DC leh AC to DC in enkhia uh
Lamka, July-31: Socio-Economics & Caste Census 2011 adia Supervsor leh Enumerator ten zan akipan training pan uh a, tuni’n Data Entry Operator ding teng tawh joint in training nei uhi. Ms Jacintha Lazarus, IAS, DC/CCpur leh Maniram Sharma, IAS, AC to DC in tuni’n training centre teng pha in thil hihding dan tuamtuam sinsak uhi. DC in a genna ah Socio-Economics & Caste Census 2011 tawh kisai in khat veithu in District pumpi huap a nasep hilou ding a, phase 3 suah hidin gen hi. 1st phase ah Lamka block, Tuibuong block, Samulamlan block ban ah Henglep leh Singngat block khua khenkhat cover ding in gen hi. Socio-Economis & Caste Census 2012 ahihleh Aug 2, 2012 zinglam dak 10:00 in Tuibuong a District Training Centre ah hon hiding hi.
Mary Kom deihsakna thu puang
Lamka, July-31: KSO Gen HQ in London a Olympic Games ah Manipur leh India sik-le-tanga vatel MC Mary Kom deihsakna thu puang kawm in lawhching kawma hong kiknawn deihthu leh lam-et thu puang uhi.Kuki Martial Arts Assn(KMAA) & CCpur Dist Amateur Muaythai Assn(CDMA) pawlin leng 5vei hial World Women Champion hihna la banah Manipur singtangmite lak apan Olympic Games atel pha om sun Mary C. Kom deihsakthu puang uh a,London a Olympic Games ah Manipur leh India minthangsak dinga lawhching din deihsak thu puang uhi.
MDC in free uniform hawmkhia
Lamka, July-31: CCpur dist a govt school leh Govt Aided school tamtak ah free text book hawmkhiak zel hi a, tuni sun in V.Khaikhanmung, MDC/Zenhang Lamka in Bijang Loubuk Jr H/S a student te lakah free uniform hawmkhia hi. Aman agenna ah a bialsung a school om sun himahleh phaman ngeilou in a veh ngeilouhna tung ah kisuanlah thu gen hi. Maban ah student a tamsem theihna ding a staff te’n panla din hasuan a, haksatna a neihte uh amah kiang tunzel dingin theisak hi.
DC in school 2 surprise visit
Lamka, July-31: DC/CCpur in tuni zinglam in Kumbipukhri Jr H/S leh Tuibuong Govt Jr H/S surprise visit bawl a, huai ah ZEO/CCpur leh AI of schools te'n zui uhi. DC in student te’ attendance check a, naupangte'n Mid Day meal ngah uhiam chih telin school tawh kisai thil tuamtuam akisaipihte dotna bawl hi. DC a pai zawhin ZEO leh AI of schools te'n Phungkhothang H/S leh Vimala Raina H/S te inspection bawl uhi.
Candidate tamtheipen poimawh
Lamka, July-31:Staff Selection Commission(SSC) in Data Entry Operator(payscale Rs. 5200 - 20200 + grade pay Rs. 2400) leh LDC(payscale Rs 5200-20200+ grade pay Rs 1900) semding lakna ding Oct 21 & 28,2012 in ‘Combined Hr Sec Level(10+2) Examination,2012’ kichi ‘Combined All India Open Examination’ conduct ding a, huai ah 10+2 passed-te candidate hithei ding uhi. Hiai pen SSC saina a competitive examna ah Lamka leng Centre ahihna masapen hiding a,Centre code No leng CCpur(5502) ahi hi. Tunungin SSC saina a exam om dingte leng Lamka mah exam centre ahihtouh zel theihna ding in hibang examna-te ah candidate tamtheipen a om poimawh hi’n thutut kingah hi.A manphapen bel Imphal leh mundang vanaih selou in Lamka ah leng SSC nuaia examna tungtawn in sepna hoihtaktak ngahtheihna ding Golden Chance ahi hi.
CDSU in theihsakna penawn
Lamka, July- 31: CCpur District Students Union(CDSU) in Mata a Vungzagen Hr Sec School a Lecturer leh Lab.Asst semding lakna ding tawh kisai govt a ngetna abawl uh limsak ahihlouh poisakthu puang uhi. Huai post-te lakna dinga advertisement leh interview bawlsawm dante zat theihlouh din govt in puanghen chi’n CDSU in ngetna pethak uh a, tualou in advertisement bawlthak ding leh concerned DC saina nuai ah District HQ mah a interview neih ding a phut in tualsung mite mah hamphatna piak hihen chi uhi.
BSF te’n thaukap sunzom ding
Lamka, July-31: STC/BSF CCpur a training te’n Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah July 15, 2012 zingsang baihtak akipan nitak zan sawt tanpha long/short/grenade leh 51-mm mortar a kap uh July 31, 2012 tan ding himahleh ahun behlep uh a, Aug 1,2012 akipan Aug 15,2012 tan zingsang dak 5.00 akipan zan khawvak in leng kap ding uh hi’n taklang uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in thupuan bawl hi.
Hoihnu’ sihdan suikhe di’n nawh
Lamka, July- 31: Zomi Human Rights Foundation(ZHRF) thusuak danin July 24, 2102 a sisa a muhkhiak Ms. Luanneihoih @ Hoihnu (48) d/o Thienkhopau Vaiphei of Red cross road sihdan tawh kisai kintak a suikhe dingin thuneitute nawh u a, thudik puangkhe din leng thuneitute nawh uhi. Hoihnu sihna tawh kisai numei pawl tuamtuamte panlakna tunitan govt in a limsak louh leng lamdang sakthu ZHRF in apuan ban uah numei pawlte panlakna nelhsiah a om hi’n leng taklang uhi. Tualthatte akinthei pena zongkhe ding leh dan tawh kituak gawtna pedinn leng ngen uh a, Ms. Hoihnu’ innkuante’zangna-dopna pe ding in leng ngen uhi. Numei tunga hiamgamna, tatsiatna leh nuaisiahna om touzel leng dan enkoltute’n panla dia theisak kawm in numeite dikna(rights) leh hamphatna (priviledge) te kembit leh zuunsak ding in govt ngen uhi.
YPA makaite’n Delhi pha ding
Lamka, July- 31: YPA Gen. HQ in kumthak a Diamond Jubilee lop asawm tawh kisai in Celebration Committee a Chairman H Mangchinkhup EM/ADCC makaihin Vice Chairman S Chin Ngaih Pau, Secy Pauzagin Tonsing leh Finance sub committee chairman S Kamsuanlun EM/ADCC in Aug 2, 2012 in Delhi phaksawm uhi. Amau Aug 3,2012 in YPA Delhi jt HQ makaite tawh houlim ding uh a, Aug 4 in SSPP Delhi Fresher’s Meet uap ding uh hi’n kigen hi.
KNLF in boycott puang
Kolphe Kuki, Secretary(Info & Pub) KNLF/KPA in Press Note a suah in a gendan in Kuki Rebellion,1917-1919 hunlai a suahtakna ding leh gam humbitna dinga hinna pia Kuki mipite theihgigena latsakna in Aug 15, 2012 a Indian Independence Day lopna boycott hiding chi’n puang hi.Kuki mite’n British khutnuai apan India zalenna dingin panlakpih mahle uh India in suahtakna a ngah nungin nelhsiah a om uh hi’n thusuak in taklang hi.Huaiziakin KNLF in gam adia zalenna dingin tawplou in panla ding chi’n puang hi.
Entrance /Selection test om ding
Lamka, July-31:ITI/Saikot ah academic sessionn 2012-13 akipan Wireman, Draughtmen,Stenography(Eng), Carpentry,Welder leh Dressmaking zil dinga applicant-te ading in Aug 07, 2012 zinglam dak 10.30 in ITI/Saikot mun mah ah Entrance/Selection test om ding hi. Huaia telding candidate tengin original certificate leh marksheet tawichiat ding in Supdt(Tech) in theisak hi.
MCS combined competitive adia written examna result
Imphal, July-31: Manipur Public Service Commission(MPSC) saina in Feb 6-22, 2012 sung Manipur Civil Services Combined Competitive (Main) Examination, 2010 a written examination om tuni’n a result puankhiak hi a, huaia lawhchingte ading in Aug 21, 2012 akipan in Interview om ding hi. Written a lawhchingte Roll No. page 3na ah kisuah a, interview tawh kisai leng MPSC Notice Board ah kitak hi. Huailou in Commission website (1) www.mpscmanipur.gov.in and (2) www.manipur.gov.in ah leng et-theih ding hi.
BJP President hongzin ding
Imphal, July-31: BJP National President Nitin Gadkari in Aug 18, 2012 in Manipur hongpha ding a,amah om sung in party tuamtuam apan leader khenkhat in BJP zom ding uh hi’n kigen hi. Huai hunsung mah in BJP party a lutthakte vaidawnna kikhopna leng om ding a, BJP National President in kum 2014 a Lok Sabha election om hun ah Manipur ah BJP leh party tuamtuam pankhawm theihna ding tungtang leng panla ding chihthu om hi. BJP National President in Manipur hongphak ding ziakin BJP Zonal Organisation Secretary Chandrasekhar Rao in Aug 5,2012 in Manipur hongpha masa ding hi’n kigen hi.
Imphal Newspaper- te suaklou ding
Imphal, July-31 : Newspaper hawmtu N. Bira(34) in July 26, 2012 nitakin Thoubal leh Wangjing area ah news fee khonzou innlam manawh a Honda Activa a tailai Singjamei lak ah Police Commando hidia gintak civil dress a kicheite’n khawlsak in a sum puak Rs. 16,000/- leh mobile handset a laksak ban uah soisa uhi.Bira soisate mankhia a action lak phutna in All Manipur Newspaper Sales & Distributors te’n Aug 1, 2012 in Newspaper hawmkhe lou in ni 1 sung ceasework strike neih din thupuk uh a, huai support latsakna in All Manipur Working Journalists’ Union(AMWJU) pawl in leng Aug. 1, 2012 issue Newspaper suahlouh ding uh hi’n thupuan bawl uhi.
Bank honkhiakna din Rs. 80 crores
Imphal, July-31: Manipur a Block khenkhat ah Bank a omlouh ziakin govt in pensioner, old age pension leh panpihna sum chituamtuam ngahte laka sum hawmkhiak ding tungtang ah nawngkaina a omsek ziakin govt in bank omlouhna Block-te ah honkhiak sawm hi. Huai dingin akisaipih BDO/SDO quarter,bank, security barrack leh infrastructure poimawh tuamtuam bawlna ding in Special Plan Assistance(SPA) nuaia 2nd phase a zat ding in Manipur govt in Rs. 80 crores bikhiah a, huaite zangin nasep kipan pah ding hi’n kigen hi.
Handloom Day,2012 zat hiding
Imphal, July-31: Manipur a Handlooms Promotion Council-te saina in August 1, 2012 zinglam dak 11.00 in Kuki Inn ah ‘the 13th Handloom Day,2012’ zat hiding hi. Kumlui 2011 in Handloom Promotion Council pawlin handloom puan gan numei 141 leh pasal 7 kigawm mi 148 kipahman pia uh a, handloom design thak mukhia mi 3, Handloom Co-operative Society nasem hoih 6, school uniform a handloom zang private leh govt school 11 leng kipahman pia uhi. Tukum in Panthoibi handloom hoihtak pankhia mi 2 leng kithuahpihna leh huhna tuamtuam pia uh chihthu om hi.
Tuni’n Sit-in-protest kipan uh
Imphal, July-31: CPI(M) Manipur pawlin tuni’n demand tuamtuam a neihte uh semkhe ding a govt phutna in Imphal West a Patsoi ADC office kong ah Sit-in-protest kipan uhi. CPI(M) pawlin point tuamtuam 5 demand neih ziakin tuni akipan ni 5 sung daih dingin India gam pumpi ah Sit-in-protest nei uh a, a demand-te uh lakah BPL leh APL khentuam louh ding, innkuan khat in kha 1 sung in antang kg. 35 tan kg. 1 zel Rs. 2 rate in a ngah ding uh chih tel hi.
Jiribam District Demand Committee
Imphal, July-31: Jiribam District Demand Committee(JDDC) pawl husa neilou in sawtkuamtak a om daih dide nung un zan akipan in thom neinawn ding in kipan uh a, Manipur govt ah thutawp pia uhi. Jiribam District Demand Committee(JDDC) thusuak in a taklatdan in JDDC leh Manipur govt in November 9, 2011 kilemna(MoU) a suai a kaih uh govt in atak a semkhe ding in phut uh a, thusuak in a genzelna ah point 11 omna MoU ah govt lam in point 9 tungtang ah tuni tan in bangmah ginataka semkhelou hi’n taklang uhi. MoU tawh kituak a govt in a sepkhiak kei aleh tunung in mipi tawh pangkhawm in nuakna(agitation) khauhsem pan ding uh chi’n taklang uhi.
.