Indefinite bandh omtou lai ding

Nabil hausapa sihna tawh kisai

Henglep sub-division sung a S.Nabil khua ah Sept 7,2012 nitak dak 9.00 velin Henkhothang Haokip s/o(late)Nehkhomang Haokip, Chief of S.Nabil zuntha dinga pawtkhia mi bangzahhiam kipawlte’n kapliam uh a, kintakin Dist.hospital puaktung himahleh damzoulou in si hi.

Tuni (sept 29) suun in SP/CCpur office chamber ah Henkhothang Haokip sihna tawh kisai in Investigation Officer (IO) Jugeshchandra, MPS Addl SP/Bishnupur leh JAC makai te’n joint meeting nei uhi. Huai hun ah Addl SP/Bishnupur in S.Nabil hausa pa’ thahna tawh kisai Police te’ panlakdan report bawl hi.

SP/CCpur apan kiza dan in S.Nabil hausa pa’ sihna thu ah CCpur Dist himahleh Police jurisdiction ah Bishnupur Police te mawhpuakna hikha a, bandh, general strike om hun in CCpur mipi’n thuak kha a, tualthat tute matkhiat nang in CCpur Police te’ area hikhalou chi hi. Aman agenbehna ah Henkhothang sihna thu ah govt in ngai poimawh mahmah a, niteng in DGP leh Addl DGP kiang ah thil omdan report gige ahihdan gen a, tualthattute govt in mankhe ngeingei ding ahihdan gen a, bangchik hun a matkhiat ding chihbel tualthattute akibukmang ziak un genthei hilou chi hi.

JAC te kiang ah general strike khawlsan phot ding in ngen ahihdan SP in taklang a, Nabil hau thahna tawh kisai tualthattute panpihtu Moirang Police te’n mi 4 mankhia in mi 1 CJM in bail in pawtkhe sak a, mi 3 teng jail a omlel uh hi’n gen hi. Hibangkalah, JAC te apan thusuak kingahdanin, tualthat-tu taktakte matkhiak ahihma hunchiam omlou CCpur bandh sutzop hiding chi uhi.