Naupang 1 tuikulh(well) feet 30 ah kia in silou
Lamka, June-16: Kum 1 leh kha 9 a upa Manhoihching d/o V. Tualkhansong of Mission veng, Hiangtam Lamka tuni sunnung dak 1.30 velin a inn gei ua tuikulh(well) feet 30 vela thuk ah kia a, tui tawi dia kisa a innvengte uh khat in tuikulh sunga om mu in hun sawtlou nungin lakhe thei uh a, dist. hospital puaktung ahihnung in a dinmun hoihtou zel hi’n kigen hi. Thutut kingahdan in huai thiltun hunlai in a innkuanpihte innsung lamah om uh hi’n kigen hi. Aman bangchichi hiam in tuikulh ah kaltou thei a,tui tawi dia kisa khat in tuikulh feet 30 vela thuk sunga tui tamtak tunga kilam mu in kikou zak hi’n kigen hi.
Huai theihphet in a pa’n delhpah in sawtlou sungin naupang tuikia kai khethei a,inn-mun ah hun bangtanhiam a etkol nung in Dist. Hospital puaklut in om a, nitaklam in a dinmun hoih hiaihiai chihthu kiza hi. Manhoihching tui lakah hunsawt a omlouh ziak in naksam manlou hi’n kigen a, oxygen leng bulh ngailou hi.
1st division a Class X & XII passed-te kipahpihna om
Lamka, June-16: Tuni zinglam dak 10.30 in B. Vengnom Community Hall ah Henglep Sub-divn sung apan 1st division a Class X & XII passed-te kipahpihna programme zang uh a, T.Manga Vaiphei, MLA (Henglep A/C) & Chairman,MTDC khuallian in pang hi.Huai ah Functional President in Demmamg Haokip, Vice Chairman ADC/CCpur pang a, Guests of Honour in Thangmang Haokip, MDC leh Paolal Haokip, MDC pang uhi. 1st division a Class X pass mi 63 leh 1st division maha Class XII passed mi 55 te Rev T.Kamgin Gangte in vualzawlna ngetsakna thumna nei hi. Class X & XII a lawhching teng T.Manga Vaiphei in Rs 1500 + certificate 1 chiat pia a, Class XII passed-te lak ah Manipur a top 20 laka telpha Elizabeth Kamei kiang ah Rs 3000 + memento + certificate pia a, Lungmei Lungjangaipou kiang ah Rs 5000 + memento + certificate a piak ah Class X a top 20 laka telpha Kamei Abel kiang ah Rs 3000 + memento + certificate pia hi.
T.Manga Vaiphei in agenna ah kumdang in Henglep A/C apan Manipur a top 20 laka telpha kuamah omlou a, tutung in top 20 laka tekpha a om kipahthu gen hi. Kipahman sangthei ding student neikha nu-le-pate mi hampha hi’n gen a, nu-le-pate’n tate laisimna ding in gentheihna tamtak thuak uh ahihdan student te’n mangngilh lou ding hasuan hi. Class X leh class XII zousa student te’n maban ah laisim ding tamsem om ahihdan theikawm in kuhkal, chihtak leh tupguh neikawm a laisim ding leh nu-le-pate ban ah Pathian phawk ding in leng student-te hasuan hi. Aman a genbehna ah Henglep A/C sung a MDC 4 te leh KSO/Henglep sub divn makaite tawh kithuzak in maban ah 1st divisional kia hilou in select bawlkhiat a, kipahman(cash award) leng kilawm hunkhop bikhiah hiding in gen hi.
Demmang Haokip in a genna ah student- te’n mahni pianna nu-le-pate zahtak leh Pathian laukawm a laisim dingin thuhilh a, student te’n a signature uh mipite’n a hamphatpih phak ding tana laisim ding in hasuan hi.
Henglep sub-division ate’n kipahpihna programme a neih uh tutung apen a 6veina hita a, T. Manga Vaiphei, MLA(Henglep A/C) in a sponsore hi’n kigen hi.
TRABDA Video CD honna om
Lamka, June-16: IB road a KKL complex ah tuni zinglam dak 10.00 in Tipaimukh Road Area Business Development Assn (TRABDA) pawlin Video CD cassette a bawlkhiak uh Lalhmangpui, ADC(Pherjawl) in khuallian apang in hongkhia a, TRABDA panpihna ding in CD cassette khat Rs. 2000 in leisak hi.
TRABDA pawlin maban a zuih ding thu poimawh tuamtuam genkhawm uh a, Tipaimukh line a gari tai teng in TRABDA ah min khumlut dinga theisak kawmin, TRABDA thusuak zuiloute’n vangsiatna banghiam a tuah hun uah leng ngaihsak hilou ding uh chi’n puang uhi. TRABDA pawlin Laitui Medico kiangah huai line a gari taiteng ading ticket lakna counter khat kia koih ding uh hi’n kigen hi.
DC leh GOC in uap ding uh
Lamka, June-15: Gospel for India-te saina in June 18-23, 2012 sung Rayburn College ah ‘Vacation Children Development School(VCDS)’ kichi omding hi. June 18, 2012 zinglam dak 11:00 in Ms Jacintha lazarus, IAS DC/CCpur khuallian a pang in VCDS hong ding a, Rev Vungminthang, Director of Insitution, EBC in Pathian kiang ah latna neiding hi. VCDS om sung in Dr Jamzathang, Langkhanpau Guite, Chairman ADC/CCpur, David K.Zote, Dy Register MU leh Rev Khen P.Tombing, Chief Co-ordinator./PCI (R) te’n thupi tuamtuam pansan in sinsak ding uhi. June 23, 2012 sun dak 12:30 in hunkhakna program om ding a, huai ah Maj Gen. Binoy Poonnen, VSM, GOC 57- Mountain Divn khuallian in pang ding a, Rev Khen P.Tombing in thumna in VCDS khak ding hi.
Lions Club te’n tui dawn ding koih
Lamka, June-16: Lions Club of CCpur Greater te’n Tedim Road a JP Selection(dukan) ah dangtakte khualna in tuisiang dawn ding koihna(portable pure drinking water storage facility) khat koih uh a, huai June 17,2012(Pathianni) nitaklam dak 3.00 in honna(inauguration) om ding hi.Phatuamngai kuapeuh in tui duh a dangtakte khualna in huai ah dawn ding tuisiang (mineral water) thawh(contribute) chiat sawm dingin Lions Club of CCpur Greater a President Lion T. Gouzadou in ngetna bawl hi.
Khemzawh a omlou din theisak
Lamka, June-16: Mi khema sum laksak ching mihoihlou(criminal) te’n Bank a account nei khenkhat khemzou in bank account akipan sum tamtak laksak sek uh a,huchibang mite apan pilvang dingin S. Kaikhanthang, Chief Manager, SBI/CCpur Branch in SBI a account neite theisak hi. Chief Manager in SBI a account neite’n mobile SMS hiam, ahihkeileh e-mail tungtawn in “lottery na man”, “sepna na mu” chih hiam “sepna kon ngaihtuahsak thei ding” chi a kikhemnate limsaklou ding in theisak hi. SBI a customer/account neite’n mahni ATM card,PIN number,mobile banking password leh internet banking password leng kuamah theisaklou ding in zasak hi.Mi hunkhop khemzou a sum tamtak laksak sek criminal-te apan kuapeuh pilvang dia deihna ziak leh mipi khualna in huchibang thupuan poimawh bawl ahihdan Chief Manager gen hi.
Justice S.R Sen in Lamka pha ding
Lamka, June-16:Gauhati High Court, Imphal Bench a Judge-te laka khat Justice S.R Sen, June 17, 2012 in Lamka hongpha ding a, June 9,2012 asi Lammalsawm(22) s/o Justice T.Vaiphei, Judge, Guwahati High Court, Imphal Bench hong gal ding a, amah June 18, 2012 in kiknawn ding hi’n kigen hi.
PTC Executive meeting om
Lamka, June-16: Hiangtam Lamka a PTC office ah tuni in PTC Executive Committee meeting 6veina om a, huai ah Paite Nam sunga issue tuamtuam leh haksatna omte genkhawm in maban ding ngentel taka sutkhawmna leng nei uhi.Huai meeting ah YPA leh SSPP heutute ban ah PTC a CWC Chairman leh Vice Chairman leng tel uh hi’n kigen hi.
HSLC(Compartment) adia Admit Card
Lamka, June-16: Lamka Central School,IB Road ah June 22, 2012 in HSLC Compartmental examination 2012 om ding a, candidate teng in mahni school chiat ah June 20, 2012 apan in admit card laktheih ding chi’n Officer incharge, HSLC(Comparmental) Examination 2012 apan kiza hi.
Tempawng in a khuk satkha
Lamka, June-16: Lamthang (55) h/o Hoihnu of S. Gangpijang in kal Nilaini paisa in a gamvakna a singzawl a satna ah akhuk satkha a, a liamna a serious deuhdeuh ziakin tuni’n Lamka a dist. hospital ah admit in om hi.
Jumble Sale omding
Lamka, June-16: Baptist Youth Fellowship(BYF), Central Lamka te’n hotdamna chialpi camp neihsawm uh a, huai ding a fund raising bawlna kawm in June 18, 2012 zinglam dak 10:00 apan in EBCC Central Lamka biakinn huangsung ah Jumble Sale neihsawm uhi. Jumble Sale hun ah silh-le-te’n , um-le-bel (utensil) ban ah computer tanpha kiman tak in zuak hidin gen uhi.
Hiangtam Lamka Dorcas khawmpi
Lamka, June-16: Baptist Dorcas Fellowship(BDF) Hiangtam Lamka pawlin zanhal nitak apan Tualsung Dorcas Khawmpi nei uh a, Local Pastor V. Jamkhanthang in hongkhia in Gouzavung in thugen hi. Huai khawmpi ah Hiangtam Lamka sunga numei pawl tamtak kihel in tuni nitakin khawmpi zou uhi.
ZRO/ZRA akipan in tawpsak
Sr Director(Ops),Ministry of Defence, ZRO/ZRA in thusuah a bawl dungzui in Sergeant David K. Ngaihte in Zomi nampi adia nasemte’ zuih ding dan(rules & regulations) kibawlte a bawhsiat ziakin Defence Secretary,ZRO HQ thupiak bangin tawpsak(dismiss) hi’n puang a,tuni a tawpsakna Order a suah tawh kiton in tawpsak hi’n leng taklang hi.
Imphal ah SBI Regional office
Imphal, June-16: Imphal ah May,2012 akipan in State Bank of India(SBI) Regional office(Region-V) kihong thak a,tulelin James Thatlinga,Asst Gen Manager(RBO) in Regional Manager(Region-V) len hi. Manipur ah SBI branch kibehlap zungzung in tu’n branch omteng 27 hita a, May 2012 khasung lelin leng Branch 2/3 kihongthak hi. Tuma in Regional Manager(Region-V) in Shillong a office nei in Manipur a SBI branch omte enkol a, hileleng May 2012 akipan Imphal ah Regional Manager’ office hong kisuan in tu’n Manipur a SBI branch omte kia sai ding hi’n kigen hi.
Kekrupat ah suunna leh zahna
Imphal, June-16: Manipur gam leitang kekzak ding deihlouh ziakin June 18, 2001 in Imphal leh Manipur phaijang bial a buaizak lai a si(martyr) 18te sunna leh zahna piakna kawm in June 18, 2012 in Kekrupat a Martyrs memorial mun ah zahna pak piakna(floral tributes) leh sunna hun zat hiding hi.UCM in ‘The 11th Great June Uprising’ minvuah in zingsang dak 5.00 akipan nitaklam dak 6.00 tan programme zat hiding in puang uh a, AMUCO makaihna in Kekrupat ah suunna leh zahna piak zawh in ‘The 11th Unity Day’ chih minvuah in THAU Ground ah mipi kikhopna om ding hi’n thutut kingah hi.
ZYF in UNC bandh support-lou
Imphal, June-18: United Naga Council(UNC) pawlin Manipur a Naga mite tenna bialteng Manipur govt nuaia om hilou kivaihawmna ‘alternative arrangement’ kichi Centre in pedia phutna in tuni zankim akipan in June 18, 2012 zankim tan Manipur ah Naga mite omna bialteng ah Total bandh puang uh a, All Naga Students’ Association Manipur(ANSAM) pawlin leng huai support thu puang uhi. Hileleng Zeliangrong Youth Front(Assam,Manipur & Nagaland) pawlin UNC panlakna a bandh om support lou ding uh hi’n puang uhi. ZYF thusuak in a puandan in UNC pawlin hun paisa ah leng ZYF thulaklou leh nelhsiah uh ahihdan puang uhi.
Case 2118 apan Rs. 2 lakhs mukhia
Imphal, June-16: Imphal West district Police te’n June 4, 2012 akipan in khawpi sung mun tuamtuam ah Mobile Check Post hongkhia in Special Drive pan uh a, license tellou ahihkeileh kum chinglou a gari hek, registration certificate telloute, insurance certificate tellou,mi tamlua tuangkhawmte,zu hiam drug khamkawm a gari hek, gari hek kawma mobile phone zangte leh gari a tinted glass kithuahte checking bawlin dan dawhsia hunkhop mankhia uh chihthu om hi. Police te’n huai tawh kisai in June 4-9, 2012 sungin case tuamtuam 2118 akipan in sum a liausak uh(fine) kigawm 2,83,000 val pha hi’n kigen hi.
Class XII(compartmental) exam
Imphal, June-16: Council of Hr Sec Education Manipur(CoHSEM) saina in June 19 & 20,2012 in Class XII/Hr Sec Compartmental Examination,2012 om ding hi.June 19, 2012 in theory a subject teng exam hiding a,June 20, 2012 in practical a subject te exam hiding chi’n Controller of Education in thusuah hi. CC Hr Sec School, TG Hr Sec School, Johnstone Hr Sec School, Ibotonsana Girls’ Hr Sec School leh Jiribam Hr Sec School ah theory subject-te exam hiding a, TG Hr Sec School leh Jiribam Hr Sec School ah practical subject-te exam ding uhi.
Hand-grenade khat paihkhum
Imphal, June-16 : Imphal East district sung Wangkhei Ningthem Pukhri Mapal a om Y.Amungcha (55) s/o Kunjo tenna inn ah tuni zingsang dak 4:50 velin meltheihlouhte’n Chinese hand-grenade khat paihkhum uh a, hileleng puaklou hi’n kigen hi. Inn-neite’n police ah report bawl uh a, Police te’n kintakin lakhia uh chihhu om hi. Thudang kizadan in Imphal East Commando pawl leh 30-Assam Rifles kithuah in tuni zinglam dak 8:00 velin Khurai Popular High School kiang ah PLA 1 mankhia uhi. Amah Myanmar ah training zou ahih banah mipi leh govt employee-te lan apan party sumkhon apang hi’n kigen hi.
MCS Officer 4 kaisang
Manipur govt in MCS Officer 4 kaisang sakin MCS(grade-II) akipan in MCS(Grade-I) ah kaisang sak a, huai tawh kitonin lawh(payscale) leng Rs. 15,600-Rs. 39,100+grade pay Rs. 6,600 per month muding uhi. MCS Officer 4te leh tulela a posting-na uh anuai bang hi.
1.L. Ibobi Singh, Under Secy(Social Welfare)
2.Kh.Kunjabihari Singh,Dy Director,CAF & PD
3.Chongpu Kipgen,CEO, ADC/Kangpokpi
4.Kh. Ibotombi Singh,SDO/Tadubi.
.