Bungmual khua ah inn kibuhal sawm om
Lamka, June 15: Lamka PS apan tumlam km 2 a gamla Bungmual khua ah zanhal (June 13, 2012) nitak dak 9:00 velin inn kibuhal sawm om a, himahleh, vangphat huaitakin meikuang a mupah om ziakin kangse manlou in meikuang kipan tung phet hihmit in om hi.Thil tunna mun Bungmual’ Laiveng hi a, inn neitu Nekzakam Hauzel leh a innkuante Delhi a om in midang luahsak uhi. Inn luahtu Soiminthang te thiltun laitakin omlou uh a, a tate ahihleh huai compound sung mah ah inn luah a om Pauzalal-te’ inn ah ava pawt laitak uh hi’n kigen hi. Meltheihlouhte’n huandaai dia kizang gawva phel dawkkhia in puansia tawh gaak lom in haalkuang ua, Bungmual hanmual (cemetery) zotna lampi apan lamkhang chin a om Nekzakam’ inn tungah paihkhum uhi.
Nekzakam’ compound sung mah a teng Pauzalal-te innkuan leh Soiminthang tate’n thilging za uh a, ahihziakin a inn sakte uh haigah pulh in a inntung uh dengkha dan in ngaihsun uh chi uhi. Hun sawtlou nungin Bungmual hanmual kiang a teng EBC Bungmual a BYF Secretary Khamson lazil khin a innlam zuan a pai in Nekzakam’ inntung a meikuang mu in delh a, huaiphet in a theikha peuh in kidelhhuan in meikuang phelhmit zawhpah in om hi. Inntung langva kikhuh hikei leh kuangzak man ding a, tu’n leng bangtanhiam kangzek man in puansia leh a kigakna guate thautui nam vengvung hi.
Thiltung tawh kisai YPA Bungmual in ngaikhawk mahmah in thil omdan suizui lel ua, hibang a gamtang khawsungmi hi’n hikei taleh a kituahpih bang action lak hiding chi uhi. Singkhanmang Guite, President YPA Bungmual in a genna ah mulkimna bei a gamtangte a theikha hiam ahihkei leh suizui theih dia ‘clue’ pethei a om leh kipak mahmah ding uh ahihdan gen hi.
Med Suptt in Media-te kimuhpih
Lamka, June-15: Dr. N.Paulginthang, Med Supt/ Dist Hospital in tuni sunnung in a office chamber ah Media-te kimuhpih hi. Aman a genna ah District Hospital sianthouna ding in mipi lam inleng mahni abang a ngaihsun in staff-te kithuahpih chiat ding in ngen hi. Dist Hospital a ward teng ah niin(waste) te Town lamte’n enkai ding leh Sanitary Truck ah nawnkhiaksak dia deihthu gen hi. Ward sung sianthouna ding in damlou ompih kuapeuh in ward sung ah an neklouh deihthu gen hi. Ward tuamtuam a damlou ompihte leh damlou vehtu te abuaihuaipen hikha sek hi’n leng gen hi. Blood bank tawh kisai in tunai chin in blood analyser machine kituahkhia in solar light tungtawna dakkal 24 sung zat theih leh sisan koih theih gige dia om ahihdan gen hi. CT Scan part mangte leng thuneitute’n a buaipih ban uah leh Police te’n suizui zel uh hi’n gen a, Police te’n X-Ray Technician 2 leh Grade IV 1 a mat ziak un suspend in om uh a, tu’n X-Ray deptt a semding kuamah omlouh ziakin Director (Health) ah suspend a omte tangding mi 3 akintheipan a koihdin ngetna bawl hi’n gen hi. RKS Committee thupukna dungzui in Dist Hospital campus a gari parking fee kila ahihdan gen a, mipi lam in hoih asak kei leh RKS Chairperson DC/CCpur kiangah thupukna etthak dia nget theih ahihdan leng gen hi. Med Supdt in agenbehna ah Dist Hospital hoihna ding leh sianthouna ding in mipite apan kithuahpihna lou in thil hitheilou ahihdan gen in mipite’n kithuahpih chiat ding leh adiakin damlou vehtute omdan siam ding in ngen a, Dist Hospital ah staff om ding zah a omlouh ziakin deihbanga nasep haksa hi’n gen hi.
Sungkhawh ziakin nupi 2 si
Lamka, June-15: Thanlon sub-divn sunga Palkhuang khua ah zan nitakin sungkhawh ziakin Zenzaman w/o Thangson leh Ngaizen w/o Paukhozam si uh a, amau hun tomchik kihal in si zom uh chihthu kiza hi. Hun bangtanhiam paisa apan Palkhuang leh akim ah sungkhawh-khawsik hii leng hi’n kigen a, bialtu MLA Vungzagin Valte in CMO kiangah medical team sawldi’n theisak chihthu kiza hi. Sungkhawh ziaka nupi 2 site leng bialtu MLA in puandum in aluang uh tuam hi’n kigen hi.
Thudang kizadanin tuni zingsang dak 6:30 velin Phaitong Hausa i/c Thonglianthang (50) s/o (late) Mangzachin Guite damlouhna khenkhat ziakin akhua uah si a, tuni mah in kivui chihthu kiza hi.
KIC in vaidawnna program nei
Lamka, June-15: Kuki Inpi/CCpur makaite’n tuni’n Tuibuong a KIC complex ah mun tuamtuam a zinkhiate vaidawnna program nei uh a, New York a UNPFII khawmpi a hawh Dr. T. Lunkim, award tuamtuam la Dr. HH Mate, Chiefs’ Rights leh SoO thu a KIM palai Delhi a zinte leh Kuki Martial Arts Assn member medal late vaidawnna nei uhi. Huai ah Dr. T.Lunkim in New York a UNPFII khawmpi ah a telna thu report pia a, Dr. HH Mate in award tuamtuam a lakte report pia hi. Delhi ah Chiefs’ Rights leh SoO thu a Kuki Innpi Manipur makai zinte’n leng report kimtak pia uh a, program zatna ah Kuki nampi sunga pawl tuamtuam makai tamtak tel uhi.
Singkung feet 20 apan kia
Lamka, June-15: Ginkhenmang(15) s/o Thangchinkham of Thingkangphai in zinglam dak 9.50 velin a huansung ua hai(mango) lou dia kisalai haikung feet 20 vel asang ah kia a, a khutngawng guh a langnih in akitan banah a veilam pheipi guh leng kitan hi. Akigendan in aman hai loudia kisalai a tuanna a tangkhial kha in kia hi’n kigen a, a liamna a serious ziakin dist. hospital ah admit in om hi.
‘The 2nd Lamka Book Fair’ kipan
Lamka, June-15: Hmar Students Assn leh Kuki Students Orgn in Bookline(Kolkata), Penguin Publication( Delhi) leh Viva Book Pvt. Ltd. (Delhi) pangkhawma saina in tuni , zinglam in IB Road a Synod Hall ah ‘The 2nd Lamka Book Fair’ kipan a, T.Vunglallian, Educationist & founder, Lalpuithluaii Foundation School in hong hi. Huai Book Fair ah laibu tamtak zuak hi a, printed price apan 10% discount a zuak ahihman in tuni’n mi tamtak in lei uhi. June 24, 2012 tan Book Fair omtou lai ding hi’n kigen hi.
COPTAM Central Committee
Lamka,June-15: Committee on Protection of Tribal Areas,Manipur(COPTAM) Central Committee lepthak ahih banah appointment thak khenkhat leng bawl uh a, huai dungzui in tulela Central Committee-te 1) Chairman-Letpu Haokip, 2)Vice Chairman(Admn)-Lamkhogen Vaiphei, 3)Vice Chairman(Extnl)-Pauzalal Hangshing, 4) General Secy-Thangkam Lupheng, 5) Joint Secy-Seiboi Haokip, 6)Asst Secy-Thangminlen Kipgen, 7) Secy(Finance-1)-Shonthang Haokip, 8)Secy(Finance-II) –Khupzatawn, 9)Secy(Info & Publicity)-David Buhril leh 10) Secy(Organisation) -Helal Khongsai hi uhi.
Electric post kaihna khuam pukdek
Lamka, June-15: Salem Veng a Vijaya Bank kong lamlian jul a electric high tension khuak(post) kaihna kiphut dek in lampi tung ah awn deidoi hi. Huai electric post kaihna (sing khuam) abul ah kizungkalh a, cable gui omlou hileh Tedim Road lampi khaktan in kipuk thei din om hi. Akisaipih deptt te’n a lakkhiat kei ua leh cable gui in a puakzawh nawnlouh hun in lauhuai mahmah ding in kilang hi.
Tuni’n Cabinet Meeting om
Imphal, June-15: CM Cabinet Secretariat ah tuni nitaklam dak 3:00 in Cavbinet meeting om a, huai ah Gram Panchayat election ding tungtang genkhawm uh a,State Election Commission khut a mawhpuakna piak din thupuk uhi. Huai dungzui in State Election Commission in September 2012 khasung a Notification a suah ding hi’n thusuak in gen hi. Kum 2009 a District Council(ADC) election om laiin Kanglatongbi Panchayat Constituency a seat 5 om laka seat 3te Kangpokpi ADC ah alut ziakin tu in seat 2 kia om a, huai seat 2te Khulkhul Zila Parishad a gawmkhawm din lemsa uhi.
Huailou in SSA nuai ah Manipur a District 9 omte ah Central Model School 1 chiat dinkhiak din Cabinet in lemsa a, Model School te Central in 90% huhna pe ding a, State in 10% seng ding hi’n kigen hi. Huai dingin student numei 50 leh pasal 50 a kigawm in 100 zel kai ding uh a, hostel facility leng om ding hi. Model School-te a sem ding Warden tel in staff 130 lakthak hidin leng Cabinet in lemsa uhi.
Tata Winger 1 kihaltum sak
June 15: Bishnupur district sunga Phubala khua ah tuni zingsang baihtak dak 2.30 velin ALTOS member Romeo tenna inn a gari buksung a kikoih Tata Winger(No. MN-O1W/ 6565) meltheihlouhte’n haltum uh chihthu om hi. Thusuak kingah dan in gari kihalna gei ah handgrenade 1 leh KCP(MC) Nongrem Khomba Group te’ letter head a kigelh 1 muh hi a, huai ah KCP(MC) Nongrem Khomba Group te’n Imphal line ah ALTOS te taithei nawnlou dia ‘ban’ a puan nung un a tai teitei ziakun phubalakna in Romeo’ Tata Winger haltum ahihdan kigelh chihthu om hi. Tata winger haltumte mawhpaihna in June 16, 2012 in Phubala Mera Paibi pawlin Tedim Road bandh hidin puang uh a, ALTOS pawl in leng Romeo’ tata winger a koihna buka kikoihlai mei a haltumte mawhpaih uhi. Huai Tata Winger kihalsia a laktheih om lai teng Moirang Police te’n la in FIR registered uh chihthu om hi.
Sectoral Allocation-te approved bawl
Imphal, June-15: Planning Commission in kum 2012-2013 sunga Manipur Annual Plan dingin Rs. 3500 crores a bikhiah lak ah Special Plan Assistance (SPA) leh Special Central Assistance (SCA) kigawm Rs. 1200 crores tel hi. Huai tawh kisai in Manipur Cabinet in June 13, 2012 in Annual Plan tawh kisai a Sectoral/Sub-Sectoral allocation bikhiah a om approved bawl uhi. Huai dungzui in Agriculture & allied activities ah Rs, 16,466.36 lakhs; Rural development ah Rs. 20,484.00 lakhs; Special Area programme Rs. 3346.00 lakhs; Irrigation & Flood Control Rs. 76560.00 lakhs; Energy Rs. 12500.00 lakhs; Industry & Mineral Rs. 3250.00 lakhs; Transport Rs. 2606.00 lakhs; Science & Technology and Environment Rs. 1955.00 lakhs; General Economics Services Rs. 12,1952.92 lakhs; Social Services Rs. 84,157.72 lakhs; General Services Rs. 2822.00 lakhs; Others Rs. 300.00 lakhs hi’n thutut kingah hi.
Chinese hand-grenade mukhia
Imphal, June-15 : Moirang Phiyangbam Leikai a om N. Ranjan (50) s/o (late) Babu tenna inn ah zan nitak dak 10:00 velin meltheihlouhte’n Chinese hand-grenade khat a koih uh muhkhiak hi’n kigen hi. N. Ranjan bel Moirang Autorickshaw Service Assn a Treasurer hi a, tuma in PREPAK te’n Auto Service-te kiangah Rs. 1000/- chiat pe dingin demand bawl uh a, huai tawh kisai mah in helpawlte apan vauna mu hidin police te’n gintak-huai sakthu gen uhi.
HAC meeting ah thupukna 2
Imphal, June-15: Tuma deuhin Manipur Assembly a Hill Areas Committee(HAC) meeting ah thupukna poimawh 2 bawl uh a, huai dungzui in Old Age pensioner te’n bank tungtawn a pension sum a lak ding uh chih govt in order a suah tungtang ah Manipur singtanggam a district tuamtuam CCpur,Ukhrul,Senapati, Tamenglong leh Chandel a Core Banking Solution hiam Electronic Clearing Service(ECS) omlouhna munte ah pensioner te’n sum tamloulou a muhdingte uh bank tungtawn a lak ding chih govt in khahkol din recommend uhi. Huailou in singtanggam ah scheme leh programme tuamtuam lawhching taka sepkhiak theihna ding in khua(village) teng ah Village Development Committee(VDC) bawlkhiak ding deihthu leng genkhawm in thupuk uh chihthu kiza hi.
Police te’n SK oil hunkhop mukhia
Imphal, June-15: Lamphel Police Station a OC Ingocha makaihna in Lamphel Police te’n Special Intelligence Unit tawh kithuah in zanhal nitaklam dak 4.30 akipan in Takyelpat area leh Khurai area lak ah Special drive bawl uh a, mi tuamtuam akipan akigawm in kerosene(SK Oil) litre 4,500 vel mukhia(seized) uh chi’n thutut kingah hi.
UPA in President dia candidate din Pranab Mukherjee puang
New Delhi, June-15: Congress makaihna a Centre a govt bawl UPA in July 19, 2012 a India President telna ding ah UPA candidate ding in Union Finance Minister Pranab Mukherjee
thupuk uh a, tuni’n 7 Race Course Road a Prime Minister Dr Manmohan Singh tenna inn ah Congress leh UPA atel party tuamtuam meeting ah bangtanhiam genkhawm nungin thupukna bawl uhi. Prime Minister in Mexico a G-20 Summit a vatel hong tunkik nung June 24, 2012 velin Pranab Mukherjee in Finance Minister hihna apan kitawp ding a, azing June 25, 2012 in President dia candidate dingin nomination paper pelut(file) ding hi’n kigen hi.
Tuni’n Prime Minister tenna inn a UPA meeting ah Mrs Sonia Gandhi tung masapen a,Prime Minister Dr Manmohan Singh tawh kinaichik ah tu uhi. Huai meeting ah Union Finance Minister Pranab Mukherjee leng tel a, amah tungtang genkhawm ahih lai in gamlalou a tukawm in ngaikhia hi. UPA atel Trinamool Congress chief Ms Mamata Banerjee tuni a meeting ah tellou in Kolkata tungkik khin a,aman President dingin APJ Abdul Kalam mah deih ahihdan puang lailai a, himahleh tuni nitaklam dak 4.00 vela UPA meeting hun ah Mamata in Abdul Kalam deihthu a puankhawmpih Samajwadi Party(SP) chief Mulayam Singh Yadav in Pranab Mukherjee gum(support) thei ding hidan in Congress lam apan a gen pawl om hi. Mamata in tuni zinglam a a gendan in Mulayam Singh Yadav in leng Abdul Kalam mah support ding ahi chi hi. Mamata makaihna Trinamool Congress tellou in President telna dinga Electoral College ah Congress leh a kizoppih party-te’ vote 38% lel hidin kigen a, UPA vote 50% val a phak theihna ding in Congress in Left parties-te hahtakin chial uh hi’n leng thusuak in gen hi.
Mulayam Singh Yadav in bang thupukna taktak bawl ding hiam chih theih nopna lian mahmah hi’n kigen a,amah tuni’n Agra tawn in Lucknow ah kiknawn a, hileleng President telna ding tungtang bangmah gen nailou hi’n thutut kingah hi. SP senior leader khat banah a sanggampa Ram Gopal Yadav in bel Mulayam Yadav in thupukna awla bawl ding hi’n gen hi.Ram Gopal Yadav in a gendan in Samajwadi Party in mid-term election a om a deihlouh ziakin pawlam apan UPA coalition govt thuap(support) ding a, hileleng UPA bel zomlou ding chi’n gen hi.
Thudang kizadan in President-lui Dr APJ Abdul Kalam in telching hiding chih a kichet kei aleh candidate utlou din kigen a, SP apan support a muh kei aleh candidate ahih gintak huailou chihthu om hi. Opposition BJP pawlin thil omdan hungaih lai uh a, Pranab Mukherjee leng support din niallou uh hi’n kilang mahleh Dr Kalam tawh bukkak in lungbuai uh hi’n kigen hi. Lok Sabha ah UPA pawlin Trinamool telin MP 274 nei uh a, pawlam apan support pia SP in MP 22 nei uhi. Trinamool MP 20 leh SP tellou in govt lam ah MP 255 lel hiding a, minority suak ding uhi.President election ading Electoral College ah Trinamool leh SP kigawm 11% a phak ziakun Trinamool leh SP in NDA leh a kizoppih opposition lam a support ua leh Dr Kalam adingin President chintheihna lampi om hi’n kigen a, huaiziakin Congress in Trinamool leh SP gupna ngah teitei sawm in pan alak uh gintak huai hi’n kigen hi.
N-E a Baptist heutulian Rev & Dr I. Benwati si
Dimapur, June-15: India malsuahbial mipi tamzaw in “Impur Chanu” chi a a theih uh Rev. Dr. I. Benwati zan zinglam dak 9:30 in Dimapur a om a sanggampa Col (retd.) Maken tenna inn ah teknat ziakin si hi. Rev Dr I.Benwati(kum 91 a upa) mi damthei mahmah hi a, tu in leng natna thupilua neikei mahleh a tektak ziakin hun bangtanhiam paisa apan hat nawnlou in lupna ngakin om chi uhi. Rev Wati in tanu 2 leh tu(grand children) 2 nusia a, a zi Mrs Nirmala Mahanty in May 28, 2012 in Oxford, United Kingdom ah sihsan hi.
Maken tenna inn ah zan in siluang zahna piakin om a, huai hun ah Nagaland Chief Minister Neiphiu Rio, Cabinet Minister-te leh MLA tamzaw, amah ngainatute leh govt top official-te banah sahkhaw tuamtuam a leader aza asimte paikhawm ua, civil society tuamtuam leh Naga helpawl om thei liai tengin leng zahna pia uh chih hi. Rev Wati luang tuni(June 15) in a pianna khua Impur tut ahihnung zinglam dak 11:00 apan sunna program kipan a, nitaklam in vui in om hi. Aman a sihma in gamdang a a sih khak zenzen leleng a khua Impur mun mah a vuiding in a innkuante kiangah ngen hi.
Rev. Dr. I. Benwati in Bangalore a om nuamsa in omsek mahleh a tanute tawh omkhawm dingin United Kingdom ah va pai a, a zi in May 28,2012 a a sihsan takin a tupa (grandson) tawh India ah hong pai in June 3,2012 in Delhi hongtung ua, a sanggamte I Imkong, MLA leh Maken te’n Delhi ah ana dawn uhi. Aman huai hun apan in “Pathian in pha asak hunhun in ama kianga paidia mansa a om ka hi” chi hi. Amah December 18, 1920 in Impur ah piang a,kum 1940 in GHS Shillong ah Ist Div in Class X zou a, Northern Baptist Theological Seminary, Chicago(USA) ah kum 1948 in B.D zou in NEI a baptist mite’ lak a Bachelor of Divinity zou masapen a chiamteh in om hi. Wheaton College, USA ah kum 1949 in MA zou a, Naga khangthu a MA zou masapen a chiamteh hinawn hi.
Rev Dr JW Cook tawh Eastern Theological College kichi (1949 – 1953) pankhia ua, kum 1950 in Nirmala Mahanty tawh kiteng in tanu 2 nei uh a, amaute London ah khawsa tuak uhi. Naga Bible masapen “Temeshi Lai” 1949 – 1964 bawlkhetu ahihbanah World Evangelical Fellowship (tu a World Evangelical Alliance) kichi ah kum 1967 – 1974 sung President len a, World Vision International Board, Monrovia, California, USA ah leng board member in pang hi. Saptuam makai chauh hilou in Nagate’ adia khuampi poimawh khat hitawn tung a, Nagate’ khawsuahna ding leh helpawlte’ kigawmkhawmna dia panla mahmah te’ lak a khat hidanin leng thusuakin gen hi.
.