‘Vanglian Jehova’ & ‘Nampi Mosi’ chih Album thak kihong
Lamka, Aug-11: Zogam Artists Association(ZAA) senior member Mrs Vungkhanching (w/o Rousang Valte) in disc khat a Album 2 om ‘Vanglian Jehova’ kichi leh ‘Nampi Mosi’ kichi Music Video Album a bawlthak honna tuni’n YPA Hall New Lamka ah om hi. ZRO Advisor K. Guite in ‘Nampi Mosi’ hongkhia a, Rev. L. Khamkholun, Gen. Secretary, EBC in ‘Vanglian Jehova’ pen hongkhia in Pathian kiang ah latna thumna leng nei hi. Huai hunah Special Guests in Ginsuanhau, MLA(Singngat); Vungzagin Valte, MLA(Thanlon); Langkhanpau Guite, Chairman, ADC/CCpur; M. Gouzamang, EM/ADC leh LB Sona, Chairman, Zomi Council pang uh a, Chandel apan Tongpau, MDC(Chandel) telin mi poimawh tuamtuam banah mipi tamtak in Album thak honna hun uap uhi.
Ginsuanhau, MLA in Album pichingtak bawlkhia Mrs Vungkhanching phat-huai sakthu gen a, tuni’n Album manphatak honkhiak ahihdan gen hi. Vungzagin Valte, MLA in Album honkhiakna ding tawh kisai in saptuam leh nampi makaite’ tanvou piak ahih uh manpha sakthu gen a, Album bawlkhiakna dia panla tuni a honkhiak theih ding a hiaitan tunpihte mi thupi ahi uh chi hi. Langkhanpau Guite, Chairman/ADC in Album hoihtak leh gen neitak ahihdan gen kawmin nampi adia kitundingna ding ahih deihthu gen a, kuapeuh in a manphatna theisiam dinga deihthu gen hi. M. Gouzamang, EM/ADC in lungsim a chihtakna tawh theihtawp suah a, thil khatpeuh sep ahihchiangin gah kilawm muhtheih ding om a, nampi in haksatna atuah hun aleng hibang Album hoihtak bawlkhiak in gah hoih suah dinga lam-et thu gen hi.
Tuni a Album kihongkhia ‘Nampi Mosi’ kichi gam ngaihla hi a, ‘Vanglian Jehova’ kichi pen Pathian phatna la ahi hi. Vungzamuan Valte, IRS in inntek thugenna nei in, Rev. Lian C. Tombing in Album tawh kisai a buaipihte tungah kipahthu gen a, mipi paikhawmte kiangah Auction sale a zuak in om hi. Mi poimawh tuamtuamte lak apan Ginsuanhau, MLA in Album khat Rs. 5000/- in lei a,Tongpau MDC in Rs 5000/- Vungzagin Valte, MLA in Rs. 4500/- , Lian C. Tombing in Rs. 5000/-, Langkhanpau Guite in Rs. 3000/-, Rev Khen P Tombing in Rs 2000 leh M. Gouzamang in Rs. 2000/- in lei hi. Tualou in mi hunkhop in Rs 1000 leh Rs 500 in leisak uhi.
CDSU in Dist Topper Award hawmkhia
Lamka, Aug-11: CCpur District Students’Union (CDSU) pawlin tuni in New Bazar a CDSU Admn office tukum 2012 adia Class X (HSLC/AISSE), Class XII/10+2 (HSSLC) leh Class XII/10+2(CBSE) saina a examination a result suak apan CCpur district sunga Topper anuai ate Award pia uhi.
Category 1 : Class X (HSLC/AISSE) ah Young Learners’ Schhol apan Th Chingkheinganba Singh s/o Th Ibomcha Singh of Tuibuong Forest Gate leh St Paul’s Institute apan A.Gautam Singh s/o A.Ranjeet Singh of Mualkawi in topper award la uhi.
Category II : Class XII (HSSLC) ah Donbosco Hr Sc School apan Niangthianmawi d/o L.Ginzapau of Rengkai Zion Veng, Donbosco Hr Sc School akipan mah Chiinmuankim d/o L.Thangzagin of New Lamka leh Rayburn College apan C.Lalrinchhani d/o R.R Chunghnunga of Salem Veng in topper award la la uhi.
Category III :Class XII(CBSE) ah JNV/Tuinom a kaituak Ravinder Kumar Shah s/o Anil Shah of Thangzam Road leh Ruthy Niangneilam d/o Thongzalian of P.Kamdou Veng in topper award la uhi.
District Topper 2012 te kipahman in trophy + certificate leh sum (cash award) piak hi uh a, huaizawh in Rev Henzalen Doungel, Pastor KBC Central Church, B.Vengnuom in Pathian kiang ah vualzawl ngetna leh thumsakna nei hi. Siamnunlian Valte, Consultant/ CDSU leh H.Doungel, Youth Co-ordinator/ NYK & Consultant/CDSU te'n hasotna thu gen uhi. CDSU consultant 2 te’n topper award ngahte kipahpihthu gen uh a, Manipur tanpha a topper hithei dingin maban ah kuhkul taka pang ding in hasuan uhi. CDSU a Education deptt te’n award ngahteng pahtakthu uh a, award hawmkhiat ahih theihna ding a kithuahpihte tungah leng kipahthu gen uhi.
DC/CCpur khuallian hiding
Lamka, Aug-11:Lamka Public Ground ah Aug 15,2012 zinglam dak 9.00 in Independence Day lopna kipan ding a, huai ah Ms Jacintha Lazarus,IAS, DC/CCpur khuallian a pangin India flag a kaihpalh ding banah March past atel contingent tuamtuamte apan salute la ding hi.Khuallian apan thugenna banah Flagship programme tuamtuam lahna,Musical performance,STC/BSF apan performance,Cultural progamme leh kipahman hawmn leng om ding a, huaizawh in DC- XI team leh Public leader-te’n exhibition football match kimawl ding uhi.
Public Awareness leh Singngat Spl Music video album honna
Lamka, Aug-11: Singngat Vision-2020 (Implementation Committee) saina in Aug 13, 2012 zinglam dak 11.00 in Singngat Community Hall ah ‘Public Awareness-cum-Releasing of
Singngat Special Music video album’honna om ding a, Ginsuanhau,MLA(Singngat A/C) khuallian a pang in hong ding hi. Huai ah Functional President in Suanchinpau Guite,MDC(Lungthul) pang ding a, Chief Host in P. Sianzadong,MDC(Singngat) leh Guest of Honour in Ms Rachel Guite,MCS, SDO/Singngat pang ding hi. Vungzamuan,IRS leh Vungzamawi,Lecturer akipan Singngat Vision-2020 tawh kisai thugen lunglut-huaitak ngaihkhiak hiding hi.
Chairman,ADC in Album hong ding
Lamka, Aug-11: Miss Thianhoih d/o S. Gindal of Palkhuang village(Thanlon Sub-divn) in “Pa neiloute’ pa” chih a sak Album thak M. Ginzapau Guite,MDC(Ngazam) in anu (late) Donzangai theihgigena dia a bawlkhiak Aug 12, 2012(Pathianni) sunnung dak 2.00 in New Lamka(G) a CYA Hall ah honna om ding hi. Huai ah Langkhanpau Guite,Chairman, ADC/CCpur khuallian a pang in hong ding a, Rev V. Khamvum in thumna in lan ding hi.Album honna ah Functional President in H. Jamkhanpau,MDC(Thanlon) pang ding a, Guest of Honour in Lalhmangpui,MDC(Parbung) pang ding hi.
MLA 3 in Lamka pha
Lamka, Aug-11: T.Manga Vaiphei, MLA(Henglep A/C) & Chairman/ MTDC; Ginsuanhau MLA (Singngat A/C) leh Vungzagin Valte, MLA (Thanlon A/C) in programme tuamtuam neih ziakin Lamka hongpha uhi.T.Manga in Red Cross Road a a inn ah election hunlai in amah adia an-ngawl a thum(prayer team) mi 100 valte ankuang umpih a, blanket leh water filter 1 chiat pia hi. Vungzagin Valte in YPA Hall, New Lamka a Album honna hun uap a, Ginsuanhau in sunnung in Khuga Dam Right side canal a M.Semuol khaw kiang ah tuma zeka canal siatna mun a nasepna enkhia hi.
Sumo tailai suangtum in dengkha
Lamka, Aug-11: Leimatak akipan Lamka zuan atai Tata Sumo khat zan nitaklam dak 3.45 velin Leimatak apan km 16 vela gamla Innbung mual kichihna mun ah lamsak khoubang apan suang lianpi feet 5 vel alian khat tuukkhia in dengkha a, Tata Sumo atuang mi 3 liam uhi. Suang in a denkhak nungin Tata Sumo leng kisia in taithei nawnlou hi’n kigen hi. Tata Sumo atuang Demminthang(24) s/o Lamkholet of Changpikot(near Saitual) a nungzang mun bangzah hiam liam a, aliam midang 2te Imphal ah etkol hi un kigen hi.
A tanu’ rape tupa Jail ah
Lamka, Aug-11: Oinam Kumar Singh (39) s/o O.Chaoba Singh of Tuibuong Meitei Leikai in kum 14 vela upa a tanu a sual(rape) ziakin zan in Tuibuong Area Youth Club(TAYC ) makaihna in mipi’n mankhia in Police ah pekhia uh a, .Police-te’n Oinam Kumar leh a tanu tuni’n Imphal ah medical examination bawlsak uhi. Huaizawh in Police te’n CJM court ah Oinam Kumar dingsak uh a, JCM in Judicial custody(jail) a omding in a puan ziakin Police te’n Jail ah koih uhi. Oinam Kumar Singh in a tanu a rape ziakin Police te’n atung ah FIR No.83(8)2012 CCP-PS U/S 326/376 IPC registered uhi.
ZCA te’n General meeting nei
Lamka, Aug-11: Zomi Chiefs’ Assn pawlin tuni’n Nehru Marg a Zomi Council office ah Genral meeting nei uh a, huai ah hausa 150 val tel uhi. Hausa paikhawmte’n MGNREGS scheme apan MDC te’n 25% leh line deptt te’n 25% sa ding uh chi a govt in order a suah pom theilou uh a, maban ah akul leh poimawh banga panla ding in thupukna bawl in hausa 1 in Rs 2000/- zel thawh ding in thukim uhi. District dangte’n bandh abawl hunhun un Zomi Chiefs Ass in pawl in leng support ding in thupuk uh chihthu om hi.
Police-te nitengin duty uh
Lamka, Aug-11: Lamka khawpi ah tulai in security dinmun hihkhauh hi a, Police leh VDF kithuah in mun tuamtuam ah duty uhi. Nitak chiangin leng mipi tamna mun bazar area leh mun khenkhat ah frisking leh checking bawl sek uh a, gari taituahte a document check in khauhtak in panla uhi.
‘Gospel Tangkou’ kum 25 ching
Lamka, Aug-11: Zomi Colony a Manipur Evangelical Lutheran Church(MELC) HQ Church ah tuni’n Gospel Tangkou kum 25 a chin ziakin Pathian kiang kipahthu genna program zang uhi. Huai ah Dy Moderator Upa V.Lawmsang in thumna in hun hong a, Rt.Rev Dr Ginkhanmung Zou, Bishop, MELC in Gospel Tangkou Special issue hong kawmin Pathian kiang ah lan(dedicate) hi. Gospel Tangkou Patron Member 144 te kiang ah Memento pia uh a, Rev Hangminthang, Moderator, MELC in Pathian thu gen hi.
Police custody ah om ding
Lamka, Aug-11: Sinzawl khua a om 39-Assam Rifle te’n Aug 7, 2012 nitaklam dak 5:30 vel in Thanlon sub-divn a Khuanggin khua ah Myanmar a Tedim khawmi Nengliankham(46) s/o (late) Pumkap, Z.Gozang(36) s/o (late) Lianthang leh N.Ginlian (30) s/o Vajong akipan No. 4 (heroin powder) gram 700 mukhia uh a, A/R te’n mi 3te leh No. 4 a muhkhiak uh Thanlon Police sh pekhia uhi. Police te'n zan in CJM court ah mi 3 te dingsak uh a, CJM in Aug 16, 2012 tan Police custody a omding in phalsak hi.
CDCTA Emergency Assembly om
Lamka, Aug-11: CCpur District Council Teachers' Assn(CDCTA) pawl in tuni’n IB Road a Synod Hall ah Emergency Assembly nei uh a, teachers tamtak paikhawm uhi. Huai ah Pension -cum-Gratuity (PCG) & Death cum Gratuity (DCG) tungtang, Service book, Mid Day Meal,Pending 6th Month ROP (TA/DA) tungtang, 14 % Dearness Arrear thu, Define Contribution Pension Scheme, Senior Scale of Pay thu, Pension benefit Scheme, SSA tungtawna free uniform, text book, school bag, telin thu tuamtuam genkhawm uhi.
Suunna
Dongthianhnun(18) s/o L. Lalmuanthang of Hiangtam Lamka tuni zingsang baihtak in a anhuan-inn uah awklumsa in kimukhia a, tuni mah in Lamka hanmual ah kivui hi.
V. Thangkhotual (79) f/o G. Lianchinkhup of Vengnuam( New Lamka) zan nitak dak 7.30 velin zunkhum ziaka natna tuamtuam vei in si a, tuni’n YPA hanmual New Lamka ah kivui hi.
Patriots’ Day zat hi ding
Imphal, Aug-11 Manipur gam humbitna dia hinna pia mihangsante zahna in Aug 13, 2012 in Patriots’ Day,2012 kizang ding a, huai ah Manipur Governor Gurbachan Jagat khuallian hiding a, Functional President in Chief Minister O. Ibobi pang ding hi.Zinglam dak 8.00 in Moirangkhom a Hicham Yaicham Pat ah zahna piak hiding a, huaizawh zinglam dak 8.30 in Palace compound a Thangal General temple ah zahna piak hiding hi. Nitaklam dak 3.30 in Kangla ah martyrs-te zahna piak hiding a, huai apan nitaklam dak 4.00 in BT Park a Shaheed Minar ah leng martyrs-te zahna piak hiding hi.
AMWJU President’ tenna inn a bomb kipai puakzak
Imphal, Aug-11: Thongju Part-II a om All Manipur Working Journalists’ Union(AMWJU) President A. Mobi tenna inn ah tuni nitak dak 8.10 velin meltheihlouh pawl khat in bomb a paihkhum uh a compound sung ah puakzak a, hileleng misi leh liam omlou hi’n thutut kingah hi. Huai thiltung tawh kisai in AMWJU President leh Editor-te telin mi 20 velin tuni nitak dak 9.30 apan in nitak dak 10.30 tan Home Minister Gaikhangam tawh kimu in thil omdan genkhawm uhi. AMWJU pawlin Aug 12, 2012 zinglam dak 10.00 in General Body meeting nei ding uh a, sunnung dak 2.00 in Rally pai ding uh a, Chief Minister leh Home Minister kiang ah memorandum pe ding uh chih thutut kingah hi.
Free Eye Care camp om ding
Imphal,Aug-11: Lions Eye Hospital & Services Trust in District Blindness Control Society, Imphal tawh pangkhawm in Aug 12 , 2012(Sunday) in Sangaiprou, Airport road,Imphal a Lions Service Centre ah Free Eye Care Camp sai ding uhi. Huai ah mitlam buaite leh mit natna tuamtuam neite’n zinglam dak 10.00 akipan sun dak 12.00 tan in vanaih theih ding chi’n Lions Eye Hospital & Services Trust a Secretary L. Priyokumar Singh in thupuan bawl hi.
KCP group 4- te leh govt. kihou ding
Imphal, Aug-11 : Manipur a helpawl KCP group 4-te leh govt in Peace talk nei ding uh chihthu om hi. Huai tawh kisai in KCP(MTF) a Chief Adviser Naorem Brojen @ City Meitei tuni’n Imphal Airport hong tung a, M. Minai, SDPO/Imphal West in airport apan vapi hi. KCP group 4-te bel KCP(Lamphel), KCP(Taibangnganba), KCP (Pakhanglakpa) leh KCP (MTF) hi uhi. Ministry Home Affairs a Jt Secy(NE) Sambhu Singh, Manipur a Principal Secy(Home) Dr Suresh Babu leh Sajiwa Jail a SP hilel K. Muivah apaisa July 31, 2012 in New Delhi ah kimu uh a, huai ah peace talk neih ding a thukim ziakun tu a kipandek hi’n kigen hi. KCP (MTF) Chief Adviser bel Manipur pawlam a om hi a, peace talk ding ziakin tuni’n Manipur hongtung hi’n kigen hi. Aman Imphal hongtun in peace talk tawh kisai in condition bangmah om nailou hidan in gen hi.
Child Welfare Body-te kitawp
Imphal, Aug 11: Ukhrul district apan naupang 23 kumlui 2011 in free education ngah ding chih ziakin Kerala tunpih hi uh a, hileleng laizilna gina piak ahihlouh ziakun a omna mun uapan hutkhiak in om uhi. Himahleh amau tuni tanpha Ukhrul district a tunkik nailouh ziakun Ukhrul a Child Welfare Committee(CWC) pawl lungkimlou in Social Welfare department mawhsak uh a, huaiziakin ziakin Child Welfare Committee (CWC) a telkha teng kitawp uhi.
CWC, Ukhrul thusuakin a gendanin G Satyabati, Director of Social Welfare in Kerala a naupang tangte Manipur pitungna dia pan lalou chi’n nasatak in mawhsak uhi. CWC Ukhrul Chairperson, CWC Ukhrul leh Member Secretary te’n a taklatdan un CWC Ernakulam in CWC Ukhrul ah Social welfare Director in Kerala hawh dia mi 2 a sawlte tungtang dotna abawl uh CWC Ukhrul te’n theikhalou uh ahihdan a gen chiangun CWC Ernakulam te’n leng naupangte paisak ngamlou uh hidanin kigen hi. Satyabati panlakdan lungkimlouh ziakin CWC Ukhrul member teng kitawp uh hi’n kigen hi.
Army- te’n gultuk 2 hunkhia
Imphal, Aug-11 : IG/AR (South) nuai a om 18-Sikh Regiment ten tuni’n Unit Hospital ah numei khay gul in a tuk hinna humbit uhi. Smt Koncha Rasi (52) of Irom Siphai village gul in atuk phet in 18-Sikh Regiment Unit Hospital puaktung hi a, Army-te’n gul gu thahna ‘anti-snake venom’ ana pe pah uh a, amah leng hoihlam nawtpah in Unit Hospital apan potsak pah uh chihthu om hi.
Huailou in Smt Laishram Mema (40) of Mangjin village, Bishnupur district zan in gul in atuk ziakin 27-A/R Unit hospital puaktung hi a, amah leng anti-snake venom piak pah ahihziakin a hinna humbit himahleh a taksa gimlai ziakin RIMS ah refered in om hi.
Raj Polyclinic ah naupang 1 si
Imphal, Aug-11: Hatta Golapati a om Baby Jeneth Sahani (5yrs) d/o Serajuddin zan nitak in khawsik ziakin Raj Polyclinic ah kipawlut mahleh tuni zinglam dak 8:30 verlin si chihthu om hi. Misi innkuante leh tanaute’n doctor leh nurse te’ etkol hoihlouh ziak a si hi a gen in uh lungkimlouh thu taklang kawm in suang khong in Raj Polyclinic deng uh a, glass bangzahhiam deng sia uhi. Hileleng Police-te huaimun a tunpah ziakun buaina huaise manlou chih hi.
Raj Polyclinic Manager Dr. Dinesh in zan nitak dak 6:00 a damlou kipawlut hoihtak a etkol himahleh a sisan a Haemoglobin niamlua a, normal a 11 vel ding himahleh amah a 4 level lel hi a, tua ziakin sisan poimawh a, Raj Polyclinic in sisan a neihlouh ziakin zingsang in ngaihtuah hithei pan a, huai hun ah kikhel manta hi’n gen hi. Doctor leh nurse te’n bel theihtawp suah a enkol uh hizaw in gen hi. Thiltung tawh kisai in Police-te panlakna ziakin kihoulem thei uh chihthu om hi.
.