Health Minister vaidawnna omding
Lamka, Sept-25: Dr HL Liensang, CMO/CCpur leh Dr V.C Pau, DFWO saina in Oct 2, 2012 zinglam dak 10:30 in CMO office campus ah Health & FW Minister Phungzathang Tonsing kipahpihna leh reception kithuah program om ding hi. Huai ah CMO leh DFWO nuai a Nurse leh ASHA member teng telding hi’n kigen hi.
Ni 40 sung an-ngawl thumna kipan
Lamka, Sept-25: Ms Lalremsiem leh EFCI Central Numei pawl kigawmte panlakna in tuni’n Muolvaiphei a Nehemiah Prayer Mountain ah ni 40 leh zan 40 sung an-ngawla thumkhawmna kipan a, Rev Zoramsiem, Gen Secy Central Women, EFCI/Shillong in hongkhia hi. Thumkhawmna ah khawpi sung mun tuamtuam apan EFCI te ban ah saptuam tuamtuam apan mi tamtak tel uhi. An-ngawl thumna Nov 3, 2012 tan sunzom ding uhi.
Vaiphei Officers’ Forum in kipahpih
MPSC saina a Manipur Civil Services Combined Competitive(Main) Examination,2010 leh Personality Test a lawhching Sl No. 33 Roll No. 07054-Soiminlien Lengen; Sl No. 75 Roll No. 03785-Chinlianhat Vaiphei; Sl No. 99 Roll No. 09478-Alfred Jamlallun Khaute leh Sl No. 104 Roll No. 10491-P.N., Boipi lawhchinna tung ah Vaiphei Officers’ Foum in kipahpihthu puang uh a, maban ah gam leh mipite adia a nasepna uah pilna, siamna leh itna tawh nasem a, lawhching touzel chiat dingin deihsakthu puang uhi.
JAC te’n govt office tamzaw khaksak
Lamka, Sept-25: Henglep sub-divn sung a S. Nabil khua ah Sept 7,2012 nitak in pawl khat in Henkhothang Haokip , Chief of S.Nabil a kapliam uh damzoulou in a sih ziakin JAC leh student pawlte’ panlakna in zan in Mass Protest Rally pai uh a, tuni apan in govt office leh govt nasepna boycott pan uhi. JAC leh student pawlin tuni’n govt office tamzaw khaksak uh a, ZEO office ah security venbitna nuai ah TET form hawmkhiat hi a, gate pawlam ah TET form la ding tamtak om mahleh office staff te’n nasemtheilou uhi. Tuibuong area a govt office omte ah security duty mahle uh staff-te office kai tawm mahmah uhi.
19th Livestock Census om ding
Lamka, Sept-25: Vety & Animal Husbandry deptt/CCpur in district sunga ganvulh om zah suikhiakna dingin ‘19th Livestock Census’ patsawm uhi. Vety staff te’n ganvulh omzah sim kawmin innlusi ah banlut ding uh a, huai hun ah kuapeuh in kithuahpih chiat dingin Joint Director(Vety)/Ccpur in ngetna thusuah hi.
Chiahpui khawmite’n buaipih
Lamka, Sept-25: Thu kizadan in zanhal zinglam in Mizoram a Chiahpui khua ah pitek khat gammang a, bengngong ahihziakin ginatakin bangmah dottheih hilou chi uhi. Nitaklam dak 6.00 velin thil omdan theihchet hi a, Chiahpui V/C te’n kem uh a, lungsim venglou ahihbanah lai a sim theihlouh ziakin bangtanhiam buaipih uh hi’n kigen hi. Aman vanzat bangzah hiam pua a, mun tuamtuam a huaithu a thehzak nungin Chingousiam of Bungpilon ahihdan theikhia uh chihthu om hi.
Medical Camp om ding
Lamka, Sept-25: Dist. Health Society/CCpur saina in Sept 26, 2012 in Sagang PHC nuai a Moirang Mantak khua ah Mobile Medical Camp leh Reproductive Child Health camp kithuah om ding hi. Sept 27 in Singngat sub-division a Tuima khua ah om nawn ding a, Sept 29 in Sangaikot block sunga Songpeh khua ah om ding hi.
Annual Games & Sports Meet
Lamka, Sept-25: Molnom West a Sunshine English School te’n Annual Games and Sports Meet 23veina nei ding uhi.Sept 26, 2012 in opening ceremony om ding a, huai ah Chief Guest in Captain M.N Khama, 27-Sector Assam Rifles khuallian apang in Annual Games and Sports Meet hongkhe ding hi.Huai ah student te’n kidemna tuamtuam nei ding uhi.
Police te’n helte 6 jail tun
Lamka, Sept-25: Chongkhozou designated camp a om KNO/KNF (Zogam) cadre Jangminlun Khongsai s/o Chungkhai Khongsai of Songpeh; Lalcha Misao (24) s/o Songkhosat of Motbung leh Suanminlal Khongsai (19) s/o Nangkhanthang of Ngoiphai in Sept 15, 2012 in camp apan AK 56-rifles 2, magazine 3, atang 40, M-16 rifles 2, magazine 3, atang 48 ban ah lethod thau (gun)1, atang 2 tawh taikhia 46-Assam Rifles te'n Sept 17,2012 in Bualmual leh Hengmol kikal a mankhia in Imphal Police ah pekhia uhi. CCpur Police te'n a case lasawn in Sept 25 tan Police custody ah om uh a, tuni’n CJM in mi 3 te Jail a omdin thutan khum a, Police te’n Sajiwa Jail ah koih in FIR No.96 (9) 2012 CCP-PS U/S 400 IPC & 25 (1-C) Arms. Act registered uhi.
Huaiban ah Khomoi ah Sept 19, 2012 nitak in 1/11-Gorkha Rifles te’n HPC(D) President Group apan Ramchhuoilou Singson (38) s/o Lienkhokam of Rovakot, Kenedy Hmar (21) s/o (late) Biekvel of Maulen leh Ruolneilal Puruolte (23) s/o Tlansiem of Lungthulien mankhia uh a, mi 3te apan in 9mm pistol 1, magazine 1, atang 2 leh 7.65mm pistol 1, magazine 1 leh atang 7 mukhia in Imphal Police ah pekhia uhi. CCpur police te’n a case lasawn in ni bangzah hiam sung Police custody ah om uh a, tuni’n CJM in jail a omdin thutan khum a, Police te’n Sajiwa Jail a koih in FIR No. 97( 9) 2012 CCP-PS U/S 400 IPC & 25(1-C) Arms.Act registered uhi.
Governor in Seminar hong
Imphal, Sept-25: Manipur Governor Gurbachan Jagat in tuni zinglam in Imphal a Hotel Classic ah State Academy of Training(SAT) Manipur, Integrated Watershed Management Programme a State Level Nodal Agency-te leh Bombay Natural History Society kigawm in ‘Good Governance in Manipur-Dialogue with civil society and Capacity Building & Management’ chih thupi zanga Seminar ah Chief Guest hikawm in hong hi.Governor in ‘Good governance for conflict resolution’ chih thupi a zang in thu a genna ah khantouhna nasep leh kivaipuakna dik tungtawnin muanna omthei phet ding hi’n gen hi.Adiakin Manipur adin tu dinmun ah kivaipuakna hoih leh siangthou poimawh petmah chi’n Governor in gen hi.
Manipur phaijang bial ah bomb 2 puak
Imphal, Sep-25: Tuni’n Manipur phaijang bial a mun 2 ah bomb puak a, muntuam ah kg. 5 vela gik IED bomb muhkhiak hi’n kigen hi. Tuni zingsang dak 5.30 velin Raj Bhavan apan gamlalou PIB Defence Wing office a mallam pang bang(wall) jul ah bomb puakzak a, hileleng asi leh liam omlou hi. Huaima deuh zingsang dak 5.00 velin Bishnupur district sung Khwairapam a National Highway No. 150 in a totkhak Imphal-CCpur lamlian ah bomb khat mah puakzak hi. Bishnupur bial Khwairapan mun a bomb puak ahihleh 6/8- Gorkha Rifles post zotna lampi hi a, huai ah leng asi leh liam omlou hi. Imphal khaswpi sunga bomb puak amau thilhih hi’n RPF/PLA thupuangtu in gen hi.
Thudang kizadan in Imphal-Silchar road a Moidangpok ah tuni zingsang dak 5.00 in kg. 5 a gik IED bomb muhkhiak hi a, Manipur Police a bomb expert team in ahuntak in hihsia uhi. Huailou in tuni zinglam dak 11.00 velin Imphal East district a Heingang Mayai Leikai a om Zilla Parishad Adhyaksha P. Bimola Devi tenna inn ah meltheihlouh te’n Chinese hand-grenade a paihlut uh puakzak manlou in Police a bomb siamte’n lakhia uhi. (UNA Agency)
Championship lak lopna om ding
Imphal, Sept-25: Mumbai ah Sept 8,2012 in 1st Super Fight League Challenger (Boxing championship) ah Kario Issac of Senapati in Champion hihna la a, huai kipahpihna in Senapati district HQ ah Sept 29, 2012 in felicitation programme om ding hi. Huai ah Chief Guest in Ms MC Mary Kom, World Champion & Olympic Bronze Medalist pang ding hi.Kario Issac in 1st Super Fight League Challenger a final fight zan sunnung dak 1.00 in Neo Prime Time ah kisuah(telecast) hi a, Zoom ah nitaklam dak 2.00 in telecast ahi hi.
Combined team in mi 1 kaplum
Imphal, Sep- 25:Imphal West Commando leh 18-Sikh Regt kithuah combined teamte’n search & frisking operation a bawl lai un helte hidia gintak pawlkhat tawh tuni nitaklam dak 5.40 velin Changangei Uchekon a Jamini Ashram kiang ah kikaptuah uh a, huai ah combined team in helpawl hidia gintak mi 1 kaplum uh a, misi taksa tung akipan in hand grenade 1 leh 9mm pistol 1 mukhia uhi.
Police thusuak in a gendan in combined team in khawl dingin thupe mahle uh kaplup a om pen khawl tuanlou in pai teitei a, combined teamte omna lam ah bomb paihkhum mahleh puakzak tuanlou a, huaitakin thau in a kap ziakin combined team in kaplum uh hizaw in gen hi.(UNA Agency)
Govt in Headmaster/Principal-te thupia
Imphal, Sept-25: Headmaster/Principal khenkhat in LP/Primary Schools, Jr H/S, H/S leh Hr Sec School ah officiating/adhoc teachers/employee khenkhat ahun uh beinung in leng sunzomsak uh a,huchibang adhoc leh officiating a semte appointment order a kitaklang hunsung kia semding himahle uh Headmaster/Principal khenkhat in hunbei nunga leng sunzom sak uh a, duty/utilization certificate a piakte uh Court case a vanzat ding suaksek chi’n Dy Secy(Education-S) in thusuah bawl hi.
Huaiziakin Education(S) deptt nuaia sem Headmaster/Principal leh Head of office te’n adhoc/officiating employee-te ahun uh bei nungin High Court ahihkei leh compentent authority apan thusuak om ahih kei aleh school hiam office a semsaklou ding in thupiak hi uh a, huai limsaklou Headmaster leh Prnicipal-te tung ah ‘Manipur Public Servant Personal Liability’ pansan in action lak hiding chihthu om hi.
Manipur a Political dinmun omdan
Imphal, Sept-25: Manipur ah tukum bula 10-Assembly election omlaia kizang Electronic Voting Machine(EVM) khoih lamdang hidin Congress hilou party dangte’n ginlelhna nei mahle uh tutung phaijang biala Gram Panchayat election ah ballot paper leng a kizat ziakin
Voter-te patau louzaw uh chi’n BJP Manipur Pradesh ah Sr Vice President Prof S. Tiken in gen hi. Prof. S Tiken in tuni’n BJP office ah media-te kimuhpih in a thugenna ah Gram Panchayat election ah candidate te’n sum tangpi seng uh a, hileleng govt len khenkhat in election hunlai apan vote sim zawhhun tan in a power uh diklou takin zang uh chi hi. Govt in candidate-te sum zat theih ding zah kichiantak a bikhiahsak poimawh chi’n leng Prof Tiken in gen hi. Assembly election hunlai in EVM khoih lamdang(manipulated) hidin mipi tamtak in ngaihdan nei a, tutung Gram Panchayat election ah mipite’n govt lamin a hihdiklouhdan uh theichian hi’n Prof S. Sarat in gen hi. Vote simzawh kuanin result khen lamdangna om a, huai dungzui in kuahiam ching chi a puankhiak nungin certificate piakma deuh in khenlamdang a om pawl tanpha muh leh theih hisek chi’n gen hi.
Court ah Chief Minister- lui Zoramthanga ding ding
Aizawl, Sept 25: Nekguk-takgukna tawh kisai in Mizoram Chief Minister-lui Zoramthanga tungah ngawhna point 2 om ziakin October 15, 2012 chiangin special court ma ah dinsak hiding chihthu om hi. Atung a ngawhna 2 kibawlte ahihleh govt property tuamtuamte azatna ding ah zanglou in ama’ mimal adingin kizat chih leh nekguk-takgukna thila a kigolh ziakin a gou neih thupilua chih thute hi’n kigen hi.
Mizoram state Anti Corruption Bureau (ACB) in Mizo National Front (MNF) Chief banah Mizoram CM-lui Zoramthanga tungah hibang ngawhna bawlkhum uh a, ngawhna masapen govt property-te a ma mimal adingin zang chih pe’n special court ah chargesheet piaklut khit(filed) hi a, himahleh ACB in special court ah ngawhna 2na pen a gouneih tawh kisai in chargesheet a file manlouh ziakun Oct 15, 2012 chiangin ngawhna masapen tawh kisai special court ah genkhom hidingin kigen a, huai hun ah alou theilou in Zoramthanga ava kilat ngaiding chihthu om hi.
Court lam apan thusuak dangkhat in a gendanin, special court in ACB kiangah Zoramthanga tung a ngawhna omte ah Sintawpni(Sept 21, 2012) tan a chargesheet bawl tuaktuak dingin theisak mahle uh ACB in additional chargesheet bawlding a ngaihsak louh ziak un govt property tungtang (first charge) kia Oct15 a genkhawm hiding chi uhi.
Zoramthanga in Chief Minister a letlai June 22, 2007 in Anti-corruption organisation Prism pawlin ACB kiangah Zoramthanga tungah FIR file khum uhi. Prism-te’n a taklat dan un Agriculture deptt-te farming materials Rs 37 lakhs manding Zoramthanga in Aizawl khawnawl a a private farm Aii Puk adingin zang chi uhi. Himahleh Zoramthanga tungah action bangmah a omlouh takin Prism in Gauhati High Court ah July 14, 2009 in PIL pelut thaknawn uhi. High court in Dec 21, 2009 in thusuah bawlin Zoramthanga tunga ngawhna omte kha 4 sung ngei a suikhe dingin Mizoram govt theisak uhi.
Prism President Vanlalruata in agenna ah Mizoram govt in High Court thupiak lam tuamtuam ah zekaisak ding dan “delay tactics” hah zon mahmah uh chi hi. State Chief Vigilance officer kiang tanpha ah thiltung suizui dingin nawhna bangzahvei hiam bawl himahleh kilawhsam chi’n Vanlalruata in gen hi. Zoramthanga in Agriculture department te’ vanneih wire mesh roll 30, leh angle iron post 660 te a farm adingin piak hi a, huai pen Zoramthanga zi Roneihsangi in a nget dungzui in 50 % payment apiak ahihziakin thil dik hitheilou chi’n Prism pang uhi. Tualou in PMGSY Contractor- te apan Zoramthanga in 3% a cut sakthu ah Zoramthanga mah in leng ana lakha mah ahihdan pom chi uhi.
Kum 68 a upa banah Chief Minister term 2 ana len Zoramthanga in a sum muhna tawh kituaklou khopa tam gou(assets) nei chi uhi. PMGSY nuai a Contractor- te apan 3% a cut sak genlouh 1998 -2008 kikal in sum-le-pai tamtak kimawlpih chi uh a, kum 2003 a Assembly election om dekin affidavit a bawlna ah Rs 54,18,061.94 nei a, kum 2008 assembly election om dekin a affidavit ah Rs 1,38,02,241.26 nei ahihdan taklang chi uhi. Kum 2003 leh kum 2008 kikal a gou leh a sum neih Rs 83,84,179 in kikhai chih ahi hi. ACB te’n September 16, 2010 in Ramhlun, Aizawl a Zoramthanga tenna inn valuh uh a, bank passbooks, land settlement certificates leh periodical pattas (agricultural land) tamtak mukhia uh chi uhi. Zoramthanga in tumalam a ana genna khat ah corruption ah ka kigolh kei himhim, ka political career beisak tupna ahi a, nekguk-takgukna a ka kibualkhak aleh siik kilh in hon kilh un chi a, CM ka letlai tanpha a ka tunga ngawhna om hita a, ACB te’n honsui mahle uh ka tung ah diklouhna bangmah a mukei uh, chi hi.