16th  ZYA General Assembly 2014  om
Lamka, April-24: Simveng a SYO Hall ah tuni zinglam  apan  Zomi Youth Assn (ZYA) Gen HQ in‘16th Annual General Assembly, 2014’ nei uh a, Upa T.Ginkhum in thumna in hong hi. Chinsuanthang, Vice President (External) in vaidawnna  thu gen a, huai zawh in ZYA block 13 apan Secy report, Finance Secy, ZYA Gen HQ leh General Secy, ZYA Gen HQ apan report om hi. Finance Secy report dungzui in ZYA Gen HQ in opening balance Rs. 19,047/- nei a, May 2013-March 2014 sung in Annual fund leh membership fee Rs. 8,10,899/- muhkhiak hi a, huai hunsung mah in Rs 7,38,911/- zatbei hi a, closing balance Rs. 71,988/-om hi’n report pia hi. T.Goukhomang, President ,ZYA Gen HQ in a genna ah block-te apan report ding a tawm leh Pathian in honpahpih a, mipi damna pia hizaw chi’n gen hi. ZYA nasep kichi phattuam ngaihna, sihni leh  manni a panpihtu hi a, mite gensiat, simmawh, gim leh tawl ban ah gentheihna tuah ding mah hi’n gen a, huchi hun ah hleng mipi khualna ziakin thuakzou taka panlak ngai chi’n gen hi. ZYA block 13 omlak ah block 8 a office ding MDC te’ tungtawn in nasep pailel hi’n leng gen hi. An huanna din thuk 3 omlou in an-le-meh kihuan theilou a, huai bang in ZYA Gen HQ, block leh unit-te hatsemna din saptuam/church leader, hausa leh Village Authority member te tawh pankhawm  poimawh hi’n gen hi.  Sunnung dak 1.00 in session 2na  kipan a, Speaker apang  V.Zenzathang in makaih in thutuamtuam genkhawm uhi. Huai lakah Zomite’ omna teng ah luidung a ngasa(fish) omte poison leh dynamo zang a matlouh ding chih hi  a, khawpi sunga lui (stream) omte kepbit a, plastic leh niin ahithei tan a paihlouh ding, ZYA block 5 a office ding kilam nailoute leng ZYA Gen HQ in bawhzui dingin thupuk uhi. Dress code tawh kisai nopni, dahni a zatding neih dingin thupuk uh a, ZYA Lamka block leh ZYA Gen HQ in enzui din thupuk uhi. ZYA Gen HQ nuai ah tulel in Constituent body 7 om a, block 13, Unit 104 leh Region 4 om hi’n kigen hi.

ICDS tungtang ah Sensitization Programme om
Lamka, April-24: Tuni’n  M.Ramthar mun a Health Integrated Ministries campus ah ‘One Day Sensitization Programme on Integrated Child Development Scheme and Law related to Juvenile Rights’ kichi om hi. Huai ah PK Jha,IAS, DC/CCpur in ‘Gender Issues’ chih thupi a zangin sinsak a, society hoihna dingin gender tawh kisai ah pasal leh pumei kikim ahihman in numeite tawisangna din women empowerment lam hahbawl ngai hi’n gen a, society sungah numeite leh pasalte’ thilhih theihdan  kibang ahihman in gender tawh kisai ah a niamzaw omlou chi hi.
    
Bal Ram Singh, Addl SP/CCpur in ‘Role of Police to look after the implementation of ICDS’ thupi zangin a sinsakna ah Police te’n ICDS  tungtang ngentel takin enkai uh a, society sunga gamtang khialte’n kibawlhoihna dinga hunhoih aneih ualeh amaute hong hoih theilai uh hi’n gen a, tua tawh kiton in naupang (juvenile) te’n leng thilsual a hih ua leh  dankalh thei uh a, hileleng  amau kibawlhoih theihlai uh chi hi. Aman a genzelna ah naupang kum 18 nuailam peuhmah Juvenile hi ua, amaute’n sualna bawlthei in khawtang leh dinmun leng hih sethei ua, huchibang a gamtangte’ leng etkolna hoihtak piak hile uh a hinkhua hoih nawn thei hi’n gen  hi. Tuni a hoihte leng nidang a hoihlou ngei hikha thei ua, a hoihloute’n leng kibawl hoih theihna nei uh chi hi.
    
L. Pishak Singh, Executive Director, New Life Ministry, Bishnupur  in  ‘Early Child Care and Education’ tungtang a genna ah naupangte aneu uapan itna tawh etkol poimawh in, amaute’n leng haksatna tuamtuam tuak uhhi’n gen a, school akaina tanpha uh etzui poimawh chi hi.  A kum uh dungzui in laizilna ah leng a by-heart theih ding tan uh om a, teacher te’n huaisanga sangzaw leh haksazaw homework a piak uleh amaute adia puakgik guan hiding uh chi hi. Tuamah bangin naupangte’n school a kaina uah puakgik anei uhiam chihte nu-le-pa’n a theihchet ding uh hi’n gen a, naupang chika school kaisak pahlou in, innsung a etkol nunga laizil  theidia alet chiang un school kaisak pat ding hi’n leng gen hi.

District Council  sitting om ding
Lamka, April-24: Tuibuong a District Council Hall ah April 25,2014 zinglam dak 11:30 in MDC tengin Council sitting/ meeting nei ding uh a, ADC member te’n tuma in CEO,ADC/CCpur kianga agenda a piakkhawmte uh genkhawm ding uhi.

World Veterinary Day zat hiding
Lamka, April-24: Joint Director (Vety &AH)/CCpur apan kizadan in ‘World Veterinary Day’ tawh kiton in  April 26, 2014 zinglam dak 8:00  apan sun dak 12:00 sung Tuibuong a Dist Vety. Hospital ah ‘Free Anti-Rabies Vaccination in Dog camp’ om ding a, ui (dog) nei kuapeuh in uihai dalna damdawi in kapsak theih ding hi.

David KC Ngaihte in Lajong FC a teldin  contract signed
Lamka, April-24:  David Khamchinson Ngaihte @ David KC Ngaihte s/o  John K Ngaihte of Bungmual( at present,Imphal)  in Rangdajied FC tawh contract a signed uh April 21, 2014 in bei hi. Royal Wahingdoh FC (Shillong), Salgaocar FC leh Mohammedan Sporting Club te’n amau zom dingin zol uh a, zan nitakin Hotel Centre point, Shillong ah Shillong Lajong FC tawh kum 1(season) khat  sung ading contract signed uhi. Shillong Lajong FC in season pailel ah match khat neilai mahle uh Coach Thangboi Singto in, KC Ngaihte adeih ziakin club dang tawh contract sign manlou dia season beima a contract signed uh hi’n kigen hi. Lajong FC ahihleh Indian Super League(ISL) a team 8 kimawl dingte laka tel uh a, Indian Premier League (Cricket) tawh ki-compete theidia kibawl ISL hi’n leng kigen a, I-League sanga thupizaw din   leng kigen hi.

Hospital ah cash counter zat ding
Lamka, April-24: Med Suptd/Dist Hospital apan thusuak in a gendan in Dist Hospital a OPD registration room ah cash counter kihongthak a, huai ah OPD ticket, admission ticket, investigation challan a beizah sum piaktheih ding hi. Huai ban ah mipi’n wards, OT, Labour room, laboratories (Pathology, Biochemistry & Radiology) ban ah Birth & Death registration mun ah sum pelou ding a theisak kawmin cash counter kia ah pe dingin theisak hi. Birth & Death registration ahihleh working day a OPD hun 10am-1:00 pm sung  hiding hi.

Tuni’n solar battery 3 hongtung
Lamka, April-24: Dist Hospital a electric/power omlouh hun ah    ward tuamtuam a electric power suppy dingin MANIREDA in  Hospital a blood bank tungah solar plate tamtak koih uh a, bloob bank building nungah 25-KV solar Power Plant om hi. Huaite tawh kizopna nei dingin solar battery 120 koih uhi. Aug 25, 2013 nitak  in gutate’n solar power plant luh in battery 3 gukhia  uhi. Huai nungin  Dist Hospital a 25-KV Solar Power Plant ah battery 3 omlou in kizang a, tuni sunnung dak 3:00 velin Imphal akipan  Dist Hospital ading  solar battery 3 puaktung  in om hi. Company-te’n battery 3 a fitzawh hun un zat pah hiding hi.  Solar battery 3 kigu awng hukna ding in deptt te’n n kumlui 2013 in a thak leina ding Rs. 70, 000/-  deposit uh hi’n kigen hi.

IMPHAL NEWS:
President in Ph.D degree pe ding
Imphal, April 24 : India President Pranab Mukherjee in  April 29, 2014 in Manipur hongpha ding a, tuahun in Manipur University a Convocation uap ding hi. India President in Manipur a politician kumlui Chief Minister-lui Rishang Keishing,ex-MP(Rajya Sabha)  leh Manipur Scholar Laishram Birendrakumar Singh kiangah Ph.D (Honorary) degree pia(confer) ding hi’n kigen hi.

Model Code of Conduct khahkol
Imphal, April-24: :Election Commission of India(ECI) in March 5, 2014 in Lok Sabha election om ding a thupuan abawl tawh kiton in Election Model Code of Conduct leng xat kipan hi’n puang a,tuni’n Election Commission on Manipur a CEO office a theihsak dungzui in Model Code of Conduct leng bangtanhiam khahkol hidan in theisak chih ahi hi.   Huai tawh kiton in tuma in Manipur a Minister-te official tour a zinkhiak phallouh chihthu om leng khahkol hi a,tu’n bel state pua ah a zinkhiak theih ding ban uah  deptt a official-te leng samthei ding uh a,meeting leng sam(call) thei ding uhi. Manipur ah April 9 & 17 in Lok Sabha election om khin a, huai result bel May 16, 2014 in kitheichian ding hi.

Bomb koihte mawhpaih in protest
Imphal, April-24: Ukhrul Autonomous District Council (UADC) a Administrative staff te’n  Chief Exe Officer(CEO),ADCC/Ukhrul innkong a bomb koihte mawhpaihna in tuni’n Ukhrul Mini-Secretariat kong ah sit-in-protest tu uhi. Thu kizadan in zan zingsang in envelope a kitun IED bomb khat CEO,Ukhrul ADCC kong ah muhkhiak hi a,huchih lai in CEO semlel Leiyaphy Rita of  Phungreitang West leng Ukhrul a omlou in Imphal ah a om laitak hi’n kigen hi. CEO kia hilou in midang in leng CEO innkong a IED kikoihna ziak bangmah gen ding theilou uh hi’n kigen hi.

Candidate 9318 exam uh
Imphal, April-24 : Manipur Public Service Commission (MPSC) saina in  MCS 17, MPS 20 leh Election Officer 1  lakna dingin  tuni’n Manpur Civil Services Combined Competitive (Preliminary) Examination, 2014 om hi. Huai a tel dingin  candidate 11,983 in application pe mahle uh tuni in exam  centre tuamtuam 24 ah candidate 9318 exam uh hi’n  kigen hi.

Mega Edn. Fest & Career Counselling
Imphal, April-24 : Manipuri Muslim Oline Forum-te saina in  April 26-27, 2014 in DM College of Arts Auditorium ah ‘Mega Education Fest & Career Counselling’ om ding hi. Huai ah Class X leh XII a exam result ngakte ading bikin career counseling om ding a, recource persons in Armstrong Panmei, IAS, Joint Secy. Tribal & Hills Affairs; Khagemba Sanabam, Director, Reliable Hydrotech & Manipur Oxygen Plant Pvt. Ltd; Army Officer Igar; Md. Akbar Khan, Education Secy. HMOF; Dr. Raheijuddin Sheikh, Asst. Professor, DM College of Science leh Dr. Firoj, MO JNIMS pang ding uhi.

Manipur ah tulai in tui haksa
Imphal, April-24:Manipur ah tulaiin vuah a zuklouh banah khawlum ziakin mipi in tui tawh kisai haksatna tuak uh a, adiakin phaijang biala lui tamzaw ah tui tawm mahmah a, khenkhat tuiluang ding leng omlou khop in tuikang hi’n kigen hi.Maban ah ni bangzahhiam sung vuah a zuk tuankei leh Manipur ah tui haksatna thupi semsem lai ding khopa patauh-huai hi’n kigen hi.
    
Adiakin Thoubal district ah tui a tawm ziakin loubawlna mun leh haichi chinna munte ah buh leh haichi piangzah leng nasataka kiamzou hial ding hi’n kigen hi.

ZU in Jiribam dinmun enkhia
Imphal, April-24: Zeliangrong Union(ZU) team khat in  tuni’n Jiribam vapha in huai biala thil omdan enkhia uhi. Zeliangrong Union te’n community leader tuamtuam banah civil society tuamtuam a makaite leng kimuhpih in Jiribam bial thil sousang thei ding bangchidana panlak hoih ding hiam chih genkhawmpih zel uh hi’n kigen hi. ZU teamte’n community tuamtuam kala kigamlatna leh kituahlouhna om theite bangchibanga hih vaiveng theih ding hiam chih suizui deuh uh hi’n leng kigen hi. Amau pawlon Manipur govt in ahun taka panlalou chi a mawhsakhuai sakthu a gen ban uah Tamenglong district sung mun khenkhat ah Police Outpost koih dinga govt a nget uh tutan govt in a pichin tuanlouh tungtang ah leng lungkimhuailou sakthu gen uhi.

Van tuamtuam mei in kangtum
Imphal, April-24: Chandel district ah zan in gamlak a meikang in Charangching Khunkha, Hnatham aleh Panchai village khawmite patau leh lauthong in koih a, Hnatham Baptist Church building sunga mipi kibu a omte  a taikhiak nung zekin huai ziakin leng kangtum hi’n kigen hi. Meikang in khawsung a pehsawn ziakin Charangching Khunkha ah inn khat kangtum a,Hnatham khua ah   Samuel Khumlo(23) in meikuang phelhmit sawmlai a sapum 23% kangliam in  RIMS ah etkol in om hi. Hnatham khua a Fire Service station panpih dingin Imphal akipan Fire Tender 1, 20-Assam Rifles akipan water tankers, Leikun a om  8th M/R leh SP/ Chandel in meikuang omna mun kidelhhuan  uhi. Hnatham village chief WlThungam leh  Pastor Rt Chumboi  in a gendan in meikuang kipatna chiantak gen theikei mahle uh Church cemetery kiang akipan hidia ginthu gen uh a, meikuang ziakin Church building leh  office-cum-store room kangtum a, meikuang phelhmit sawmin hahtakin panlak himahleh van tuamtuam Rs. 85 lakh vel man ding kangtum hi’n gen hi.  Huai bial mipi in Chanel district a Fire station ah vanzat kiching omlouh poisakthu gen uhi.

Naupangte khantouhna dingin teacher-te’ mawhpuakna lian -NCPCR Chairperson
Imphal, April-24:National Commission for Protection of Child Rights (NCPCR)te apan huhna zangin Manipur Commission for Protection of Child Rights (MCPCR) te’n tuni’n Hotel Imphal ah ‘One-day state level Teacher's training program on Child Rights’ sai uhi. Huai ah Chief Guest in  Chairperson of NCPCR  Kaushal Singh pang a, aman a thugenna ah naupangte hinkhua ding bawlna ah teacher-te mawhpuakna lian petmah a, amau khantouhna ding in sinsaktu a pang teacher te’ ah kingakna lianpi om chi’n gen hi. Huailou in teacher-te’n naupangte thil tuamtuam a sinsakte uh theisiam ding a sinsakdan leng a theih uh poimawh chi’n NCPCR Chairperson in gen hi.

NAB ten SP tamtak mukhia
Imphal, April-24 : Narcotics & Border Affairs (NAB) ten April 22, 2014 in Lamphel  a electricity office kiangah Md. Yunus Khan (28) s/o Nijamuddin Khan of Khuminthok Mayai Leikai village apan in damdawi khamtheih SP (Spasmo Proxyvon) tablet 39,800 mukhia uhi.