CDSU in kipahthugenna in ankuang umpih
Imphal, Aug-21: CCpur District Students’ Union (CDSU) makaite’n Staff Selection Commission (SSC) in examination centre khat hiding a CCpur district HQ Lamka a telsakna utawh kisai a panlakpih Vungzagin Valte, MLA(Thanlon A/C) tunga kipahthugenna in tuni’n Lamphelpat,Imphal a MLA-pa Quarter ah kel 2 gou in ankuang va umpih uh a, huai ah CDSU constituent body teng apan palaite leng vatel in kipahthugen uh chihthu kiza hi.
CDSU President Lalkhohao Chongloi in a gendan in CDSU in SSC examination centre khat ding a Lamka a proposed tungin Vungzagin Valte in memorandum draft stage apan kithuahpihtou den a, Guwahati leh Delhi tanpha ah a makaih banah tumazek in Delhi ah huai thu bawhzui ahihlai in leng amah panlakna ziakin Manipur Bhawan ah inntektak a tungthei in official tuamtuam leng muthei uh a, CDSU adia milestone hoihtak bawlsaktu ahih ziakin a tung ah kipahna sang mahmah chi’n gen hi.
CDSU’ General Secretary Lalzomsang in a genna ah MLA pu in SSC examination centre kia hilou in gam-le-lei tungtang(land issue) telin CDSU panlakna tuamtuam ah makaihtu (guide) laka khat ahih manin atungah kipahthu genlouh theihlouh hi’n gen hi. CDSU President in kipah etsakna in MLA-pu puandum khat silhsak hi. Zingchiang (Aug 22, 2012) in Thoubal District sung Thiyam Konjin a Emmanuel English School te’n recognition a ngah uh leng Vungzagin Valte,MLA’ panlakna ziak ahi chi’n Aug 22, 2012 in kipahthugenna program neihsawm uh chihthu kiza hi. Huai Emmanuel English School ahihleh Evangelical Baptist Convention (EBC) saptuam etkolna nuai a om ahi hi.
Chief Secy makaih in joint meeting
Lamka, Aug-21: District e Governance Society/CCpur inntekna in Aug 22, 2012 zinglam dak 11.00 in DC office a BRGF Resource Centre ah Manipur Chief Secy DS Poonia, IAS makaihna in Fundamentalist Common Centre tawh kisai joint meeting om ding hi. Huai ah Village Level Entrepreneurs (VLEs) member te’n Imphal apan hongtel ding MS Zoom Developers-te tawh joint meeting nei ding uhi. Huai ah site verification, Hardware/ Equipment status, Solar Power Installation leh VSAT installtation tawh kisai genkhawm ding uhi.
Bank-te ni 2 sung strike ding
Lamka, Aug-21:United Forum of Bank Union apan thusuak dungzui in Aug 22 & 23, 2012 in India gamsung a Bank om teng nasemlou a kiphin(strike) dingin theisak uh a,huai dungzui in ni 2 sung ‘all India Bank strike’om ding hi’n kigen hi.Chief Manager, SBI/CCpur branch in Aug 22 & 23,2012 sung bank a transaction omlouh ding ziakin customer-te’n lentanlouhna tuak ding uh hi a theisak kawmin poisakthu puang a, a ni 2 sung bank strike sungin thukin tawh kisai a poimawhna neite’n ATM/internet banking tungtawna kitoudelh phot dingin theisak hi.
Police officer- te’n seminar nei
Lamka, Aug-21: District Police, New Life Foundation, CRY-Kolkata leh Social Welfare pangkhawm in tuni in Khuga IB ah Human Trafficking tawh kisai “One Day District Level Consultation for Police Personel on Juvenile Justice Act' om a, huai ah Police Officer 50 vel tel uhi. Huai ah Ashim Ghosh, Sr. Manager. Development Support-CRY-Kolkata; K.Saroja Devi, PO, Social Welfare deptt; K.Pradipkumar Singh, State Convener, MACR leh Mala Lisham, Member Secy Child Welfare Committee te'n sinsak uhi.
Mary Kom thu ah meeting ding
Lamka Aug-21:World Boxing champion MC Mary Kom vaidonna Aug 26, 2012 a om ding tawh kisai in Chairman ADC/CCpur office chamber ah Aug 22, 2012 sunnung dak 12:00 in meeting om ding a , huai ah Joint Philantrophic Organsation, Students’ Organisation-te, Tribe leader te,Women Organisation-te,CDSA, CCpur District Private School Assn.ban ah EM/MDC-te tel ding a, Mary Kom athupi theipena vaidon ding dan genkhawm ding uh hi’n kigen hi.
CT Scan zattheih di’n omta
Lamka, Aug-21: Dist Hospital a CT scan vanzat kigumang ziakin sawtkuamtak zat theihlouh in om mahleh Toshiba company ah part thak thukhak uh a, huaite hongtun tawh kiton in tuni’n a part tuamtuam thuah zouta uhi. Tuni'n leng zattheih ding hiam chih enkhia uh a, zattheih din omta hi. Dist Hospital asem Y.Surchandra, Technician leh Dr Sumorendro, Radiologist te'n CT Scan enkai ding uh hi'n kigen hi.
JNU ah Asst Professor muthak
Lamka, Aug-21:Dr L. Lam Khan Piang in New Delhi a Jawaharlal Nehru University (JNU) a Centre for the Studies of Social System ah Assistant Professor sepna muthak a, tuni’n acceptance va pia hi’n thutut kingah hi. Aman tulelin National Institute of Health & Family Welfare ah Asst Professor sem in, a zi leh tapa tawh NIHFW campus, New Delhi ah khawsa uhi. Dr Piang ahihleh Zomi society adia mi poimawh mahmah ahihbanah Zomi Human Rights Foundation, Delhi cell a Chairman leng ahi hi. Huailou in tuma zekin Mercy Vungthianmuang Guite in JNU mah ah German Centre a Asst Professor amuh banah Ms Vungmuanching in Shivaji College, Delhi University ah Asst Professor (English subject) ah mu hi.
ZYA Gen HQ a CEC meeting ding
Lamka, Aug-21: Zomi Youth Association(ZYA) Gen HQ a Central Executive Committee pawlin Aug 23, 2012 zingsang dak 6.30 in meeting ding uh a, huai ah ADC/CCpur-te inntekna a Mary Kom vaidonna ah ZYA in thilpiak ding tungtang leh ZYA/ZHRF Myanmar leh ZYA Gen HQ kala cultural exchange programme telin thu tuamtuam genkhawm ding uhi.
KSO Singngat Block election
Lamka, Aug-21: KSO/CCpur district thusuak dungzui in Aug 25, 2012 in Haijang khua a KSO Singngat office ah KSO Singngat Block vaipaw ding President, Vice President, Secy, Jt Secy, Secy(Edn), Secy(Fin) leh Secy(Info) telna election om ding hi. Candidate nuamte adin Aug 24, 2012 tan nomination paper piaktheih ding a, huaini mah in nomination paper-te chetna(scrutiny) a om ding banah candidate kizukkik nuamte adin kizukkik theih ding chihthu om hi.
Imphal-Jiri lamlian Lok Sabha ah
Imphal, Aug-21:Dr Th. Meinya,MP(Lok Sabha) in tuni’n Lok Sabha ah Imphal-Jiribam lamlian(NH No. 37) akinthei lama zawh ahih theihna dia panla dingin Centre theisak hi. Prime Minister Dr Manmohan in Manipur hongphak lai in kum 2013 sungin huai lamlian zawh hiding in gen a,hileleng tu dinmun ah nasepna ze-awl mahmah hi a a kilat ziakin PM thugen a vuakzuak louhna dingin Centre in panla din theisak hi.Imphal-Jiribam lamlian km. 222 asau himahleh lamlian ginatlouh ziakin vanpua Truck-te adin ni 4/5 sung hunlut ahihman in Manipur mipite adia lifeline khat gentheih huai mahmah chi’n gen hi.
Thoubal district ah I44 Cr PC
Imphal, Aug-21: Thoubal district ah tuni sun dak 12.00 akipan in 144 Cr PC koih hi a, Aug 22, 2012 akipan in nitak dak 6.00 akipan zingsang dak 4.00 kikal teng 144 Cr PC koih hi ding chi’n Dist Magistrate/Thoubal in puang hi.Thusuak kingah dan in Bangalore apan Guwahati zuan train apan sawnkhiak a om Northeast mi siluang muhkhiakte lak ah Thoubal district a Lilong khawmi 1 a telkhak ziakin mipi sousang dinga gintak hi a, huai dalna dia panlakna dingin 144 Cr PC puan a om hi’n kigen hi. 144 Cr PC om sungteng pawlam mun khat ah mi 5 sanga tamzaw omkhawm phal ahihlouh banah Police leh Security chihlouh midang kuamah hiamhei leh galvan tawikhia leng om theilou ding chih hi.
Guest House bawl hiding –Edn Minister
Imphal, Aug-21: Teacher semlai leh pension-sa khenkhat in hihding poimawh neih ziakin mun gamlatak akipan Imphal hawh a poimawh hun ah kingakna ding tunna ding mun lemtang omlouh ziaka haksatna tuak tamtak om a, huaite khualna in Babupara mun a Bengali High School campus ah Guest House khat bawlkhiak dingin pamn kila chi’n Education Minister M. Okendro Singh in gen hi. Imphal mun ah teacher-te ading Guest House tuam himhim bawlkhiak ahihtheihna dingin aman Minister of State(Education) a letlai kum 17 apaisa apan ana tup hi’n leng Minister in gen hi.
M. Okendro in tutunga Education Minister hihna a let akipan in education deptt asem pension-te’n a pension ni mah un pension sum(provisional gratuity) ngahthei uh a,tuni tan in teacher, office staff leh peon(grade-IV) kigawm mi 35 in a pension ni mah un sum a lom(bulk) in lakhin uhi.
Damdawi khamtheih mukhia
Imphal, Aug-21: Indian Airlines in Delhi apan hong puak damdawi khamtheih Robocoff kichi tuni nitaklam dak 4:00 in Imphal Airport hongtung hi. Imphal East Police te’n report a muh dungzui un Airport delh pah uh a, mi 4 in Bolero gari (No. WB-02TC/505) in a puakkhiak uh thei in sawtlou nung in mankhia uhi.Matkhiak a omte bel damdawi neitu
Md. Waris (40) s/o Nasib Ali of Lilong Mamang Leikai leh a lawmte Md. Hajizur Rahman (VDF personnel No. 861267) tulel a Sangai Yumpham a om, Md. Shamsur (41) of Sangai Yumpham leh Md. Isub Khan (21) of Lilong Turel Ahanbi hi uhi. Huai damdawi khamtheihte Delhi apan Kolkata tawn in Imphal hongtung hi’n kigen hi
HSLC,2012 rank certificate laktheih
Imphal, Aug-21: Class X(HSLC) examination,2012 a lawhching position 25na tan ading rank certificate zawh hita a,candidate-te ahihkei leh amau sik-le-tang a lathei dinga authorised a bawlte un Aug 22, 2012 akipan in Board of Secondary Education Manipyur(BSEM) office a Room No. 103 ah admit card produce in lathei ding uh chi’n Secretary,BSEM apan thusuak om hi.
Helpawl atel 3 mankhia
Imphal, Aug-21:Imphal East Commando leh Thoubal Commando kithuahte’n zan sunnung in Mantripukhri Lamlongei a Auto Parking ah KNLF cadre 2 -Lienkhomang Haokip (28) of Tuisomjang village leh Hlunkhomang Haokip @ Mangcha (30) of Siloi village, Motbung mankhia uh chih Police thusuak in gen hi.Amau KNLF party adin mun tuamtuam a sumkhon hi uh a, amau nidang in KNF atel in huai apan huai apan KNLF a lut uh hi’n thusuak in gen hi. Huailouin Imphal East Commando te’n zan nitaklam dak 5:30 in Mantripukhri Khongnang a Waiting shed ah KCP(Noyon) te panpihtu H. Malemnganba Meitei (28) of Yumnam Patlou Mayai Leikai mankhia uh chihthu leng om hi.
Counselling mun ding kisuan
Imphal, Aug-21: Manipur nominee a MBBS/BDS zil ding lakna dia Entrance Test ah selected leh wait list a telte adin Aug 22, 2012 zinglam dak 10:00 a RIMS Jubilee Hall ah Counselling om ding himahleh lemtanlouhna om ziakin Directorate of Health Services complex, R & D Wing a Conference Hall adin kisuan chihthu om hi. Huai a telding candidate te’n Lamphelpat a Directorate of Health Services complex mun zuan dingin theihsak hi uhi.
Medical camp ah mi 400 val ki-ensak
Imphal, Aug-21:Manipur a Medical Officer-te leh Dental Surgeon Association pawlin Pathianni paisa in Ukhrul district sung a K. Leihaoram khua ah ni ‘One day Free Medical Camp’ bawl uh a, huai ah khawsung mi banah akiang naia khaw tuamtuma apan akigawm in damlou mi 400 val en uhi. Damlou ki-ensakte lakah manbei in damdoi hawmkhia uh chih thutut kingah hi.
Inter-Ministerial team in Assam pha
Guwahati, Aug 21: Tuni’n Central government apan senior official 7 in Assam pha in Bodo Territorial Council sunga Muslim leh Bodo kal a buaina ziaka inn-le-lou nusia a Relief camp a omte dinmun enkhia uhi. Inter-Ministerial team te’n Relief and rehabilitation tungtang a etzui ban uah Kokrajhar, Dhubri, Chirang leh Baksa district-te abanban in pha uhi.
Ministerial team ah Ministry of Home Affairs a Joint Secretary (Northeast) Shambhu Singh leh Joint Secretary (Disaster Management) R K Srivastava te’n makai uh a, adangte Ministries of Health, Rural Development, Food, Department of Drinking Water and Planning Commission apan hi uhi.
Inter-Ministerial team te’n tunitaklam in Assam a state government official-te tawh Relief leh rehabilitation tungtang genkhawm uh a, tualou in Prime Minister Dr Manmohan Singh in Assam a phak lai a, relief package dan a Rs. 300 crores piak dia a puan leng a sum zat dingdan kikum uh chihthu kiza hi. Inter-Ministerial teamte’n tuni zinglam in Delhi a nutsiat ma deuh un Cabinet Secretary Ajit Seth leh Union Home Secretary RK Singh tawh leng houlim masa uh hi’n thusuakin gen hi.
Sunna: Vungkham Hangzou (86) f/o Kiamlou Hangzou IDAS, Paite Veng, Imphal August 21, 2012 nitakin zunkhum leh taksa hatnawnlouh ziakin si a, tuni August 22, 2012 nitaklam in Chingmeirong Christian cemetery ah vui hiding hi.
.