Gari neitu telin mi 7 liam, mi 3 gim mahmah
Lamka, August 3: Tuni zinglam dak 10 vel a Leijangphai (Thanlon sub division) apan Lamka zuan a hongtai mau (bamboo) pua gari MN 02A/5248 sunnung dak 1-2pm kikal in Khawzim leh Chiangpi kikal ah tuahsia a, huai ah mi 7 in liamna tuak uhi. A liamte lak ah mi 3 gimdeuh hi’n theihtheih hi. Hibang kalah, CCpur district hospital a Medical suptd in accident ziaka liamna tuak hunkhop om chih thu azakin doctor te, nurse-te leh staff tuamtuam te thuzakin kigingsa a om dingin theisak hi.
Accident a liamna tuakte ahihleh Satginlal (50) of Chongchin, Donglawmlal @ S Lalpi (40) s/o Goukhokam of New Lamka (gari neitu), Gouchon (50) s/o Lienkham of Hqtrs Veng, Lamkhohat (60) m/o Manglaljoy of Chongchin, Chongneilhing (37) w/o Soitinpau of Gangte veng, Niengneithem (36) w/o Gouthiem of Chiengkonpang leh Khuolminlian (27) of Tamei (Tamenglong district) hidanin kigen a, Gari hektu (driver) ahihleh Inao Singh hi’n gen uhi.
Thusuak kingahdanin, tuahsiatna tuak gari ahihleh truck liante (Punjab body) hi a, mau pum 2,000 val pua ua, cabin sung ah mi 7 tuang ua, gari zuitu (handy man) pe’n truck tung ah tuang hi’n kigen hi. Gari tuahsiatdan theihchet hikei mah leh lampi neuna mun leh kawina mun ahihziak a driver in heikawi zoulou hi’n gen pawl om a, kawl (cliff) ah kilepkhesuk in gari 3/4 vei a kilep nungin vangphathuaitakin singkung in nang kha a, hikei leh kawlnuai a luidung feet 300/400 a saang deng thei ding dinmun ah om chi uhi. Driver leh handyman leng kisukha zek mah le uh first aid piakin om a, adang mi 7 teng damdawi inn ah admit in om uhi. Liamna tuakte lakah Satginlal, Donglawmlal leh Gouchon te gimdiak uh hi’n kigen hi.
Chiangpi phakkuan ah accident om chih thu zakphet in, Chiangpi a om Assam Rifles te’ banah Chongkhozou leh Chiangpi apan in Young Vaiphei Association (YVA) te’ makaih in nungak-tangvalin delh ua, tualou in Khawzim leh khawkim-khawkiang apan in leng mi tamtak in leng delh uh hidanin kigen hi. Medical Suptd Dr N Paulginthang in thiltung azak in panla ngala, Dr Shyam Sunder, Dr Jamthianlal Valte, Dr N Damsuanlian leh Nurse hunkhop in accident a liamna tuakte nitak zan sawtnung tanpha in buaipih uhi.
