SBI/Pearsonmun Branch  

Lamka, July-16: State Bank of India(SBI)/Pearsonmun Branch ah tulai in account hong nuamte adi’n zero-balance in account hontheih hita hi. Staff dang posting om naikei mahleh Branch Manager J.C. Bhuyan in zinglam dak 9.30 apan nitaklam dak 3.30 sung amah kia a nasem in account hong nuamte adin zero-balance in honsak a, tuni tan in mi 15 velin account hong uhi. Thu kizadanin huai branch ah vanzat bangkim om mahleh state govt.in guard ding security a piak nailouh ziakin cash(sum) transaction saithei nailou uh a, govt. in security a koih hunhun in sum saina leh thilteng function theipan ding hi’n kigen hi.

 

Mizoram Assembly Budget Session tuni’n kipan

India President telna ding ballot box Aizawl tung

Aizawl, July-16: Mizoram Assembly Budget Session tuni’n kipan a, August 2, 2012 tan sutzop hiding in kigen hi. Session sungin starred question 405 om ding a, unstarred questions 95, private members’ resolution adia suggestion 29 leh amendment of legislations telin bill 5 genkhawm hiding hi. Tuni in Finance Minister H. Liansailova in kum 2012-13 sunga Budget ding luikhia a, July 23 leh 24, 2012 in huai genkhawm ding uhi. Hibangkalah July 19, 2012 chiangin India President thak telna om ding a, huai a zat ding ballot box leng tuni’n Aizawl khawpi ah puaktung hita hi.

       Mizoram Assembly Budget session ah July 25-31 sungin departmental tuamtuam in a sumzat ding in genkhawmna leh vote lakna om ding hi. July 19, 2012 in India Presidential election om ding ziakin Assembly session khawl ding hi. July 20 in Assembly session ngeina bangin sutzop hiding a, huaini in Private Member’s Business genkhawm hiding chih hi. Tuni in Finance Minister Mizoram Budget piching (Regular Budget) a luikhiakna ah Planning Commission in Mizoram state ading Anmual Plan Rs. 2300 crores a bikhiah thu leh CSS/NEA/NLCPR nuaia sum zat dingte leng taklang hi.

       Consolidated Fund nuaia sum zat ding a bikhiah a om Revenue Account tungtawnin Rs. 4796.48 crores leh Capital Accounts nuai ah Rs. 383.44 crores a gawmkhawm in Rs. 5179.92 croes hiding chi’n Finance Minister in House ah pulak hi. Govt in flagship programme nuaia NLUP adingin Rs. 370.00 crores bikhiah a, innkuan 29,861 velin huai hamphatna ngahbeh ding uh chi hi. MLA Local Area Dev Fund dinga Rs. 10 crores koih a om sek leng Rs 12 crores in sukpun hi a, MLA-te’n a bial uh puahna ding in Rs 30 lakhs zel zangthei ding uh chi’n Fin Minister in gen hi. District 5 – Aizawl, Champhai, Mamit, Kolasib leh Serchhip puahna dinga District Planning Committee in a zatdingin Rs. 5.00 crores koih in om a, Sialkal tlangdung Development Committee kipatna dingin Rs. 50.00 lakhs, Sinlung Hill Development adingin Rs 3 crores bikhiah in om hi.

            Thudang kizadan in July 19, 2012 chianga India President 14na telna om ding tawh kisai in Ballot box leh Ballot paper-te tuni zinglam dak 11.40 in New Delhi apan Jet Airways in Lengpui airport pawtung hi. H. Lalengmawia, Joint CEO leh Vanlalnghenga, Addl. Secretary, Mizoram Legislative Assembly te’n Election Commission of India official-te apan Ballot box leh Paper-te ana sang(received) uh a, sunnung dak 1.45in Mizoram Legislative Assembly Secretary banah Returning Officer dia guan a om Ngurthanzuala makaihin Treasury strong-room-ah koihlut uhi.

       July 19, 2012 in zinglam dak 10;00 akipan nitaklam dak 5:00 tan vote khiak theih dinga, Mizoram Legislative Assembly member-ten Assembly Building sawng 2na a Committee Room ah vote khe ding uh a, ballot box te July 20, 2012 in New Delhi zotpih hi ding hi. Vote simna ahihleh July 22,2012(Pathianni) zinglam dak dak 11:00 in Returning Officer’ office, Parliament House, New Delhi-a Room No 63-ah sim kipan ding hi. India Presidenta 14na telna ding ah candidate 2 lel om a, huaite UPA nominee Pranab Mukherjee leh opposition NDA nominee PA Sangma hi uhi.

Pawl tuamtuam in mawhpaihthu puang

ED/DRDA tenna inn kong ah bomb kimukhia

Lamka, July-16: Hiangtam Lamka, Chapel Lane a H. Chinkhokam @ C. Hangshing, MCS, Executive Director /DRDA tenna inn konga gate pawlam ah zan zingsang dak 5:45 velin Chinese hand-grenade 1 kikoih muhkhiak hi a, Police-te’n a theih phet un delhzui pah in huai hand-grenade lakhia uhi. Huai hand-genade a pin puan in kituam a, lehkha lianlou khat ah laitui sana kigelh ‘Warning, KNLF/MPLA’ chih kigelh tawh kikhilkhawm hi. Police te’n huai tawh kisai in FIR No. 71(7) 2012 CCP-PS U/S 400/506 IPC & 5 of Explosive Substances Act register uhi.Thu kizadan in ED/DRDA in official thil tawh kisai in Delhi a a zinkhiak kalin a KNLF/MPLA apan Rs. 40 lakhs ngetna demand letter mu hi’n kigen hi.

Pawl tuamtuam in C. Hangshing’ inn konga hibang vauna bomb koihte mawhpaihthu puang uhi.

     DRDA staff te’n tuni’n DC office campus a om DRDA office khak in office kong ah sit-in protest/dharna nei uhi. DRDA staff-te’ gendan in mipi ading na aseplai un sum hongpai om sunsunte helpawl in demand a bawlna tung uah demand bawltute mawhpaih thu gen kawm in tunung in hibang demand bawl lou in development a om theihna dinga kithuahpih zaw ding in ngen uhi. Autonomous District Council/CCpur office apan thusuak in ED/DRDA inn konga hand-grenade koihte mawhpaihthu puang kawmin hibang thilhihte’ ziakin district sunga development nasepna a hihbuai theih banah kituaktaka khawsakna khawmna leng hihbuai thei hi a taklang kawmin pawl tuamtuam kuapeuh in muanna leh lemna omna dia panla zaw ding in ngetna bawl uhi.

         Zomi Students’ Federation(ZSF), CCpur District Students’ Union(CDSU)

Siamsinpawlpi(SSPP) Gen HQ, Kuki Students’ Organisation(KSO)/CCpur district, Hiangtam Lamka Village Authority, SSPP Hiangtam Lamka Branch, YPA Hiangtam Lamka Unit, ZMA Hiangtam Lamka Unit leh PTC Hiangtam Lamka Unit te’n mawhpaihthu puang uhi.Mawhpaihna thupuan khenkhat ah hibang kivauna mahni masialna ziaka hiamgamtaka nasem pawlte’ thilhih hi a taklang in govt leh thuneitute’n kintaka panla a mankhe ding theisak uhi. Tuban pawl tuamtuam hi’n kuapeuh in leng thagum leh kivaulau thawh mailou in kihouna tungtawn a thil hihveng zaw ding in ngen uhi.Manipur Express a Patron Member khat in office/deptt tawh kisai nasepna ah amah mimal tunga vauna om tungtang ah Manipur Express staff te’n lamdang sakthu leh poisakthu taklang kawmin hibang thilhihte mawhpaih in civilised society a om kuapeuh in hiamgamna leh kivauna sangin thil himhim genkhawm a hihveng(solve) ching chiat zaw ding in deihthu puang hi.

GOC in CD thak hongkhia  

Lamka, July-16: Major Gen. Binoy Poonnen,VSM,GOC- 57-Mountain Division in zan in Rayburn College ah Gospel for India(GFI)-te’ saina in June 18-23, 2012 sung Vacation Childrens’ Dev School(VCDS)omlai a CD kibawl hongkhia a, Rev. Dr. S. Lalpi Vaiphei, OMCR in Pathian kiangah lan hi. GOC in a genna ah GFI in naupangte adia thil phatuamtak a sai uh pahtak huai sakthu gen a, naupangte amuh in amah neulai a Sunday School a kailai hunte phawk thak hi’n gen hi.Zana programme zatna hun ah i/c DC/CCpur leh SP/CCpur banah official hunkhop leng tel uhi.

 

Ni 1 val electric kimulou  

Lamka, July-16: Ningthoukhong Power Sub-Station apan a 132-KV Khengjang Power Sub Station a mei(power) supply na transmission a CT(Current Transformer) kichi July 14, 2012 in a siat ziakin Khengjang Power sub station ah zan in electric current lutlou hi. CCpur district in ni 1 val electric current mulou in om a, himahleh deptt-te’ panlakna ziakin tuni sunnung in a siatna mun bawlhoih in om a, nitaklam in ngeina bangin electric current om nawn hi.

 

CDSU election om ding  

Lamka, July-16: CCpur Govt College a Students’ Union office ah July 17, 2012 zinglam dak 10.30 in CCpur District Students Union(CDSU) vaipaw thakding telna(election) om ding hi. Huai ah President,Vice President leh General Secretary tel ding uh a, nomination file omlou in proposed system a election om ding hi’n kigen hi.

 

Public Ground a fencing hihsia om  

Lamka, July-16: CCpur District Sports Assn(CDSA) pawlin Lamka Public Ground kimkawt a perimeter fencing a bawl uh July 15-16, 2012 kikal zankimlai in a hihsia om hi a taklang in mipi adia nasep hihsiate mawhpaihthu puang uhi. Huai thu ah CDSA makaite’n Police ah report bawl in FIR pelut uh a, Police te’n suizui ding uh hi’n leng kigen hi.

Ex-servicemen te’n GOC mu  

Lamka, July-16: New Lamka Ex-Servicemen Welfare Assn pawlin zan a GOC,57-Mountain Divn in Lamka hongphak lai in mu uh a, singpi dawnkhawmpih uhi. Huai hun ah GOC kiang ah office mun ding poimawh mahmah ahihdan gen uh a, GOC in a haksatna uh etkaipih ding hi a genkawm in gelhthawh a memorandum pe dingin theisak hi’n kigen hi.

 

Korea govt’ huhna in Ph D sinding  

Lamka, July-16: Langkhankhup Ngaihte s/o Rev (Dr) Luaichinthang of Bungmual in tunung sawtlou in South Korea khawpi Seoul zuan ding chihthu kiza hi. Amah JNU,New Delhi ah omlel a, Korea University ah 'Ph.D in Korean Language Education' sinna ding in Korean government apan kum 4 sung ading full scholarship mu hi. Aman JNU apan MA(Korean) sangtak in zoukhia hi.

 

Sinzawl ah mipi’n school bawl  

Lamka, July-16:Thanlon sub-division sung Sinzawl khua a Convention English School khawsung mipi in pucca building a bawl kipan in nitengin nasem uhi. EBC HQ apan huhna tungtawn in nasepna pailel a, Lamka a om Sinzawl khawmite’n leng kithuahpih sawmin Sub-Committee dinkhia uh a, mi kiphalte kiangah panpih dingin ngetna bawl uhi.       Sinzawl khua a Convention English School ah Class X tan om a, kumteng in BSEM saina a HSLC examna ah student hunkhop lawhching uhi.

 

Thusuah tawh kisai theihsakna    

Manipur Express a suah dingin gelhthawh, kam a gen, telephone leh internet tungtawn in pawl tuamtuam min a thusuah ding tamtak kimu sek hi.Hileleng Manipur a Media-te’n common stand kizui dungzui in pawl min a thusuah kimute himhim letter head,seal leh thusuahtu’ min leh suai(signature) omlou himhim kisuah theilou a,maban ah leng huchibang te kisuah theilou ding chih kuapeuh in a theih dingin hong kitaklang thakthak hi.

Accident ziakin liam uh  

Lamka, July-16: Khammuanthang(22) s/o (late) Khupkhansuan of New Bazar zan nitak dak 7.00 velin a innsung ua tui kisuangsou palpuk kha in a pum mun tuamtuam liam hi. Huailou in Vahnei(25) w/o Doumalsawm of Bungpilon zanhal sunnung dak 2.00 velin Imphal apan Lamka zuanlai Moirang ah a tuanna Diesel Auto leh Bus kihettuah khakziakin a taklam khut liam hi. Aliam mi 2te Dist. Hospital ah etkol hi uhi.

 

Suunna  

K.Ginthanzam(27) s/o(late) Kamkhovung of Zion Veng, New Lamka zan nitak dak 10.00 velin Dist. Hospital ah sinna in si a, tuni in New Lamka YPA Hanmual ah kivui hi.

 

Special Investigation Course

Imphal, July-16 :Y. Joykumar,IPS, Director General of Police,Manipur in tuni zinglam dak 9.00 in 1^st M/R Banquet Hall ah Special Investigation Course kichi hongkhia hi. Huai Special Investigation Course bel police-te laka Investigation Officer (IO) te ading deuh hi a, Course honna hun ah V. Zathang,IPS, Addl DGP, MK Das,IPS, Addl DGP leh high ranking police official tamtak in uap uhi. DGP in a genna ah Manipur a police te’n case tuamtuam a suizuina uh deih banga alawhchin theihlouhna ziak thildang hilou in proper channel leh plan feltak bawl masak louh ziak hi’n gen hi.

 

Manipur ah sawtlou sung zinling

Imphal, July-16:Tuni zingsang baihtak dak 1.25 velin Manipur ah second tamlou sung zinling hi.Manipur University a Seismological Observatory Centre thusuak dungzui in zinling hatdan richter scale 5.7 hi a, a kipatna mun(epicentre) leng Imphal apan mallam km. 88 vela gamla Ukhrul district sung Chingai sub-division hi’n thusuak in gen hi.

 

Truck in nupi 1 phulum

Imphal, July-16 : Porompat PS huamsung JNIMS crossing ah tuni sunnung dak 1:30 velin Truck (No. MN-01/4206) in Kinetic atuang nupi 1 phukha a, damzoulou in amun ah si hi. Misi bel K. Ongbi Rajeshwari Devi(50) w/o Shanti Kumar of Yumnam Huidrom Makha Leikai hi a, Veterinary department asem hi’n kigen hi. Porompat Police te’n Truck man(seized) in Police Station ah koih uhi.

 

27 A/R ten gultuk hinna humbit

Imphal, July-16 : 27 A/R ten zan in Thoubal District sung a Khongjom khawmi K. Nanao Singh kichi gul in a tuk ziakin 27-Assam Rifles Unit Hospital a puaktung hi a, huai phet in A/R Medical Officer in anti-snake venom in kap a,huai in a hinna humbit thei in RIMS ah admit in om hi.

Probationary Officer ngahthak        

Delhi, July-16: Ginthanlian Valte @ Lianmawi in tunai chin in Indian Overseas Bank ah Probationary Officer ding in lawhching hi.Amah SSPP Joint HQ Delhi a President lenlel ahi hi.Huailou in Tuanmuansang s/o Kamkhanpau Tonsing in Indian Overseas Bank mah ah Probationary Officer ngah hi. Aman tukum sungin Bank tuamtuam ah Probationary Officer 5 vei a ngahna hi a, tulelin RBI Officer lakna ding ah interview ngak lel hi’n kigen hi.

 

Re-allocation of Works/

Transfer & posting

1. 1.Ameising Luikham, IAS, Addl. Chief Secretary(Tribal Affairs & Hills/CAF & PD) as Addl. Chief Secretary(Tribal Affairs & Hills/RD & PR/CAF & PD).
2. 2.V.K. Thakral, IAS, Principal Secretary( RD & PR/Forest & Environment) as Principal Secretary( Forest & Environment).
3. 3.L.P. Gonmei, IAS, Principal Secretary(Power/Science & Technology) as Principal Secretary(Science & Technology).
4. 4.Letkhogin Haokip, IAS, Commissioner( Social Welfare/Agri) as Commissioner (Social Welfare).
5. 5.JC Ramthanga, IAS, Commissioner (DE/Horti and Soil Conservation) & Member Secretary( EBADA, BRVDB) as Commissioner (DE/Horti & Soil Conservation/Minor Irrigation) & Member Secretary(EBADA, BRVDB).
6. 6.Rakesh Ranjan, IAS, Commissioner to CM & Commissioner (Finance/Economics & Statistics) and Resident Commissioner, Manipur Bhavan, New Delhi as Commissioner to CM & Commissioner (Finance) and Resident Commissioner Manipur Bhavan, New Delhi.
7. 7.Rajesh Agarwal, IAS on return from Central deputation as Commissioner (Power/Agri/Economics & Statistics).
8. 8.Thangkholun Sitlhou, IAS, Commissioner (MI/CADA) as Commissioner( CADA).
9. 9.H. Deleep Singh, IAS, Director( YAS) & Special Secretary(YAS) and Director (Tribal Affairs & Hills) as Special Secretary(YAS) & Director(YAS) in Addition.
10. 10.Lhunminthang Haokip, IAS, ADC/Moreh as Director (Tribal Affairs & Hills).
11. 11.C. Hangshing, MCS, Executive Director,DRDA/CCpur as Addl DC/CCpur and Executive Director ,DRDA/ CCpur.
12. 12.Hopson Chothe, MCS, Executive Director,DRDA/Chandel & CEO/Chandel as Addl DC/Moreh, Addl DC/Chandel & Executive Director,DRDA/Chandel and CEO/ Chandel.

.