Socio-Economic & Caste Census, 2011 kipatna dinga honna om

Lamka, Aug-2: District Administration/ CCpur in CCpur district sung pumpi ah ‘Socio-Economic and Caste Census,2011’ nasep patna ding in tuni zinglam dak 11.00 in Tuibuong a District Training Centre ah honna program(launching ceremony) om hi. Huai ah TN Haokip, ex-Minister & MLA(Saikot A/C ) khuallian a pang in hong a, Guest of Honour in Langkhanpau Guite, Chairman ADC/CCpur pang hi. Huai ah Ms Jacintha Lazarus, IAS, DC/CCpur makaihna in district level officer( DLO) tamtak leh MDC hunkhop in uap uhi.    

     TN Haokip in a genna ah CCpur dist sunga milip a tamzaw in Below Poverty Line(BPL) card neiding himahle uh a neiding tamzaw thamte'n BPL card neilou uh hi'n gen hi. Above Poverty Line(APL) hizenpi BPL Card deih teiteite' Pathian in maban ah a khawsakna uh buai semsem in koihthei a, zawng sak semsem ding hi a ginthu gen hi. Aman Minister(Tribal Dev & Hills) a puaklai in mi khat APL hinapi in BPL te’ kia in a ngettheih uh Medical Re-embursement sum ngen in lakhia a, hileleng Pathian in phuba la in sihlawh dektak hi'n gen hi. Saikot A/C huamsung ah BPL family omzah hoihtaka theihchetna ding in Supervisor leh Enumerator te'n hoihtak a census sai dingin leng ngen a, amah leh MDC te'n ahithei tana kithuahpih ding uh ahihman in patauhna ding bangmah omlou hi'n gen hi.

       Langkhanpau Guite in a gendan in kum khat paisa apan CCpur district ah Economics Census omlouh ziakin BPL Card deihte ading in om theilou hi’n gen hi. Socio-Economic Census akipan in district sung ah BPL innkuan omzah kithei ding a, BPL Card neite'n govt. apan hamphatna tuamtuam omte ngahthei ding hi'n gen hi. Enumerator leh Supervisor training a tel dia sehkhak te'n midang sawllou in amau mah telchiat dingin theisak hi. BPL Card nei nailou tamtakte'n Socio-Economic Census tungtawn in BPL Card ngah ding uh a, huai tungtawn in govt. apan hamphatna a ngah theihna ding un Supervisor leh Enumerator te'n hoihtak a nasem ding in hasuan hi. Huaiziak in Socio-Economic & Caste Census tawh kisai nasepna ah MLA, MDC, Public Leader leh mipi kuapeuh in kithuahpih dingin ngen hi.

        DC/CCpur in a genna ah Socio-Economics Census tawh kisai hih fellouh tamtak a om ziakin BPL innkuan tamtakin govt apan hamphatna ngah lou hi’n gen a, CCpur district sung area lianpi ahihziak in Socio-Economic & Caste Census 2011 leng khatvei thu a pat theihlouh hi’n gen hi. BPL card neilou hileleng govt apan hamphatna ngah ding diktakte'n a ngah theihna ding un kuapeuh in Supervisor leh Enumerator-te kithuahpih chiat dingin ngen a       a, Supervisor leh Enumerator te'n Census bawl hun ah innkuan sunga nekzongpen, nekzonna min (occupation), laisiamna leh sahkhua telin thil tuamtuam dotna bawlding uh hi’n gen hi.

 Huai hun ah MANITRON te’n Census bawldan ding lahna(demonstration) nei uh a, Chief Guest leh Guest of Honour in Socio-Economics Census & Caste 2011 ding tawh kisai vanzat tablet PC & Kits hawmkhia uhi. Akigendan in CCpur dist a Socio-Economic & Caste Census om ding phase 3 in kikhen ding a, CCpur, Samulamlan, Tuibuong, Singngat leh Henglep area khenkhat ah pat hiding a, Second phase ah Thanlon, Tipaimukh, Vangai leh Henglep HQ lak sai hiding a, Dec 2012 tan a zawhsiang hiding in kigen hi.

 

DC/CCpur in student-te khakhia

Lamka, Aug-2: DC/CCpur in tuni zingsang dak 8:00 in Lamka Public Ground ah RMSA/CCpur sponsore na nuai ah town area a govt school 4 apan Imphal a Excursion pai ding Class X student-te sawlkhia(flag off) hi. Huaite Phungkhothang Govt. H/S apan student 53, Rengkai Hr. Sec. School apan student 120, Lanva Model H/S apan 25 leh Thangkhai H/S apan student 8 hi uhi. Teacher 13 in kithuahpih in Bus 4 dim in kuankhia uhi. Aug 3, 2012 in Vungzagen Hr. Sec. School, Gandhi Memorial H/S leh INA H/S apan class X student hunkhop kuankhe nawn ding uhi. Excursion apai student te'n Zoo, Sangrela Garden, Science Centre leh Museum mun en ding uh a, thil amuhte uapan essay gelh kidemna leng nei ding uhi.

 

DLCC meeting om ding  

Lamka, Aug-2: DC/CCpur makaih in Aug 3, 2012 zinglam dak 11:00 in DC' office a BRGF Resource Centre ah District Level Co-ordination Committee (DLCC) meeting om ding hi. Huai ah Aug 15, 2012 in CCpur district ah Indian Independence Day lopna ding tawh kisai genkhawm ding uh hi’n kigen hi. DLCC meeting zawh sunnung dak 2:00 in DC/CCpur office a BRGF Resource Centre ah Social Welfare Scheme tawh kisai in meeting om ding hi. Huai ah SDO teng, Dist. Social Welfare Officer, CCpur district sunga Bank manager-te leh business community-te tel ding uhi.

 

Petroleun Exploration thu joint discussion    

Lamka, Aug-2: India govt, Manipur govt leh Jubilant Oil &Gas Private Ltd pangkhawm in Tamenglong district leh CCpur district ah leinuai apan thautui lakkhiak sawm uhi. Huai thu ah DC/CCpur makaih in Aug 4, 2012 sun dak 12:00 in DC office a BRGF Resource Centre ah joint discussion om ding hi. Huai ah Dr Chaltonlien Amo, Chairman, Hill Area Committee (HAC), T.Manga Vaiphei, Chairman MTDC, Vungzagin Valte, MLA; Public Leaders (KIC, ZC, HI, MPC) leh student organisation tuamtuam a makaite tel ding uhi.

 

H.Mangchinkhup in langva hawmkhia  

Lamka, Aug-2: H. Mangchinkhup, EM, ADC/CCpur in tuni zingsang dak 7:00 in Bungmual a atenna inn ah DRDA tungtawn in Rural Housing Scheme 2012-13 ading beneficiary 35te lak ah langva bundle 5 chiat hawmkhia hi. Langva hawmkhiakma in T. Khampi in langvate Pathian kiang ah latna neikawm in H. Mangchinkhup ading in thumsak hi. H.Mangchinkhup in agenna ah tagah leh meithaite kianga langva hawmkhiak hi'n gen a, maban ah tamsem hawmkhiak sawm hi'n gen hi. Aman a genbehna ah gari buk ding leh vokbuk tung khuhna dinga langva ngente kipe thei nailou a, maban ah langva a kichin leh huaite leng ngaihtuah hidin gen hi. Langva ngahte'n ahi ding bangtaka zang chiat dingin theisak a, inn bawlzawh hun in lemlak pelut chiat ding in theisak hi.

UBI Bank officer 2 kaisang

Lamka, Aug-2: H. Shyamrothang, United Bank of India(UBI),RIMS Branch, Imphal a sem zanzek in Officer Scale-II akipan Scale-III in kaisang a, huailou in Hauchinmang,UBI Moirang Branch a sem leng Officer Scale-I akipan Scale-II in kaisang chih thutut kingah hi.

 

Video Album thak honna om ding  

Lamka, Aug-2:Mrs Vungkhanching w/o Rousang Valte in Pathian la a sak ‘Vanglian Jehova’ leh gam ngaihna ‘Nampi’ Mosi’ chih la Video Album thak a bawl Aug 11, 2012(2^nd Saturday) zinglam dak 11.00 in New Lamka YPA Hall ah honna om ding hi. Huai ah K. Guite, Advisor ZRO in ‘Nampi’ Mosi’ video album hong ding a,Rev L. Khamkholun, Gen Secretary ,EBC in ‘Vanglian Jehova’   video album hong kawmin Video Album honkhiak thak 2te thumna in lan ding hi.

Hun patna din Rev Khen P. Tombing in thumna in hun hong ding a, Video album Producer Rousang Valte in album tawh kisai genna hun zang ding hi.Huai ah V. Vungzamuan,IRS in inntekpa hihna la ding a, Ginsuanhau,MLA; Vungzagin Valte,MLA; Langkhanpau Guite,Chairman, ADC/CCpur; M. Gouzamang,EM,ADC/CCpur leh Zomi Council Chairman LB Sonna in huai hun uap ding uhi. Huai hun uap chiat dingin Mr & Mrs Rousang Valte in kuapeuh chial uhi.

 

Culvert bawlte’n zousiang uh            

Lamka, Aug-2: 80-RCC BRTF te’n June 28, 2012 akipan CCpur Govt College kong a IB Road-Tipaimukh Road junction khenzek Tipaimukh Road lam ah Culvert bawl a pat uh sunzom zel uh a, culvert tunga suangnen sun(concrete) tan zousiang uhi. Culvert tuang (slap culvert) ding sik(iron bar) phan vek uh a, zan in culvert tuang suang leh chip kithuah (concrete)sungin zou uhi.

 

YPA makaite’n Delhi zuan

Lamka, Aug-2: YPA Gen. HQ in kumthak March 3, 2013 in Diamond Jubilee lop a sawm ziakun fund drive kawm dingin Celebration Committee a Chairman H Mangchinkhup, EM/ADCC makaihin Vice Chairman S. Chin Ngaih Pau; V.Vungzathang, Chairman, CEC YPA Gen HQ leh Finance Sub committee chairman S Kamsuanlun, EM/ADCC te’n tuni’n Delhi zuan in zinkhia uhi. Amau Aug 3, 2012 in YPA Delhi Jt HQ makaite tawh houlim ding uh a, Aug 4 in SSPP Delhi Fresher’s Meet uap ding uh hi’n kigen a, Aug 6, 2012 in Lamka hongtung nawn ding uh chih hi.

SSC exam dingte’ Free Coaching

Lamka, Aug-2:Thado Kuki Students’ Union(TKSU) CCpur Govt. College Branch in tunung a Staff Selection Commission(SSC) saina a exam om hun a telding TKSU sunga student-te’ tuni apan in CCpur Govt College ah kha 1 sung daih ding Free Coaching pan uhi. Huai ah CCpur dist. sunga TKSU member tamtak tel uh a, sunnung dak 2.30 akipan nitaklam dak 5.00 kikal nei uh hi’n kigen hi.

 

ZYA Lungthul(L) makai thakte

Lamka, Aug-2: Singngat sub divn. a Lungthul(L) khua ah kum 2012-2015 sung ZYA Unit makai ding telna om a, President in C.Tunthianmang, Vice President in Kh Ginkhankhup, Secy in K.Lamkhanmuan, Asst Secy in M.Haubiaklun, Finance Secy in G.Pauliankap, Treasurer in G.Gouzalang, Inf Secy in Paumuankap leh volunter leader dingin Zamzamuan telching uhi. Executive Member 3 guang uh a, Adviser in S.Khamkhai guang uhi.

 

Laibu thak honna leh zuakna

Lamka, Aug-2: Upa H. Nengzong,IFS(retd) in ‘Convention Worker-te tanchin(1910-2011)’kichi worker 400 valte tanchin leh lemlak telna laibu a gelh Aug 4, 2012 zingsang dak 7.00 in Hiangtam Lamka EBCC biakinn ah honna om ding hi.Bu 1 in Rs. 270 man ding himahleh huai hun a telte’n Rs. 250 in leithei ding uhi.

 

Vunglal a omna kitheilou Lamka, Aug-2:T.Vunglal(30) s/o(late) T. Khatgin of Zellang Veng tuni sunnung dak 1.30 velin a inn uapan potkhia tuni nitak nungin leng tungkik nailou chihthu om hi.Vunglal in lungsim venlouh hun nei hi’n kigen a, amah feet 5 leh inches 3 asang, gawng lua hilou in gen uhi. A potkhiak lai in T-shirt ngou silh in pyjama gial teng chih hi. A mukha leh a omna theite’n phone no. 9862959069 theisak dingin a innkuante apan ngetna om hi.

 

Imphal East district ah I44 Cr PC

Imphal, Aug-2 : Imphal East district pumpi ah tuni zingsang dak 6.00 akipan in 144 Cr PC koih hi a,thuthak dang a om kei leh Sept 1, 2012 tan koih hiding chi’n Dist Magistrate/Imphal East in thusuah hi. 144 Cr PC om sungteng pawlam mun khat ah mi 5 sanga tamzaw omkhawm phal ahihlouh banah hiamhei leh galvan tawikhia leng om theilou ding chi’n Dist Magistrate in puang hi. Hileleng 144 Cr PC in Law & Order enkol Police leh Security force-te huamkhalou ding chi’n taklang hi.

 

Breast Feeding Week zat kipan

Imphal, Aug-2: Breastfeeding Promotion Activists-Manipur leh Indian Academy of Pediatrics Manipur, Imphal Obstetrics & Gynaecological Society banah National Neonatology Forum kigawm te’n zan akipan in Aug 7, 2012 tan sutzop dingin naungekte’ ading in nute’ noizu mah hoihpen ahihdan chialpina kawmin ‘20^th World Breast Feeding Week’ zang uhi. Zan in Lamshang a RDO complex ah honna(inaugural function) om a,tuni’n Medical Directorate a School of Nursing mun ah zang uhi. Aug 3, 2012 in Langol a Shija Acvademy of Nursing ah zang ding uh a, Aug 4 in Langol View Maternity & Nursing Home ah zat hiding hi. Aug 5 in Mother Care Children Hospital ah zat hiding a,Aug 6 in JNIMS Conference Hall ah zang ding uhi. Aug 7 sunnung dak 2.30 in RIMS Jubilee Hall ah hunkhakna function om ding hi.

 

Mi tamtakin nomination file uh

Imphal, Aug.-2: Manipur phaijang bial ah Sept 13,2012 in Zila Parishad leh Pradhan telna ding ah candidate ding mi tamtak in nomination file uh chi’n Returning Officer in thusuah hi. Bishnupur a Zila Parishad adin mi 10, Pradhan adin 7 leh member ding in mi 64 in nomination file uh a, Nambol ah Zila Parishad adin mi 6, Pradhan adin 12 leh member din mi 40 in nomination file uhi. Moirang ah Zila Parishad adin 8, Pradhan adin 19 leh member ding in 98 in file uh a, Kakching ah Zila Parishad adin 10, Pradhan adingin 33 leh member din mi 196 in nomination file uhi.

     Lilong ah Zila Parishad adin 5, Pradhan adin 10 leh member din mi 87 in nomination file uh a, Thoubal ah Zila Parishad adin mi13, Pradhan adin 44 leh member dingin mi 271 in nomination file uhi. Jiribam ah Zila Parishad din 3, Pradhan dingin 13 leh member ding in mi 72 in nomination file uh a; Keirao ah Zila Parishad adin 3, Pradhan adingin 16 leh member dingin mi 95 in nomination file uhi. Porompat ah Zila Parishad adin 14, Pradhan adingin 37 leh member ding in mi 186 in nomination file uh a; Swombung ah Zila Parishad adin 13, Pradhan adin 30 leh member dingin mi 147 in nomination file uhi.  Patsoi ah Zila Parishad adin 12, Pradhan adin 13 leh member din mi 130 in nomination file uh a, Wangoi ah Zila Parishad adin mi 9, Pradhan din mi 33 leh member dingin mi 161 in nomination paper file uhi.

 

Under Secy apan Deputy Secy

New Delhi,Aug- 2: H. Kam Suanthang s/o Upa Gin nok of Dorcas veng, New Lamka tulelin Union Home Ministry a Under Secretary semlai zanhal in Deputy Secretary (Selection Grade) ah kaisang a, huai tawh kiton in Home Ministry apan Ministry of Agriculture & Co-operation ah kisuan hi.Huailou in Ministry of Panchayati Raj a Under Secretary sem P. L. Haokip leng Under Secretary apan Deputy Secretary ah kaisang a,tu’n MSME ah kisuan ding hi.

 

Transfer/posting of IPS/MPS officers    

1. 1.L. Kailun,IPS, Inspector General of Police(IGP) as IGP(Law & Order-I).
2. 2.Clay Khongsai,IPS, DIG(HQ/Admn) with additional charge of Spl Secretary(Home)-cum-Security Officer as DIG(Range-I).
3. 3.S. Manglemjao Singh,IPS, DIG(Armed Police-I) as DIG(Range-III).
4. 4.G.A. Bimolchadra Sharma,IPS, DIG(Range-III) as DIG(Armed Police-I).
5. 5.Dr S. Ibocha Singh,IPS, DIG as DIG(Range-IV).
6. 6.Laxmi Prasad,IPS, DIG as DIG(Armed Police-II).
7. 7.Smt Vandana Kharki,IPS, SP/NAB as Asst Director,MPTC/Pangei.
8. 8.A. Kundo Singh,MPS, CO,Home Guard(VA) as CO, 6^th IRB
9. 9.Smt W. Mamata Devi,MPS, CO, 2^nd IRB as CO, 9^th IRB
10. 10.Y. Ashok Kumar Singh,MPS, Addl SP/CCpur as i/c CO, Home Guard(VA).
11. 11.Md Ishak Shah,MPS, Addl SP(Ops)/Imphal West as i/c SP, NAB.
12. 12.S. Chaoba Siingh,MPS, Addl SP(Prosecution) as i/c SP, CID(CB)
13. 13.L. Ibotombi Singh,MPS, Dy CO, 7^th M/R as i/c CO, 2^nd IRB.
14. 14.JS Moren Anal,MPS, Dy CO, 6^th M/R as i/c SP(Tech)/(CID).
15. 15.Th. Shyam Sunder Singh,MPS, Dy CO, 2^nd M/R as i/c Asst Director,MPTC.
16. 16.N. Manimohon Singh,MPS, Dy CO, 2^nd M/R as Dy CO, 2^nd M/R with additional charge of Dy Secy(Home)-cum-Security Officer in addition(in his grade pay).
17. 17.Md Jakeruddin MPS, i/c Addl SP/Kangpokpi as Asst CO in 4^th IRB and attached to SP/Senapati and utilised to look after the work of Addl SP/Kangpokpi.

.