Electricity deptt-te’ dharna tu

Mipi hon in Electricity office luh:van tamtak hihsia uh

London a Olympics Games,2012 ah Manipur mi MC Mary Kom telna women boxing kidemna omsek a, himahleh, electric meivak ginatlouh ziakin mi tamtak in hoihtaka en theilou in lungkimlouh thu gen uhi. Huchih lai in zanhal Aug 8, 2012 nitak nitak dak 6.30 velin mipi hon in Bijang a om Electricity office valuh uha, EE office room telin room 3 vel kongkhak leh tukvelh hihsia in lut uh a, room sunga chair table leh furniture tamtak hihsia uh gen kigen hi. Huai thu zak phet in T.Tunzalian,EE(Electricity)/CCpur Divn in security tawh kithuah in office mun delh a,huaiziakin thil a siat ding bang khop a sia tamlou hi’n kigen hi.

Bangziaka Electricity office kiluh hiam chih chiantaka theih hikei mahleh

Huai nitak dak 6.15 in MC Mary Kom leh Britain mi Nicola Adams te numei boxing kimawl uh a,hileleng electric pailouh ziakin mi tamtak in huai en theilou uh hi’n kigen a, huaiziaka thangpaite kipunkhawm a electricity office buluh uh hizaw dia gintak huai sakthu khenkhat in gen uhi. Manipur mi Olympic Games atel MC Mary Kom a pan masak nitak(Aug.5) inleng electric mitzel vakzel a,minute 15 sung lelin electric 4 vei mit a,mipi tamzaw in ginatakin en theilou uhi.

EE in a gendan in zanhal nitak load-shedding himahleh MC Mary Kom kimawl ding ziak in Chief Engineer( Electricity) kiang tanpha ah electric meivak paisak ding in ngen a, hileleng Khengjang Power Station apan CCpur dist ading electric current paisaklou uh hi’n gen hi. Electricity office kiluh a, van tuamtuam hihsiat tawh kisai in Police te’n FIR No.82(8) 2012 CCP-PS U/S 447/457/34 IPC & 3 of P.P (D) Act registered uhi. Thiltung mawhpaihna in tuni Aug 10, 2012 in electricy staff te Tuibuang a a office mai uah dharna tu uhi.