DC teamte hongtung, Chairman teamte omlai
Lamka, Sept-28: Langkhanpau Guite, Chairman ADC/CCpur leh Ms Jacintha Lazarus, IAS, DC/CCpur & ED/DRDA makaihna in MDC leh official hunkhop in zan in Thamlon bial pha in zinkhia uh a, Sinzawl khua apan DC teamte’n NEC road tawn in Tipaimukh road zui uh a, tuni zingsang dak 1:30 velin Lamka hongtung kiknawn uhi. Chairman ADC/CCpur leh teamte’n program dang a neihziak un Thanlon bial ah omlai uhi.
Chairman, ADC leh DC teamte’n zan in a kuanlam un Zezaw PHSC building enkhia uh a, Singngat Primary Health Centre leng enkhia uhi. Singngat akipan Guite Road tawn uh a, Suangdoh govt H/S enkhia uh a, huaizawh in Tuima a Medical camp om leng enkhia uhi. Huai apan Thuangtam JB school, Mualnuam a Tualkhohau H/S, Mualnuam khua a Solar Street light leh Songtal govt H/S inspection bawl uhi. Songtal govt H/S ah DC/CCpur & ED/DRDA in ADC/CCpur nuai a 13th Finance tungtawn a kibawl Water Tanky 1 hong hi. Huai khua mah ah BADP 2011-12 fund a Mineral Water Tanky 2 kibawl thak Chairman ADC leh DC/CCpur in 1 tuak hong uhi. Sinzawl khua ah Chairman, ADC in Sinzawl PHC ading BADP 2009-10 fund a kilei Ambulance gari pekhia hi. Sinzawl khua apan in Khuanggin JB school enkhia uh a, huai apan DC team in NEC Road tawn in Thanlon khua ah lut uh a, huai apan Lamka hongtung uh hi’n kigen hi.
Power House munding enkhia uh
Lamka, Sept 28: Supdt Engineer (Power) makaihin tuni in power deptt apan EE 3, AE 1 leh SO 2 in Thanlon A/C zuan uh a, amau Thanlon leh Pherjawl ah Power house bawlna ding mun a etkhiak ding banuah Pherjawl tan electric gui khunsuak theih ding hiam chih study neiding uh chihthu kiza hi. Tunung sawtlou in engineer team in Sinzawl ah Power house bawlna mun ding leh electric gui khunsuak dingdan enkhe ding uh a, nasep leng kipan haknawnlou ding hi’n thusuak kingah hi Vungzagin Valte,MLA(Thanlon A/C) in a Constituency ah electric tun suaksak sawm in panla a, Power deptt leng pua CM Ibobi kiangah a Constituency sung ah electric vaksuak sakdin ngen a, CM in tukum sung ngei in electric gui khunsuak ding chi’n genpih hi’n kigen hi.
Electric revenue drive sunzom uh
Lamka Sept-28: Electricity deptt/CCpur divn te’n Lamka leh akim a khaw tuamtuam ah electric fee tampi ba leh phalna beia electric late zonkhiatna dingin Sept 7, 2012 apan ‘revenue drive & detection of un-authorised connection’ aneih uh sunzom zel uhi. Veng/khua hunkhop ah revenue drive & phalna beia mei la zonkhiakna nasep zouta uh a, tuni’n SDO/CCpur office kim lak drive bawl uh a, phalna beia electric la mi bangzahhiam te’ electric lakna gui lakkhiatsak(disconnect) uhi.
DC in TET form hawmna enkhia
Lamka, Sept-28: ZEO office a TET form kihawm 1 ah Rs 330/- zel pia alak thu ah tuni’n Ms Jacitha Lazarus, IAS DC/CCpur leh Maniram Sharma, IAS AC to DC in TET form hawmna mun enkhia uhi. DC ZEO office ah ZEO leh CDSU makaite meeting neihpih a, TET form 1 zel ah Rs 300 lak ding, form lak leh koihna a senna a om leh District Administration in seng ding hi'n DC in gen hi. ZEO office ah Sept 24, 2012 apan form 1 ah Rs 330- a zuakkhiak hi a, form lakhinsa mimal complaint a omleh ZEO/CCpur in Rs 30 lehkik din mawhpaw ding chi'n DC in gen hi. Huailou in TET form fill-up khit in lakna mun chiat ah submit theih hi’n kigen hi.
JAC te’n General strike puang
Lamka, Sept-28: Henkhothang Haokip,Chief of S. Nabil thah ahih lungkimlouh ziaka kibawlkhia JAC pawlin tualthatte matkhiak ding phutna in kiphinna tuamtuam pat nungun leng govt in tualthatte mankhelou chi’n Sept 29, 2012 akipan in hunchiam omlou ding in General Strike puang uh a, Press Release ah JAC Chairman Henkhomang leh JAC Secretary Samuel in suaikai uhi. Hileleng Press/Media-te leh medical tawh kisai emergency thilte khahkol uhi.
Truck accident ziakin mi 1 si
Lamka, Sept-28: Thanlon sub-divn sung Bukpi leh Zoutung kikal a Muallukhim kichihna mun ah zan sunnung lam dak 2.00 in Parbung apan Lamka zuan atai 407-Truck (No. MN-02A/2365) accident a, huai ah passenger mi 4 tuangte lak ah Truck tunga tuang Siema Hmar of Parbung liamin Bukpi V/A panlakna in District Hospital puaktung himahleh damzoulou in si hi’n kigen hi. Truck tuahsiat thu theih phet in huai apan gamlalou bamboo camp kichihna muna suangla Mahajon Thanglal in JCB a thawn a zangsak in va panpih a, amah tungah Bukpi VA leh ZYA te’n kipahthu gen uhi. Fima’ luang a khua uh Parbung a vui dingin puak hi’n kigen hi.
Dukan ngeina bang a hon hiding
Lamka, Sept-28:Lamka Traders & Self Employed Assn. apan thutut kingah danin tuni nitaklam dak 6:00 tan in leng General Strike tawh kisai in JAC apan bangmah thuzak hilou a, huaiziakin Dukan/dawr ngeina banga hon hiding chi uhi. Oct. 7, 2012 (Sunday) sunnung dak 1:30 in Synod Hall, IB Road ah Public Consultative meeting om ding chihthu leng kiza hi.
MZP Branch Diamond Jubilee
Lamka, Sept-28: Mizo Zirlai Pawl(MZP) Lamka Branch kum 60 chinna Oct 24, 2012 in Hmuia Veng a YMA Hall ah zatsawm uh a, huai dingin kisakhol lel uhi. Tuni sunnung in Group YMA Office, Hmuia Veng ah MZP Diamond Jubilee T-Shirt kibawl honkhiakna om a, B. Zodingliana, MDC in khuallian a pang in hongkhia a, Rev. R.R Chungnunga in Pathian kiangah lan hi. Tuni a T-Shirt honkhiakna ah YMA Lamka Branch apan palaite’ tel uh a, B. Zodingliana in thugen hi.
Primary Teachers Assn meeting
Lamka, Sept-28: CCpur District Primary Teachers Assn, 2006 pawl in tuni in KKL complex ah joint meeting nei CCpur dist sung ah kum 2006 in mi 189 in Education (S) nuai ah Primary teacher ngah uh a, Dec 15, 2011 in joinning report pe mahle uh tunitan lawh mu nailou in govt in MGEL leh post creation hihfel nailou hi'n gen uhi. Govt in a ngaihsaklouh ziaka lawh a muh tuankei ualeh maban ah kiphinna tuamtuam banah thil omdan court tanpha tut hidin gen uhi.
Health Camp ah mi 188 enkhia
Lamka, Sept-28: District Health Society/CCpur saina in zan in Singngat PHC nuai a om Tuima khua ah ‘Mobile Medical camp leh Reproductive Child Health (RCH) camp’ kithuah om hi. Huai ah doctor 5 in damlou mi 188 val en uh a, damdoi leng manbei(free) in pia uhi. Huai DC/CCpur & ED/DRDA leh Chairman ADC/CCpur in leng zan in huai Medical camp enkhia uhi.
Cleanliness Day zangchiat di’n theisak
Lamka, Sept-28: Kumteng in Oct 2 a National Cleanliness Day kizang bang in tukum in leng govt office, semi govt office, institution teng leh NGO teng in leng mahni office campus hahsiang chiat ding leh hausa/village authority tengin mahni khua chiat ah social work nei a khawsung hahsiang dingin DC/CCpur in theisak hi.
Old Age Pension sum hawmkhia
Lamka, Sept-28: CCpur district ah Old Age Pensioner (Black, Green, Blue Card, Red card nei) pension sum la nailoute ading in tuni zinglam dak 10:30 in District Social Welfare office ah pension sum hawmkhia uh a, Sept 29, 2012 in leng sunzom ding uh chih himahleh JAC pawl in CCpur dist ah indefinite general strike apuan ziak un awla hawmkhiat hidin gen uhi.
SBI ah transaction omlou ding
Half Yearly closing ziakin Sept 29, 2012 in State Bank of India(SBI)/CCpur branch ah September Transaction bangmah omlou ding chi’n Chief Manager, SBI/CCpur apan thutut kingah hi.
Zomi Council Meeting kisuan
Lamka, Sept-28: Nehru Marg a Zomi Council(ZC) Administrative Office Sep. 29,2012 zing dak 7.00 a Cabinet meeting om ding chih himahleh S. Nabil hausa thah ahihziaka JAC pawlin General Strike a puan ziakun Oct 1, 2012 zing dak 7.00 a neih dingin ahun suan uh chi’n Chairman, ZC apan kiza hi.
Activa gari kigumang
Lamka, Sept-28: Simveng a T.Zamchinlam tenna inn kong lak a Honda Activa (No. MN-02/3656) kikoih Sept 26, 2012 nitak dak 9:00 velin meltheihlouh kuate hiam in gumang uhi. Huai thu ah gari neitu in Police ah report bawl uh a, Police te'n FIR No. 104(9) 2012 CCP-PS U/S 379 IPC registered uhi.
Dukan ngeina bang a hon hiding
Lamka, Sept-28:Lamka Traders & Self Employed Assn. apan thutut kingah danin tuni nitaklam dak 6:00 tan in leng General Strike tawh kisai in JAC apan bangmah thuzak hilou a, huaiziakin Dukan/dawr ngeina banga hon hiding chi uhi. Oct. 7, 2012 (Sunday) sunnung dak 1:30 in Synod Hall, IB Road ah Public Consultative meeting om ding chihthu leng kiza hi.
Tuni’n Cabinet meeting om
Imphal, Sept-28: Tuni nitaklam dak 3:00 in Cabinet meeting om a, huai ah London Olympic Games ah Weightlifting atel Ng. Sonia, tulela Uttar Pradesh a Inspector sem, DSP(Sport) piak dingin thukim uhi. Common Wealth Games a Gold Medal la Monika Devi, tulela CRPF ah constable sem leng Manipur Police a SI piak lemsa uhi. Huai banah Manipur a Advocate General N. Koteshwar leng Guwahati High Court a Judge dia guan ahihziak in Advocate General post ong a, huai mun-awng luah ding in Guwahati High Court a Senior Advocate Kh. Ibohal guang ding in thukim uh hi’n kigen hi.
Moreh kiangah Bomb puakzak:mi 3 si
Moreh, Sept-28: Chandel district sung Moreh akipan km. 20 vela gamla Kwatha village a Sericulture farm kiang ah lamlian apan feet 20 vela gamla ah bomb kiphumgu khat puakzak a, a kiangnai a omkha 24-Assam Rifles jawan 2 si a, midang 5 liam uh hi’n thutut kingah hi. Huailou in bomb puahzakna apan gamlalou a om civilian N. Sangaijao (60) s/o (late) Wahongchong Angou of Kwatha village amun ah si a, nupi 2 - Kaboklei Garry (45) w/o Ito of Kwatha leh Angou Rito @Akoi (30) w/o Tomanjao of Kwatha liam uhi. Aliamte Kwatha post a om A/R te’n Moreh hospital ah pawtung uh a, Koboklei pen gim mahmah hi.
Bomb puahna mun a si 24- A/R jawan 2te R. No. 5007966 Gajendra Kaushik of Rajasthan/Alwar Bhawadhi village(Rajasthan) leh R. No. 2402068 Kewal Singh of Sanaddi village Shahpur district, Himachal Pradesh hi uhi. Hiai thu Press a sut ahihtan in bomb puahna ziak diktak theih hi nailou a, Hospital ah Pressmen-te leng lutsak hilou uhi.
Andro ah Medical Camp om ding
Imphal, Sept-28: Lions Club of Greater Imphal in National Rural Health Mission tawh pangkhawm in Sept 30, 2012 in Andro ah Mega Health Camp sai(organized) ding uh chih thusuak kiza hi. Huai Mega Health Camp ah damlou om zahzah en(free medical check-up) a bawl ban uah damdoi leng manbei in pe ding uh a, X-ray tanpha leng akul leh poimawh dan in manbei in la ding uhi. Huai ah Andro leh akim naia khaw tuamtuam apan damloute’n vazuan ding in Lions Club of Greater Imphal makaite’n mipi zasak uhi.
Combined HQ meeting om ding
Imphal, Sept-28: Manipur ah tulai in mun tuamtuam a bomb puak leh bomb kam(plant) a om munluat ziakin Oct 1, 2012 nitaklam dak 3:00 in CM makaihna in security tawh kisai genkhawm ding in Combined Head Quarter Meeting om ding hi. Huai ah GOC, Eastern Command; GOC 3rd Corps; GOC 57-Mountain Division; IG/AR (South); Chief Secretary leh Manipur DGP tel ding uh a,tulai a bomb puak leh bomb thangkam tungtang ah panlakdan ding genkhawm ding uh chihthu om hi.
Union Cabinet reshuffle zakai ding
Imphal, Sept-28: Prime Minister Dr Manmohan Singh makaihna UPA govt a Cabinet lepthakna(reshuffle) leh tanvou bikhiahthakna om pah ding hi’n kigen mahleh policy khenkhat tawh kisai a thupukna(decision) lakdan ah UPA atel party tuamtuam sung ah ngaihdan kibatlouhna thupitak om ziakin Casbinet reshuffle om hun ding deih banga kin theilou in October 2012 kha kimlai vel a om theipen ding hi’n a gen pawl om a, huai dan in akinpen in leng October 14, 2012 vela om thei pan ding hi’n kigen hi. Trinamool Congress in UPA govt nusia in MP 19 in UPA a gupna ua pan a kizukkik ban uah Minister 6 leng a kitawp ziakun UPA govt ah Minister mun hunkhop awng a, Trinamool Congress apan UPA a Minister atel kitawpte lakah Railway Minister Mukul Roy leng a telkhak ziakin Road Transport & Highway Minister CP Joshi in Railway Ministry tawh lenkhawm hi.
JAC of AMTUC & AMGEO lungkimlou
Imphal, Sept-28: All Manipur Trade Union Council(AMTUC) leh All Manipur Govt Employees Orgn(AMGEO) kigawmna Joint Administrative Council(JAC) pawlin Manipur govt tawh kihoulemna bang in govt employee-te tuni tan 6th pay ahi bangbang a piak ahihlouh lungkimlouh thu puang uhi. Huailou in January 1,2012 akipan Dearness Allowance(DA) leh Dearness Relief(DR) 7% leh July 1,2012 akipan Dearness Allowance(DA) leh Dearness Relief(DR) 7% kigawm 14% tutan piaklouh a om leng lamdang sakthu puang uhi. Govt machinery apang employee-te lawh leh DA/DR ginataka piak ahihlouh lai in MLA leh Minister-te 29/5/2010 akipan in a lawh uleh allowance uh pungsak uh a,MLA/Minister-te lawh Rs. 25,000 akipan Rs. 70,000 in khangsak uhi. JAC in strike leh kiphinna neih lunglut kei mahleh govt tawh kilemna banga govt in a sepkhiak tuankei le hut in ut kei leleng JAC in kiphinna pan ding chi’n thusuak ah taklang uhi.
Moreh ah TB dalna ding meeting
Imphal, Sept-28: Moreh a Trade Centre Conference Hall ah tuni’n OKHO Trust,Manipur banah Manipur State TB NGO Forum leh Global Health Advocates India saina in ‘Advocacy-cum- Consultations on Care and Control of TB’ chih programme om hi. Huai ah
Global Health Advocate India a Programme Officer Christofer Mathew leh Dr. Okram Manihar (retired State TB Officer) in makai uh a, TB natna apan kivenna ding leh TB a damloute etkoldan ding tawh kisai sinsak uhi. Huai ah pawl tuamtuam apan mi tamkhop tel uhi.
2nd Semester result suak
Imphal, Sept-28: MU nuai a B.A/B.Sc/ B.Com/ B.Sc(Biotechnology) leh B.Sw 2nd Semester apaisa June 2012 a examination om result suak hi. BA 2nd Semester a candidate 9564 lak ah 6797 in passed uh pass zah 71.06% tung hi. B.Sc 2nd Semester a candidate 7639 lak ah 4692 in passed uh a, pass zah 61.42% tung hi. B.Com 2nd Semester ah candidate 521 om lak ah 351 in passed uh a, pass zah 67.37% tung hi. B.Sc(Biotechnology) 2nd Semester ah candidate 16 om ah 16 in passed uh a, pass zah 100% tung hi.B.Sw 2nd semester ah candidate 8 lakah 8 passed uh a, pass zah 100% tung hi.