SP makaih in crime meeting
Lamka, July-19: L.Mangkhogin Haokip, IPS, SP/CCpur makaihna in a office chamber ah tuni zinglam in crime meeting om a, huai ah Addl, SP/CCpur leh SDPO te leng tel uhi. Singngat PS, Thanlon PS, Parbung PS, Henglep PS leh CCpur PS apan OC te leng tel uh a, Dist sunga Police station wise a crime thu genkhawm in maban a panlakdan ding leng genkhawm uh chihthu om hi.
Bike in nungaknou 2 phukha in taisan
Lamka, July-19 : Tuni nitak dak 6:5 velin Leisang ah Bike a taite’n lampi a pailai nungaknou 2 phukha in taisan uhi. Phut khak a om nungaknoute bel Miss Kamthianzou @ Rebecca (15) d/o Lalven Hmar leh Miss Hallalnei (15) d/o Gouthiangen Vaiphei hi ua, S. Bualjang khawmi tuak hi uhi. Bike a tuangte’n a phutkhak phet un a gari light uh hihmit in taisuak uh a, phut khak a om 2te Lamka a Dist Hospital tut in om uhi. Kamthianzou pen gimsim hi’n kigen a, khawsung mipi’n bike pen thei uh hidan in gen ua, July 20, 2012 tan hungaih ding uh hi’n gen uhi.
USA Crusade Tour, 2012
Lamka, July-11: Zomite laka Pathian thugen minthang Rev Dr JM Paupu in azi Mrs Dimnu tawh kithuah in tuma deuh akipan in USA gama khawpi tuamtuam ah ‘Crusade Tour 2012’ a neih uh sunzom zel uh a,maban adin July 20-22, 2012 sung in Bossier City ah Crusade nei ding uhi. Huai zawh July 23, 2012 in Bossier City apan akipatna uh Denver khawpi ah kiknawn ding uh hi’n kigen hi.
Kipahthu genna leh ngetna
Lamka, July-19: CCpur district ading in Lamka ah Staff Selection Commission(SSC) nuaia Exam Centre ding ngah ahihna tung ah CCpur District Students’ Union(CDSU) in SSC Chairman NK Raghupathy, CCpur district apan MLAs,MP,Dist Administrator, College-te leh CDSU leader masate banah panla khateng tungah kipahthu puang uhi. SSC saina in Data Entry Operator leh LDC lakna ding ah Lamka leng exam centre hita ding a,CDSU in huai a telnuam Online tungtawn a apply dingte kuapeuh kithuahpih ut uh hi’n puang uh a,July 23-28,2012 sung zinglam dak 10.30 akipan sunnung dak 2.30 tan Lamka Public Ground kianga CDSU Information Centre naihtheih ding hi’n CDSU thusuak in taklang hi.
Waste Management training
Lamka, July-19: Dist Hospital a Med Supt’s Conference Hall ah MSF/CCpur-te saina in zan apan tuni tan daih ding Waste Management training om hi. Zanin Medical Officer leh Nurse-te training uh a, tuni’n Grade IV te training uhi. Training sung in MSF/CCpur te’n sinsak uh a, Hospital campus a om incinerator (machine a niin halna) zatdan ding sinsak uh hi’n kigen hi.
Koite lui apan tui nekding kiching
Lamka, July-19: Lamka khawpi adia tuinek ding supply Zone-II (Lanva lui), Zone-III (Khuga Dam) apan tui kiningching kei mahleh Zone-I (Koite lui) apan bel tulaitak in kiningching mahmah hi’n gen uhi. Zone-I in tui a supply khakna mun Christian Fellowship Church, Dist HQ, Tuibuong a biakinn gei ah tulai in sun leh zan dakkal 24 sung tui tatsatlou in kaikhe ziahziah hi.
Army kila ding: document deih tam
Lamka, July-19: Senapati a football ground ah July 21-29, 2012 sung Army(Doldier GD, Clerk/Store Keeper/Soldier Technical leh Soldier Nursing Asst) lakna ding in recruitment om ding a, huai a telsawm tuailai tamtak in tulai in DC’ office ah document poimawhte buaipih uh a,DC office a certificate issue-te buai sakzou hial uhi. Recruitment Rally om ding ah July 22 & 23, 2012 in CCpur dist ate’n Physical Efficiency Test (PET) nei ding uh a, PET a lawhchingte’n July 29, 2012 in written test nei ding uhi.
Aliam mi 2 Hospital ah
Lamka, July-19: Mangtungnung(25) s/o Chinzasuan of Hiangtam village in zanhal nitaklam dak 3.00velin Likhai ah electric gui khoihlai electric current in mankha a, a taksa mun tamtak liamin dist. hospital ah admit in om hi.Huailouin Helkholam (75) h/o Ngaikhonem of Kamkeilon(Henglep sub-divn) Sintawpni paisa in a innsung uah khindang kichip ziakin thuktung a tui kisuangsou in pumbuah kha a, amah leng tu’n dist. hospital ah etkolin om hi.
Suunna
S.Khamsuanmang @M.Ngaihte s/o (late) S.Langthual of Tuibuang zan nitak zankim velin sinna ziakin Dist. hospital ah si a, tuni’n Tuibuang hanmual ah kivui hi. S. Khamsuanmang bel KNO/ZDV a Secy/IPR len hi’n kigen hi.
Manipur a MLA tengin vote khia
Imphal, July-19:Chingmeirong mun a Manipur Assembly Secretariat a Committee Room ah tuni zinglam dak 10.00 akipan in MLA te’n India President thak telna(election) nei in vote khia uh a,Manipur a MLA om mi 60 tengin sunnung dak 1.30 velin vote khekhin uhi. Congress MLA 42, Trinamool Congress 7, MSCP 5, NPF 4, NCP 1 leh LSP 1 in UPA nominee Pranab Mukherjee vote pevek uh hi’n kigen hi. MPCC President & Home Minister Gaikhangam in tuni nitaklam in BT road a Congress Bhavan ah Press-te kimuhpih in tutunga India President telna ah Manipur a ruling party leh opposition member tengin candidate 1 a vote khawm theih uh thil chiamtehtham ching hi’n gen hi.
Suti la IPS Officer hongkiklou
Imphal, July-19: Anubhav,IPS(2000 batch/Manipur-Tripura cadre) in Aug 1,2005 akipan July 31,2007 tan kha 24 sung Extra Ordinary Leave(EOL) la in Harvard Business School, Boston, USA ah kum 2 sung MBA programme vazil a, aman suti a lak bei khintham mahleh tutan Manipur ah a join tuanlouh ziakin huai in state govt adiakin Police deptt lam lungbuaisak mahmah hi’n kigen hi. Anubhav in suti a lakma in Supdt of Police/Ukhrul sem hi’n kigen hi.
Excise in Rs. 69,34,853 mukhia
Imphal, July-19: Excise department in khalui June 2012 tan in revenue Rs. 69,34,853 mukhia uhi. Deptt in financial year 2012-13 sunga revenue a muhkhiak ding ua bikhiah(targetted revenue) Rs. 59 lakhs hi a, April-June, 2012 sungin Rs. 2,42,15,922 mukhia uhi. Excise deptt in kumlui April-June, 2011 sungin revenue a muhkhiak uh kigawm Rs. 2,34,45,497 pha hi’n kigen hi.
Computerised Patta pekhe ding
Imphal, July-19: Imphal East district sunga Revenue village tuamtuam a Computerised Janabandi(Patta) hunkhop July 21, 2012 akipan in DC/Imphal East office ah [iakkhiak theih hiding chihthu om hi.Patta deihte’n zinglam dak 11.00 akipan nitaklam dak 3.00 kikal in Rs. 16 pia in laktheih ding hi. Tu dinmun tana Computerised Patta piakkhiak theih dingte lakah
SDC/Basikhong bial ah Revenue village 4, SDC/Keingang bial ah revenue village 4 leh SDC/Sagolmang biala revenue village 6 tel hi’n kigen hi.
CIPET ah Course tuamtuam
Imphal, July-19: Central Institute of Plastics Engg & Technology(CIPET),Imphal ah Chemistry subject khat a la Science graduate leh Class X passed student-te adin AICTE in approved a bawl Job Oriented course tuamtuam kum 1 ½ sung leh kum 3 sung zil ding course om a, detail information theinuam leh free application form deihte’n CIPET,Takylpat Industrial Estate,Imphal (mobile No. 9862027863/8974431157/9206040700) contact ngai ding hi.
.