CT Scan thu ah mi 1 matbeh in om
Lamka, April-18:Dist Hospital a CT scan vanzat khenkhat kigu tawh kisai in Police te’n zanhal in mi 3 a matkhiak nung un ginlelh ziak mahin zan in Dist Hospital a grade IV sem Lianzamung (47) s/o (late) Sangkhum of Medical Compound matkhiak beh uhi.Police te’n tuni’n CJM court ah dingsak uh a, CJM in April 20, 2012 tan Police custody a omding in phalsak hi.
‘Naga-te’ adin tulaitak a hunhoih mansuahlouh poimawh’ – Rio
Prime Minister in NSCN(IM) core demand-te pomlou
Kohima, April-18: Prime Minister Dr Manmohan Singh in Indo-Naga peace talks pailel ah NSCN(IM) in demand a bawl bangzahhiamte’ lakah api deuh (core demand) a neihte amah leh a govt in pomtheilou ahihdan hon zasak chi’n Nagaland Chief Minister Neipiu Rio in zan in gen hi. Rio in a taklatdanin kum 15 hial Indo-Naga peace talks paita mahleh Centre govt in NSCN(IM) thilnget-te a et vengveng nungin ‘Sovereignty’ kichi pomtheih vual ding hilou chi’n Prime Minister in hon zasak chi hi. Huchi kalah Neiphiu Rio in Nagate’n tu hunhoih mansuahlouh hoih mahmah ding hi’n leng gen hi.
Centre govt in Nagate’ adia ‘sovereignty’ hiam ahihkeileh Naga-te’ tenna bial teng vaihawmna khat nuai a omsak ding chih leng Centre govt in pomtheilou ahihdan Prime Minister tungtawnin zaksakin ka om uh chi’n leng Rio in gen hi. Tuma deuh in Centre in NSCN(IM) kiangah kum 60 val political problem om sukvengna dingin Nagaland state pua a Naga omte’ adingin greater autonomy ana tah ua, huai leng Manipur a phaizangmite’n naktakin nang uh chih ahi hi. NSCN(IM) in ‘Nagalim’ leh New Delhi in kizopna a hoihsem a neih theihna ding in India a state dangte’ sangmah in thuneihna lianzaw Nagalim piak hihen a chih uleng centre in pom theilou chi’n Prime Minister in Nagaland Chief Minister Rio theisak hi’n kigen hi. NSCN(IM) Chairman Isak Chishi Swu leh General Secretary Thuingaleng Muivah tulai in peace talks om nawnding ngakin New Delhi ah om lel ua, himahleh hiai dan a thil hong paitouh leh kihouna leng a dinkhol baihlam mahmah ding hi’n kigen hi. NSCN(IM) in sovereignty a ngetna ua pan kiphahniam in a thilnget uh a khen ua lebel lampi om mahmah lai hi’n leng kigen hi.
New Delhi a Chief Ministers Conference om lai in Neiphiu Rio in mimal takin Prime Minister kimuhpih a, huai hun ah Prime Minister in Rio kiangah ‘thil hithei ding peuhmah kum 100 nungin leng ahithei ding om a, himahleh thil hithei hetlou dingte kum 100 paikhit nungin leng hitheituan lou ding om ahi’ chi’n gen chihthu om hi. Rio in zan in Kohima Secretariat kiang a Naga Solidarity Park a honna ah Prime Minister tawh a houlimna teng uh genkhia a, huai kawmin Naga helpawlte hi’n civil society leader-te’ kiangah ngetna bawl tawh thuah in Naga political problem sukvengna dingin ei adia bang hoihpen hiam chih telsiam poimawh mahmah dingin kilang chi hi.
Rio in a genzelna ah Centre leh NSCN(IM) kihouna a dinkhawl aleh thu buaihuai tamtak om ding a, Disturbed Areas Act leh Armed Forces (Special Powers) Act nuai a i om lai dan un Naga mihing bangzah in i sihlawh laiding ua, numei bangzah sualluih in hong om dia chih leh bawl gentheihna bangzahta i tuaklai ding ua chihte ngaihsut vengveng poimawh a, tua ziakin, ceasefire a beikhak ding thil lauhuaitak ahi, chi hi. Hibang hun poimawhtak ah thupukna kichiantak i lak fuh ngeingei leh eite a hampha ding i hi chi’n leader tuamtuamte leng chialna bawl hi.
Guwahati ah Passport Service Centre kihong khia
Guwahati, April-18: Union External Affairs ministry in India malsuahbial(Northeast) apan passport ngen tamtak omte ngaikhawk mahmah in zan in Guwahati ah Passport Service Centre( passport seve kendra) hongkhia a, passport ngente’n hun sawtlua kiveilou in ngah thei pahpahta ding uh chihthu kiza hi. Passport deih a tam deuhdeuh ziakin Guwahati a Regional passport office peseng nawnlou in application asing asim pending in om hi.
Ministry of External Affairs leh IT company Tata Consultancy Services pangkhawmin passport deihte baihlamtakin pekhe ding uh chih hi a, MEA joint secretary & Chief passport officer Muktesh Pardeshi in a gendanin n Guwahati a Regional passport office(RPO) in Assam, Meghalaya, Arunachal Pradesh, Nagaland, Manipur leh Mizoram apan passport deihteng abuaipih ziakun a na uh zekai in bangpi semkhelou ua, pending pumdim ahi chi hi. Tripura state ahihleh Kolkata RPO nuai ah koih in om hi.
India malsuahbial adia Regional Passport Officer T A Changson in a gendanin kumteng in passport deih kibehlap nasa mahmah a, kum 1979 in Guwahati RPO honkhiak hi a, kum 1980 sungin passport 1,732 piakkhiak hi’n gen hi. Kum 2011 in mihing 54,483 kiangah passport issued hi a, kum 2010 in kha tengin passport ngen mi 3,728 zel piak hi uh a, kumlui 2011 in khateng in mi 4,540 kiangah piakin om chi hi. Tua passport service centre kihongthak in three-tier security system nei ding a, aguk le gal a passport bawl leh piak kichi om theilou ding chi uhi.
Chairman makaih in BADP meeting om ding
Lamka, April-18:Langkhanpau Guite, Chairman, ADC/CCpur makaihna in a office chamber ah April 19, 2012 sunnung in Border Area Development Program (BADP) tungtang meeting om ding hi. Huai ah BADP nuaia nasepsate etkhawmna ban ah BADP 2012-2013 action plan leng genkhawm ding uhi. Huai ah District Level BADP Committee a member te- DC, CEO, DAO(Agri), DO (Horti), ZEO, EE/PWD, CMO leh concern MLA leh MP te ban ah MDC te’ special invitees in telding uhi.
Thudang kizadan in hun paisa ah IAY, IWMP, BRGF leh BADP tawh kisai meeting om hun chiangin Committee member tamtak in thei khalou uh a, himahleh Langkhanpau Guite in Chairman hihna a let nunga huchibang meeting omte ah committee member-te’n leng ahun taka thei in meeting ah telsek uh a, fund paidan work proposal leh nasep dan theikha pan uh hi’n Committee member khenkhat in gen uhi.
YMA in Social work in bawlsak
Lamka, April-18: Apaisa April 15, 2012 nitak dak 10:30 velin huihpi leh vuahpi kithuah in HQ Veng a Thangtindal Colony a teng Kaimang Gangte s/o (late) Enpau’ tenna inn a mutsiat ziakin YMA Chiengkon Branch in mipi lak apan Rs 10000/- val leh sing cubic kaikhawm uh a,tuni in YMA Chiengkon branch makaihna in mipi 140 velin social work nei in inn bawlsak uhi. Huai ah bialtu MDC Kamsuanlun in langva bundle 3 pia in inntung khuhsak hi.
Shaktiman in a ngalguh langnih gawitan
Lamka, April-18:Zan nitak dak 9.00 velin Beaulahlane ah Shaktiman apan suang lakhe dinga kisa a side pia Khamsuanlal (22) s/o Haukhansum of New Zoveng in khawmial nuai ah ginataka a muhtheihlouh ziakin Shaktiman in fencing tawh hetkhawm kha in kipuk a, Shaktiman in a veilam leh taklam khepek gawi kha in a ngalguh langnih kitan hi. Khamsuanlal in huai Shaktiman zui in zan nitakin gari dim a suang ki-load teng suahkhiak sawm in kisa uh a, driver omlouhna lam apan ding in gari taina ding lamhilh a, driver tawh kimuchian thei nawnlou in hun bangtanhiam nungin a khe gawikhak a om ahihdan driver hilh a, huchi’n dist. hospital ah etkol dingin pawlut uh hi’n kigen hi.
Free Dental Camp om ding
Lamka, April-18: New Lamka a Hebron Veng YPA Unit leh College Veng YPA Unit saina in April 21, 2012 zinglam dak 10:00 apan in New Lamka YPA Hall ah Free Dental Camp om ding hi. Huai ah Dr. Nilachandra, MDS leh Dr. Thangginmang, BDS te’n ha tawh kisai a buaina neite en ding uh a, damdoi leng manbei in peding uhi.
DPO hilou in DTO ding hizaw
Lamka, April-18: Zan issue a Transfer/posting kisuah ah Dr H. Singkhozam tulela DPO/CCpur lenlai sr Medical Officer, Dist Hospital/CCpur adia kisuan ding chih banah Dr T. Pumzathang,DLO/CCpur in DPO/CCpur len ding chi a kisuahkha pen typing mistake hi a, Dr H. Singkhozam tulela DTO/CCpur lenlai sr Medical Officer, Dist Hospital/CCpur adia kisuan ding chih hi a, Dr T. Pumzathang,DLO/CCpur in DTO/CCpur len ding chih hizaw hi.
Integration Camp hun kisuan nawn
Lamka, April-18: Youth Affairs & Sports saina in April 11-15,2012 sung Muolvaiphei Youth Centre ah‘Youth Integration Camp’om ding chih himahleh buaina khenkhat leh lemtanlouhna om ziak in April 18-22,2012 sung a om dingin ahun suan uh a,hileleng tuni a thu kizathak nawn dungzui in thuthak om masiah adin ahun kisuan nawn hi.
Data Entry ading interview zou
Lamka, April-18: MANITRON te’n CCpur dist sunga block tuamtuam ah Socio Economic & Census 2011 nuai a Data Entry Operator sem ding lakna dia interview a sai uh tuni’n zousiang uhi. Interview hun ah candidate 175 tel uh a, select a omteng tukha sung in mobile phone tungtawn a theih sak hiding un kigen hi.
CM leh Home Minister in PM mu uh
Imphal, April-18: Chief Minister O. Ibobi leh Home Minister banah MPCC President Gaikhangam in tuni sun dak 12:30 velin Prime Minister Dr. Manmohan Singh mu uh a, huai hun ah Manipur ministry keklet ding tungtang genkhawm uh chih hi a, hileleng a kihouna uh thuchian zak hilou hi. Huaizawh in Chief Minister leh Home Minister Gaikhangam in law leh order tungtang ah Union Defence Minister AK Antony leh Union Home Minister P. Chidambaram leng mu uh a, Manipur a law & ordfer dinmun tawh kisai genkhawm uh chihthu leng kiza hi.
4th IRB personnel in thau khah
Imphal, April-18:Kangpokpi a ADC complex a om 4th IRB personnel khat in zan nitak dak 8:00 velin a thautawi round 4 vel kapkhia chihthu om hi. Tuni zingsang in Kangpokpi Town Committee Chairman leh Kangpokpi Women Welfare Orgn. te’n 4th IRB Commander Punsi kimuhpih uh a, zan nitak a thiltung lungkimlouh thu genpih kawm in tuban huchibang thil om nawnlouhna ding a panla din theisak uhi. IRB Commander tupmawng hilou ahihdan genkawm in, ngaihdam ngen hi.
Kangpokpi Women Welfare pawlin kha 4 vel paisa apan Kangpokpi ah 4th IRB te om pah himahle uh hibanga a gamtatna uh lungkim huailou lua ahihdan langsak uhi. ADC complex kianga omte’n a gendan un nitak tengin IRB te’n zu dawnkhawm in buaina om deuh gige hi’n gen uhi.
Combined team in UNLF 1 man
Imphal, April-18:Wangjing area lak ah tuni zinglam in 15-Assam Rifles leh 42-Assam Rifles kithuah combined team in operation a bawlna uah UNLF atel self-styled Corporal Y. Poitomba @ Ibohal (26) of Langjing Terapur mankhia uh a, amah akipan 9mm pistol khat leh atang 3 mukhia uh a, amah leh a galvan kepte tuni’n Thoubal Police ah pekhia uhi.
Khamtheih a sumdawng mi 2 man
Imphal, April-18: 9-Assam Rifles te’n zan in Khudengthabi lak operation a bawlna uah damdawi khamtheih a sumdawng mi 2 mankhia uh chihthu om hi. Thusuak in a taklatdan in matkhiak a om Zilkhongam(32) leh Semkholet @ Letboi(35) hi uh a, Assam Rifles te’n amau akipan in Pseudotheygrine kg. 750 vel ding mukhia uh a, Narcotics Control Bureau-te khut ah pekhia uh chihthu om hi.
Pasal 1 amah leh amah kithahsawm
Imphal, April-18: Zan sun dak 12.30 velin Lamphel PS huamsung Laipham Khunou Mamang Leikai ah Konthoujam Ibohanbi(50) kichi inn kisungkalh in puan bangzahhiam meia halkuang in huai ah amah leh amah kihallup sawm a,huai thu zak phet in Imphal a Fire Service te’n kintaka delhin hunkhia uh chihthu om hi.Ibohanbi ahihleh a khenchiang in a ngaihtuahna lungsim buai a, zan in leng lungsim venlouh laitak a kithahsawm hidan in a mukha te’n gen uhi.
MHS GradeIV Officer hunkhop kisuan
Imphal, April-18: Manipur Secretariat a Health deptt in tuma lama Medical Officer leh Dental Surgeon kilathakte omna ding(posting) order suah a, huai dungzui in Medical Officer 177 leh Dental Surgeon 29te District Hospital tuamtuam, Community Health Centre leh Primary Health Centre(PHC) a posting dingin order suak hi. Huai a telkha atangpi in singtangmite page 2na a employment news column ah amin uleh a posting mun ah kisuah hi.
Director, MOBC in theihsakna bawl
Imphal, April-14: Directorate of Minorities, Other Backward Classes & SC, govt of Manipur in kum 2010-2011 a OBC nuaia PostMatric Scholarship ngah ding student-te’ telkhakna Heads of Institution tengin amau institution a student te’n Saving Bank Account a honna ding uh Post office tawh kisai particular poimawh –post office min leh address telin Imphal a Head Post office ah theisak ding in Institution tuamtuam a Head-te theisak a, huchi’n Post office te’n account hon ding tungtang buaipih ding uh chi’n Director in theisak hi.
.