Inter-State Council member dingin Mizoram CM telkha
CWC ah Sangliana min genkhak hilou -Lal Thanhawla
Aizawl, June-13: New Delhi a Chief Ministers’ meeting banah Budget tawh kisai leh Union Planning Commission tawh meeting dia zin Mizoram Chief Minister Lalthanhawla in azi tawh kal khat val New Delhi ah ava tam nungin zan in Aizawl tungkik hi. A zinkhiak sung in India President telna ding tawh kisai in Mizoram ah gen-le-sak ana tam mahmah ziakin zan a Aizawl a tunkik zawh sawtlou in a official bungalow ah press meet sam hi. Huai ah Delhi a Congress Working Committee (CWC) meeting hunah July 2012 chianga India President thakding telna ding ah National Commission for Minorities a Vice-Chairman HT Sangliana min leng genlat a om taktak mah hiam chih dotna om Lal Thanhawla in adawnna ah Congress Working Committee meeting hun ah HT Sanglian min kuama’n genkha lou a, CWC meeting genlouh Delhi ah kuama’n Sangliana min genlang khalou himhim ahi chi hi.
Thudang kizadan in Central govt in Inter state council’ a bawlkhiak ah standing committee member dingin Chief Minister Lal Thanhawla leng telkha chihthu om hi.
Chief Minister in thudang agenna ah Mizoram in Planning Commission apan kum 2012-13 adia Annual Plan sum a ngah dia bikhiah Rs. 2100 crore hi a, tua zawhin lampi puahna dingin Rs. 200 crore a nget beh Finance Commission in a phalsak in tu’n Rs. 2300 crore gtungtou thei chi hi. Mizoram ading in Finance Commission official-te a kihong mahmah ua, banghiam a gen chiang un nuih mai kawmin Mizoram phat-huai a sakdan uh nak gen uh a, kou leng ka kipak ua, amau leng a kipak mahmah uh chi’n Lal Thanhawla in gen a, NLUP ading liauliau in leng budget ah Rs 400 crore hon guansak uh chi hi.
Tuivai Hydel Project tawh kisai bangkim felta ahihdan Chief Minister in gen a, huai project tawh kisai tender sap hi a, huai dawnna Company lian 7 in pia uh a, tu’n bangkim chiangvekta in kilang a, contractor ding telkhiak nung khathak July in Union Minister in foundation stone hong ding chi hi. Mizoram a Autonomous District Council 3 omte’ ngetna tawh kisai agenna ah, Centre apan direct funding a ngen ua, state govt in leng centre ah recommend sak chi’n gen a, hileleng hun ala laiding chi hi.Huai ding in Indian constitution a 6th schedule amendment bawl masak leng poimawh ding chi hi.
Thudang kizadan in Central govt in tuma zeka abawlkhiak Inter state council’ standing committee member dingin Mizoram Chief Minister Lal Thanhawla leng guang uhi. Inter-State Council ahihleh Union Home Minister P. Chidambaram in Chairman ahihna nuai a Committee poimawh mahmah hi’n kigen hi. Union Finance Minister Pranab Mukherjee leh Agriculture Minister Sharad Pawar banah Minister 6 tel uh a, Lal Thanhawla telin state tuamtuam apan Chief Minister 9 leng tel uhi. Hileleng North-east bial apan Mizoram Chief Minister Lal Thanhawla kia telkha hi’n kigen hi.
DC in office leh farm enkhia
Lamka , June-13: Ms Jacintha Lazarus, IAS DC/CCpur in tuni sunnung in Pangjawl khaw gei a Sericulture deptt-te Farm enkhia a, huai zawh in SDO/CCpur office pha in office nasepdan enkhia hi. Huai hun ah S.Khaikhopau Ngaihte, BO HQ, DC’s office leh staff mi bangzahhiam in DC zui uhi. DC/CCpur in kalnawn sungin office tuamtuam visit nawn ding hi’n kigen hi.
Police-te’n special drive sunzom
Lamka June-13: Police te’n zan apan khawpi sung mun tuamtuam ah special drive pan uh a, tuni’n leng sunzom uhi. Amau Gari a glass vom thuah(black tinted filmed glass), gari document omlou, registration omlou, driving licence neiloute leh kumchinglou a gari hekte check bawl uhi. L.Mangkhogin, IPS, SP/CCpur in a gendan in khawpi sung leh akim ah tulai in sualna uang semsem a theih ahih ziakin huaite hihkiamna ding leh mipite bitna ding khualna a special drive kibawl hi’n gen hi.
Leijangphai ah inn 1 kangtum
Lamka, June-13:Thanlon bial Leijangphai khua a om PC Lala’ inn zan nitaklam dak 3.00 velin kangtum a, innsung a om TV, Solar, puankhuina khawl 2, buh hum leh zuak dia a koih uh van tamtak kangtum chihthu om hi.Meikuang kipat tunglai in inn-neite kuamh a omlouh ziakun meikuang kipatna ziak thei omlou hi’n gen uhi. Vungzagin Valte,MLA(Thanlon A/C) in huai thiltung a theih phet in a nominee leh worker khenkhat thil omdan enchian ding leh panpihna pekawm din sawl a,amau zan mahin Leijangphai khua vapha uh a antang bag 3,chini bag 1 leh zanpuan vapia uh chih thutut kingah hi.
P Biakkim in Ph.D (Museology) ngah
Lamka, June-13: P Biakkim d/o (late) Thualdong Hangzo of Siloam Veng, Bungmual tulel a Nongthymmai, Shillong a om in, New Delhi a National Museum Institute of History of Art, Conservation and Museology apan in Ph. D (Museology) ngah hi. A Thesis "Cultural perspective in museum education – strategies and philosophies (With Special Reference to Manipur State Museum) ahi hi.
CCpur district ah Police kichinglou
Lamka, June-13: SP/CCpur in a gendan in CCpur dist ah Police personnel 890 om ding lak ah tulelin 474 kia om hi’n gen hi. Huaiziakin Police personnel 416 vel kisamlai a, huaite pasal lam ah Inspector 1, Sub- Inspector (SI) 25, Asst Sub Inspector (ASI) 24, Head Constable 60 leh Police Constable 253 ban ah numei lam ah ASI 2, Head Constable 1 leh Police constable 49 hi’n gen hi.
Covenant te’n kipahpihna neiding
Lamka, June-13: Covenant Children’s Home Managing Board, staff leh naupang te’n tukum a Class XII zouthak mi 7 khakkhiakna leh Class X examna a lawhchingte kipahpihna in June 19, 2012 zinglam dak 11:00 in New Lamka YPA Hall ah programme zang ding uhi. Huai hun ah Rev Khen P. Tombing in graduation hun zatpih ding a, Rev. Kham T. Valte in Graduate thakte kipahpihna sai ding hi. Pastor G. Suanzalam in student lawhchingte adingin thumsak ding hi.
Mega Life Camp kipan
Lamka , June-13: Bungmual a Lametna mun ah EBC Gen HQ, LRRC, GBC Home Base Care te’ pangkhawm in Mega Life Camp a sai uh zan nitaklam dak 6:30 in Rev K.Mangte, Principal GBC in hongkhia a, huai camp 1st batch ah Imphal divn leh Lamka North divn akipan mi 50 tel uhi. June 14, 2012 tan Orientation Program neiding uh a, Langzachin, Project Co-ordinator, LRCC in sinsak ding hi.June 15-19, 2012 sung chialpina om ding a,
Rev Ginmalsawm, DS/Singngat leh Suankhanhau, Lecturer GBC te’n Pathian thu gending uhi. Huaizawh June 22-30, 2012 sung Mega Life Camp 2nd bath om ding a, huai ah Lamka South leh Singngat divn tel ding uh hi’n kigen hi.
NMMI tawh kisai training
Lamka, June-13: District Officer(Hort & SC)/CCpur saina in National Mission on Micro Irrigation(NMMI) tawh kisai ni 2 sung traning programme om ding hi. Ms Jacintha Lazarus,IAS, DC/CCpur in Chief Guest a pangin June 14, 2012 zinglam dak 10.00 in Hiangtam Lamka a PTC Conference Hall ah training hongkhe ding hi.
T.Manga in sigalna bawng 1 gou
Lamka, June-13: T. Manga Vaiphei, MLA & Chairman,MTDC in tuni’n Lamka hongpha a, June 9, 2012 asi Lammalsawm(22) s/o Justice T. Vaiphei,Judge- Guwahati High Court, Imphal Bench galna in bawng 1 gou hi.
Mi mi 4 liam Hospital ah admit
Lamka, June-13: Niangngaihching (30) w/o Kambiaklian of Mata tuni zinglam dak 9.30 velin mei tawh dia kisalai meikuang in jerikan tin sunga khawnvaktui(kerosene) kikoih peh in a mai leh a awmlak teng halkha nasatakin liam hi. Huailou in S. Lucky (7) s/o S. Jadhumani of Khumajamba Meitei Leikai tuni sunnung dak 1.00 velin a tenna inn uah vok-an dia kihuan tuisou in buakkha in a kawngbom lakteng liam hi. Thudang kizadan in tuni sunnung in Activa a taite’n Diren (55) s/o (late) Bishejor of Torbung phukha uh a, amuk leh awmlak liam a, huailou in Mangmuan(55) w/o (late) Paupi of Rengkai tuni sunnung dak 2.00 velin a inn ua ceiling bawllai kia in liam hi. Aliamteng Dist Hospital ah etkol in om uhi.
India President in lemsakna suaikai
Imphal, June-13: Manipur, Meghalaya leh Tripura state in High Court tuam chiat a neih theihna ding un Parliament in Bill passed a, huai ataka sepkhiak theihna ding in India President Pratibha Devi Singh Patil in lemsakpihna suaikai khin hi’n kigen hi.Manipur ah High Court building omsa ahihman in October,2012 vel akipan in High Court tuam om theita din kigen hi. All Manipur Bar Asssn(AMBA) pawlin High Court a Judge om ding 7 lakah Manipur a lawyer/advocate-te laka chitna neite kia lak ding in phu uh a, state dang hiam Court tuam apan Judge dang hongpai ding deihlouh thu puang uhi.
Rishang vaidawnna om ding
Imphal, June-13 :Chief Minister-lui Rishang Keishing, MP(Rajya Sabha) in Parliament ah pahtakna piak ahih kipahpihna in BT Road a Congress Bhavan ah June 14, 2012 nitaklam dak 3:30 in Manipur Pradesh Congress Committee(MPCC) in kipahpihna leh vaidawnna hun zatpih ding hi.
Governor in Award piakna uap
Imphal, June-13: All Manipur Entrepreneurs Assn(AMEA) pawlin Classic Hotel ah Governor’s Best Entrepreuner’s Award leh AMEA Outstanding Award,2011-2012 piakkhiakna function a neih uh Manipur Governor Gurbachan Jagat in khuallian a pang in uap a, aman Award tuamtuamte pekhia hi.Governor in a thugenna ah masawnna ding leh khantouhna ding in Entrepreneur-te’n dinmun poimawhtak tang uh hi’n gen a,enterprise tuamtuam nei leh asemte’n mahni kitoudelh zawha dinga kuhkal tana panla din leng hasuan hi. Governor in kumthak akipan Governor’s Best Entrepreuner’s Award ngahte cash award Rs. 50,000 leh AMEA Outstanding Award ngahte Rs. 20,000 in zui ding hi’n gen hi.Tuni a programme zatna ah K. Govindas,Minister(Commerce & Indus) leh O. Nabakishore,IAS, Principal Secy(Commerce & Indus) leng tel uhi.
Manipur Cabinet meeting om
Imphal, June-13 :CM’ Cabinet Secretariat ah tuni nitaklam dak 3.00 akipan in Cabinet Meeting om a, huai ah Centre in Manipur adia Annual Plan a bikhiah Rs. 3500 crores tawh kisai genkhawm uh a, department teng adin sectoral allocation leng bawl uhi. Huailou in kum 2008 a numei constable(women police constable) recruitment a om Assembly election lai velin final result suak mahleh post awng zah sangin 24 a tamzaw lak hi a, aval 24 kilate bang lawh ding hiam chih sawtkuamtak a genkhawm nung un Havildar a post awng 24te hiai adia heikoi(divert) ding in thupuk uh chihthu om hi.
Tata Magic in nupi 1 phulum
Imphal, June-13 : BT Road a Temporary Market Shed kiangah tuni zingsang dak 5:00 vel in Tata Magic (No. MN-OIX/0502) in lamlian a pailai AK Devi (70) w/o Ibohal of Wangoi Wahengbam Leikai phukha a, kintak in RIMS a puaklut nung in Raj Polyclinic a etkol dingin refer himahleh dam zoulou in si chihthu om hi.
Transport Minister in flag-off ding
Imphal, June-13: Imphal khawpi leh akimlak ah June 14, 2012 akipan in route tuamtuam 3 ah Semi-low floor Bus 10 service kipan ding a, Transport Minister banah United Metropolitan Transport Authority a Chairman Dr Kh Ratan Kumar in June 14, 2012 zinglam dak 8.00 in MSRTC complex apan sawlkhia(flagoff) ding hi. Route No. 1 a service te’n Canchipur a Manipur University gate apan Koirengei a BSF gate tan pai ding uh a, Route No. 2 ate’n Malom apan Khurai Lamlong kikal kawmtuah ding uh a, Route No. 3 a service te’n Lamphel a DC/Imphal West office leh Porompat a DC/Imphal East office kal kawmtuah ding uhi. Route No. 1 ah Bus 4 pai ding a, Route No. 2 & No. 3 ah Bus 3 tuak pai ding uh a, bhara Rs. 10 hiding hi. Semi-low floor Bus te zinglam in dak 7,8,9,10 & 11 in pai ding uh a, sunnung dak 1,2,3,4 & 5 in pai ding uhi.
Thadou-Kuki MIL text bu honna
Imphal, June-13: Thadou Kuki Literature Society te’n Undergraduate leh Degree course a Thadou-Kuki MIL subject(text books) a bawl uh June 16, 2012 zinglam dak 11.00 in Kuki inn,Old Labulane ah honna(releasing ceremony) om ding hi. Huai ah IFCD Minister Ngamthang Haokip khuallian a pang in hong ding a, Rev Dr Hawlngam Haokip, Adviser,TKLS in lan(dedicate) ding hi. Chief Guest in Writer’s award pekhe ding a, Guests of Honour VIP mi tuamtuam 7 te’n subject writer-te thilpiak pekhe ding uhi.
Meltheihlouhte’n bomb va koih
Imphal, June-13: Samurou a om Machu Cinema hall neitu N. Chaoba (57) s/o (late) Ibomcha of Uripok Khaidem Leikai tenna inn ah tuni zingsang baihtak in meltheihlouhte’n a koih uh hidia gintak Chinese hand-grenade khat muhkhiak hi a, police ah report ahih ziakin Police te’n lakhia uh a, muntuam ah hihsia uh chihthu om hi.
.