DC in NMMI tawh kisai training hong
Lamka, June-14: District Officer(Hort & SC)/CCpur saina in tuni in Hiangtam Lamka a PTC Conference Hall ah National Mission on Micro Irrigation(NMMI) tawh kisai training kipan a, huai ah Ms Jacintha Lazarus,IAS, DC/CCpur khuallian a pang in training hongkhia hi. DC in a genna ah mipite govt tung kia kingalou in mahni kitoudelh sawm leng poimawhlua hi’n gen hi. CCpur dist gam leitang(soil) hoih mahmah a,himahleh nasepdan siamlouh ziakin state dang ah zuakkhiat ding omlou in state dang apan kilalut zaw hi’n gen hi. Hort deptt tungtawn in gam khansem theihna dia panla chiat dingin leng DC in training atel 30te hasuan a, amaute kiang ah silpauline leh haichi tang hawm khia hi.
Tuilou ah buh suanthei omlou
Lamka, June-14: Tuktui luan hun leh tuilou(paddy field) a buh suanhun himahleh kumdang tawh kibanglou in vuahtui tawmluat ziak in tuilou neitute’n buh suantheilou in buai mahmah uhi. Khuga Dam canal apan tui a luanlouh ziak in Saikot area a tuilou omteng leng buhsuan theilou uh a, tu June khasung tan in buh suan ahih kei aleh kikhel thei ding khop a patauh huai hi’n kigen hi.
Bus Terminal building segawp
Lamka, June-14: Pangjawl khawsak a Inter-State Bus Terminal mun a building leh fencing kibawl zat taktak ahihma in segawp hi. Huaimun enkol leh vengtu ding omlouh ziakin thanghuai taka zang a tam banah ut dandan a hihsia pawl om a, building a shutter kithuahte tanpha kikal khia a, building nunglam varanda a khuam 6 lak ah khuam 5te kikhensia in sik(iron bar) teng kigu mang hi. Building tung(floor) leng hoihtaka concrete kisung himahleh kikhen segawp a, inntunga sik kiphante leng laktheih teng kilakhia a, etmai in leng lungjinhuai khop in kise gawp hi.
Sapthei(passion fruit) chinna mun enkhia
Lamka, June-14: ‘National Mission on Micro Irrigation(NMMI)’ training atel mi 30 te’n tuni’n DO(Hort & SC) makaihna in field visit uh a, Saikot area a Thenmuol khua ah sapthei (passion fruit) chinna mun enkhia uhi. Thenmuol ah inn 90 velin gam acre 200 vel alian ah sapthei ching uh a, acre 1 ah kum khat in Rs 1-1.5 lakh mukhe zou uh hi’n kigen a, sapthei zamna ding sikkhaute Hort deptt in pia uh a, sapthei nuai ah haichi tuamtuam ai-eng (turmeric) , siing (ginger) leh kidney beam multi cropping ching pawl leng om uhi. Thenmuol khua apan Khompuibung ah grape leh nahtang (banana) chinna mun enkhia uh a, huai apan Mata khua ah nahtang, zongtah(tribem) kichite leh sekthuk(lemon) chinna munte enkhia uhi. Mualtam khua ah pomegranate (theibuhfai) chinna, nahtang leh sekthuk(lemon) chinna munte leng enkhia uhi.
Training and Capacity building of JFMC
Lamka, June-14: Forest Development Agency(FDA), Southern Forest Divn/CCpur saina in tuni zinglam in DFO Coference Hall ah ‘2-days Training and Capacity Building of Joint Forest Management Committee Member’ om a, technical session ah M.Ginzalian, AAO(Agri)/CCpur, Dr. George Joute, Dist.Vety Officer te’n sinsak uh a,huai ah mi 70 vel tel uhi. June 15, 2012 in training a telteng in S.Haijang leh Saipum khua a Joint Forest Management Committee te’n sing leh gua a suanna mun uh enkhe ding uhi.
Class X & XII 1st divn- te kipahpihna
Lamka, June-14: KSO/Henglep Sub-division te’n June 16, 2012 zinglam dak 10.30 in B. Vengnom Community Hall ah Henglep Sub-divn sung apan Class X & XII 1st division a passed-te kipahpihna programme zang ding uhi. Huchibang kipahpihna programme a neih uh 6veina hiding in kigen a,T. Manga Vaiphei,MLA (Henglep A/C) in a sponsore ding hi’n leng thutut kingah hi.
IWMP Awareness & Training
Lamka, June-14: SDO/BDO Henglep saina in June 15, 2012 in Leimatak ah IWMP tawh kisai Awareness & Training program om ding a, Demmang Haokip, Vice Chairman ADC/CCpur khuallian apang in hongkhe ding hi. Huai ah C.Hangshing, ED/DRDA, K.Hnunliansang, AE/DRDA, Letkholhun AE/DRDA, L.Premjeet Singh, AO/DRDA , Joycee Lalrinpui, PO/DRDA leh Hatzaching in thupi tuamtuam zangin sinsak ding uhi.
PTC Executive meeting om ding
Lamka, June-14: PTC office ah June 16, 2012 in PTC Executive Committee meeting 6 veina om ding a, huai ah Paite Nam sunga issue tuamtuam leh haksatna omte genkhawmna, leh maban ding ngentel taka sut khawmna nei ding uhi. Huai meeting ah YPA leh SSPP heutute ban ah PTC a CWC Chairman leh Vice Chairman-te leng telding in chial uh hi’n kigen hi.
UPF in HPC(D) makaite mat ngaisiamlou
Secretary,Info & Publicity/United People’s Front(UPF) in Press Release a suah kimu in a gen dan in Mizoram Armed Police(MAP) te’n June 10, 2012 in Silchar Airport ah HPC(D) C-in-C banah tulela UPF Vice President Lalropuia leh a Deputy Bieknung a mat uh lungkimlouh thu puangkawm in MAP te gamtatdan mawhpaih hi. HPC(D) pawl UPF atel organisation poimawh khat ahihban ah India govt leh security tawh kalah SoO suaikai hi uh a,huchi kalah MAP-te gamtatna khengval leh uanglua hi’n taklang hi.
UPF in a thiltup tungtun theihna dingin panlatou zel a,thiltup lawhchinna dingin India govt tawh kalah political thila kihouna kipat theihna dia panlak ahih lai in Mizoram police-te’ gamtatna in peace process hihse thei ding hi’n leng thusuak in gen hi.UPF in India govt leh Mizoram state govt in Front a Vice Chairman leh a Deputy khahkhe ding in ngen uhi.
SUUNNA
Mrs Niangchiin (92) m/o S. Kamkholian Ngaihte of Pumkhothong Steet, Central Lamka zan nitak dak 8:00 vel in cancer in si a, tuni’n Lamka hanmual ah kivui hi.
Mi 5 taikhiate lakah 4 matkik zawhin om
Aizawl Central Jail apan mi 5 taikhia
Aizawl, June-14: Court in case tuamtuam ziaka jail tangdia a thutankhum mi 5te zanhal nitak dak 10.15 velin Aizawl Central Jail apan taikhethei ua, Police te’n hahtaka a zon nung un mi 5te laka 4 te matkik zou uh a, himahleh a taikhete’ laka tel Burma mi khat bel tutan a omna theihlouh in omlai a, police te’n muanmawhna munmun dapkual lai uh chihthu om hi. Sairang Police Officer in Charge in a gendanin Central jail apan gamlalou Lengte khawmite’ panpihna ziakin mi 5 laka mi 4 matkhiak zawh hita a, kipahhuai mahmah chi hi.
Jail apan taikhia mi 5 laka 4 te tualthahna case ziaka damsung suangkulh tangdia thutankhum hi uh a, adang khat ahihleh kum 7 sung tangdia thutankhum a om ahi hi. Huai mi 5 te’n chabi bawltawm (duplicate key) nei in, a omna uh(cell) kalhna chabi hongthei uh a, huchi’n awlawl a kihemkhia in, a puansilh uh (blanket)-te uh zang in jail bang (prison wall) ah kiban galkai thei uh hi’n kigen hi. Aizawl police te’n security leh intelligence agency tuamtuam tawh kithuzakin mi khat omlai matna dingin nasatakin panla uh chih hi. Hun paisa ah leng mi 5 te’n taikhiak sawm in panla mahle uh jail vengtute’n a theihman ziakun taikhe theilou ua, tutungin bangchidan a taikhe thei mawk uhiam chih ngaihtuahtham ching chi uhi.
Jail apan taikhia mi 5te ahihleh, MD Mister (28) of Bihar, Kaplianthanga (29) of Mizoram’s Champhai, Budhi Joy Reang (20) of Tripura, Baire Reang (21) of Tripura leh Mauchi of Myanmar ahi hi. Mauchi ahihleh Joy Reang tawh kithuahthei mahmah hi a, numei sualluih(rape) ziaka court in kum 7 sung jail tangdia a thutan hi a, adang teng tualthah ziaka damsung suangkulh tangding ngen hi uhi. Mi 5te a taikhiak zawh uh minute 20 velin a taikhe utlou a lawmte un security guard-te kiangah thil omdan hilh uh a, tuazawh in jail apan a taikhia omlam theihin om phet chih hi. Jail authority te’n a gendan un, central jail ah security guard lam taksapna liantak om a, security guard khat in nitak chiangin ward 3 bang mawhpua ahih ziakin haksatna genvuallouh om sek chi uhi.
Md Ismat kipahpihna hun ah CM tel
Imphal, June-14: Central Board of Secondary Education(CBSE) saina a Class XII examna a topper hihna la Md Ismat kipahpihna in tuni’n Zenith Academy ah function om a, huai ah Chief Minister O. Ibobi khuallian in pang hi. CM in a thugenna ah Manipur ah laisiam hunkhop a om hun chiangin lemna leh muanna banah khantouhna piching om ding hi’n gen a, Md Ismat lawhchinna in Manipur min hoihsak hi’n leng gen hi.CM in a genzelna ah Md Ismat lawhchinna kipahpihna in cash award Rs. 5 lakhs piak ding banah a kaina school Zenith Academy thuneitute Rs. 10 lakhs piak ding a Manipur Cabinet in thupukna a bawl leng sepkhiak pah hiding chi hi. CM in Md Ismat adin amah discretionary fund apan Rs. 50,000 piak chiam a,Zenith Academy thuneitute leng Rs. 50,000 piak hidin gen hi.
MPCC in Rishang kikhoppih
Imphal, June-14: Manipur Pradesh Congress Committee(MPCC) in tuni nitaklam dak 3.30 in BT Road a Congress Bhavan ah Parliament kum 60 chin lopna a pahtawi a om Chief Minister-lui Rishang Keishing,MP(Rajya Sabha) vaidawnna kawmin kikhoppih uh a,huai ah Rishang in Congress ahih banah India mi ahih kipahhuai sakthu gen hi. Manipur mipite’n leng India mi hihdan theikawm a gam khantouhna ding leh muanna omna dia panla chiat dingin ngetna bawl hi.MPCC President Gaikhangam in a genna ah Congress senior leader
Rishang Keishing chihtakna Manipur a Congress makaite leh party member-te’n enton ding in deihthu gen a, CM O. Ibobi in Rishang chihtakna leh gin-omna party adia ditzawh vuallouh hi’n gen hi.
World Blood Donar Day kizang
Imphal, June-14: Tuni’n World Blood Doner Day kizang a, Manipur ah leng Manipur State AIDS Control Society leh State Blood Transfusion Council,Manipur saina in GP Women’s College ah zinglam dak 10.00 akipan in “Every blood donor is a hero” chih thupi a nei in kizang hi.Huai ah RIMS a Blood Transfusion a Head Dr A. Meinya in a genna ah Manipur ah sisan(blood) unit 27,000 poimawh lak ah tuni tan in unit 21,000 lel thawhkhawm hipan a,mi khat in sisan 3/4 vei tan thawh(donate) leleng bangmah a poina ding omlou hi’n gen hi.Tuni a Blood Donar Day kizang leng sisan thawhte pahtakna latsakna banah sisan piak a phattuamdan puanzakna kawm hi’n gen hi.
Home Minister in Cdo complex enkhia
Imphal, June-14: Home Minister Gaikhangam in tuni’n Minuthong a Commando complex mun vapha in thil omdan va enkhia a, huaizawh in aman Press-te kimuhpih in a thugenna ah Manipur ah sum dinmun haksat ziakin vasnzat(infrastructure) kul leh poimawh tuamtuam deih banga kaihkhawm zawh hinailou hi’n gen hi. Aman a genzelna ah Lamphelpat a Commando complex kibawl zawhsiang hunhun in Minuthong complex a om Commando-te
huai muna kisuan vek ding hi’n gen hi.Home Minister in Minuthong a Commando complex a phakna ah Principal Secretary(Home) Dr Suresh Babu,IAS leh Manipur DGP R. Baral,IPS banah top Police official hunkhop in zui uhi.
Semi-low Floor Bus service kipan
Imphal, June-15: Imphal khawpi leh a kimlak ah tuni apan Semi-low Floor Bus 10 in passenger service kipan uh a, tuni zingsang in Transport Minister Dr Kh Ratan Kumar in MSRTC complex apan flag-off(sawlkhia) hi. Minister in a gendan in tuni a service kipankhia pen etkhiandan hilai a, a lawhchin leh route tamzawsem ah leng service kipan ding chi’n gen hi. Route No. 1 MU-Koirenghei/BSF gate kikal ah Bus 4 service a, Route No. 2 Malom Bazar-Lamlong bazar kikal ah Bus 3 leh Route No. 3 Lamphel(DC/Imphal west office)-Parompat(DC/Imphal East office) kikal ah Bus 3 mah service hi. Zingsang dak 7:00 akipan dak 11.00 kikal leh sunnung dak 1.00 akipan nitaklam dak 5.00 kikal in dakkal 1 zel kihal in Bus pai a, bhara mi 1 ah Rs. 10 la uhi.
AK Sinha,IAS in join nawn
Imphal, June-14: Arun Kumar Sinha @ AK Sinha,IAS in Jharkhand state ah Inter-cadre deputation a kum bangzahhiam a sep nungin Manipur ah hong join nawnta a, govt in Special Secretary(Home) len ding in tuni’n order suah hi.Huailou in Smt Vandana Karki,IPS, SP/NAB in June 11-20, 2012 sung Earned Leave la in zinkhia a, amah omlouh sung in Smt Achin Haokip,MPS, SP(CID/CD) in SP/NAB mawhpuakna tawh lenkhawm ding chihthu om hi.
.