Singngat Vision 2020 pulakna leh Album honna om
Lamka, Aug-13: Singngat Community Hall ah tuni’n Public Awareness-cum-Releasing of Singngat Special Music Video Album kichi om a, Singngat khua khantouhna ding gelna a Sinngat Vision-2020 in a tup leh ngimte pulakna leng om hi. Huai ah Ginsuanhau, MLA(Singngat) khuallian a pangin Singngat Special Music Video Album hong hi. Tuni a programme zatna ah Functional President in Suanchinpau Guite,MDC(Lungthul) pang a, Chief Host in P. Sianzadong,MDC(Singngat) leh Guest of Honour in Ms Rachel Guite,MCS, SDO/Singngat pang hi. Langkhanpau Guite, Chairman, ADC/CCpur telin MDC khenkhat banah DSO(CAF& PD)/CCpur leh SDPO/Singngat in uap uhi.Vungzamuan Valte, IRS, Co-ordinator, Singngat Vision 2020 leh K. Vungzamawi, Lecturer, Co-ordinator, Singngat Vision 2020 apan thugenna leh Vision 2020 tawh kisai pulakna om hi.
Khuallian in a genna ah Singngat Vision 2020 bawlkhiak ahih kipahthu gen a, khawsung leh a kim a khuate adin leng gah kilawmtak suah ngei dia lam-et thu gen hi. Singngat Vision tunung a lawhching ngei dia gintakthu genkawm in CCpur dist. adia khawpi lianpen 2na Singngat khua Model Town a bawl ding tungtang ah pan lakkhawm hidin gen hi. Singngat ah tui taksapna liantak om gige a, PHE deptt-te thil omdan a genpih ziakin tunung in tui haksatnate suk veng dinga panlak hi’n gen hi. Khawsung ah hand pump koihna ding tunung sawtl;ou in leivuh kipan leng gen hi. Laizilna lam leng puah taktak a poimawh ziakin Singngat Model School leng Hr Sec School a upgrade din proposal a piak leng oanlaik sunzom zel ahihdan MLA in gen hi. Gam khantouhna ding nasep lunglut mi ahih dungzui in diktat taka nasep thouzel hidin gen a, Singngat Vision saitu kithuahpihna din Rs. 50,000 pia hi.
Ka gintak sangin dan leh thupiak dinmun hoihzaw – Sonia
UPA Chairpernson leh Union Home Minister in Assam pha
Guwahati, Aug-13: UPA Chairperson banah Congress President Mrs Sonia Gandhi in tuni’n Assam a namkal buaina munte vapha in refugee camp a galtai omkhawmte veh a, huai ah Union Home Minister Sushil Kumar Shinde in zui hi. Lower Assam a Bodo area ah ni tamlou sung Muslim leh Bodo mite kal buaina khawktak a om ziakin mi 77 si a, tenna inn ding neilou mi 400,000 val om uhi. Mi tamtak a inn-mun ua kik ngam nailou in Relief camp a om uh hi’n kigen a, hun bangtanhiam paisa apan naupang damlou hunkhop a om banah Relief camp a naunei tanpha leng om uhi. Sonia leh Home Minister in New Delhi apan Guwahati a Lokapriya Gopinath Bordoloi airport bawh uh a, huai apan Kokrajhar district pha masa uh a, Dhubri district a Relief camp omte leng pha uhi.
Chief Minister Tarun Gogoi makaih Assam govt in namkal buaina tawh kisai ginataka panlalou chih mawhsakna a tam ziakin Congress party adingin minsiatna tamtak om hi’n kigen hi. Buaina kipatna thu, ahihkei leh mipite adia bitna bangzahta a poimawh hiam chih leh galtaite innlum a kiknawn theihna ding tanpha uh Gogoi in ginatakin ngaihsaklou chi’n ngawhna tam mahmah hi.
Mrs Sonia Gandhi leh tuni zingkalin namkal buaina kipatna Kokrajhar tung a, huai ah media-te kiang a gendanin, “tu mah a hongtung pan ka hi a, ka gintak sangin dan leh thupiak dinmun dengdel lua in ka theikei a, Relief camp a om mipite’n a innlum uh a zuan ut mahmah uh chih ka thei” chi hi. “Tua banah akhua uh aluahkik theihna ding un hun la zek laiding a, state govt in leng pan naktaka la ding uh ahihdan hon chiam uh” chi hi. Sonia Gandhi leh Union Home Minister Shinde tuni’n Guwahati apan Assam Chief Minister Tarun Gogoi leh Assam Pradesh Congress President B. Kalita in zui uh a, amau Bodo-mite omna Relief camp leh Muslim mite omna Relief camp veh tuaktuak uhi. Shinde in Union Home Malet nungin Assam a phak patna hi’n kigen hi.
Relief camp-te sianthouna lam ah chau mahmah a, mihing 2,00,000 valte dinmun awlmawh huai mahmah hi’n kigen hi. Tutung namkal buaina tawh kisai in alang tuaktuak in galvan tanpha zang in khua tamtak kihaltumsak uhi. Galtaite lak ah seh 3 suah seh 2te Muslim mi hidan in kigen a, state govt in leng lemna leh muanna om theihna dingin naktakin panla uhi. Tarun Gogoi in tuma zekin August 15, 2012 tanin Relief camp a omte’n a khua chiat uh zuankik thei ding uh chi’n gen mahleh huai thil hithei vual hinailou chihthu om hi. Titagurhi Relief camp a om mi khat in a gendan in a khua uh luahkik nawn ut mahmah uh himahleh galvantawite’n a inn-le-loute uh a haltum ziakun August 15, 2012 tan a kik zawh ding kichi thil namai hilou ahihdan gen hi.
Chief Secretary in Lamka pha
Lamka, Aug-13: Manipur Chief Secretary DS Poonia,IAS in tuni zinglam in azi tawh Lamka hongpha uh a, mun tuamtuam ah tanaute kiang pha uhi. DC/CCpur official residence ah zing an ne uh a, DC/CCpur office leng Chief Secretary in phading chih himahleh pha manlou in Imphal ah kiknawn uhi.
DC in Solar shop ‘Nino System’ hong
Lamka, Aug-13: CCpur district adia Solar shop masapen ding ‘Nino System’ kichi tuni sunnung in Ms. Jacintha Lazarus, IAS, DC/CCpur in Tipaimukh Road ah hong a, Rev K.Kamchinkhup, Director of Ministries/ EBC in thumna in lan hi. Huai ah Chief Host in Kamsuanlun, EM/ADC pang a, mi poimawh hunkhop in huai hun uap uhi. DC in agenna ah Solar Shop honkhiat a om kipahpih thu gen a, maban ah mipi adia phatuam ahih deihsakthu gen hi. Tuni a Solar shop kihong khia Nino Sytem ahihleh Lamka a authorised agent om sun hi’n kigen hi.
Electric High Tension gui kitan
Lamka, Aug-13: Chiengkon bazar ah tuni nitaklam dak 4:00 velin Electric High Tension gui (wire) kitan a, electric currrent pai mahleh kuamah a liam omlou hi’n kigen hi. Eelctric current pai laitaka a gui a kitan ziakin mipi hihbuai mahmah hi’n kigen hi. Electricity deptt te’n thil omdan a theih phet un delh pah uh a, tu nitak mah in bawl hoihnawn uh chihthu om hi.
ADC Chairman in Album thak hong
Lamka, Aug-13: Langkhanpau Guite, Chaiman,ADC/CCpur in zan sunnung in New Lamka(G) a CYA Hall ah Miss Thianhoih in ‘Pa neiloute pa’ chih a sak Album thak hongkhia a, Rev V. Khamvum in thumna in lan hi. ADC Chairman in a thugenna ah
M.Ginzapau Guite,MDC in anu’ (late) Donzangai theihgigena dinga huai Album a bawlkhiak nu neiloute, pa neiloute banah zi leh pasal neilou te adia kingakna tham Album piching hidia a lam-et thu gen hi. Programme zatna hun ah Functional President in H. Jamkhanpau, MDC(Thanlon) pang a, Guest of Honour in Lalhmangpui, MDC(Parbung) pang hi.
Shaktiman accident ah mi 2 liam
Lamka, Aug-13: Muallum khawlai ah zan nitaklam dak 6.00 in Shaktiman khat accident in a sunga tuang passenger khenkhat liam uhi. Aliam nasadeuh a kigente lakah Thangsianmuan(10) s/o Kaplam of Muallum a veilam khepi a kitan banah a taksatung mun tuamtuam nasa a, Kakap(17) s/o Ginsianthang of Muallum leng alu liam in mi 2te Dist. hospital ah etkol hi uhi.
I_day parade final rehearsal
Lamka, Aug-13: Lamka Public Ground ah Aug 15, 2012 a Independence Day lopna ding ah March Past a telding contingent tuamtuam in Parade commander ding David Biaklian, MPS, SDPO/CCpur makaih in parade final rehearsal nei uhi. Huai ah DC/CCpur leh Dist Level Officer tamtak in leng uap uhi.
VDF 1 Khuga Dam ah kelum
Lamka, Aug-13:Songpi Grouping Centre a omlel Village Defence Force(VDF) personnel(No. 11VDF020528) Henjakai @ Paokhothang (22) s/o (late) Otzathang of S. Molcham zan sunnung dak 2:30 velin Khuga Dam a tui ah kia a, zan khawvak a zon himahleh kimu zoulou in tuni zinglam dak 11:30 velin muhkhiat in om hi. Thu kizadan in Henjakai @ Paokhothang leh alawmte mi 6 zan sun in Khuga Dam ah hawh uh a, amah kihahsiang sawm in a kunsuk leh tui ah kia a, mang vengveng hi'n kigen hi. A lawmte banah mipi tamtak in zong mahle uh khawmial in a lapman ziakin deih bangin zong theilou uh hi’n kigen hi. SP/CCpur leh Police te’n leng delh uh a, KKL makaihba in Joint Philantrophic Orgn makaite’n zankhawvak in zong mahle uh, khovak tan in leng muhkhiak hilou a, tuni zingsang in sunzom nawn uh a, zinglam dak 11:30 vel in Vanlallem s/o Thongtinthang of Mata in ngakuai zang in siluang in kai khia hi’n kigen hi. Doctor leh Police te’n postmortem a bawlzawh un a innkuante pekhia uh a, tuni’n Songpi hanmual ah kivui hi.
Mun tuamtuam 2 ah accident
Lamka, Aug-13: Mrs Nienglunkim(38) w/o Lalkholian of Chiengkonpang tuni zinglam dak 8.30 velin a pasal tawh Bike a kipawlai Phalam road ah accident uh a, a kawngbom liam hi. Zelkhovung(70) w/o (late) Chinkhokam of Hebron Veng tuni zingsang dak 8.40 velin Hebron biakinn kiangah lampi kanlai Bike in phukha a, a khelguh nasa hi. Accident tuak mi 2te Dist. hospital ah admit in om uhi.
Freshers Meet om ding
Lamka, Aug-13: CCpur Govt College a Multipurpose Hall ah ah Aug 14, 2012 zinglam dak 11.00 akipan in huai College a Students’ Union-te vaisaina in Freshers’ Meet 48veina zang ding uhi. Huai ah Chief Host in Ricky Vanlallawm, Principal, CCpur Govt College pang ding a, Guest of Honour in Thoyam Haokip, Vice Principal pang ding hi.
KNF in Termination Order suah
Secretary(Info & Public Relations),KNF(S) in thusuah a bawl in a taklatdan in Aug 11, 2012 a Cabinet meeting thupukna dungzui in Army No. 307 Thenlal Haokip @ T. Lalboi @ Prem s/o Hemthang of M. Songgel in party/orgn principle kalh in omdan hoihlou leh Orgn minsiat theihna ding in a gamtat ziakin a kibawlhoihna ding hun sawttak piak himahleh huai limsaklou in a taimang ziakin tuni akipan tawpsak(terminate) hi’n puang hi.A thilhih khelh ah Orgn in mawh pawlou ding a,amahmah in kipuak ding hi’n leng taklang hi. Thusuak in a genzelna ah Orgn apan tawpsak ahih dungzui in kitheihsiamlouhna omthei ahihna ah Orgn dang in lalut lou din theisak a, Thenlal Haokip in Orgn nuaisiahna kampau zanglou din leng thupia uhi.
SUUNA
Miss Dimngaihching(35) d/o Zamkholun of Sim Veng tuni nitaklam dak 3.30 in TB natna ziakin si a, aluang Aug 14, 2012 in Sim Veng hanmual ah kivui ding hi.
Chinsuankham @ Michael s/o Ginzapau of Mualkawi apaisa Aug 11, 2012 nitakin Chennai ah sungkhawh ziak a buaisia in hospital tut himahleh dam zoulou in si hi. ZYA Chennai in buaipih uh a, Royapettat Govt Hospital ah Aug 14 in aluang post-mortem bawl hi dinga, huaizawh Lamka lam ah puak hiding hi.
Manipur ah Patriots’ Day kizang
Imphal, Aug-13: Tuni in Manipur gam zalenna humbitna ding a hinna piate zahna in ‘Patriots’ Day’ kizang a, programme-pipen BT Park a Shaheed Minar ah kizang hi. Huai ah Manipur Governor Gurbachan Jagat leh Chief Minister O. Ibobi makaihna in martyr-te zahna in pak(wreath) piak hi a, huaima zingsang in Moirangkhom a Hicham Yaicham Pat, Palace compound a Thangal General temple leh Kangla mun ah Martyr-te theihgigena mun kibawl ah zahna piak hi uhi.
Governor in kum 1891 a British sepaihte tawh kidouna ah gam zalenna humbitna dia hinna piate zahna pia hi’n puang a, zalenna humbitna ding in kituak a pankhawm poimawh ahihdan leng gen hi.Manipur ah bandh, strike leh blockade om mun mahmah a huai hun chiangin mipi vantang a thuaktu hizaw ahihman un hibang nuakna tawpsan deihthu leng gen hi.Chief Minister O. Ibobi in a genna ah Manipur humbitna dia hinna piate zahna in Manipur mipite kipumkhat ding leh gam khantouhna dinga nasem din deihthu gen hi.
Thangso,MP in kipahpihna thu puang
Imphal, Aug-13: Thangso Baite, MP(Outer Manipur Parliamentary Constituency) in London Olympic Games a Bronze medal la MC Mary Kom kipahpihna thupuan bawl a, ama’ lawhchinna Manipur state leh India gam pumpi adia lawhchinna thupi leh chiamtehtham ching hi’n taklang hi. MP(Outer Manipur) in Mary Kom’ lawhchinna in leitung pumpi ah India gam minthangsak hi’n leng taklang a, Mary Kom vaidawnna thupitak National Capital(Delhi) ah om ding hi’n leng puang hi. Ama’ lawhchinna in Manipur sports khangthu ah a mang ngei nawnlou ding history khat bawlkhia hi’n leng MP in kipahpihthu puang kawm in taklang hi.
Blood Donation Camp om
Imphal, Aug-13: Lions and Lioness Club of Imphal, 18-Sikh Regiment leh RIMS Blood Transfusion deptt kithuah in tuni’n in Sangaiprou a Lions Eye Hospital mun ah blood donation camp sai uh a, Brigadier Navneet Kumar, Commander, 9-Sector Assam Rifles khuallian a pang in hong hi. Blood Donation camp ah 28-Assam Rifles, 18-Sikh Regiment leh 143-Bn CRPF apan personnel tamtak in sisan pia uhi. Huailou in Lamshang a RDO College of Nursing; School of Nursing, Lamshang; School of Nursing, Khabesoi leh Nightingale Nursing Institute, Porompat a Nurse sinlel tamtak in leng sisan thawh(donate) uhi.
Arunachal leh Assam in sum pe ding
Imphal,Aug-13: England khawpi London a Olympic Games, 2012 ah MC Mary Kom in Bronze Madal a ngah North-east India apan Olymic Games a boxing kidemna ah medal ngah masapen ahihziakin Arunachal Pradesh in kipahpihna in Rs. 10 lakhs pe ding a,Assam in Rs. 20 lakhs a piak ding banah Ministry of Tribal Affairs, Govt of India in Rs. 10 lakhs pe ding chihthu om hi. Arunachal Pradesh Chief Minister in Nabam Toki in Mary Kom vaidawnna thupitak Arunachal ah om ding a, huai ah Rs. 10 lakhs piak hiding chi’n gen hi.Assam Chief Minister Tarun Gogoi in Rs. 20 lakhs piak dia a chiam banah Mary Kom in Assam ah Boxing Academy honkhiak a lunglut leh Assam govt in gam pe ding chi’n gen hi. Manipur govt in leng Mary Kom kipahman Rs. 50 lakh piak hidia a puan banah a sepna Police deptt ah Addl SP piak hidin puang hi. India govt a Ministry of Tribal Affairs in leng Rs. 10 lakhs piak ding in puang hi.
Helpawl in I-day boycott puang
Imphal, Aug-13: Manipur phaijang biala helpawl tuamtuam kigawm CorCom banah HNLC, KLO, NDFB, NLFT,TPDF leh ULA pawlin Aug 15, 2012 a Independence Day lopna ding boycott puang uh a, huaini zingsang dak 1.00 akipasn in nitaklam dak 5.30 tan North-east region ah General strike puang uhi. Hileleng emergency thil banah essential services, media leh sahkhua tawh kisai thilte bel khahkol uhi. Amau pawlin a taklatdan un North-east bial India nuaia omlou himahleh sepaih thahatna banah state a vaihawmte India in thuzawh in anuai a koih hizaw in leng taklang uhi.
Mun tuamtuam ah helte mankhia
Imphal, Aug-13: 5/9-G/R te’n zanhal nitak dak 11.40 velin Kwakta area lak operation bawl uh a, huai ah PLA atel khat mankhia in amah akipan in 9mm pistol 1 leh atang 3 mukhia uh chihthu om hi. Huailou in zan nitak in 9-Assam Rifles te’n Moreh Ward No. 7 area ah operation bawl uh a, KNLA atel 1 leh Prepak cadre 1 mankhia uh a, .32-pistol 2 leh thautang 10 omna magazine khat leng mukhia uh chihthu om hi. Thudang kizadan in tuni nitak dak 6.00 velin 28-Assam Rifles te’n Imphal East district a Porompat PS huamsung Nongmaijingchin lak operation a bawlna uah Chinese hand-grenade 12 leh RPG Cell 6 leinuai a kiphum mukhia uh a, Porompat Police station ah pekhia uh chihthu om hi.
.