Thoubal a Khebaching ah Khongjom Day zatna om
Imphal, April-23: Thoubal district sung Khebaching a Khongjom War Memorial ah tuni’n Manipur govt in inntekna in Khongjom Day zat hi a, huai ah Chief Minister O. Ibobi makaihna in Manipur mipite’n Khongjom mun ah April 23, 1891 a British sepaihte tawh kihouna ah Manipur gam humbitna dinga hinna pia mihangsante zahna pia uhi. Huai ah Manipur Rifles contingent khat in Manipur mihangsante zahna in Guard of Honour, General Salute, Reverse arms, Sounding of Last Post, 2 minutes silence,Slope arms leh Order of arms lahna nei uhi. CM makaih in Paona Brajabashi lem(statue) ah zahna pak(wreath) piak ahih banah M/R contingent pawlin Salute pia uhi. Huaizawh in Khongjom lui ah tarpon piakna(offering) in zui hi.
Khongjom War Memorial conmplex a mipi kikhawmte ma ah Chief Guest hikawm in Chief Minister O. Ibobi in a thugenna ah i pu leh pate’n Manipur gam humbitna dingin hangsan taka pan alak ziakun eite tuni’n zalenna nei a khawsa thei i hi chi’n gen a, huchih dungzui in banghiam i deih leh poimawh omte ngenthei dinga zalenna nei mah i hi chi’n gen hi.Hileleng i thildeihte ngetna ding in hiamgamna(violence) zanga i gamtat ding uh hilou chi’n leng gen hi.
Huai huna Functional President apang Dy Chief Minister Gaikhangam in a genna ah Khongjom Day i zatna uah eite’n Manipur gam adia hinna pia mihangsante deihdan i theihthak uh poimawh a,huaite i zuih tuankei ua leh tuni a i hunzat uh bukimlou suak ding ahi, chi’n gen hi. I pu leh pate’n i zalenna uh kepbitna din hangsan taka hinna a piak ngam bang un eite leng i kipumkhatna haksaksem dingin i pankhawm gige uh poimawh ahi chi’n gen hi.
Tuni a Khongjom Day zatna ah British te’n Manipur hong opkhum lai ua Political Agent a Manipur a hong om Grimwood innkuante leng UK akipan hongzin in tuni a programmr zatna ah tel uh a, huailou in Minister leh MLA-te banah civil leh police top official-te leh mipi tamtak paikhawm uhi.
STC 58th Annual Assembly neih in om
Lamka, April-23: Simveng a SYO Hall ah tuni in Simte Tribe Council (STC) Annual Assembly 58veina om a, H.Dongzalian Simte 1st Gen Secy , SNC/STC in hong a, Rev S. Kaikhanmang, Director of Mission, NTBCA in thumna in program lan hi. Doukhanmang, Gen Secy STC HQ makaih in mipi’n heutu mualliamsate suunna nei uh a, huai zawh in Presidential speech in zui hi. STC Gen HQ apan Gen Secy & Finance report om a, STC block 3 leh Unit 29 apan ban ah Simte Literature Society, Gen HQ;Simte Youth Orgn Gen HQ leh Khangthah Zuun Pawl Gen HQ apan report ngaikhia uhi. STC Gen HQ in June 12, 1013-April 21, 2014 sung in Rs. 1,17,750/-mukhia uh a, huai sungmah in Rs1,32,141/- zangbei in opening balance ah Rs 66,698/- nei uh a, closing balance Rs 52,307/- nei lai uhi. Sunnung in Business Session nei uh a, agenda 10 genkhawm in huai lakah agenda 6 apan resolution bawl uhi. Assembly resolutionte - 1) 2016 in STC Gen HQ kum 60 chinna Jubilee zatding, 2) SYO Hall pen Simte Innpi chi a zat ding, 3) Simte Puanlaisan/Puandum leh Simte Khangthah Puante Pasal silhthawh standard size a bawl a, asaulam 7’, a vailam 4’ ding in lemsa uhi, 4) Sihni, manni leh SYO program ah Simte’ Puandum/Ngong-oh zatding, 5) Namlaam tawh kisai STC program hun ah Simte Puanlaisan/Ngong-oh zatding, 6) KZP leh Khangthah program hun ah Simte Puanlaisan/ Ngong-oh zatding chihte ahi. Huaiban ah SYO Gen HQ in sihni, manni a zatding SYO flag a bawl uh member paikhawm te’n pom (approved) uhi.
Zogal Day kum 95th chinna zang
Lamka, April-23: ‘Zou Sung Siemphatna Saipawl’ inntekna in tuni nitak in Zoveng, Zenhang Lamka ah ‘Zogal Day (1917-1919) kum 95th chinna zang uhi. Huai ah 1917s lai a Zogal Day hun a site leh makai sisate suunna ban ah Zogal Day hun a damlaite’ laphuahte sakna, Pu-pa tawndan lam (culture) ‘Lamtang kaai’ dance in laam uhi.
Zogal Day tawh kisai Thangchinmang in Zogal Day leh Khongjom Day kichi kilamdanna omlou hi’n gen hi. Ipu-Ipa te’n 1917s lai in Bristish te’n Manipur gam hongla ding in Myanmar apan sepaih tamtak tawh hongkuan uh a, General Khongjom makaih in Meitei te’n naktak in dou uh a, Zoute’n leng Singngat sub divn a Mongken, Buksau ban ah Tonjang khua ah Britishte ana dou uh a, Chin-Kuki-Zomi te’n amau omna chiat ah Bristish-te anadou uh hi’n gen hi. Tuni chiang in khangthakte’n Ipu-Ipa tawndan mangngilh phialphial in Zogal Day leng hoihtakin theinawnlou uh a, i culture uh mang hiaihiai hi’n gen hi. Aman agenbehna ah ipu-ipa te’n i gam uah Christian sahkhua honglut ma in Israel’ calendar zui uh a, tuhun a April kha in Abraham maitam kichi kil 4 nei ah buannawi/tungman zang in sum (coin) kibawl 30, sial (mithun) lem buannawi/tungman akibawl 3 leh loukhawhna a kizang ‘tu’ in doimangpa (spirit/gods) ana bia uh a, sun leh zan in zu-le-sa tawh laam in hun anazang uh chi’n gen hi.
Rayburn College a student BA lam in class neilou ding
Lamka, April-23: Manipur Public Service Commission saina in April 24, 2014 in ‘Manipur Civil Services Combined Competitive (Preliminary) Examination, 2014’ om ding ah New Lamka a Rayburn College a teacher/lecturer tamzaw exam ah a telding ziak un BA lam te’n zing an nekma leh an nek zawh a class neihzel pen nei theilou ding uh hi’n thusuak kingah hi.
Awareness Program om ding
Lamka, April-23: Manipur Alliance for Children Rights (MACR),CCpur Chapter saina in M.Ramthar khua ah April 24, 2014 zinglam dak 11:00 in ‘One day awareness program on Integrated Child Development Scheme and other Law Related to Juvenile Rights’ kichi omding hi. Huai ah ‘Gender issues’ pansan in PK Jha, IAS, DC/CCpur in sinsak ding a, ‘Role of Police to look after the implementation of ICDS’ chih pansan in K.Kabib, IPS, SP/CCpur in sinsak ding a, ‘Provision of ICDS’ chih pansan in Memcha, CDPO, ICDS/Tuibuong block leh ‘Early Child Care and Education’ chih pansan in L.Pishak Singh, Exe. Director , New Life Ministry, Bishnupur dist in sinsak ding hi.
Pitek khat muhkhiak in om
Lamka, April-23: Saikot khawlai ah tuni sunnung dak 1:00 vel in pitek kum 80-90 velding ‘khat Siphu’ puan kichi (yellow) puan-ak leh lukhu kituah silh, khekol (madipant) purple teng ban ah Moreh khedap pum (red) bulh 1 kivialleh in nitaklam dak 5:00 vel in Vanlalkham, Football Coach(DYASO) te’ inn ah lut hi. Phatuam ngaite’n panla in nitak dak 8:00 vel in pitek pen ‘Kamsuanniang’ of Kanan, Nghathal ahihdan theihkhiak in om hi. Vanlalkham innkuante’n pitek pen amin, a omna dongzel mahle uh gen utlou a, a upat takziak in houpih haksa mahmah hi’n kigen hi. Inn neite’n pitek pen an hoihtak in nesak uh a, ORS tui leng dawnsak in kem uhi. Inn neite leh innkim-innkiangte’n houpih zel uh a, agen khiat sunsun ahihleh ‘Hiangtam’ leh ‘Ngoulun’ chihkia genkhe ut lel hi’n kigen hi.
HYA/Saikot makaite ban ah phatuamngaite’n Philantrophic Orgn tuamtuam thuzak zel uh a, YPA Lamka Unit makaite’n leng Saikot khua pha in pitek enkhia uh a, a mi theikei mahle uh Hiangtam Lamka area ah mukha zel uh hi’n gen uhi. Pitek khat amin gen utlou Saikot khua ah muhkhiat a om chihthu thehzak ahihnung nitak dak 8:00 velin pitek ahihna kitheikhia a, ‘Kamsuanniang’ of Kanan, Nghathal hi’n kigen hi. Kamsuanniang’ tunu Helam in Saikot khua a Vanlalkham tenna inn apan api (grand mother) a inn uh Kanan Veng, Ngathal ah tonpih hi.
Suunna
Mrs. Khupning (100) m/o Khoching of Zion Veng, New Lamka tuni nitak dak 7:30 velin teknat in si a, April 24, 2014 in YPA Hanmual, New Lamka ah kivui ding hi.
Khawlumdan uang deuhdeuh
Imphal, April-23: Manipur telin Northeast bial ah khawlumdan ngeina sanga sangzaw in uang deuhdeuh hi’n kigen hi.Regional Meteorological Centre, Guwahati akipan thusuak in a gendan in tuni’n Imphal a khawlumpen hun ah 34.9 degree celcius tung a, tuban ni 3 sungin khawlumdan ni 1 zelin 1 degree celcius kibehlap tou zel dinga lam-et hi a, huchi hileh ni 3 sunga khawlum hunpen 37 degree celcius tan tungthei ding hi’n kigen hi. MET thusuak dungzui in June 1, 2014 akipan zuak zu dingin gintak hi a,tulai a khawlumdan uang deuhdeuh banah vuah zuklouh ziakin Manipur gamsung mun tuamtuam ah mipi in tui haksatna tuak uh chih ahi hi.
BJP leh MPP office ah leng kizang
Imphal, April-23: Nityaipat a BJP office ah tuni’n BJP Manipur Unit President Th. Chaoba makaihna in Khongjom Day zang uh a, Manipur humbitna dinga hinna pia mihangsante zahna in pak(wreath) pia uhi. Kum 1891 velin Manipur leng innkuan sungah gam ading khual leh mahni mimal ading khualna lungsim neite kala buaina ziakin British te’n Manipur gam hong lazou uh hi’n gen hi. Tuni a Khongjom Day zatna ah BJP Mahila Morcha makaite banah Cell tuamtuam akipan leader leh party worker-te tel uhi. MPP office ah leng Khongjom Day zatna om a, MPP President N. Sovakiran in hinna pia Manipur mihangsante zahna pia hi.
AIR Imphal Stn ah Director thak
Imphal, April-23: M. Kanan Kumar Singh in apaisa Feb 28, 2014 akipan in All India Radio(AIR),Imphal ah Station Director leh Controlling Officer hihna len chihthu om hi. M. Kanan Kumar Singh bel IP(P)S a Senior Grade Officer hi’n kigen hi.
Chandel dist ah khua 2 ah inn kang
Imphal, April-23: Chandel district HQ kianga khua 2-Natum leh Charangching Khunou ah inn kang om hi’n thusuak in gen hi.Tuni zinglam dak 11.30 velin meikuang ziakin Natum ah bialinn 1 kangtum a, Charangching Khunou ah innkang a meikuang ziakin mi 1 liam a, a sapum liamdan 23% hi a, Imphal a Private Hospital ah etkol a om hi’n kigen hi.Chandel leh Imphal akipan in Fire Tender te’n a kidelhhuan ban uah Assam Rifles leh mipite panlakna ziakin sunning dak 2.00 in meikuang phelhmit zawh hi’n kigen a, biakinn leh innkang ziaka kangtum teng Rs. 85 lakh vel hidan in kigen hi.
Blood Donation Camp om
Imphal, April-23: Lion Club of Imphal Greater banah Association of Volunteer, Voluntary Blood Doners Manipur/Thoubal Branch pawlin JNIMS a Blood Bank tawh pangkhawmin Khongjom Day tawh kiton in Khongjom War Memorial complex ah tuni’n Blood Donation Camp sai uh a, huai ah phatuamngai mi tuamtuam 130 velin sisan thawhkhawm uhi.
Daklal 48 sung bandh puang
Imphal, April-23: Zeliangrong Students’ Union,Manipur(ZSUM) pawlin Manipur govt in Jiribam a thiltung tawh kisai a panlakdan lungkim huailou chi’n tuni(April 23) zankim akipan in Zeliangrong mite luahna bial teng ah dakkal 48 sung bandh puang uh hi’n kigen hi. Bandh in National project tuamtuam leng huamkha ding hi a genkawm in railway-line nasepna leng huamkha hi’n gen uhi.ZSUM pawlin Addl DC/Jiribam in thupuan a bawl tungtang ah April 13, 2014 a student soisak a omte protection piak ahihlouh ban uah student mi 5 a inn luahna uh a pawlam a kalhkhum a om in petrol buahkhum banah thahsawm a halkhum a om uh hi’n puang uh a,student mi 5te’n a omna inn uh bang(wall) hihsia a suakthei uh hi’n taklang uhi. Huaiziakin Addl DC in govt sik leh tanga muanna omna dia ngetna bawlthei ahihleh bangchidan a huai thiltung tawh kisai hihfel tuanlou hiam chi’n ZSUM in dotna bawl uhi.
