Lelte Award ngah Lamka mi 2 vaidawnna om
Lamka, May-4: Mizoram a ‘Lelte Award 2014’ va sang Lamka mi Mwanlal Tunglut leh Janet L Varte tuni’n Zogam Artiste Assn(ZAA) makaihna in  Buallian khawkiang a Prayer Mountain mun ah mipi in ana vaidawn uhi. Award ngah mi 2-te’  zan in Aizawl apan Sinzawl ah  giak uh a, tuzing dak 9.00 a Sinzawl nusia uh a,  nitaklam dak 3.00 in Prayer Mountain mun hongtung uhi. Huai ah  mipi’n  pakkhi ohsak in thumna tawh vualzawlna ngetsak  in om uhi. Huaimun apan Hebron Veng a Mwanlal Tunglut inn ah vaidawnna programme zat in om a, Janet L Varte leh Mwanlal Tunglut nu-le-pate leh tanaute banah pawl tuamtuam apan makaite leh mipi tamkhop leng tel uhi.
    
Huai ah Thangthuam Thawmte, President, ZAA in mi 2-te’ tunga kipahthu gen in,  Lelte Weekly in a sai a Chibil Award a ngah uh ZAA in kipahpih ahihdan gen hi. Langkhanpau Guite, Chairman, ADC/Ccpur in kipahpihna leh hasotna thu gen a,  maban a lawhching touzel dinga deihsak ahihdan gen in, sianthouna tawh maban ah  lamzang zel dinga  deihsak thu gen hi. Pastor E. Chinzamang, Local Pastor, EBCC Zion in Mwanlal Tunglut leh Janet L Varte adingin thumsakna nei hi. Lelte Weekly Magazine a Editor sikin Joseph Joute, Correspondence(Lelte) in Chibil Award adia selection kibawldan taklang a, Zotate kipumkhatna dia kibawl ahihdan genkawm in Music tungtawn a platform bawlkhiak ding tup  ziakin kumteng in Chibil Award piakkhiak hi’n gen hi.Award ah Trophy leh Citation piak a om in Artist Assn te’n selection a bawlte uh siangthou taka piak hizel chi’n gen  hi.

Ni 6 sung electric fee bill louh poimawh
Lamka, May-4: Torbung bungalow leh Kangvai kikal ah April 25, 2014 nitakin electric khuam (tower) 3 a kipuk ziakin CCpur district mipi’n ni 6 sung electric meivak/power ngahlou a, huai hunsung CCpur Dist ah electric fee bill louh  poimawh chi’n mi tamtak apan  kiza hi. CCpur district  in ni 6 sung electric  a ngahlouh ziaka  bill  tellouh ding tungtang  Imphal a Head Office apan phalna poimawh hi’n kigen a, mipi khualna ziakin kuapeuh pan latheite’ kipat a  phutzui poimawh hi’n kigen hi.

May 16 nung in team 8 hiding
Lamka, May-4: SP/CCpur in tulelin sun hi’n nitak hileh khawpi sung leh akim ah Quick Respond Team (QRT) 4 leh Statistic team 2 niteng in patrolling paisak a, May 16, 2014 nung in team 2 behlap in team 8 pai ding uh chih ahi hi. Huai lou in SP office ah tower 1 bawlthak uh a, huai tungtawn in SP office ah control room 1 om ding a, patrolling team 8 teng tawh wireless set kithuzak tuah zelding uh a, koilai hiam a buaina om hun in patrolling team 8te laka  kinai pen te’n buaina mun delhzel ding in SP/CCpur  in plan bawl hi.

Vodafone, Airtel, Idea ah 3G zat theih
Lamka, May-4: Hun sawttak Northeast Telecom circle huamsung ah Airtel kia in  Third-Generation (3G) network aneih nungin Telecom tribunal TDSAT tawh kilemna dungzui in Northeast circle ah Bharti Airtel, Vodafone leh Idea Cellular Ltd te’n 3G network pekhe thei dinga phalna piak hi uh a, 3G intra-circle roaming service kizang theita hi. Hiai service zat theihna dingin telecom operation te’n Department of Telecom in a bikhiah zah Rs 1,200 crore pia uh hi’n kigen hi. Tata Teleservices leh Aircel inleng 3G ICR ngetna pe mahle uh DoT tawh kilemna om theilou in 3G neilou uh hi’n kigen hi.  3G network tungtawn in Hi-speed internet zat theih a, mobile phone tungtawn in video-calling leng omthei hi.

Nitaklam dak 6 tan duty zel ding uh
Lamka, May-4: Lamka khawpi sung mun tuamtuam ah Traffic Police te’n Nipi(summer) sungin  zinglam dak 8:00 apan nitaklam dak 6 tan  duty sek uh a, thuthak om masiah  Nipi(Summer) hunsung in nitaklam dak 6.00 tan mah duty zelding uh hi’n kigen hi.

Battery gulai mipi’n mankhia
Lamka, May-4: Thanggoulian (35) s/o (late) Vungkhopau of Gangpimual, Thongdong Veng in  zan nitaklam dak 4:30 velin Dr Chhawnvung of Mualveng te’ inn a inverter battery kizanglai gu  a, inn neite’n theikhia in Tipaimukh road ah mipi’n mankhia uh a, battery suhkik thei uhi.

TJSWA General election om ding
Lamka, May-4: District Hospital leh Kangvai  kikal a passenger service ‘Taxi/Jeep Service Welfare Association(TJSWA) pawlin May 5, 2014 zinglam dak 10.00 in Monglenphai a HQ office ah General election nei ding uh a, huai ah Taxi/Jeep service neiteng telkim chiat ding in theisak uhi. Taxi/Jeep neitu Identity card tawiloute’n elecrtion ah vote khe theilou ding uh chihthu om hi.

KSO, Singngat makaih in meeting
Lamka, May-4: KSO/Singngat block te’n April 29, 2014 apan in KSO area sunga om ZEO nuai a school 5 leh Dist Council nuai ah school 6 om te School Survey chih thupi anei in enkhia uhi. Amau  school 11 a etkhiatte uh tawh kisai genkhawm ding in May 6, 2014 zinglam dak 10:00 in Tuibuong a KIC office ah meeting ding uh a, huai ah school 11 apan Chairman, SMDC, Headmaster/Headmistress leh Hausate tel ding uhi.

Numei naupang a omna kitheilou
Lamka, May-4: Niangnunhoih(13) d/o L. Ginsuanlal of Unity Street, Elim Veng, New Lamka  apaisa May 1, 2014 zingkal dak 9.00 vela pawtkhia tunitan a omna kitheilou a, a pawtkhiak lai in puansan ban bul (armless), khekol tom gial leh slipper pink rong bun hi. YPA Elim Veng makaihna  in mun tuamtuam zong uh a, a mukha-te’n President (8414876387) , Vice President (943 6024484) leh Secretary (9089739515) theisak dingin ngen uhi.

Accident in liam uh
Lamka, May-4: Chingngaihkim (29) d/o T.Tualgou of Pearsonmun, tuni’n  Activa a tailai Hmar Veng ah  accident in alu liam a,  Rabina (27) s/o Kabir of Old Bazar tuzing dak 8.00 in New Bazar ah Activa  in phukha in alu leh kog liam a, amaute hospital ah etkolin om uhi.

suunna
Upa S.Tunzathang (74) h/o Mrs. Nengzaching of Vengkhang, Pearsonmun tuzing baihtak 12.15 in guhnat ziakin si a, tuni’n Pearsonmun hanmual ah kivui hi.

IMPHAL NEWS:
Manipur govt  in NEEPCO khut ah Hydro Power Project 3 piaksawm
Imphal, May-4: Manipur in state sunga Project tuamtuamte tungtawn in  Hydro Power 2,000 MW piang khesak thei dinmun a om mahleh 5%(105 MW) lel a muh ziakin power dinmun hoihzawk theihna ding ngimna in North Eastern Electric Power Corporation Limited (NEEPCO) khut ah power  317 MW pekhe thei ding Project 3 piaksawm a, huai dingin tunung sawtlou in MoU a suaikai ding uh hidan in kigen hi. Huchi hileh Manipur in huai Project 3te akipan a thawn in 13% mu ding chi’n leng kigen hi.
   
Manipur govt in  Hydro Power Project 3 piakkhiak a sawmte 1) Tamenglong district sung Irang a Irang Hydro Electric Project (60 MW) 2) Senapati district a Barak river a Khongnem-Chakha Hydro Electric Project (67 MW) leh 3) Tamenglong district sung Barak river a  Pabram Hydro Electric (190 MW) hi’n kigen hi.

Tanky gari zangin tui puaksawm
Imphal, May-4: Manipur a lui tamzaw ah tui om nawnlouh ziakin Imphal khawpi adia govt in Water Supply a etkolte khawlvek a,PHED thusuak in a gendan in competent authority in approved a bawl permit nei a Water Supply Maintenance Divn-II nuaia Tanker filling point apan tuila Tanky gari teng abanban in May 6-9, 2014 sungin Porompat Plant a Control room ah zingsang dak 6.00 ki-report ngai ding chih ahi hi.Tui haksat sungteng requisition paitou zel ding a,ahun taka report bawllou Tanky gari te a permit uh cancel hiding chih tanpha thusuak om hi.

Assam Rifles te’n mi 2  mankhia
Imphal, May-4 : PIB Defence Wing thusuak a taklatdan in Assam Rifles te’n  May 2, 2014 in  Chassad mun a gari check a bawlna uah Pulsar Bike (KA 01/6462) a tuang mi 2 khawlsak uh a,  gari document bukim a lah theihlouh ziakun hentang uhi. Amau thudotna akipan in Imphal-Moreh lampi tawn in April 11, 2014 in Tamu vapha ua, huai apan  Dimapur lampi tawn in Onziya-Nampisha-Kamjong kan in hongpai uhi. Mat a omte  Azow K.(29) s/o Citi Rezabi of Kohima leh Zudson (23) s/o Siran of Nahabari district, Dimapur hi uhi. Assam Rifles te’n mi 2te banah Pulsar bike leh mobile phone tawh mankhawm in Chassad Police  ah pekhia uhi.

Lawhchinna din pankhawm poimawh- Nehkhogin Kipgen
Imphal, May-4 : USA a Social Scientist Nehkhogin Kipgen tawh tuni in Sadar Hills a Semol Community Hall ah ‘One Day Social Awareness & Open Discussion’ n om hi. Huai hun ah Kuki Community sung ah kuapeuh ki-it leh kingaina tuah dingin ngen a, mikhat kia in lawhchinna ngah theilou a, tua ziakin Kuki te’n nation  bawlkhiakna dingin unity mah poimawh hi’n Nehkhogin Kipgen in gen hi.Kukite education lam ah keniam mahmah a, tua ziakin nu-leh-pa kuapeuh in tate laisimna dia  hasuan din thuhilh hi.  Tua banah Kuki Society apan hamphatna bang ka ngah thei ding a, chi zawlou in Kuki namte masawn theihna dingin bang ka hihthei a chichiat leng naktak a masawn ding hi’n  gen hi(UNA).

Khawsung mipi in mi 3 mankhia
Imphal, May-4: Mongsangei Mayai Leikai ah tuni’n galvantawi mi 3 in Manipur Rifles a Jemadar sem huai khawsungmi khat piman(abduct) sawmlai khawsung mipi in pummat in Singjamei Police Station ah pekhia uhi.  Thusuakin a gendan in  double barrel thau tawi 3 in tuni sunning dak 2.00 velin  Jemadar Akoijam Sashikumar inn a valut in pikhiak sawm mahle uh lawhsam in kap sawm uh a, huai husa zakha khawsung mipi hon in kidelh huan in mi 3te pummat in soisa uh a, huaizawh in Singjamei Police ah pekhia uh chihthu om hi. Huai mi 3te Loitongbam Ranjan (38) s/o Raghu of Chingtham Leikai Lairembi Maning, Thangjam Sunil (36) s/o  Kullabidhu of  Heirangoithong leh Maibam Ranbir (37) of Heirangoithong Yanglem Leirak hi uh a,amau  silver colour Verna car leh Santro Car zang uh a, mi 3te laka Loitongbam Ranjan leh  Thangjam Sunil bel  UNLF cadre-lui hi un kigen a, Ranjan tulelin  16 AR post at Yaingangpokpi a 16-A/R post a om hi’n kigen hi. Amau Sashikumar bangziaka thahsawm uhiam chih theihchet hinailou a, Police te’n mi 3te tuanna gari-te kem uhi.

A/R te’n medical camp nei uh
Imphal, May-4 : 28-Sector Assam Rifles nuai a om 3-Assam Rifles te’n tuni’n  Chandel District sung Sehlon mun ah ‘Hygiene & Sanitation Awareness Programme’ tawh kithuah in medical camp nei uhi. Hiai hun ah mipite lakah Bio-Waste tawh kisai telin kim leh kiang banah mahni kihih siangthoudan  ding   sinsakna  uh a, damlou tamtak en in damdawi leng a thawn in hawmkhia  uhi. Huai hun ah Assam Rifles a Medical Officer-te leh nurse-te ahunkhop in damloute en uh a,  khawsung mipite kipak mahmah uhi.

Gamvak 2te laka khat hongtung: 1 gamlak ah 1 pen omlai
Behiang area a thuthang SP/CCpur in hilhchian
Sabeng akuante laka khat Khamkhanlal
Lamka, May-3: Singngat sub-divn sunga  Lunzang village leh Hiangtam(K) kikalah April 29, 2014 akipan sabeng akuan gamvak 2te a tanchin uh  zak a omlouh banah thil omdan a innkuante un a suisui chiang un  Assam Rifles te’ kaplup hiding a ginthu gen uh a,  Singngat PS ah FIR tanpha registered sawm uh ahihdan zan in News-te theisak uhi. Hibang kal ah gamvak 2te laka tel Khamkhanlal (37) s/o Khamzakhup  of  Belpuan village,tulela Mission Veng a om,  tuni’n Lamka hongtung a, Mangmuanlian (35) s/o (late) Goukholian  of Hiangtam (K)  pen  gamlak ah sabeng a omlai hi’n gen hi.Hiai tawh kisai a thuthang om vengvung tungtang SP/CCpur in hilhchian hi,
    
K.Kabib, IPS, SP/CCpur in tuni sunnung 4:00 in ama’ office chamber ah Press-te kimuhpih in Singngat sub-divn. sunga Behiang area a thuzuau kithehzak ziaka  mipi buaina tawh kisai hilhchian in thudik hilou, gamlaka sabeng  akuante damtaka om uh ahihdan taklang hi.Sabeng akuante laka tel Kamkhanlal (45) s/o (late) Khamzakhup of Belpuan village, tulela Mission Veng a om,tuni’n damtakin Lamka hongtung a, amah leng thudot ding a kem uh hi’n gen hi.
    
SP/CCpur in a gendan in khawpi sungah zuauthu(rumour) kithehzak hat in mipi hihbuai zou mahmah a, maban ah leng zuau thuthang  ziakin buaina thupisem tuahtheih ahihziak in kuapeuh in zuauthu thehzak nawnlou ding leh kuapeuh in sabet(hunting) tawpsan  dingin ngen a, i gamsung ua gamsa omte thatvek lehang tunung a khangsawnte’n mukhalou in a thu kia a kitheilel ding hi’n gen hi. Behiang area a zuauthu leng  ziakin Singngat MLA in leng thil omdang kan hi’n gen hi.Behiang area ah Addl SP leh SDPO/CCpur hawhna ziak leng official thil, mipi theihding a genkhiak chi hilou chi’n gen hi. SP in agenna ah April 29, 2014 in Kamkhanlal (45) s/o (late) Khamzakhup of Belpuan village leh a lawmpa Mangmuanlian (35) s/o (late) Goukholian  of Hiangtam (K) tulela Singngat khua a om gamlak a sabeng dingin kuan uh a, Lunzang khua a giak in April 30, 2014 in gamlak ah lut uh a, huai ni in zawng(mongkey) 1 man uh a, zan (May 2) in sakhi 1 man uh hi’n gen hi. Sakhi’ lu leng Behiang khua ah atang ding pen pia in Kamkhanlal in a sa mat teng utawh Lamka hongzuan a, Police te’n thudot dinga kem hi’n gen hi. Behiang area a gamvak  2te Army te’n kaplum kha chi a thuthang kanchian dingin zan nitak mah in Singngat khua delhtou uh hi’n gen a, Behiang khua a om army-te leng thuzakin gamvak mi 2 kaplup a omlou ahihdan leh thuzuau kithehzak ahihdan theihkhiak hi’n gen hi. Kamkhanlal’ in sa hongpuak teng Forest Act,1972 dungzui in forest deptt  ah piakkhiak hidingin gen hi.
    
Kamkhanlal in agenna ah tuzing dak 4:30 velin Behiang apan Lamka hongzuan a, a lawmpa Mangmuanlian bel gamlak ah sabeng in omlai a, midang tellou in amau 2 kia gamlak ah sabeng a om uh hi’n gen hi.

Lelte Awards 2014 hawmkhiakna om
Lamka, May-3: Mizoram a Music Awards lianpen hi a kigen ‘Lelte Music Awards 2014’ kichi May 1, 2014 nitakin Aizawl a Vanapa Hall  ah hawmkhiak hi a, Chief Guest in Lalsawta, Finance Minister in pang hi. Huai ah Guest of Honour in CT Zakhuma, Chairman, Aizawl Municipal Council leh Chief Host in Micky Chhangte & Sangteii Chhakchhuak pang uhi.Lamka akipan Mwanlal Tunglut leh Janet L. Varte in ‘Chibil Award’ category ah award sang uhi. Huai ah  category tuamtuam  20 vela kikhen Award hawmkhiak hi  a, mi tuamtuam 22 piak hi uhi. Chibil Award 2014 piaka omte bel (a) Jenet Varte (Hmar Community) Rengkai, Ccpur, (b) J.Ruby (Mara Community) Saiha Meisatla, (c) Hmangaihsangi (Lai Community) Lawngtlai,  (d) Muanlal Tunglut (Paite Community) New Lamka hi uhi.  Thudang kizadan in  Zomi Artistes Association(ZAA) makaihna in Zosuante laka Lamka lam mi Lelte Musical Award 2014 vasang Mwanlal Tunglut leh Miss Janet Varte thupitakin vaidawnna neih hiding in puang uh a,  kuapeuh in huaihun uap dingin  ZAA in chialna bawl hi. May 4, 2014(Sunday) sunnung dak 1.00 in Hebron PCO, New Lamka ah kingakkhawm hiding chi’n  ZAA thusuakin gen hi.

Essay Writing Competition om
Lamka, May-3: Rengkai Hr Sec School ah tuni’n Hmar Students’ Assn(HSA) CCpur Joint HQ saina in Essay Writing Competition om a, Nathan Sanate, President HSA Hmar Veng Unit in hongkhia in HSA member tamtak tel uhi. Class IX-X student-te’ ading in ‘Mobile Phone boon or bane’ chih pansan in mi 67 in essay writing competition nei uh a, class XI-XII student te’ ading ‘Character is the crown in life’ chih pansan in mi 25 tel uhi. 1st in kipahman Rs.3500 + certificate, 2nd in Rs.2500 + certificate leh 3rd in Rs.1500 + certificate ngah ding uh a, tunung sawtlou in kipahman  hawmkhiat hidin kigen hi. Competition ah school tuamtuam-Young Leaners’ school; V.K Tawna College; Sielmat Christian Hr Sec school; Bethany Christian college; Don Bosco Hr Sec school; Mt Carmel school; Rengkai Hr Sec school; Stephen H/S; Happy Heart school, Vision Academy leh AG H/S apan student tamtak tel uhi.

BA 1st class 1st position in zou
Lamka, May-3: India President Pranab Mukherjee in Sept 29, 2014 a Manipur University a Convocation a uap ni in Miss Kimneivah Chongloi(24) d/o Elder Lamkhopao Chongloi of  Bijang, Ccpur kiangah Gold Medal Award pia hi. Aman Manipur University nuaia G.P Women’s College apan 1st class leh 1st position in BA(Home Science Hons) in zoukhia  hi. St. Mary’s High School Tuibuong apan 1st division in Class-X zou a, Sielmat Christian Hr Sec School apan 1st divn in Class-XII zou hi.

Security-te Gari kepsak phatuam
Lamka, May-3:District Hospital a duty security-te mawhpuakna a om gari-te azia om deuh hi’n kigen hi. Hospital a zan giak dingte’n  nitak dak 9.00 tan in Hospital a duty Security-te akipan coupon la in Gari amau garage ah chabi kalhkhum uh a, zingkal a lak ut hun in coupon vapia in gari lakkhiak theih hi’n thutut kingah hi.

Car leh bike kiphukha: 2 liam
Lamka, May-3:Tuni zinglam  dak 9:30 velin Lamka lam zuan Astar car (No. MN 01S-1242) leh Lamka apan Molnom zuan R-Bajaj (No. MNE-1386) Khawmoi khua ah kiphutuah kha uh a, bike atuang mi 2 liam uhi. Bike driver Lelen(26) s/o (late) Pauhen of Saihumjang a khabe leh a taklam pheipi bul nasa in hospital ah om a, bike nunga tuang Lalpu (35) s/o Helmang of Changsang, Sadar Hills liamzek mahleh Hospital ah admit ngai hiallou hi. Bike atuang mi 2 te bel Mobile kisia bawlsak zou innlam zuan uh hi’n kigen hi. R-Bajaj mailam naktakin kisia a, Astar car leng driver tutna mailak glass kisia in a mailam pei(tyre) tunglak kisia hi. Gari 2 te Police te’n la in Police Station ah koih uh a,gari kiphukhate kihoulem uh hi’n kigen hi.

COPS  makai thak guang
Lamka, May-3: Civil Officer Pensioners’ Society(COPS) makai dinga telching Executive Member te’n April 30, 2014 in kum 2014-2017 sung vaipaw ding officer bearer guang uh a, President in H. Nengsong; Vice President in Chinkhokam Hangshing; Secretary in S. Vungsing; Fin Secy in K Lianvel; Exe. Member in LT Juan Tonsing, L. Thanngur, Ginvum Ngaihte, Lalhmachhuana  leh L. Ginkhozam guang uhi.

Full fledged DAG in sem ding
Lamka, May-3: Hautinlal Suantak, IAAS s/o S Minlianthang Vaiphei, IAS in Mizoram DAG (adhoc) hun bangtan hiam asepnung in full fledged DAG dingin CAG Delhi in order suah chihthu kiza hi.

Paina ding theilou Tongthang mukhia
Lamka, May-3: Kum 80 vel dinga gintak Tongthang of Gamphajol  tuni’n New Lamka ah lamhaih in gammang a, a innkuante leh a tunna mun diktak gen theilou in New Lamka Vengnuam (S) a Pethuel biakinn kiangah pawlkhat in mukhia in kem uh a, a heikhate’n # 8794202455 contact theih ding hi’n kigen hi.

Singda Dam ah ni 10 lel daih ding tui om
Vuah tamdeuh a zuk baih ginhuailou
Imphal, May-3: Manipur ah tulai in vuah tamloulou in zu mahleh tui haksatna kiamsak ding khop vuahtui kiching a zuk baih gintak hiailou hi’n kigen hi. Huchi kalah Imphal area adia tui lakna mun poimawhpen hi a kigen Singda Dam ah tui omzah nasatakin a level kiamsuk a, huai a tui om in ni 10 sung lel daih ding hi’n kigen hi. Zan zinglam dak 8.00 velin PHED official te’n Singda Dam a tui omzah a etkhiakna uah 881.61 million cubic meters om hi’n gen uhi. Tuni zingsang in vuah tamlou zu mahleh tuni zingsang in huai Dam a tui omzah  881.37 million cubic meters lel hi’n official te’n gen uh a, zan a khawlumdan 31.00 degree Celsius a tun ziakin Singda a tui level kiam nasadeuh hi’n kigen hi.

Observer si’ innkuante Rs. 35 lakh pe ding
ECI apan phalna kingak lai –CEO
Imphal, May-3: Inner Manipur Lok Sabha seat adia General Observer Chandrabhanu,IAS(UP cadre) leh Observer dang 2 in Moreh apan Imphal zuanlai heart attack  ziakin Chandrabhanu heart attack in si a,Manipur govt in a innkuante kiang ah ex-gratia Rs. 35 lakh sawm in Election Commission(ECI) ah report piak hi a, dawnna ngak a omlel lai hi’n CEO Manipur O. Nabakishore in gen hi. Manipur govt in ex-gratia Rs. 35 lakh piak a sawm pen tunung in Centre ah re-imburse thei ding hi’n leng kigen hi.

Florence Nightingle Award sang ding
Imphal, May-3: Govt of India nuaia Ministry of Health & Family Welfare in Florence Nightingle Award sang dingin Chongnu Kom of Lower Kom Keirap, Loktak Project, CCpur  district tulela Primary Health Centre, Leimaram  a nurse sem telkhia hi’n kigen hi.  Florence Nightingle Award  ah Rs 50,000 leh Medal banah Citation tawh kithuah hi a, May 12, 2014 in New Delhi a Rastrapati Bhavan ah India President in pekhe ding hi.

SSPP Olympic opening ceremony
Imphal, May-3: Siamsinpawlpi (SSPP) Imphal Block saina in May 5, 2014 zinglam dak 10:30 in National Games Village Zone II ground ah SSPP Imphal Block Olympic 2014 Opening Ceremony om ding hi. Huai ah T Mangminthang, IPS, Director Indian Postal Service, Manipur region khuallian a pang in Olympic honna nei ding hi.

Feet 30 a thuk ah naupang kia
Guwahati, May-3: Assam khawpi Guwahati a Hatigarh Chariali area ah tunitak lamin kum 2 leh a kim a upa naupang khat feet 30 a thuk well sungah kia a, amah ahihleh Afirul Islam hi’n kigen hi. Thusuak kingahdanin, Islam ahihleh construction site a kimawl a om lai a, well sungah talkhe kha chi uhi. Hiai thu sut ahihtan in fire brigade service leh police te’n naupang hutkhiak sawmin panla lel ua, pipe tungtawnin oxygen leh apoimawh dangdang guanlut in om a, tuikawm ah naupang a nak theihna ding ngaihtuah hilel chi uhi. Afirul Islam pianna pa’n agendanin, well bul a om construction site neitupa kiangah hiai well thuktak om pe’n atuamna/a tung siin bawlding in tamvei tak ngenta ahihdan gen chi uhi.

RIMS Director in news report nial
Imphal, May-3: RIMS a Director Dr Sekharjit in a dinmun a nutsiat tawh kisai suspension ziak hidan a newspaper a kisuah  tuni’n  ama office ah  hilhchetna bawl a, tuabang om hileh Ministry of Health & Family Welfare in leng thiltunma in theisak ding chi hi.  Ministry of Health & FW in adinmun apan  paihkhiak theihna ding leh Director a midang koih theihna din thuneihna neilou a, Department of Personnel Training and Appointment of Cabinet Committee lemsakna poimawh masa zaw hi’n gen hi. Thuzuau thehzak a om  poi a sakdan genkawm in RIMS Hospital nasepna tanpha huai thu in hihbuai hi’n gen a, adinmun kum 5 bei ding kuana thiltung ahihman in puaknat thu gen hi.  Aman a genzelna ah Director  hihna a let touh ding deihlou pawlte panlakna hi a gen in  RIMS  Director a sep nawnlouhna dinga panla om hiding chi hi.

Rs 2 lakh a tan di’n theisak
Imphal, May-3: Meltheihlouh pawlin April 25 in Uchiwa ah Th Sunita (33) w/o Hemanta leh a tapa  Th Sanamatum(7) pimang uh a, Rs. 2 lakh a tankhe din a innkuante theisak uhi. A tapa Th Sanamatum  bel Uchiwa H/S a Class 1 sim hi’n kigen hi.  Nupi leh a tapa naupang pimangte  mawhpaihna in Uchiwa khawmite tuni’n kiphin uh a,  damtak a nutate’ khahkhe din ngen uhi. Hemanta gendanin azi in school ah a tapa uh pi dingin April 25 in kuan a, himahleh tungkik nawnlou chi hi.  Nutate zonga mun tuamtuam a thuzak hangin bangmah theizou tuanlou a, April 27 in meltheihlouhte’n mobile a houpih in amaute khahkhiakna di’n Rs 2 lakh ngen uh chi hi.  Loubawl a nasem in sum huaizah neilou ahihdan gen a, damtak a khahkhe dingin ngen hi.

IM dia gintak-te’n driver soisa
Imphal, May-3: NSCN (IM) cadre hidia gintak mi 5 in zanhal masa in Karong Bridge, Senapati district ah Tata Winger   driver W Romesh (24) s/o Ranjit of Yumnam Patlou soisa uhi. Manipur Press Club ah News saite kiang Romesh in agenna ah JNV Maram student bangzah hiamte tawh Imphal hong zuanlai  Santro Car(No. NL 07/4440) a tuang pasal 5 te’n side pelou chi a ngawh in man uh a, Senapati District Hospital ah chiangpum zangin soisa uh hi’n gen hi. Huaizawh in handyman kiangah Rs 10,000 pe dingin theisak uh a, Senapati Police Station ah huaini mah in mi 5 te’n complaint bawl uh hi’n en hi. State govt in kintak a mi 5te  mankhe dingin Romesh in ngen hi.