Galvan zanga buaina bawlte ziakin khantouhna nasepna buai –Chief Minister

Helpawl tuamtuam apan cadre 114 in galvan koihkhia in kipia

Imphal, Sep-26: Mantripukhri a IG/AR (South) HQ ah helpawl tuamtuam apan cadre 114 in galvan koihkhia in mainstream zom dingin Manipur Chief Minister O. Ibobi ma ah kipekhia uhi. Chief Minister in galvantawi hinkhua nuse dia kipekhia mi 114te pahtakthu genkawm in galvantawi a kiphinte’ ziakin Manipur ah khantouhna ding nasepna a nawngkai ban ah mipite tungah haksatna thupitak tunsek uh chi’n leng gen hi. Chief Minister in a genzelna ah a govt in Manipur a muanna leh bitna(Law & Order) dinmun bawlhoih ding leh electric meivak(power) kiching piak a thiltup lianpente laka tel hi’n gen hi.

Tuni’n IG, AR(South) complex a ‘Home Coming Ceremony’ ah PULF leh huai apan kakhia faction khenkhat apan cadres 16, UNLF akipan 18, KYKL leh PREPAK akipan 17 tuak, KNLF akipan 12, KCP faction tuamtuam apan 9, PLA akipan 13, UPRF akipan 1, KNLA akipan 2, UPPK akipan 6 leh UNPC apan 3 hi uh a, tuni a galvan koihkhiate lakah numei 5 tel uhi. Tuni a galvan koihkhiak a omte lakah AK series rifles, lathode guns, carbines leh pistol hunkhop tel a, Wireless sets leng bangzah hiamtak tel hi.

Chief Minister in a thugen sunzom kawmin leitung gam tuamtuamte masawn leh khangtou a a om lai un Manipur ah gam buaina ziakin haksatna tuantualna tuni tan omtou zel a, buaina ziak mahin tuantualna leng lam tuamtuam ah om hi’n gen hi. Hibang dinmun haksa a Manipur a omlai in tuni a galvan koihkhia tuailaite’n ngaihtuahna lungsim hoih nei uh hi’n Chief Minister in gen hi. Huaiziakin amaute mainstream a om dingin ngainataka na pom hi’n gen a, amaute khawsakna ding leh rehabilitation dingin govt in panlak theihna om teng ah panla ding hi’n leng CM in gen hi.

Tuni a Home Coming Ceremony hun ah Home Minister Gaikhangam, Inspector General of Assam Rifles(South) Maj General UK Gurung, Manipur DGP Y. Joykumar,IPS leh Principal Secretary(Home) Dr J. Suresh Babu,IAS banah official tuamtuam in uap uhi.

Minister in Album hong ding
Lamka, Sept-26: Health & FW Minister Phungzathang Tonsing khuallian a pang in Sept 29, 2012 zinglam dak 11:00 in YPA Hall, New Lamka ah Gospel Music Video Album thak ‘Jehova Shalom’ kichi hong ding a, Rev T.Lalzagin, DS, Lamka North Divn in lan ding hi. Huai ah Functional President in Ginsuanhau, MLA (Singngat A/C), Guest of Honour in Vungzagin Valte, MLA (Thanlon A/C), Chief Host in M.Gouzamang Guite,EM/ADC leh Special Guests in MDC te pang ding uhi.

Hunchiam omlou General Strike
Lamka, Sept-26: Henkhothang Haokip, Chief of S. Nabil apaisa Sept 7, 2012 nitak a kapliam a om dam zoulouin a sih ziakin tualthahna lungkimlou a kibawlkhia JAC leh student pawl tuamtuam kigawm in zanhal in Protest Rally pai uh a, zan apan in CCpur district sunga govt office omte khahsak uhi. JAC pawlin tuni’n Tuibuong a KIC office ah Press/Media-te kimuhpih uh a, tualthatte matkhiak ahih kei leh Sept 29, 2012(Kiginni) akipan hunchiam omlou in CCpur district pumpi ah General Strike om ding chi uh a, thiltung a om leh JAC in mawh pawlou ding hi’n gen uhi. General Strike sungin mipite’ kithuahpihna ngen uh a, tulel a Govt. nasepnate boycott leng paitou zel hi’n gen uhi.

UZO in President kitawpna pom
Lamka, Sept-26: United Zou Organisation(UZO) President Ginsuanhau in MLA(Singngat A/C) dia telching ahihziakin June 5, 2012 in President hihna apan kitawpna pia a, huai tawh kisai in UZO Executive Committee te’n tuni’n Zogal Hall ah meeting nei in Ginsuanhau kitawpna pom uh hi’n kigen hi. Tuni a UZO thupukna dungzui in ‘Father of the Zomis’ title piaka om T. Gougin,ex-Minister zahtakna in June 5 in amah sunna hun zat hizel ding a, huaini in Zou nam flag a khaina kimchiang ah khainiam zel hiding chihthu om hi.

Chairman,ADC leh DC zinkhe ding
Lamka, Sept-26: Langkhanpau Guite, Chairman ADC/CCpur leh Ms Jacintha Lazarus, IAS, DC/CCpur & ED/DRDA makaihna in MDC leh official hunkhop in Sept 27, 2012 in Sinzawl khua pha ding uh a, Sinzawl khua ah Sinzawl PHC’ading BADP 2009-10 fund a kilei Ambulance gari pekhe ding uhi. Huaizawh in khaw tuamtuam a school, PHC, PHSC leh development works-te inspection bawl ding uh hi’n leng kigen hi.

Old Age Pension sum ladin theisak
Lamka, Sept-26: CCpur district sung a Old Age Pensioner(Black, Green, Blue Card nei) hileleng pension sum la nailoute’n District Social Welfare office ah Sept 28 & 29, 2012 zinglam dak 10.30 leh nitaklam dak 3.30 kikal in laktheih ding a, bank account hong nailoute’n office akipan mah in account honna ding form la ding in Dist Social Welfare officer/CCpur in theisak hi.

Dr Chiin Guite in join nawnta
Lamka, Sept-26: District Hospital a Eye Specialist Dr(Mrs0 Chiin Guite in Central deputation in kum 7 sung Delhi ah a sep nungin hong kiknawn a, Lamka a District Hospital ah tuma deuh apan joined nawn hi. Mitlam buaina neite adin poimawh hunhun a zuat theih ding mitlam doctor om nawnta hi.

DC in SSC coaching mun enkhia
Lamka, Sept-26: P.Tongminthang Lhungdim, MDC(Sagang) in tuni nitaklam dak 4:00 in Central Church, Zomi Colony Road, Hiangtam Lamka ah Zou Sangnaupang SSC coaching centre mun vapha in thil omdan enkhia hi. MDC in SSC exam a tel dingte hasotna thu gen a, huai coaching centre organizer-te kithuahpihna apiak ban ah student-te theitui dawnpih hi.

MGNREGS tungtang meeting
Lamka, Sept-26: Ms Jacintha Lazarus, IAS, DC/CCpur & ED/DRDA makaih in DC’s office a BRGF Resource Centre ah tuni in MGNREGS tawh kisai meeting om hi. Huai ah Job Card renewal thu, revised work plan, MGNEGS 2012-13 a 1st phase ni 30 nasepna thu, Management Information System, Job card holder-te’ bank account hon thu leh thu poimawh tuamtuam genkhawm uhi.

Workshop & training hun kisuan
Lamka, Sept-26: Singngat TD Block in MGNREGS nasepkhiakdan tawh kisai in Singngat Community Hall ah Sept 27, 2012 in Workshop & training programme neih dia a bikhiah uh himahleh hun lemtang danga neih dingin ahun suan uh chih thutut kingah hi.

SBI/CCpur Branch ah hawm ding
Lamka, Sept-26: SBI/CCpur Branch ah kal masalam in account honna ding application form bei mahleh zan zekin hong tun nawn ziakin Sept 28,2012 akipan in ni khat zelin 30 hawmkhe ding uh chihthu kiza hi.

TET form hawmna mun kisuan
Lamka, Sept-26:S.Nabil hausa (late) Henkhothang Haokip thah ahihziaka lungkimlou JAC pawlin zan apan igovt office khaksak in govt activities tuamtuam leng ‘ban’ a puan ziak un ZEO/CCpur office a TET form hawmna nawngkai mahmah hi’n kigen hi. Hileleng tuni’n TET form hawmna mun kikheng a, ZEO/CCpur office kong a Synod House ah hawmkhiak hi a, Police leh VDF- te duty uhi.

Biakinn thak honna om ding
Lamka, Sept-26: Tuibuong Area Seventh-Day Adventist Church-te saina in Sept 30, 2012(Sunday) sun dak 12.30 in B. Vengnuom a Greenwood Academy campus ah biakinn thak latna leh kipahpihna tawh kithuah programme zang ding uhi.

6th Jananeta Hijam Irabot
Lamka, Sept-26: CCpur United Club Ornanisation te’n zan in Tuibuong Jr H/S ah ‘6th Jananeta Hijam Irabot theihgigena kha, 2012’ zang uhi. Huai ah Chief Guest in Y.Anandini Devi, President LUDO pang a, Functional President in S.Kulla Mangngam, President CUCO pang a, Guest of Honour in L.Paumang, Headmaster, TGJHS pang hi.Function Committee te’n student-te lakah pen leh note book 1 chiat hawmkhia uhi.

SUUNNA
K. Kamkhanlian(43) s/o Ginzathang of Khominthang,New Lamka tuni nitaklam dak 5.00 velin TB natna ziakin Dist Hospital ah si a, Sept 27, 2012 in kivui ding hi.

NCB te’n khamtheih hunkhop mukia
Imphal, Sept-26: Narcotic Control Bureau(NCB) te’n Dimapur apat Manipur zuan Truck(No. MN01/7244) khat tuni sun in Kangpokpi ah khawlsak in hoihtaka a check ua leh Truck sung apan damdoi khamtheih chi tuamtuam 3 a veka kigawm Rs. 1,027,370 man mukhia uhi. Huai khamtheih muhkhiakte tawh kisai in NCB te’n Md. Amir Khan(25) of Lilong Chairen Makhong leh Md. Amjat Khan of Thoubal Moijing Litan Makhong mankhia uh chihthu om hi.

CM kiang ah memorandum pia
Imphal, Sept-26: All Manipur Hills District Contract Basis Teachers Assn pawlin tuni’n Chief Minister kiang ah tuni’n memorandum pia uh a, huai ah amau pawl contract basis dan in kum 2006 in lak hi uh a, Dec, 2008 tan sem uh a, huai apat govt. in extension bawl lou hi’n taklang uhi. ATSUM tawh pangkhawm in regular teacher a lak dingin govt. tawh kilemna bawl himahleh January 2009 apat tuni tan lawh lalou uh a, Ministry lui a Education Minister DD Thaisi in amau pawlte priority piak masak din gen ngei a, kum over tamtak a om tak ziakun a haksatnate uh govt. in enkai ding in CM ah ngen uhi.

MPP te’n Home Minister ngen uh
Imphal, Sep-26: Manipur People’s Party(MPP) Advisor O. Joy Singh in Union Home Minister Shusilkumar Shinde kiang ah Inner Line permit system(ILP) tawh kisai private member resolution puaklut laia a thugen zukkik ding in ngen uh a, huchi ahihkei aleh MPP in panla ding uh hi’n theisak uhi. Manipur Assembly session ah July 13,2012 in Manipur ah ILP koihna ding a thupukna om pansan in Sept 10,2012 in New Delhi ah Private Member Resolution puaklut ahih lai in Union Home Minister in a thugen lungkim huailou chi’n MPP pawlin theisak uhi.
Union Home Minister in Nagaland CM Rio leh Manipur CM Ibobi in inner-line permit zat ding deihna in national newspapers khenkhat a thusuah omte thil hitheilou leh Constitution tawh kituaklou chi a Union Home Minister in a thugen mawhpaih huai chikawm in MPP Advisor O. Joy in Union Home Minister kiang ah zukkik ding in theisak hi. (UNA agency)

Dec tan in BPL survey zawh hiding
Imphal, Sept-26: Manipur ah BPL innkuan omzah diktak theihtheihna kawm ding in tulela pailel Socio-Economic & Caste Census(BPL Census) kichi azekaipen in leng December, 2012sunga zawhsiang hiding in kigen hi.Manipur ah BPL family omzah simna hun paisa ah kibatlouhna lianpi om hi’n kigen hi.Rural Development deptt in BPL innkuan zah a chiamtehdan un 3,29,053 pha a, himahleh Director of Consumer Affairs, Food & Public Distribution in a chiamtehdan un BPL innkuan 1,02,400 lel om a, nasatakin kilamdang hi’n gen uhi.

Chingpi hinglai aki lakkhiak sak
Dimapur, Sep-26: Kaziranga National Park ah tuni’n sabeng(poacher) te’n chingpi a kap liam uh ahinglai aki lakkhiak sak uhi. Rangaraga mun a thiltung hi a, chingpi a gil ah kapliam ahih nung in aki(horn) leh a bil(ear) khat at khiaksak in om a, chingpi pen ding zou kei mahleh sabengte sual sawm in pang a, huai thiltung ziakin mun tuamtuam ah mipi sousang in Animal right group te’n Forest department mawhsa mahmah uh hi’n taklang uhi. Official thusuak dungzui in tuni mahin Kaziranga National Park a Bagori range mun ah chingpi aki at khiaksa luang mukhiak in om nawn a, tukum sung in Kaziranga ah chingpi 14 thah in om hi’n kigen uhi. (UNA Agency)

Kawkeek in natna damsak thei chih chetna omlou - Govt

Mizoram ah ‘Kawkeek’ zongte’n biakinn luh
Aizawl, Sept-26: Serchhip police apan kizadan in tulai a ganhing mantam mahmah hi a kigenthang kawkeek (gecko/ reptiles) zong pawlte’n zan in Serchhip district a Bukpui khua ah biakinn khat luh in a ganhing zon uh matna ding in mun siangthou (pulpit) tanpha su botlawh uh chi uhi. Biakinn kaite’n a gendan un kawkeek zong te’n pulpit a suksiat khak banuah huaikim(area) hihthanghuai uh a, laisiangthou(Bible) omte tanpha tuanglai ah kithehzak a, pulpit tungzawn ceiling tunglam a om kawkeek a matsawm ziakua hibang thiltung hi’n gen uhi. Ceiling leng kihihsia in vang hemhom chi’n zingsang a devotion hawhte’n gen uhi. Saptuam makaite’n thil omdan a theihphet un Serchhip police station ah report pah uh hi’n kigen hi.
Thusuakin a gendanin atung in saptuam leader-te’n Setan biate’ sulnung hidingin ginglel uh a, ahihziakin Police te’n thil omdan hoihtaka a etkhiak nung un kawkeek zong pawlte’ gamtatna ahih zawkdan theikhia uhi. Serchhip police te’n a gendan un, kawkeek zongte kuahiam aliam om ding ahi chi ua, biakinn tuang (floor) apan ceiling feet 20 vel asang hi a, huai ah mi khat akia om ahihdan thei uhi.Tua ziakin a kia pen in banghiam liamna (injury mark) a nei ding chi uhi. Police te’n biakinn sung buluhte zong mahle uh hiai thu sut ahihtanin matkhiak om chihthu zak hinailou hi.
Kha bangzahhiam paisa apan Manipur leh Mizoram ah ‘kawkeek’ zon thang mahmah a, Myanmar leh Assam apan businessman lian taktakte’n hong lasawn uh chi uhi. Amaute’n sum a lakh asim a hong leizawh chiangun Southeast Asian gamte ah pawlut in man tam taktak in zuak uh a, HIV/AIDS tanpha damsakthei a gen ahihbanah cancer telin natna tuamtuam damsak thei damdawi manpha mahmah hi’n kigen hi. Champhai district ngial ah nitak chiangin gammang leh mun tuamtuam ah torch light tawh a honhon a kawkeek zong muh hi a, forest official-te’n alawh ngaihna theilou uh hi’n kigen hi.
Aizawl Wildlife division nuai a City Wildlife Offence Operation (CWOO) te’n tuma deuh Sept 8, 2012 in Aizawl ah ‘kawkeek’ 8 hunkhia in aneitu mi 4 leng man uhi. Kawkeek mat ahihleh Wildlife (Protection) Act, 1972 nuai ah phallouh hi’n kigen hi. Wildlife activist khat in agenna ah, kawkeek gikdan leh saudan ah aman bikhiah hi a, a tangpi in Rs 8 -20 lakhs kalin baihlam takin khawngthei ua, Myanmar tawnin Indonesia leh Malaysia ah tampi petmah puaklut hita chi hi. Tualouin, Mizoram govt in natna tuamtuam hihdamna dia kawkeek hoih ahihlam chetna bangmah omlouh ziakin hiai kikhemna kuama’n gingta nawnlou din leng thusuah bawl ngeita uhi. Ahihziakin, azatna manpha mahmah omkei leh kua’n hi an gam ah sum a lakh alakh a honglei ngam ding uhiam chih dotna liantak om hi a genpawl om hi.