Minister kipahpihna leh Prize lopna
Lamka, June-30: Manipur Assembly election result puankhiak nungin 58-CCpur A/C a Polling Booth-wise a etin Zion Veng, New Lamka a Polling Booth No. 58/25(A) Room-1 & Room -2 in Congress adia vote a petam hihna atan ziakun bialtu MLA Phungzathang Tonsing, Minister(Health & FW, GAD & CADA) in kipah etsakna in INC Zion veng Unit khutah Rs. 50,000 pia a, tuni sunnung dak 1.00 in Centenary building, EBCC Zion ah Minister kipahpihna leh Prize lopna kithuah programme zang uhi.
Minister in gam khantouhna dingin kithutuahna poimawh pen ahihdan gen hi. Manipur ah Inner Line Permit(ILP) lakkhiak himahleh pawl tuamtuam in koih kiknawn ding in ngen uh a, tuni a Congress Legislature Party(CLP) meeting ah CM in koihnawn dinga pass dingin deih mahleh Centre govt. in poimawh a sakleh koihnawn ding in amau mahin a pass mai ding uh chi’n pang ahihdan Minister in gen hi.
CCpur district ah water supply hoihna ding ngaih poimawh masak hidin gen a, Zion Veng a PHSC ah kalnawn apan visiting doctor khat koih hidin leng gen hi. CCpur district ah privatized Hospital a om poimawh deuhdeuh ahihman in huai din panlak ahi chi a, New Lamka area ah Hospital om theihna ding ngaihtuah hi’n Minister in gen hi. Aman a genzelna ah Hospital a duty Doctor leh Nurse telin chowkider tanpha uniform tawh kithuam dingin thupiak hi uh a, damlou ki-ensak dingte’n doctor leh nurse duty-te tanpha thei khenlou uh ahihman in pilvan huai ahihdan leng gen hi.
Tuni a programme zatna ah Youth wing, Mahila Congress leh INC Zion Veng unit apan makaite’n hun sawtlou sung chiat thugen uh a, Mahila Congress Zion veng unit te’n special items lahna nei uhi. Pastor H. Laithang, Local Pastor, EBC Zion in Minister adia vualzawlna ngetna in thumsak hi. Prize lopna in INC Zion Veng unit in bawng khat gou in ankuang lui uhi.
VPC building honna leh MLA lopna
Lamka, June-30: Vaiphei Peoples' Council Gen HQ in Bethel Veng, New Lamka ah Vaiphei Community Centre ah VPC office building sawng 2na alam uh tuni sunnung in T Manga Vaiphei, MLA & Chairman MTDC in hongkhia a, Rev (retd) Laltingen in Pathian kiangah lan (dedicate) hi. Huai hun ah MLA chingthak T Manga Vaiphei kipahpihna leh thumsakna leng om hi. Khatkhotong Baite, President VPC Gen HQ in MLA chingthak kipahpihna in Khiangkoi puan T Manga leh azi Niangphal silhsak hi. T Manga Vaiphei in a thugenna ah, alawhchinna thuguk Pathian deihsakna ziak ahi chi a, kithutuahna in Nam khantouhna tun ding ahihdan leng gen hi. Tuni kikhopna ah Genneikhup Vaiphei, EM, ADC/CCpur ban ah VPC ex-President-te, YVA Gen HQ, Zillai Gen HQ leh VLS apan heutu tamtak leng tel uh a, nitaklam in ankuang lui uhi.
SBI te’n mun 2 ah vanzat ding pia
Lamka, June-30: SBI/Pearsonmun branch a Manager JC Bhunia leh staff-te'n tuni’n Pearsonmun khua a KV Agape School ah Steel Almerah 1 pia uh a, huai ah SBI/CCpur a Chief Manager leh SBI/Thanlon Branch a Manager tel uhi. Kaikhanthang,Chief Manager,SBI/CCpur branch in agenna ah July 1, 1955 in India ah SBI kipankhia a, kum tenga July 1 pen SBI Day in kizang gige hi'n gen hi.Student te'n nu-le-pa ban ah teacher te zahtak kawmin tununga officer lian hithei ding in kuhkal taka laisim dingin hasuan hi. Huailou in SBI/Thanlon branch te’n Kamdou Veng a Mercy Home ah panpihna in Solar light 1 pia uh a, huai ah SBI/CCpur a Chief Manager ban ah SBI/Pearsonmun branch a Manager leh staff te’n leng va uap uhi.
MLA in a seppihte meeting pih
Lamka,June-30: Ginsuanhau,MLA(Singngat A/C) in tuni’n Imphal apan Lamka hongpha in Lailam Veng a a tenna inn ah Singngat Assembly Constituency sunga a seppihte tawh meeting nei uh a, Singngat A/C tawh kisai in maban sep dingte leh Singngat bial masawnna ding tawh kisai ngaihdan genkhawm uh a, meeting zawh in an nekhawm uh chihthu om hi.
CDTA te’n PCG leh DCG sum pekhia
Lamka, June-30: Tuibuong a Dist Council office ah tuni in CCpur Dist Council Teachers AssnCDTA) te'n PCG leh DCG sum piakkhiatna program nei uhi. Huai ah Chairman ADC/CCpur in Lienkhuol T.Gangte, Henkham Kipgen, Helkholam , M.Nabakumar Singh leh Siempu Gangte kiang ah Pension cum Gratuity (PCG) Rs 1 lakh chiat pia a, Mrs Mannuamching, CEO in (late) Mrs Vungthansiam leh (late) K. Achung Kom innkuante kiang ah Death cum Gratuity(DCG) ah Rs 2 lakh tuak pekhia hi.
Police in hausa 5te Jail ah koih
Lamka, June-30: Tulai in khua khenkhat recognition bawlna dingin fake gazetted notification kizang hidan a DC in complaint a bawl pansan in Police te’n Onkholun Haokip (42) s/o(late) Thang-on of Dist HQ,Tuibuang; Sangboi Khongsai (40)s/o (late) Laltinkam of Tuijang; Laltinkhai Khongsai (40) s/o(late) Letkholun of Kholunphai; D.Jangkhongam Haokip (58)s/o (late) Thongkhosei of L.Molvom leh Henneihao Khongsai (59) s/o(late) Helthang of Joljam mankhia uh a, CJM Court in ni 4 sung Police custody a omdia a phalsak nung JCM in tuni’n Judicial custody(jail) a omding in thutan khum a, Police te’n hausa 5te jail ah koih uhi. Police te’n huai thu ah FIR No.63(6) 2012 CCP PS U/S 406/420/468 IPC registered uhi.
GSO in kipahphna programme zang
Lamka, June-30: Gangte Students’Organisation/ CCpur district in tuni in KKL complex ah Gangte nam sunga Class X leh Class XII exam a lawhchingte kipahpihna program nei uhi. Huai ah Haopu Gangte in Guest of Honour hihna tawh uap in lawhchinna ngahte kiang ah certificate pekhia hi. Tutung in GSO/CCpur dist nuai ah mi 28 in Class X passed uh a, huaite lak ah 1st divn ah mi 18 leh 2nd divn ah mi 10 in passed uhi. Class XII ah mi 9 in 1st divn in passed uh a, 2nd divn a passed bel omlou hi’n kigen hi. Upa Soilam Gangte in a lawhchingte adin thumsak hi.
Faith Healer-te adi’n Sensitization
Lamka, June-30: District AIDS Prevention and Control Unit/CCpur-te saina in tuni in Dorcas Hall a Semi Auditorium ah “One day Sensitization Training Program for Faith Healer of the District” kichi om a, DC/CCpur in hong ding chih himahleh a teltheihlouh ziakin Rev. N. Thawndoulian, DS/EBC Lamka South in thumna tawh hongkhia hi. Huai hunah Dr. HL Liensang, CMO/CCpur in keynote address gen a, Dr. VC Pau Tonsing, DFWO/CCpur in HIV/AIDS veite kep leh kithuahpih dingdan telin amaute panpih dingdan sinsak hi. Rev. V. Khamvum, M.Div, MET(Holland) in HIV/AIDS tawh hinkhua zangte etkol dingdan leh amaute lungsim dam taka panpih theih dingdan sinsak hi.
Contractors Assn. vaipaw thak tel uh
Lamka, June-30: CCpur District Contractors Association(CDCA) pawlin tuni in T.Kaigou tenna inn ah kum 2012-2015 sunga vaipaw ding tel uhi. President in T.Gouzadou, ex-Minister, Vice President in T.Langel, Gen Secy in Paokholal Haokip, Joint Secy in N.Sanga, Inf Secy in Holjang Lhungdim, Finance Secy in P.Tongthang Zou leh Treasurer in K.Hnunkhum telching uhi. CCpur Dist Contractors Assn. ah member 70 vel om hi’n kigen hi.
JNV a class VI adin mi 40
Lamka, June-30: Rayburn H/S New Lamka ah Feb 12, 2012 in JNV/Tuinom ah academic session 2012-2013 a Class VI sin ding lakna ding Entrance Test om a, huai result puankhiak in omta hi. Thu kingahdan in Urban open seat ah mi 6 hing uh a, Urban SC Quota ah mi 1 lawhching hi. Urban ST Quota seat ah mi 3, Rural seat ah mi 14, Rural SC Quota seat ah mi 5, Rural ST Quota seat ah mi 11 avek a gawm in mi 40 lawhching uh chi’n thutut kingah hi.
Christian Book Festival kipan
Lamka, June-30: Tamil Nadu state sung a dia laibu zuaktu minthangpen pawl a kigen Beautiful Books te' saina in Hiangtam Lamka a YPA GHQ Hall ah zan in Christian Book Festival 2012 kipan a, July 1, 2012(Pathianni) tan om ding hi. Huai ah Chennai a Beautiful Books te'n Pathian thu tawh kisai laibu tuamtuam mantawm chikchik in zuak uh hi’n kigen hi.
Assembly Session sunzom ding uh
Imphal, June-30: Manipur Assembly Monsoon Session apaisa June 27, 2012 akipan ni 2 siting om nungin June 29-July 1,2012 tan ni 3 sung khawl ding uh a, July 2,2012(Seppatni) zinglam dak 11.00 in sunzom ding uhi. Huai ni in Finance tawh lenkhawm Chief Minister O. Ibobi in House ah kum 2012-2012 sunga sum zat ding(Budget Estimates,2012-2012) luikhe ding a, July 3,2012 in huai genkhawmna(general discussion) om ding hi.
Old Age Pensioner 72,191 om
Imphal, June-30: Centre in Old Age Pensioner-te panpihna dingin Manipur a Social Welfare deptt tungtawn a panpihna(grant) a piak mi(beneficiaries) 72,191 om hi’n kigen hi. Indira Gandhi National Old Age Pension Scheme kichi kum 56 sanga upazaw leh kemtu ding neiloute ading chih hi a, huai dingin India govt in kha tengin beneficiary khat tungah piak dingin grant Rs. 200 zel bikhiah a, state govt in huaizah mah behlap in khateng a tarik 7 tan in Rs. 400 piak ding chih hi’n kigen hi.Huai grant sumte state govt in thildanga zat din a heikoi(divert) theihlouh ding chih hi’n kigen hi. Manipur ah August 1995 akipan in huai scheme kizang hi’n leng thutut kingah hi.
AMHCBLA te’n govt thutawp pia
Imphal, June-30: All Manipur Hills Contract Basis Lecturers Assn(AMHCBLA) thusuak in a gendan in contract basis a sem dia govt tawh kithukimna a bawl uh Feb 28,2012 in bei mahleh academic session laklawh laitak ahihziakin student-te khualna in nasem uh a,tu’n kha 4 hial chingtou mahleh govt in contract period behlap(extend) ahih nailouh ziakin Govt in July 10, 2012 tan in contract period behlapna order suah dingin theisak uhi.Huailou in renumeration leng kha 1 ah Rs. 13,700 zel hiding chih himahleh Rs. 8,000 lel piak hi uh a,govt in a samlaite July 10, 2012 tana pekim dingin theisak hi.
July 10, 2012 tana Govt in ahih buchin dinga condition a bikhiahte uh pichin ahih keileh AMHCBLA pawlin July 15, 2012 akipan in ceasework strike pan ding uh a,huai hunsunga thiltung a om leh govt in mawhpaw ding hi’n taklang uhi.
Menchim ziakin Gari tamtak tang
Imphal, June-30: Imphal-Jiribam lamlian a Muku akipan Imphal lam km. 4 vela gamla ah feet 30 vela sau menchim om ziakin Jiribam akipan Imphal lam zxuan Gari tamtak paisuak theilou a tang(stranded) a, menchim in a dal ziakin vanpua gari tuamtuam 450 vel paisuai theilou in tutan in tanglai uh chihthu om hi.
Original marksheet laktheih ding
Imphal, June-30: Council of Hr Secondary Education Manipur(CoHSEM) office ah tuni akipan in Higher Secondary/Class XII (Compartmental) Examination,2012 a original marksheet hawmkhiak(issued) kipan a, akisaipih Institution tuamtuam a Head te’n office kaihun sunga lathei dingin Controller of Examinations, CoHSEM in theisak hi. Private candidate te’n leng admission card pawkhia(produce) in marksheet lathei ding uh chihthu om hi.
.