Lok Sabha election 2014 paizom zel:
Phase 7na adia Lok Sabha election campaign hun bei
New Delhi ,April-28: Lok Sabha seat 543 adingin April 7,2014 akipan May 12, 2014 kikal in phase 9 om ding election paizel a,huai election a  phase 7na dingin April 30, 2014 in  state tuamtuam 7 leh UT 2  a Lok Sabha seat 89 ah election om ding a,  tua ding tawh kisai in tuni’n election adia vote campaign hun bei hi.April 30 a Lok Sabha election phase 7na zawh in May 7 leh May 12, 2014 in election omlai dsing a, huaipen  election 2014 zawh siangna hita ding chih ahi hi.
    
Tutung a 7th phase election omna  ding state 7-te ahihleh Gujarat a Lok Sabha seat 26, Andhra Pradesh state ah seat 17, Bihar ah seat 7, Punjab ah seat 13, Uttar Pradesh ah seat 14, West Bengal ah seat 9 banah Jammu & Kashmir, Dadra and Nagar Haveli banah  Daman and Diu ah seat khat chiat ah  om ding hi. Election omna dfing Lok Sabha seat 89 om teng ah voter te’n Electronic Voting Machine (EVM) tungtawn in vote kheding uh chi’n ECI thusuak in gen hi.

Electric khuam(tower) kipukte tunitan bawl hinailou
Kangvai leh Torbung bungalow kalah electric tower 3 kipuk
Lamka, April-28: Ningthoukhong akipan 100/32-KV Khengjang Power sub-Station a electric(power) supply-na electric gui kingakna akhuam(tower) 3 a kipuk ziakin Ccpur district in Kiginni paisa(April 26,2014) akipan in electric meivak ngahlou in tuni ni 3 a chinna hita hi.April 26, 2014 in S. Kotlian khawlsak ah electric tower 2 kipuk a, azing April 27, 2014 in  Torbung khawsak ah electric tower dang khat kipuk hi’n thutut kingah hi.  Tuni’n Imphal akipan Transmission divn nuaia Section Officer 1 leh Lineman 2 in thil omdan hong enkhia uh a, Tower kipuksia 3te bawlna ding vanzat leng zonkhawm ngai masa ding hi’n gen uh a, nasep pat hun ding genchian theilou uh hi’n kigen hi.
    
Kangvai leh Torbung bungalow kikal a electric tower 3 kipukte huihnung in a mutpuk hilou in khual a frame kithuah sik(iron kithuah)te akilakkhiak ziakin a khuam ding zoulou a kipuk hi’n mit a muchiante’n gen uhi. Huihpi hat ziaka kipuk hileh tower dangte leng kipuk ding hi’n gen uhi. Department in tuni a enkhe pan uh ahihman in April 29, 2014 in leng nasep a pat theih uh gintak haksa mahmah hi’n kigen hi.
    
Sugnu lam akipan in Lamka lam ah electric(power) piak theih ahih lebel azia om ding a, ni tamlou sungin Lamka areas ah electric meivak paithei ding a gintak hi a, hileleng electric tower kipukte’n 33/11-KV Moirang feeder leh 11-KV Kangvai feeder a electric gui kikhungte a delhkhak ziakin huai feeder 2te ah bel chik chiang in electric power a muthei ding uhiam chih genchet haksa mahmah lai dinmun hi’n kigen hi.

Mi  90,000 valte’ adia nek ding kidaihlou
Lamka,April-28: Dist.Agri office/CCpur te’n kum 2013-14 in district sung a tuilou leh singtanglou (wet paddy & jhuming cultivation) a buh-le-bal piangzah a lakkhawm uh zou uh a, tuilou  hactares 7500 alian a buh chiinna apan  buh hum matric tones 32250 piang a, singtanglou hactares 12500 alian ah buhhum matric tones 16250 piang hi’n suikhia uhi. Tuilou leh singtanglou kigawm hactares  20000 alian ah buhhum  matric tones 48500 piang a, buhhum teng antang hileh matric tones 32,333 phazou ding a, kg.dana hisap in kg 3,23,33,000 pha ding hi’n kigen hi.
    
Kum 2013-14 a buh piangkhezah apan tuat in  mi khatin kum 1  in antang kg 183 kham bangin hisap hileh CCpur dist a  puhpiang teng mi 1,76,683 lelin kum 1 sung nethei phet ding uh chi uhi. Kum 2011 a census dungzui in CCpur dist ah n mihing 2,71,274 om a, huchi hileh buhhum piangkhiateng mi 1,76,683 in kum 1  sung a nekkhop ding ualeh mi 95,435 te’nekding daihzou lou hi’n gen uhi. CCpur district a mihing 97,460 velte’nek ding kidaihlouh ziakin kum 1 sungin mundang apan antang matric tone 17835.18 (kg.1,78,35,180) val laklut ngai din  kigen a, kum 2011  zawh in   mihing kibehlap ding zah theihbut hilou a, akibehlap mihing’ nek ding zah tawh simlel hileh matric tone 20,000 val ding hi’n kigen hi.
    
Huaiban ah kum 2013-14 in vaimin (maize) hactare3240 alian kichinna ah 5,184 matric tone piang a, hactare 140 alian a oil seed kichinna ah 112 matric tone piang hi. Hactare 37 alian a sugarcane(kawltu) kichinna ah 1998 matric tone piang a, hacture 300 alian a pulses kichinna ah 360 matric tone piang hi’n official thusuak kingah hi.
      
Kum 2012 in CCpur dist ah tuilou hactares 1088 aliana a buh chiinna lakah buhhum matric tones 3264 piang a, singtanglou hactares 14690 alian ah buhhum matric tones 17554 piang hi.Tuilou leh singtanglou a buhpiang kigawm matric tones 13878.6 pha a,kg.dan a hisap in a,kg 1,38,78,666 pha hi’n kigen hi.

DC/CCpur  in EE/PHED  theisak
Lamka, April-28: Lamka khawpi sung adia tuinek supply-te laka tel Zone-II Bungmual khawsak a intake point a tuilakna mun a pipe lawngsung ah singtum leh cement bag sung a nahpa(leaves) kithundim in  tui paitheilou dinga  hukbing tungtang ah  Dist Admn in poimawh ngaih mahmah a, tuni’n DC/CCpur in EE/PHED kiangah Zone-II a intake point a thil om enzui ding leh  mipi’ tui nekding hihbuaite tungah a poimawh bangin Police a report ding leh FIR gelhlut ding in theisak hi.

Hospital a zatding Ambulance tunbeh
Lamka, April-28: CCpur district Hospital a zat dingin tuni nitaklam dak 4.30 velin  Ambulance 2 hongtung a,  CMO office ah 1 zat hiding a, khat pen Hospital a zat hiding hi.  Huai Ambulance 2-te’  NRHM nuaia hongpai hi a, Dr. P. Shyam Sunder Singh, Med Supt in Imphal a vala hi’n kigen hi.

1st IRB te’n duty pan nawn
Lamka, April-28: DC/CCpur office a 1st IRB duty-te’ tuma in Lok Sabha election duty adia a  kuankhiat nungun  hongtung kimta uh a, tuni pan DC’ office ah duty nawnta uh a,duty a om lel  BSF-te tawh duty khawm uhi.

District Hospital a gari lut leh pawtzah chiamteh uh
Lamka, April-28: District Hospital a duty Police te’n tuni akipan in Hospital campus a lut Gari peuhmah gelhlut in enchian uh a, hospital huangsung a gari kigu sek ziaka  panlakna thak hi’n kigen hi. SP/CCpur apan thupiak dungzui in Police te’n hospital huanga  gari lut teng chiamteh uh a,   a pawtkhiak chiangun leng hoihtaka enchain in  gari neitu min leh  a registration no. lazel uhi. Nitak sawtnungin hospital nasepna hihbuai thei ding hospital  a gari tai tuahte leng  etkai  hiding chi uh a, mipite’n kithuahpih din ngen uhi.

Addl DC/CCpur  in training hong
Lamka, April-28: SSA-RTE/CCpur saina in IB Road a Synod Hall ah tuni’n  ‘3 days refresher training program for selected teachers/instructors of Residential and Non-Residential Training Centers’ kipan a, Maniram Sharma, IAS, Addl DC/CCpur khuallian apang in hong hi. Huai ah Guest of Honour in Mannuamching, MCS, CEO/ADC pang a, Functional President in Lalsanglien, ZEO/DPO, SSA-RTE/CCpur pang hi.
    
Chief Guest in  teacher-te’n  officer ding tamtak bawlkhia uh hi’n gen a,CCpur dist ah khawsakna haksa tamtak leh pianken a vualphaloute teacher te’n hoihtak in  laihilh le uh officer lian hong suak ding uh hi’n gen a, huaidia panla  din teacher-te’ hasuan hi. CEO/CCpur in  teacher-te nam leh gam banah  khawtang kingaknang bawltute hi uh a, a mawhpuakna uh lian petmah hi’n gen hi.

DC makaih Board meeting om ding
Lamka, April-28: DC/CCpur office chamber ah April 29, 2014 zinglam dak 11:30 in ‘Dist Criminal Injuries Relief & Rehabilitation Board’ meeting om ding a, huai ah case 3 genkhawm ding uhi. Huai meeting a tel ding  member-te SP/CCpur, CMO/CCpur, DSWO/CCpur, Secy Action for Women & Child Advacement leh Chinlunthang, Advocate hi  uhi.

HPC(D) om maimai loudin puang
Lamka, April-28:John F. Hmar, Info Secy/HPC(D) in thusuak a bawldan in Mioram Armed Police(MAP) leh Lalhmingthang  Sanate pawl kithutuak in Manipur a Lungthulien khua ah  poi khoihloute tunga khut a khak ban uah mipi giautau takin koih uh a,huai  nam melmate gamtatna hi’n puang uhi.Lam diklou adia panlate ziakin Hmar nam leh HPC(D) buai ngeilou ding a, nam zulhzausante’n nam a zuak ding uh HPC(D) in phal ngeilou ding a,nam in maban liantak neia kal as uanlai in mimal hamphatna ding zonga pawl leh nammin diklou taka zangte’n  lawhchinna tunlou ding uh a,nam adia siatna ding a bawl touh zel uh leng Pathian in phallou ding chi’n taklang uhi.
    Nam itna neuchik leng neilou leh doilok huai taka thilhihte’n sisan leh hinna tamtak senga gam bawlna dia panlakna  hihbuai zoulou ding uh a,Mizoram govt in leng lemna lampi zong lou in Hmar sisan luanna ding zong a pankhawmpih ding azon tawpsan dingin theisak uhi.HPC(D) in Lalhmingthang Sanate leh a pawlte dawhthei takin en sek mahleh nam adia thilpoi a sep zel ding ua leh HPC(D) om maimai nawnlou ding chi’n puang uhi.

Prez in MU Convocation uap ding
Imphal, April-28 : India President Pranab Mukherjee in April 29, 2014 a Manipur a hongphak ding ziakin tulai in Imphal khawpi  le hakim ah security khauh mahmah hi. President in Delhi apan Special Flight zangin sunnung dak 2.40 in Imphal Airport hongtung ding a, huai akipan security khauhtak venbitna nuai ah  Manipur University(MU) zuan ding hi. Aman  MU ah 14th Convocation uap ding a, Parliamentarian Rishang Keishing leh Scholar Laishram Birendrakumar kiangah Ph.D (Honorary) degree peding hi’n kigen hi. Huai hun ah Manipur Governor VK Duggal leh Mu Canchellor leng tel ding uh a, President in MU Centenary Hall leng hong  ding chihthu om hi.

Cabinet in tui tungtang  genkhawm  
Imphal, April-28: CM Cabinet Secretariat ah tuni nitaklam dak 3.00 akipan Cabinet meeting om a, huai ah Manipur a tui haksa tawh kisai govt in panlak pah dinga genkhawm kawm in tui kichinna mun tuamtuam apan tui nawnkham ding dan tanpha genkhawm uh a, nitak dak 8.30 tan meeting uhi.Tuni a Cabinet meeting ah tui haksa tungtang ngaih poimawhpen a nei in panlak ding dan ngentel takin genkhawm uh chih ahi hi. Manipur govt thupuangtu Education,CAF & PD  Minister M. Okendro in a gendan in Manipur ah tunung in hibang khop tui haksatna om nawnlouhna ding in ahun tunma in a poimawh bangbang panlak kholh zel ding in dan(legislation) tanpha bawl dingin Cabinet in thukim uh hi’n gen hi. Khuga Dam leh tui omna mun tuamtuam tui lakhawm in tui haksatna diak munte ah mipi laka hawmkhiak fing tanpha in leng genkhawm uh chih ahi hi.

MP(RS) din Abdul Salam kichiam
Imphal, April-28 : Rajya Sabha Chairman Hamid Ansari in tuni’n  New Delhi ah Rajya Sabha member ding a telching mi 12 te kichiamsak  hi. Huai hun ah Manipur apan Md. Abdul Salam leng tel a, amah Manipur adia Rajya Sabha member 9na hi’n kigen hi. Huai hun ah Inner Manipur apan MP(Lok Sabha)  Dr. Th Meinya in leng uap hi. Md Abdul Salam bel Manipur akipan Rajya Sabha member dingin tuhtu omlou a ching ahi hi.

Kiselbuai ziakin a lawmpa that kha
Imphal, April-28: Bishnupur district sung Kumbi ah zan nitaklam dak 3:00 in N Iboton(51) s/o (late)  Loto leh a lawmpa  Y Babu (60) s/o (late) Ibocha in zu dawnkhawm lai kiselbuai uh a, huai ah Y  Babu in a lawmpa  Iboton that kha hi’n kigen hi. Thusuak a gendan in lawmte 2te’n  nitenga zu dawnkhawm hi uh a, zan in Kumbi a IB Road mun a zu a dawnlai un kiselbuai kha in Y. Babu in Iboton’ lu(head) kongkhak ah tauh a, tuaphet in Iboton lu ah sisan pawt in khua phawklou a om nungin amun ah si chih ahi hi. Y.Babu taimang hi’n kigen  a, thiltung tawh kisai Kumbi police ah report hi a, Kumbi Police te’n  nitak dak 11:30 in Kumbi Bazar ah Y. Babu mankhia uhi.

Nara in Meinya tunga hekna pe ding
Imphal, April-28:Inner Manipur Lok Sabha seat ah CPI leh Secular Alliance candidate  Dr M Nara in Inner Manipur bial ah April 17 a election om ni in Congress candidate Dr Th. Meinya ziakin Khonghampat a Polling Station ah proxy voting tamtak om chih tungtang ah Election Commission of India a hekna(complaint) pelut ding in Delhi tungta a, a lemtan hunhun in ECI kimuhpih ding hi’n gen hi. Dr M. Nara in ECI in Dr Meinya disqualify dingin phut sawm a, election om ni a vote kikhia 90% sanga tamzaw omna EVM teng leng proxy voting ziakin simlouh a koih ding in ECI ah ngetsawm hi’n gen hi. Dr Nara in a gendan in Polling station 102 ah vote kikhia 90% val hi’n gen a, Polling station 26 ah vote khiakzah 95% pha hi’n gen hi.

Viral Load testing koihdin theisak
Imphal, April-28: Manipur High Court in tuni’n HIV/AIDS veite ading  Viral Load Testing Service koih dingin RIMS thupia hi. Huai thu bel  Community Network for Empowerment (CoNE) te tuni’n office ah  press-te kimuhpihna  uh a, huai hun ah Network President RK Nolinikanta  leh Kh. Tarunkumar in a gendan un Appril 6, 2014 in Network ten HIV/AIDS veite ading a ki-test theihna ding RIMS a koih din ngen uh a Manipur High Court in tuni’n  RIMS thuneite kiangah koih dinga thu pia hi’n gen uhi. High Court in kha 3 sung  a koih dingin RIMS thupia uhi. Huai koih ahih  aleh HIV veite ading in sisan ki-test theih gige ding ahih banah treatment tawh kisai ieng masawn leh sawnlouh kithei ding hi’n  Nolikanta in gen hi.

Agri Minister Nasir paihkhiak deih
Imphal, April-28 : Agriculture Minister Abdul Nasir in ZEO/Thoubal semlel David Tualzathang kampau kilawmloutaka kou kawm in nuaisiah takin a maitang ah kou a, huai tawh kisai in ATSUM President Muan Tombing in tuni’n AICC President Mrs Sonia Gandhi kiangah memorandum khak a, Abdul Nasir a dinmun apan paikhe dingin ngen chihthu om  hi. Thusuakin a gendan in Agri Minister Abdul Nasir in phone in David Tualzathang sam a, amah leng Minister quarters ah vahawh a, huai hun ah Minister in  Thoubal ZEO dinga kua’n hong koih hiam ? Bang dia CCpur ZEO lenlou a Thoubal a hongpai na hiam ? chi kawm in Lilong/Thoubal a Leiphrakpam Mamang Leikai Primary School a School Management & Development Committee (SDMC) te ZEO/DPO in approved a bawlsa hi a, huaiziakin ZEO a hihziakin bangmah  khek lamdang theilou ding a, Minister thupiak banga na a nasep ding chi’n gen  chih ahi hi. SSA rule leh guidelines zuilou in Minister thupiak banga a sep ding hi’n leng genkhum chihthu om hi.  Huai tawh kisai in ATSUM in Education Minister Nasir  ahi kei a, tua ziakin huai thu ah a kigolhna ding bangmah a om kei chi uhi. Agri Minister in ZEO a thuhilhna ding bangmah a om kei a, a poimawh aleh Education Minister om chi’n taklang uhi. Abdul Nasir tun a action lak ahihkei leh ATSUM in kiphinna tuamtuam nei ding hidan in leng Muan Tombing in memorandum ah taklang hi.(UNA)