pai ding a, huai dinga ticket la candidate-te amau examna ding centre chiat ah drop hiding uh a, exam zawh in pick-up chiah hinawn ding uhi.RBI nuaia Asst lakna dingin April 29,2012 a examna a teldingte'n leng April 25 akipan in Songbul akipan Bus ticket laktheih ding hi.

Truck gawikhak damzoulou in si

Lamka, April-21: Hiangtam Lamka Mualveng a Ibuchou' workshop ah zan nitak dak 7.10 velin Truck (No. MZ-01B/6401) in side pia a om huai gari zui Tunsianthang(22) s/o (late) Khamsuanpau of Zomi Colony gawikha in Imphal a Shija hospital puak dinga refer ahihlai in lamkal ah si hi'n kigen hi. Thutut kingahdan in Tunsianthang huai Truck zui hi a, aman lampi nunglam apan Truck taina ding hilhlai kineh lawkha in Truck in a khedap gawi kha in kipuk a, huchi'n a Truck in a konglak gawikha hi'n kigen hi. Amah dist. hospital puaktung nungin doctor te'n Shija Hospital ah refer uh a, Imphal zuatpihma in si hi'n kigen hi. Tuni in misi tanaute Truck neite inndongte vai in kihou uh a, Truck neite'n puandum a siluang tuam in voktal tuk 6 a gawh ban uah sigalna in Rs. 1 lakh pia in kihoulem uh hi'n kigen hi. Tunsianthang bel a unau lakua pasal omsun hi'n kigen hi.

CM hongtunglou: MPCC Chief zinkhia

Imphal, April-21: Home Minister banah Manipur Pradesh Congress Committee(MPCC) President Gaikhangam zan in Delhi apan Imphal hongtung a, Chief Minister O. Ibobi leh Health Minister Phungzathang Tonsing tuni'n hongtung ding uh chih himahleh hongtung nailou uh a, MPCC President Gaikhangam tuni in Delhi ah zin nawn hi'n kigen hi. CM leh MPCC Chief teamte'n tuni nitak dak 9.00 in AICC Manipur incharge Luizinho Faleiro tawh kimu in Manipur ministry keklet ding tungtang genkhawm uh chihthu om hi.Thu kizadan in CM leh MPCC Chief in Congress High Command ah ministry keklet huna Minister ding list a piak uh a kituahlouh luat ziakin nawngkai lai hi'n kigen hi.

Manipur in Central apan Rs. 197 crores mu

Imphal, April-21:Manipur in overdraft(RBI a sumbat) tamtak nei dinga omlai Central in Market Borrowing Wing leh Central Assistance dan in Rs. 197 crores pia a, tua ziakin Manipur overdraft dia omlai omsak lou hi'n kigen hi. Manipur in Central Assistance apan Rs. 197 crore amuh pen state account ah koihlut hi a, overdraft beisiang kei mahleh normal balance dan in omthei a, tua ziakin overdraft omlou tawh kibang chih hi. Hiai ziakin Treasury te'n leng bill pass lou phot ding a theihsak hi uh a, tu dinmun dan in April 2012 khalawh leng May kaltawp ahihkei a leh June kal masa a hawmkhiak zawh hipan phet dinga lam-et hi'n kigen hi.

Commando-te'n operation bawl

Imphal, April-21: Tulai in mun tuamtuam ah helpawlin amau pawla telding in naupang pimang leh kidnap a chin uh dalna dingin tuni zingsang in Imphal West Commando te'n Kwakeithel leh Huidrom Leikai lak operation bawl ua, huai ah muanmawh mi 8 vel hentang(detained) uh chihthu om hi.Thudang kizadan in Imphal West Commando leh 30-Assam Rifles kithuah combined team in zan zingsang in Sairengkhul LP School kiangah PREPAK atel numei khat mankhia uhi. Police thusuak in a gendan in amah S. Premabati Devi (37) of Sairengkhul Mayai Leikai mankhia hi a, thudotna apan a kipuandan in helpawl a lut dinga naupang pimang leh zoltu khat hidan in kigen hi.

Khongjom Day ading gari kidawh ding

Imphal, April-21:Thoubal district a Khebaching ah April 23, 2012 a Khongjom Day zatna a telding mipite adin Transport deptt. in Imphal khawpi mun tuamtuam ah bus kidawhsak sawm uhi. Thusuak in a gendan in Koirenbi mun ah bus khat kidawh ding a, Chingmeirong, Palace gate, Porompat a DC office, Tera Bazar, Kwakeithel bazar leh Lamphel Police Station kong ah khat chiat kidawh ding a, Babupara a Transport Directorate ah Bus 5 kidawh ding hi. Khongjom Day zatna a telding kuapeuh bus kidawhte khatpeuh ah tuan theih ding hidan in gen uhi.

G/R te'n Oinam ah Medical camp sai

Imphal, April-21:PIB(Defence Wing) thusuak in a gendan in Red Shield Division nuaia om 6/8-Gorkha Rifles te'n zan in Bishnupur district sunga Oinam khua ah 'One day free Medical camp' bawl uh a, huai ah 6/8-Gorkha Rifles unit a Medical office, 33-Assam Rifles apan numei doctor 1,Oinam apan civilian doctor 1 leh Ningthoukhong apan civilian doctor khat in damloute en uhi. Huai Medical camp ah Oinam leh akimlak mun tuamtuam apan pasal 99, numei 210 leh naupang151 kigawm mi 460 ki-ensak uh a, huaite manbei in damdoi leng piak hi uh chihthu om hi.

KSO Gen HQ a Exe Member thakte

Imphal, April-21:KSO Gen HQ in KSO Standing Committee tawh kithuza in zan in Haokip Veng,Imphal a KSO Information Centre a meeting hun ah kum 2012-2014 sung KSO Gen HQ a Executive member thak dingin mi 6 guang uhi. Huaite Vice President(External) din Paotinthang Lupheng, Spokesman din Roubul Pudaite, Secy(Edn & Statistics) din Thongjalun Mate, Asst Secy(Education & Statistics) din Satminthang, Secy(Info & Pub) din Henkhokai leh Secy(Relief & Rehab) dingin Thangboi Gangte guang uhi.

Bomb hidia gingta in patau uh

Imphal, April-21: New Secretariat building nuai a dustbin sung ah tuni sun in newspaper a thil kitun khat bomb hidia gintak ziakin huai kim leh kianga om khate patau uh a, huai phet in CRPF leh police a bomb expert te'n hoihtak in enchian uhi. Hun bangtanhiam nungin Newspaper a kitun pen damdawi bottle hawm hizaw chih theikhe pan uh chihthu om hi.

.