District Council campus ah Council Day kizang

Lamka, Aug-1: Tuibuong a Autonomous Dist Council(ADC)/CCpur office a Conference Hall ah tuni in Autonomous Dist Council/CCpur kiphuhkhiak ni champha ‘Council Day’ zang uhi. Huai ah BS Khasana, DIG/STC BSF; Ms Jacintha Lazarus, IAS, DC/CCpur leh L. Mangkhogin, IPS, SP/CCpur in Special Guests a pang in uap uh a, Brig. VS Ranade,Commander, 27-Sector, Assam Rifles a damlouh ziakin tel theilou a, amah sikin

Vazir Singh, Addl DIG ,27-Sector, Assam Rifles vatel hi.

       DIG/BSF in plain area a om gige ahih man in CCpur dist ah hong om akipan Autonomous District Council kichi theikha pan hi’n gen a, CCpur dist gam lianpi ahihman in ADC member-te a dinmun poimawh mah hi’n gen hi. Kum 2 sung lelin leng district ah masawnna leh khantouhna tamtak omkhia hi’n gen a, maban ah grass root level apan developement thupi tamsem a om deihthu gen hi.

        DC in agenna ah District dangte tawh tehin CCpur dist a MDC te'n mipite’ kithuahpihna ziakin na semkhe tampen uh hi'n gen a, mipi' a kithuahpihna tung ah kipahthu gen hi .MDC member tengin mahni bial chiatah na hoih sep in kidem lehang gam adin khantouhna liantak hiding chi’n gen hi. Addl DIG, 27-Sector A/R in a genna ah kum 20 nunga MDC te’n na sepnawn uh kipahpih thu gen a, CCpur dist ah lemna leh muanna omtheihna dingin mipi’n security-te panpih ngai hi’n gen hi. Development omna dingin lemna, kituahna leh muanna (peace & harmony) om poimawh chi’n gen hi.

       Chairman ADC/CCpur in agenna ah MGNREGS a 25% vel MDC khut a om ding chih tungtang Hausate'n theisiamlou uh hi’n gen a, kikupkhawm poimawh sakthu gen hi. Hausa/Village Authority te'n MGNREGS adia work proposal a guan uh kimlou omkhate MDC in guang zel ding hi'n gen hi. Grass root level a gam khanthouhna a omtheihna din mipi, hausa, MDC leh DC pankhawm poimawh hi'n gen hi. Tuni a Council Day zat ahih ziakin Aug 2, 2012 in ADC/CCpur nuai a employee teng holiday puang a, hileleng huai in Sanitary section huamkhalou hi’n gen hi.

         Mannuamching, CEO,ADC/CCpur in Manipur (Hill Areas) District Council Act 1971 tungtawn in Autonomous District Council/CCpur piangkhia hi’n gen a, Feb 1973 a Dist Council election masapen a Chairman in T.Goukhenpau pang a, huai nungin District dangte tawh Aug 1 tengin Council Day kizang hi’n gen hi. Kum 20 val Dist Council function lou in om a, May 2011 in election neih hi a, July 9, 2011 in Langkhanpau Guite in Chairman ADC/CCpur len a, member 24 ban ah nominate 2 telin MDC 26 om hi’n gen hi. .Hangshing, ED/DRDA in DRDA tungtawn a scheme tuamtuam kisemte report pia hi.  Program hun sungin Jeff Akai, C.Thianngai leh PC Thuoma apan avangkim in lasak ngaihkhiatna om hi.

 

Socio-Economic & Caste Census

Lamka, Aug-1: CCpur district ah Aug 2, 2012 in ‘Socio-Economic and Caste Census,2011’ kipan ding a, Tuibuong a District Training Centre ah Aug 2, 2012 zinglam dak 10.30 in TN Haokip,ex-Minister & MLA(Saikot A/C) in khuallian a pang in hong ding hi.Huai ah Guest of Honour in Langkhanpau Guite, Chairman, ADC/CCpur pang ding hi. MANITRON-te’n huai hun ah Socio-Economic Census lahna(demonstration) nei ding uh a, ‘socio-economic & caste census’ tawh kisai vanzat poimawhte hawmkhiakna leng om ding hi.

 

DC/CCpur in sawlkhe ding

Lamka, Aug-1: RMSA/CCpur sponsore -a in Aug 2 & 3, 2012 in khawpi sunga govt school 4 apan student hunkhop te'n Students' Excursion 2012 in Imphal pha ding uh a,amau Zoo, Sangrela Garden, Science Centre leh Museum mun phading uhi. Aug 2, 2012 zingsang dak 8:00 in Lamka Public ground ah Ms Jacintha Lazarus, IAS, DC/CCpur in excursion a zinkhe dingte sawlkhia(flag off) ding a, huai ah school 4 apan Headmaster- te telngai ding hi.

 

Mary Kom deihsakna thuchah

Lamka, Aug-1:Kuki Innpi/CCpur pawlin London a Olympic Games a vatel World Boxing Champion MC Mary Kom deihsakna thuchah puang kawm in Kuki mipite ading a suanhuai leh kinepna petu hi’n leng taklang uhi. KIM thusuak in a taklat zelna ah Mary Kom in London Olympic Games apan Gold Medel tawh hong kiknawn ding in deihsakthu leh kinep thu puang uhi.

 

Ngangja tamtak haltum uh

Lamka, Aug-1: Lamka Drivers Union leh Lamka-Aizawl Sumo Service Co-op Society Ltd pawlin Lamka akipan Pari of ArmVeng, Aizawl kiang tungding nganja kg 17 vel sum atuat in Rs 3.4 lakhs manding July 28, 2012 in Tata Sumo ticket counter ah mukhia uhi. Huai nganja tuni zingsang in Lamka Drivers Union leh Lamka-Aizawl Sumo Service Co-op Society Ltd makaite'n haltum uhi. Amau pawlin kum bangzahhiam paisa akipan Lamka apan Aizawl a puaklut ding zu leh khamtheih tamtak mukhia in haltum zel uhi. Driver Union makaite gendan in Manipur-Mizoram kawmtuah a passenger pua Tata Sumo-te ah khamtheih chi tuamtuam thon ching om sek a, huaite ziaka buaitheih ahihman in kuama’n maban ah hibang chindan topsan din ngen uhi.

 

 

Diesel Auto apan kia

Lamka, Aug-1: Henlalmuan(8) s/o Lamthiengou of Gangpimual tuni sunnung dak 2.00 velin school kaitawp Diesel-Auto ah tuang a, a kumkhiakna ding mun ah Auto khawlma in tawmkhe kha a, huaiziakin aban, a kawngbom leh a taksa mun khenkhat liam a, Dist. hospital ah admit in om hi. Henlalmuan bel Covenant H/S a class-II zillel hi’n kigen hi.

 

Magazine thak pankhe ding

Lamka, Aug-1: Gangte-pau leh English kithuah ‘Huihchiim(Bi-lingual) magazine thak khat Aug 4, 2012(Kiginni) sunung dak 2.00 in Chiengkonpang Community Hall ah honna(releasing ceremony) om ding chi’n Editorial Board,HUIHCHIM akipan thutut kingah hi.

 

KNLF/KPA in thupuan bawl

Kolphe Kuki, Secretary(Info & Pub), KNLF/KPA in mipi in a theih ding thupuan abawl kimu dan in govt deptt tuamtuam a alu(head) a omna(posting) mun chiat a om ding leh mipi khualna in gin-om leh kuhkal taka nasem ding in theisak uh a, mahni sik-le-tang a semding kuamah dang a zat uh phal hilou ding chi hi.Huailou in mipi ading sum-le-pai zat thelthang leh nekguk banah corruption a kibualte ngaihdam hilou din taklang hi. Huailou in khawsung mipite’ ngah ding sum(fund) himhim hausa(village chiefs) te’n a zat thelthang uh phal hilou ding a, pawlpi(organisation) in huai enzui ding hi’n leng taklang a, mipite sum ding zang thelthangte ngaihdam hilou ding chi hi.    

       Development nasepna himhim govt in a bikhiahdan bang a sepkhiak ding hi a, huai dia zat ding fund-te zat thelthang leh heikoi theih hilou ding a, huchibang a thilhihte’n amau mawh kipuak ding uh chi hi. Huailou in Finance deptt in a theihpihlouh a Organisation min a sum nget(demand ) phal hilou a, pawlpi min diklou taka zangte tungah action lak hiding chi’n taklang hi.Thusuak in a genzelna ah khawtang(society) khantouhna ding leh masawnna dia pawlpi in nasem hi a taklang kawmin mipi nelhsiah a gamtat leh thilhih himhim ngaihsiam hilou dingintaklang hi.

 

Dr Joute in Director,Vety len

Imphal, Aug -1: Director (Vety. & AH) len Dr. Th. Jeevan Singh zan in service apan retired a, huai tawh kiton in Joint Director(Vety & AH) Dr. Saidoukhum Joute in Director(Vety & AH)) hihna luahtou hi. Tuni’n Sanjenthong a Vety. & AH Conference Hall ah deptt te’n Dr. Th. Jeevan Singh khakna leh Dr. Saidoukhum Joute vaidawnna nei uhi. Dr Joute in Director hihna a let ma in kum tamkuamtak Joint Director(Vety & AH)/CCpur len hi.

 

Hand-grenade 1 mukhia

Imphal, Aug-1: Imphal East district sung Irilbung PS a Bashikhong Kitna Panung mun a om Mutum Romeo Singh (42) s/o (late) M. Haridas Singh tenna inn ah meltheihlouhte’n hand-grenade a koih uh tuni zingsang dak 6.45 velin  muhkhia uh a, thil omdan police a report nungin police te’n vala khia uh chihthu om hi.

 

A/R te’n galvan tamkhop mukhia

Imphal, Aug-1:24-Assam Rifles-te’n July 30, 2012 in Chandel district a Haikot tawn in phaijang biala lutsawm PLA hidia gintakte galvan koihna mun khat tuak kha uh a, huai ah Czech Republic-te bawl 9mm pistol 1 leh magazine 2, AK-56 magazine 2, M-16 rifle magazine 4, Handgrenade 3, compass 1, Detonator agui tawh kithuah 2, 5.56mm tang 171, 9mm ball 50, AK-47 tang 88, 5.56mm fire cases 10, lethod fire cases 17, AK-56 fire cases 2, mobile handset 1, spectacles 2, India sum Rs. 6,210 leh Myanmar sum Kyat 1200 mukhia uh chihthu om hi.

 

Car guksawm lai mankhia

Imphal, Aug-1: Singjamei Police station huamsung Singjamei Chinga Makha ah zan nitak in mi 2 in Alto car (No. MN-01X/5476 guk a sawmlai uh a neitu in mukha a vengsung mipi in kidelh huan pah in mankhia uhi. A kigendan in mat a om bel Md. Ayuk Max (30) s/o (late) Md Kalim of Lilong Chingkham hi a, a lawmpa Th Chaoba (28)of Nambol bazar tawh Alto car (colour san) zanga  kuan uh hidan in kipuang hi. Vengsung mipite’n amah apan in duplicate chabi 3 leh pendrive 1 mukhiak uh a, Singjamei Police ah pekhia uhi.

 

Commando te’n helpawl 3 man

Imphal, Aug-1: Imphal West Commando pawlin zan zinglam dak 9.30 velin Babupara area lak apan KYKL 2 mankhia uh a, huaite L. Romen Singh(29) of Haobam Marak Lourembam Leikai leh L. Sunder Singh(27) of New Checkon Emoinu Lairak hi’n thusuak in gen hi. Imphal West Commando pawl mah in July 30, 2012 zingsang dak 5.50 velin Lamphel Vendor Market apan KCP(MPF) atel E. Kesho @ Romeo(37) of Lamjao Awang Leikai mankhia uh a,amah akipan in hand-grenade 1 mukhia uh chihthu om hi.

Written Test om ding

Imphal,Aug-1: Manipur University ah tukum a M.Sc Bio-Chemistry Course zil ding lakna ding in Aug. 7, 2012 sun dak 12:30 in MU a Community Hall ah written test om ding hi. Deptt notice board ah huaia telthei ding candidate list kitak a, candidate te’n Aug. 6, 2012 tan office kaihun sung in admit card laktheih ding hi.

 

Transfer/posting

1.H. Deleep Singh,IAS, Director(Youth Affairs & Sports) & Special Secretary(Youth Affairs

   & Sports) as Special Secretary(Youth Affairs & Sports) and Director(Youth Affairs &

   Sports/Education) in addition.

2.W. Rajen Singh,MCS, Director(Education-S) as Executive Officer/Imphal Municipal

   Council) & incharge Director(Settlement & Land Records).

3.S. Achoubi Singh,MCS, Jt Director(Consumer Affairs, Food & PD) & Executive

   Officer/Imphal Municipal Council as Deputy Secretary(Rural Dev & Panchayati Raj) &

   Chief Executive Officer , Zilla Parishad/Imphal West.

4.Th. Kiran Kumar,MCS, Chief Executive Officer, Zilla Parishad/Imphal West & ex-officio

   incharge Director(Treasury) and Director(Settlement & Land Records) as Deputy

   Secretary(Power) & incharge Director(Treasury) in addition.

 

 

.